PaLukas

1 Aantu oyendji oya li ya ningi oonkambadhala, ya gongele noya nyole kombinga yiinima ayihe, mbyoka ya ningwa, mbyoka natse wo twa itaala. 2 Shoka ya nyola otashi tsu kumwe naashoka twa uvu kwaamboka ya li po, noya li wo aauvithi yetumwalaka lyaKalunga. 3 Sho nda konakona iinima ayihe mbika nuukeka okuza ketameko, onda tokola ndi yi ku nyolele palandulathano, omusimanekwa Teofilus, 4 opo wu tseye nawanawa kutya iinima ayihe, mbyoka wa longwa, oyi li paushili.

5 Pethimbo lyaHerodes,* omukwaniilwa gwaJudea, opwa li omuyambi gwedhina Sakaria, oshilyo shongundu hayi ithanwa Abia. Omukulukadhi gwe okwa li Elisabet, gwomezimo lyaAron.* 6 Ayehe oya li aayuuki koshipala shaKalunga, nohaya vulika thiluthilu kiipango ayihe yaJehova nokomalombwelo ge agehe. 7 Ihe kaya li ye na okanona, oshoka Elisabet okwa li omuntimbe,* naayehe oya li ya kulupa.

8 Sakaria okwa li ta longo e li omuyambi koshipala shaKalunga, oshoka osha li olufo lwongundu yawo lwokulonga motempeli. 9 Molwaashoka osha li olufo lwe, okwa yi motempeli yaJehova e ta fike* iitsinino ngaashi sha kala hashi ningwa kaayambi, 10 nongundu onene yaantu oya li pondje tayi galikana pethimbo lyetsininoyambo. 11 Opo nduno omuyengeli gwaJehova okwe mu ihololele, a thikama kolulyo lwoshiyambelo, hoka haku fikilwa iitsinino. 12 Sho Sakaria e mu mono, okwa haluka, nokwa li a tila noonkondo. 13 Ihe omuyengeli okwa ti kuye: “Sakaria, ino tila, oshoka omagalikano goye oga uvika kuKalunga, nomukulukadhi gwoye, Elisabet, ota ka vala okanona okamati, nowu na oku ka luka Johannes. 14 Oto ka nyanyukwa nokuligola pombanda, noyendji otaya ka nyanyukwa omolwokuvalwa kwako, 15 oshoka omunona ngoka ota ka kala a simana momeho gaJehova. Ihe ke na nando okunwa omaviinu, nenge oshikunwa kehe hashi kolitha, nota ka udhithwa nombepo ondjapuki, nokuli manga inaa valwa;* 16 nota ka galulila oyana yaIsraeli oyendji kuJehova, Kalunga kawo. 17 Shimwe ishewe, ota ka tetekela Kalunga, e na ombepo nosho wo oonkondo dhaElia, a lundulule omitima dhaasamane* dhi kale ngaashi dhaanona, naamboka ihaaya vulika ote ke ya kwathela ya longe shoka sha uka, opo a longekidhile Jehova oshigwana.”

18 Sakaria okwa ti komuyengeli: “Shoka otashi wapa ngiini, ngele ngame nomukulukadhi gwandje aakokele?” 19 Omuyengeli okwa ti kuye: “Ongame Gabriel, ngoka handi kala aluhe koshipala shaKalunga, nonda tumwa ndi ye, ndi popye nangoye noku ku lombwela onkundana ndjika ombwanawa. 20 Ihe tala, ito ka vula okupopya, sigo oosho iinima ayihe mbika ya ningwa, oshoka ino itaala oohapu dhandje, ndhoka tadhi ka gwanithwa peuthwathimbo lyadho. 21 Pethimbo olyo tuu ndyoka, aantu oya kala pondje ya tegelela Sakaria, noya li ya kumwa, sho a kala mo ethimbo ele motempeli. 22 Sho a zi mo, ka li ta vulu okupopya nayo, noya li taya dhiladhila kutya okwa mona emoniko motempeli. Okwa kala ta udhike, ihe ka li ta popi. 23 Sho omasiku ge gokulonga motempeli* ga pu ko, okwa shuna kegumbo.

