KAagalati

4 Ngame otandi ti kutya omanga omuthigululi* e li okanona, kapu na eyooloko pokati ke nomupika, nonando oye mwene gwiinima ayihe, 2 ihe oha kala mewiliko nometonatelo lyaatonateli naayakuli sigo ethimbo, ndyoka lya uthwa kuhe, lya thiki. 3 Sha faathana, natse wo sho twa li aanona, otwa li aapika yiinima yuuyuni mbuka. 4 Ihe sho ethimbo, ndyoka lya uthwa lya thiki, Kalunga okwa tumu Omwana, ngoka a valwa komukiintu, nokwa li wo kohi yompango, 5 a vule okumangulula mboka ye li kohi yompango, opo tu vule okuninga oyana yaKalunga.

6 Ihe ngashingeyi, molwaashoka omu li oyana, Kalunga okwa tumina ombepo yOmwana momitima dhetweni, notayi igidha tayi ti: “Abba,* Tate! 7 Onkee ano kamu shi we aapika, ihe omu li oyana; nongele omu li oyana, nena Kalunga ote ke mu pa wo uuthiga.

8 Ihe manga mwa li inaamu tseya Kalunga, omwa li aapika yaamboka kaaye shi ookalunga shili. 9 Ihe sho ngashingeyi mwa tseya Kalunga, nenge sho mwa tseyika kuKalunga, otashi wapa ngiini ishewe mu lalakanene iinima yowala kaayi na oshilonga, nomwa hala ishewe okukala aapika yayo? 10 Ohamu dhiginine omasiku noomwedhi, omathimbo gomimvo nosho wo omimvo. 11 Onde mú etela ohenda, ngele oonkambadhala dhandje adhihe, ndhoka nda ninga omolweni, osima yowala.

12 Aamwatate, otandi mu indile, kaleni ngaashi ngame, molwaashoka nangame wo onda li ngaashi ne. Kamwa li mwa ningila ndje nando uuwinayi washa. 13 Ihe omu shi shi kutya sho nde mú uvithile onkundana ombwanawa oshikando shotango, onda li tandi ehama. 14 Nonando uuwehame wandje owa li omukundu kune, inamu ungaunga nangame nondhino, nenge mú tonde* ndje, ihe omwa taamba ndje ko ongomuyengeli gwaKalunga, nda fa Kristus Jesus. 15 Enyanyu, ndyoka mwa li mu na, oli li peni? Oshoka ngame mwene otandi vulu oku shi mú lombwela kutya andola osha li tashi wapa, ando omwa kolola mo omeho geni e tamu ga pe ndje. 16 Onkee ano mbela onda ninga omutondi gweni, molwaashoka tandi mú lombwele oshili? 17 Aantu oya halelela oku mú kwata ko, ihe hanelalakano ewanawa; oya hala oku mú topola ko kungame, opo mu kale mwa halelela oku ya landula. 18 Ihe ohashi kala aluhe oshiwanawa, uuna gumwe te mú kongo a mana mo nelalakano ewanawa, ihe hangele owala ndi li pune. 19 Aamwandje, ondi uvite ishewe uuwehame omolweni wa fa woshitheta shokuvala, sigo mwa kokeke uukwatya wa fa waKristus. 20 Onda hala ando ondi li pamwe nane ngashingeyi, nondi popye nane momukalo gulwe gwi ili, molwaashoka kandi shi kutya nandi mú ninge ngiini.

21 Lombwelii ndje, ne, mboka mwa hala okukala kohi yOmpango: Mbela ohamu pulakene ngaa shoka ompango tayi ti? 22 Pashiholelwa, okwa nyolwa taku ti kutya Abraham okwa li e na oyanamati yaali, gumwe okwa valwa komukadhona omupika, gulwe okomukulukadhi gwe ngoka a manguluka; 23 ihe ngoka a valwa komukadhona omupika okwa valwa pamukalo gwopaunshitwe,* naangoka a valwa komukulukadhi gwe, ngoka a manguluka, okwa valwa omolweuvaneko. 24 Iinima mbika oyi na eityo lyopathaneko; aakiintu mbaka otaya thaneke omahangano* gopaali, limwe oondyoka lya ningilwa kondundu yaSinai, ndyoka hali vala aanona ya ka ninge aapika, lyo olyo Hagar. 25 Hagar ota thaneke Sinai, ondundu, ndjoka yi li muArabia, nota thaneke wo Jerusalem shokunena, oshoka oku li muupika pamwe noyana. 26 Ihe Jerusalem shopombanda osha manguluka, na osho meme yetu.

27 Oshoka okwa nyolwa taku ti: “Nyanyukwa, omukiintu ngoye ontimbe, ngoka ihoo vala; ligola kenyanyu, ngoye ngoka kuu shi uuwehame woshitheta; aanona yomukiintu, ngoka a ethiwa, oyendji noonkondo ye vule yaangoka e na omusamane.” 28 Aamwatate, one oluvalo, ndoka lwa uvanekwa ngaashi owala Isak. 29 Ngaashi owala omunona, ngoka a valwa pamukalo gwopaunshitwe,* a tameke okuhepeka ngoka a valwa kekwatho lyombepo, nane wo osho tamu ningilwa ngashingeyi. 30 Nonando ongawo, omanyolo oga ti ngiini? “Laleka omukadhona omupika nomwanamati, oshoka omwanamati gwomukadhona omupika ita ka ninga nando omuthigululi pamwe nomwanamati gwomukiintu, ngoka a manguluka.” 31 Onkee ano, aamwatate, tse katu shi oyana yomukadhona omupika, ihe oyomukiintu, ngoka a manguluka.