Molwashike Yo Ya Kanitha Ehala Lyawo Lyokukala

TALA shoka tashi ningwa ngashingeyi. Adam naEva otaya tidhwa moshikunino oshiwanawa shaEden. Owa tseya kutya omolwashike?

Omolwashoka yo oya ningi sha shoka oshiwinayi noonkondo. Nomolwashoka Jehova ote ya geele. Owa tseya mbela oshinima oshiwinayi shoka Adam naEva ya ningi?

Yo oya ningi sha shoka Kalunga e ya lombwele yaahe shi ninge. Kalunga okwe ya lombwele kutya yo otaa vulu okulya iikulya yokomiti dhomoshikunino. Ihe komuti gumwe Kalunga okwa ti kutya inaya lya ko, ngele hasho yo otaa ka sa. Ye okwi ipungulile omuti nguno ye mwene. Notwe shi tseya kutya osha puka okukutha sha shoka shagumwe i ili, hasho mbela? Ano oshike sha ningwa po?

Esiku limwe manga Eva a li awike moshikunino, eyoka olya popi naye. Dhiladhila owala kwaashono! Olya lombwele Eva a lye oshiyimati shokomuti ngoka Kalunga e ya lombwele yaahe gu lye. Sho Jehova a shiti omayoka ine ga shita haga vulu okupopya. Ano shino otashi vulu owala okutya kutya gumwe i ili okwa li a ningitha eyoka li popye. Okwa li lye?

Ka li nando Adam. Ano okwa li e na okukala gumwe gwomaantu mboka Jehova a shiti nale manga inaa shita evi. Aantu mboka oyo aayengeli, noitatu vulu oku ya mona. Omuyengeli gumwe nguka okwa ningi omunuuntsa noonkondo. Okwa tameke ta dhiladhila kutya ye ota pumbwa okukala omupangeli ngaashi Kalunga. Nokwa halele aantu ya vulike kuye pehala lyokuvulika kuJehova. Oye omuyengeli ngoka a li a ningitha eyoka li popye.

Omuyengeli nguka okwa li a kotokele Eva. Sho e mu lombwele kutya ye ota ka fa Kalunga ngele a li oshiyimati, ye okwe shi itaale. Ano ye okwa li, naAdam wo osho a ningi. Adam naEva oya li inaaya vulika kuKalunga, nosho molwashoka yo ya kanitha oshikuninogumbo shawo oshiwanawa.

Ihe esiku limwe Kalunga ota ka sa oshimpwiyu kutya evi alihe li ninge ewanawa ngawo ngaashi oshikunino shaEden. Konima otatu ki ilonga nkene ngoye to vulu okukala u na ombinga meningo lyasho. Ihe ngashingeyi, natu tale shoka sha ningilwa Adam naEva.