24 Konima yomasiku gontumba omukulukadhi gwe Elisabet okwa ningi etegelelo, nokwa kala megumbo uule woomwedhi ntano ihaa zi mo, ta ti: 25 “Shika osho Jehova a ningila ndje. Okwa sile ndje ohenda, opo kaandi kale nda dhinika kaantu.”

26 Sho etegelelo lyaElisabet li na oomwedhi hamano, omuyengeli Gabriel okwa tumwa kuKalunga, a ye koshilando shomuGalilea, shedhina Nasaret, 27 komukadhona gwedhina Maria, ngoka a li a yalekwa komulumentu gwedhina Josef, gwomezimo lyaDavid. 28 Sho omuyengeli e ya kuye, okwa ti: “Ombili nayi kale nangoye; Jehova okwe ku hokwa noonkondo, noku li pamwe nangoye.” 29 Oohapu ndhoka odhe mu halutha, nokwa li ta kambadhala okuuva ko kutya otadhi ti shike. 30 Onkee ano omuyengeli okwa ti kuye: “Maria, ino tila, oshoka Kalunga okwe ku hokwa. 31 Tala, oto ka ninga etegelelo, noto ka vala okanona okamati, nowu na oku ka luka Jesus. 32 Ota ka kala a tumbala, nota ka ithanwa Omuna gwOmukombandambanda, na Jehova Kalunga ote ke mu ninga Omukwaniilwa ngaashi he David. 33 Ota ka pangela e li Omukwaniilwa mezimo lyaJakob sigo aluhe, nUukwaniilwa we itawu ka hula po.”

34 Ihe Maria okwa ti komuyengeli: “Shika otashi wapa ngiini, ngele inandi ya nando onale momilalo nomulumentu?” 35 Opo nduno omuyengeli okwe mu yamukula ta ti: “Ombepo ondjapuki otayi ke ya kombanda yoye, noonkondo dhOmukombandambanda otadhi ke ku siikila. Onkee ano ngoka ta ka valwa ota ka ithanwa omuyapuki, Omuna gwaKalunga. 36 Tala, Elisabet, omukwanezimo gwoye, ngoka haku tiwa iha mono aanona, okwa ninga wo etegelelo muukulupe we, noli na oomwedhi hamano ngashingeyi; 37 oshoka Kalunga iha nyengwa kusha.” 38 Opo ihe Maria okwa ti: “Tala, ngame omupiya omukadhona gwaJehova. Nandi ningilwe ngaashi wa popi.” Opo nduno omuyengeli okwa zi po puye.

39 Konima yaashoka, Maria okwa yi nziya koshitopolwa shokoondundu, koshilando shomuJuda, 40 nokwa yi megumbo lyaSakaria e ta popitha Elisabet. 41 Sho Elisabet a uvu Maria te mu popitha, okanona, hoka ke li mela lye, oka nyulukuta, na Elisabet okwa udhithwa nombepo ondjapuki, 42 nokwa igidha mokule ta ti: “Owa lalekwa nuuyamba mokati kaakiintu, nokanona, hoka to ka vala, naka yambekwe. 43 Oshi li uuthembahenda kungame, sho yina yOmuwa gwandje e ya okutalela ndje po; 44 oshoka tala, sho nda uvu to popitha ndje, okanona, hoka ke li mela lyandje, oka nyulukuta kenyanyu. 45 Omukiintu ngoka wo a itaala iinima mbika ota ka kala a nyanyukwa, oshoka Jehova ota ka gwanitha po iinima ayihe mbyoka e mu uvanekela.”

