Kalunga ohu uvu nayi​—Nkene tatu vulu oku mu nyanyudha

Mbela opu na esiku wu uvithilwe nayi noonkondo e to lili nokuli?—a Atuheni otashi vulika twe shi ningilwa. Nomathimbo gamwe ohashi vulika tu lile molwaashoka tu uvithwa nayi. Otashi vulika omuntu e tu lundile. Shoka ohashi uvitha nayi, hasho mbela?— Kalunga naye ohu uvu nayi ngele ta lundilwa. Natu kundathane kombinga yoshinima shika nokutala nkene tatu vulu oku mu nyanyudha pehala lyoku mu uvitha nayi.

Ombiimbeli otayi ti kutya yamwe mboka haya ti oye hole Kalunga ohaye mu ‘nikitha oluhodhi.’ ‘Ohaye mu ningitha omwenyo omwiinayi’ shili. (OB-1954) Oshoshili kutya kapu na ngoka ta vulu okweehameka Jehova Kalunga kolutu. Ye Omunankondoadhihe. Natu tale nduno kutya omolwashike Jehova hu uvu nayi uuna inaatu ninga shoka a hala tu ninge.

Aantu yaali yotango mboka Jehova a li a shitile kombanda yevi oya li ye mu uvitha nayi noonkondo. Aantu mbaka okwa li e ya tula mOparadisa kombanda yevi, “meyana lyaEden.” Aantu mbaka oya li oolye?— Eeno, tango okwa shiti Adam nokonima okwa shiti Eva. Natu tale kutya oya ningi shike shoka shu uvitha nayi Jehova.

Konima sho Jehova e ya tula meyana okwe ya lombwele ye li sile oshimpwiyu. Okwa li wo e ya lombwele kutya otaya vulu okumona aanona notaya vulu okukala pamwe meyana itaaya si. Ihe manga Adam naEva inaaya mona aanona, opwa ningwa oshinima oshiwinayi noonkondo. Owu shi kutya oshike sha ningwa po?— Omuyengeli gumwe okwa hongolola Adam naEva ya yone kuJehova. Natu tale kutya oshe ende ngiini.

Omuyengeli okwa ningitha eyoka li kale lya fa tali popi. Eva okwa li a panda shoka u uvu, sho eyoka lye mu lombwele kutya ‘ota fe Kalunga.’ Onkee ano, okwa ningi ngaashi eyoka lye mu lombwele. Owu shi kutya okwa li a ningi shike?—

Eva okwa li a li komuti ngoka Jehova a lombwele Adam kutya inaya lya ko. Manga Kalunga inaa shita Eva, okwa li a lombwela Adam a ti: “Lya komuti kehe meyana, kakele komuti gwokutseya uuwanawa nuuwinayi. Iiyimati yomuti ngoka ino yi lya; ngele oto shi ningi, oto si shili.”

Ompango ndjoka Eva okwa li e yi shi. Ihe nonando ongaaka, okwa tongolola omuti ngoka nokwa mono “nkene gwo opala niiyimati yagwo yi etitha olwiho okuliwa . . . Okwa toonona ko iiyimati yimwe e ta li.” Konima okwa pe Adam oshiyimati, “naye wo okwa li.” Mbela oto dhiladhila kutya okwe shi ningile shike?— Omolwaashoka Adam okwa li e hole Eva unene shi vulithe Jehova. Okwa hogolola oku mu nyanyudha pehala lyokunyanyudha Kalunga. Ihe okuvulika kuJehova okwa simana ku vule okuvulika komuntu gulwe.

Mbela oto dhimbulukwa eyoka ndyoka twa kundathana metetekelo ndyoka lya li lya popi naEva? Ngaashi owala omuntu ta vulu okuningitha okapopitha ka kale ka fa taka popi, opu na wo ngoka a ningitha eyoka li kale lya fa tali popi. Olye a li ta popi okupitila meyoka?— ‘Eyoka ndyoka ekulu, lyi ithanwa Ondiapoli naSatana,’ (OB-1954) olyo lya li tali popi.

Mbela owu shi nkene to vulu okunyanyudha Jehova?— Oto vulu oku shi ninga mokukala aluhe ho vulika kuye. Satana ota ti kutya ota vulu okuningitha kehe gumwe a longe shoka a hala a longe. Onkee ano, Jehova ote tu ladhipike ta ti: “Mumwandje, ninga oondunge, u nyanyudhe omwenyo gwandje, opo ndi wape okuyamukula ngoka ta sitha ndje ohoni.” Satana ota kambadhala okusitha Jehova ohoni nenge oku mu sheka. Okwa ti kutya ota vulu okuningitha kehe gumwe kaa longele Jehova. Onkee ano, nyanyudha Jehova mokuvulika kuye nomoku mu longela. Oto ka kambadhala ngaa nuudhiginini oku shi ninga?—