Ontiyali kAakorinto
1 Ngame Paulus, omuyapostoli gwaKristus Jesus pahalo lyaKalunga, nondi li pamwe nomumwatate Timoteus, otandi nyolele egongalo lyaKalunga, ndyoka li li muKorinto, mwa kwatelwa aayapuki ayehe, mboka ye li muAkaia ashihe:
2 Uuwanawahenda nombili, ndjoka hayi zi kuKalunga, Tate yetu, nosho wo kOmuwa Jesus Kristus, nayi kale pamwe nane.
3 Kalunga, He yOmuwa gwetu Jesus Kristus, na hambelelwe, ngoka e li Tate gwesilohenda, noku li wo Kalunga kehekeleko alihe, 4 ngoka he tu hekeleke* momaudhigu getu agehe, opo tu vule wo okuhekeleka yalwe mboka ye na omaudhigu gi ili nogi ili nehekeleko, ndyoka hali zi kuKalunga. 5 Oshoka ngaashi owala hatu adhika komaudhigu ogendji tu li aalanduli yaKristus, ohatu mono wo ehekeleko enene okupitila muKristus. 6 Uuna tu na uudhigu, otashi ningwa omolwehupitho lyeni, nomu vule okuhekelekwa; nuuna tatu hekelekwa, nane ohamu hekelekwa wo, shoka hashi mú kwathele mu vule okwiidhidhimikila omaudhigu ga faathana naangoka wo hage tu adha. 7 Otu na einekelo lya kola mune kutya ngaashi owala hamu adhika komaudhigu mwe tu fa, nane otamu ka hekelekwa wo ngaashi tse.
8 Oshoka aamwatate, inatu hala mu kale kaamu shi omaudhigu, ngoka twa li mugo moshitopolwalongo shaAsia. Oga li omadhigu noonkondo. Katwa li tatu vulu oku ga idhidhimikila koonkondo dhetu yene, nokatwa li nokuli tu shi ngele otatu ka hupa ngaa. 9 Otwa li nokuli tu uvite twa fa twa tokolelwa eso. Shoka osha ningwa, opo kaatu kale twa inekela mutse yene, ihe omuKalunga, ngoka ha yumudha aasi. 10 Okwe tu hupitha moshiponga oshinene sheso, note ke tu hupitha, notu na einekelo muye kutya ota ka tsikila natango oku tu hupitha. 11 Otamu vulu wo oku tu kwathela moku tu galikanena, oshoka ngele oyendji otaye tu galikanene,* nena Kalunga ote ya uvu, note tu kwathele.
12 Oshoka oshinima, shoka tatu itangele, osho shika kutya eiyuvo lyetu otali shi koleke kutya otu na eihumbato ewanawa muuyuni, unene tuu mokati keni, sho twa kala nokwiihumbata momukalo gwa yogoka, notagu ulike etilokalunga, hamolwuunongo wopantu, ihe omolwuuwanawahenda waKalunga. 13 Oshoka katu na sha shoku mú nyolela, kakele kiinima, mbyoka tamu vulu okulesha* noku yi uva ko, nondi na einekelo kutya otamu ka tsikila okuuva ko iinima mbika thiluthilu, 14 ngaashi owala yamwe yomune wo mu shi shi kutya otamu itanga omolwetu, osho wo natse otatu ka itanga omolweni mesiku lyOmuwa gwetu, Jesus.
15 Onkee ano omolweinekelo ndyoka, onda li tandi dhiladhila okuya kune tango, opo tu vule okunyanyukilwa ishewe pamwe oshikando oshitiyali.* 16 Oshoka onda li tandi dhiladhila ndi pite pune, ndi mú talele po, sho tandi yi kuMakedonia, naasho tandi galuka kuMakedonia, otandi ya ishewe ndi pite pune, okuza mpono, tamu thindikile ndje ndi ye kuJudea. 17 Ano sho nda li tandi dhiladhila ngawo, mbela oshinima shono kanda li nde shi dhiladhila nawa nani? Nenge onda li owala tandi dhiladhila okuninga iinima pahalo lyandje,* ihe itandi yi ningi shili? 18 Ngaashi owala Kalunga e shi okwiinekelwa, oohapu dhetu nadho odhi shi okwiinekelwa. Ihatu popi kutya otatu ningi oshinima shontumba e tatu kala inaatu shi ninga shili. 19 Oshoka Omwana gwaKalunga, Jesus Kristus, ngoka ngame, Silvanus* nosho wo Timoteus twa uvitha mokati keni, ina popya kutya ota ningi oshinima shontumba e ta kala inee shi ninga, ihe okwa ningi ashihe shoka a popya. 20 Oshoka kutya nduno omauvaneko gaKalunga oge thike peni, agehe okwe ga gwanitha po okupitila muJesus. Onkee ano okupitila wo muye, ohatu ti “Amen” kuKalunga, nokungawo, ohatu simanekitha Kalunga. 21 Ihe Kalunga, ngoka e tu gwayeka, oye a shilipaleka kutya tse nosho wo ne oyaKristus. 22 Okwe tu tula wo oshihako she, nokwe tu pa euvaneko lyaashoka tashi ke ya, ano ombepo ondjapuki, ndjoka yi li momitima dhetu.
23 Ihe otandi gana koshipala shaKalunga omolwandje* kutya itandi ke ya kuKorinto, molwaashoka inandi hala oku mú yemateka. 24 Inatu hala nando oku mú pangela shi na ko nasha neitaalo lyeni, ihe otu li aalongi pamwe nane, opo mu vule okukala mwa nyanyukwa, oshoka omwa kola omolweitaalo lyeni.