46 Opo nduno Maria okwa ti: “Omwenyo gwandje* otagu hambelele Jehova; 47 nomutima gwandje otagu nyanyukilwa Kalunga, Omuhupithi gwandje, 48 molwaashoka okwa dhimbulukwa omupiya gwe omukadhona, ngoka e li omuntu gwowala; oshoka tala, okuza ngashingeyi, omapipi agehe otaga ka ithana ndje omunelago, 49 oshoka Omunankondo okwa ningila ndje iinima iinene, nedhina lye eyapuki, 50 nota sile ohenda ayehe, mboka haye mu tila okuza kepipi nepipi. 51 Okwa longo iilongankondo noshikaha she; ota ka halakanitha po mboka aainenepeki, omolwomalalakano ngoka ge li momitima dhawo. 52 Okwa kutha ko aalumentu aanankondo kiipangelapundi, nokwa nenepeke aantu, mboka aaishonopeki. 53 Mboka ya sa ondjala okwe ya kutitha thiluthilu nuuwanawa, nokwa tidha po mboka aayamba ye li iikaha yowala. 54 Mokudhimbulukwa ohenda ye yaaluhe, okwe ya okukwathela omupiya gwe Israeli, 55 ngaashi owala a lombwelele ootatekulululwa nosho wo Abraham noluvalo lwe.”* 56 Maria okwa menekele* puElisabet uule woomwedhi ndatu lwaampono, nokonima okwa shuna kaandjawo.

57 Sho ethimbo lyaElisabet lyokupulumutha lya thiki, okwa mono okanona okamati. 58 Opo nduno sho aashiinda nosho wo aakwanezimo ye ya uvu nkene Jehova e mu ulukila esilohenda enene li thike mpono, oya nyanyukwa pamwe naye. 59 Mesiku etihetatu, oye ya okukenka okahanona, noya li ya hala oku ka lukila he, Sakaria. 60 Ihe yina yokanona okwa yamukula a ti: “Aawe, otaka lukwa Johannes.” 61 Opo nduno oya ti kuye: “Maakwanezimo yoye kamu na nando omuntu gumwe e na edhina lya tya ngawo.” 62 Opo ihe oya pula he yokanona taya udhike kutya okwa hala oku ka luka lye. 63 Onkee ano okwe ya pula okapelende e ta nyola ko kutya: “Edhina lyako oJohannes.” Ayehe, mboka ya li po, oya li ya kumwa. 64 Opo ihe nziya, okana ke oka makuka, nelaka lye olya manguluka e ta tameke okupopya, ta hambelele Kalunga. 65 Aashiinda ayehe oya li ya tila, naantu yomoshitopolwa ashihe shokoondundu shomuJudea oya tameke okupopya kombinga yasho. 66 Ayehe mboka ye shi uvu oya ipopile momitima dhawo taya ti: “Okahanona hano otaka ka kala omuntu a tya ngiini?” Oya ipopile ngawo, oshoka eke lyaJehova olya li lela kombanda yako.

67 Opo nduno he Sakaria okwa udhithwa nombepo ondjapuki, nokwa hunganeke, ta ti: 68 “Jehova na hambelelwe, Kalunga kaIsraeli, molwaashoka okwa kenukile oshigwana she, nokwe shi etela ehupitho. 69 Okwe tu pa omuhupithi omunankondo* a zi mezimo lyaDavid omupiya gwaKalunga, 70 ngaashi owala a popi okupitila maahunganeki ye aayapuki yopethimbo lyonale. 71 Okwe tu uvanekela e tu hupithe kaatondi yetu ayehe. 72 Ote ke tu sila ohenda, ngaashi a uvanekela ootatekulululwa, nota ka dhimbulukwa ehangano lye eyapuki, 73 ndyoka wo a uvanekele tatekulululwa Abraham. 74 Sho Kalunga e tu hupitha kaatondi yetu, okwe tu pa uuthembahenda woku mu longela kaatu na uumbanda, 75 opo tu kale aadhiginini naayuuki koshipala she okukalamwenyo kwetu akuhe. 76 Ihe ngoye, omumwandje, oto ka ithanwa omuhunganeki gwOmukombandambanda, oshoka oto ka tetekela Jehova wu mu longekidhile ondjila ye, 77 noto ka uvithila oshigwana she etumwalaka lyehupitho, opo shi dhiminwe po omayonagulo gasho, 78 omolwolukeno lwaKalunga ketu. Olukeno, ndwoka lwa za pombanda, otalu ke tu minikila ngaashi etango tali piti, 79 ndyoka tali gandja uuyelele kwaamboka ye li momilema nomomuzizimba gweso, nokuwilika* oompadhi dhetu mondjila yombili.”

80 Mokweendela ko kwethimbo, Johannes okwa koko e ta ningi omukuluntu,* nokwa kala mombuga, sigo esiku ndyoka a ihololele Israeli.