Ontumwafo ya nyolelwa Aakolossa
4 Ne ooyene, ungaungeni naapika yeni pauyuuki, nomomukalo omwaanawa, mu shi shi kutya nane omu na Omuwa gweni megulu.
2 Dhiginineni okugalikana nokukala mwa tonata, tamu shi ningi mu na olupandu. 3 Pethimbo opo tuu mpoka, tu galikaneneni wo, opo Kalunga e tu egululile omweelo* tu vule okuuvitha oohapu tadhi popi oshiholekwa oshiyapuki kombinga yaKristus, shoka sha tulitha ndje mondholongo, 4 nondi vule oku shi uvitha sha yela nawa, ngaashi ndi na oku shi ninga.
5 Kaleni mu na oondunge, uuna tamu ungaunga naamboka ye li kondje,* mokulongitha ethimbo lyeni nawa.* 6 Oohapu dheni nadhi kale aluhe dhohenda, dha toyala omongwa, opo mu kale mu shi nkene mu na okuyamukula kehe omuntu.
7 Omumwatate omuholike, Tikikus, omuyakuli omudhiginini, nomupiya omukwetu mOmuwa, ote ke mú lombwela ashihe kombinga yandje. 8 Otandi mu tumu kune, opo e mú lombwele kutya otu li po ngiini, noku hekeleke omitima dheni. 9 Ote ya pamwe naOnesimus, omumwatate omuholike nomudhiginini, ngoka a za mokati keni; otaye ke mu lombwela iinima ayihe, mbyoka tayi ningwa huka.
10 Aristarkus, ngoka tu li naye mondholongo, ote mú kundile po, nosho wo Markus, omumwayinagona gwaBarnabas (ngoka mwa lombwelwa mú mu taambe ko, uuna e ya kune), 11 naJesus, ngoka ha ithanwa Justus, gumwe gwomwaamboka ya kenkwa. Mboka oyo owala aalongi pamwe nangame yUukwaniilwa waKalunga, noya ningi onzo yehekeleko enene kungame. 12 Epafras, omupiya gwaKristus Jesus, ngoka a za mokati keni, ote mú kundile po. Oha kala aluhe ta galikana a mana mo omolweni, opo mu kale mwa kola, nokukala mwa tompwa thiluthilu kombinga yiinima ayihe yi na ko nasha nehalo lyaKalunga. 13 Otandi mú lombwele shili kutya oha ningi oonkambadhala dha mana mo omolweni, nomolwamboka ye li muLaodikea nomuHierapolis.
14 Omupangi omuholike, Lukas, nosho wo Demas, otaye mú kundile po wo. 15 Kundilii po aamwatate yomuLaodikea, nomumwameme Nimfas nosho wo egongalo, ndyoka hali gongalele megumbo lye. 16 Uuna ontumwafo ndjika mwe yi leshelwa, ningeni wo omalongekidho, opo yi ka leshelwe egongalo lyomuLaodekia, ne tamu lesha wo ndjoka ya za kuLaodekia. 17 Lombweleni wo Arkippus tamu ti: “Gandja eitulomo kiilonga, mbyoka we yi taamba ko wu li omulanduli gwOmuwa, opo wu vule oku yi gwanitha po.”
18 Ngame Paulus, otandi mú kundile po noohapu, ndhoka nda nyola noshikaha shandje mwene. Inamu dhimbwa kutya ondi li mondholongo. Uuwanawahenda waKalunga nawu kale pamwe nane.