Kalunga Tu Uvaneke Oparadisa

OSHO efano lyoparadisa ngaashi Kalunga tashi vulika e yi ulukile omuprofeti gwe Jesaja. Jesaja okwa kala nomwenyo okathimbo okafupi konima yeso lyaJona.

Oparadisa otashi ti “oshikunino” nenge “oparka.” Itashi ku dhimbulukitha nando mbela kusha shoka tse twe shi mono nale membo ndika? Otashi monika sha fa oshikunino oshiwanawa shoka Jehova Kalunga a ningilile Adam naEva, hasho mbela? Ihe evi alihe otali vulu ngaa mbela oku ka kala oparadisa?

Jehova okwa lombwele omuprofeti gwe Jesaja a nyolele oshigwana shaKalunga kombinga yoparadisa ompe ndjoka tayi ke ya. Ye okwa ti: ‘Omambungu noonzi otadhi ka kala pamwe nombili. Oontana noonime oongundjuka otadhi ka napela pamwe, naanona aashona otaye ke dhi litha. Nokuli nando okanona okashona otaka ka dhana popepi neyoka lyuuzigo, ko itaka ka komonwa.’

‘Shika itashi vulu okuningwa nando,’ ngiika oyendji osho taa ti. ‘Uudhigu opo wa kala nale kombanda yevi, nopo tau ka kala aluhe.’ Ihe dhiladhila kwaashino: Ehala lyokukala lya tya ngiini Kalunga a pe Adam naEva?

Kalunga okwa tula Adam naEva moparadisa. Yo oya kanitha owala ehala lyawo lyokukala, ya kulupa noya si molwashono yo ya li inaaya vulika kuKalunga. Kalunga otu uvaneke a pe aantu mboka ye mu hole iinima naanaa mbyoka Adam naEva ya kanitha.

Moparadisa ompe ndjoka tayi ya itamu ka kala shoka tashi ehameke aantu nenge shoka tashi eta uuwinayi. Otamu ka kala ombili ya gwanenena. Ayehe otaa ka kala nuukolele nonelago. Otashi ka kala naanaa ngaashi Kalunga e shi halele petameko. Ihe otatu ki ilonga nale nkene Kalunga te ke shi ninga.