Ontopolwa 44
Ta mweneke oshikungulu oshitilithi
ESIKU lyaJesus olya li lyu udha omaipyakidhilo, mwa kwatelwa okulonga omangathithi gaantu komunkulofuta nokonima yaashono okuyelithila aalongwa ye omaudhi sho ye li po oyo ayeke. Sho taku toko, ota ti: “Tu ka [taagulukileni] handiyaka.”
Kuuzilontu womunkulo gwEfuta lyaGalilea oku na oshitopolwa hashi ithanwa Dekapolis, sha za koshitya shOshigreka deʹka, tashi ti “omulongo,” na poʹlis, tashi ti “oshilando.” Iilando yaDekapolis oyo osentruma yeputuko lyOshigreka, nonando osha yela kutya omwa kala wo Aajuda oyendji. Ihe omaipyakidhilo gaJesus moshitopolwa shika oga ngambekwa noonkondo. Nokuli metalelopo ndika, ngaashi tatu ke shi mona nale, ye ota keelelwa okukala mo ethimbo ele.
Sho Jesus ta pula opo ya taagulukile handiyaka, aalongwa otaye mu fala mowato. Ihe ezepo lyawo itali kala inaali monika kuyalwe. Mbalambala yalwe otaya londo moowato dhawo oku ya landula. Handiyaka yomunkulofuta kaku shi unene kokule. Dhoshili, Efuta lyaGalilea olyo owala etale enene li na uule wookilometa 21 lwaampono nuunene momutamo ookilometa 12.
Jesus okwa vulwa shi shi okuuviwa ko. Ano mbalambala sho ya yi mowato, ota lala konima yowato, a tenteka omutse gwe koshigwilo e ta kotha a pwila mo. Oyendji yomaayapostoli oyo aaendifuta ya pyokoka mboka ya kwata nale oohi iikando oyindji mEfuta lyaGalilea. Ano otaya hingi owato.
Ihe nduka kalu shi olweendo olupu. Molwonkalo yombepo ndjoka ya pupyala kombanda yetale, ndyoka li li oometa 210 lwaampono kohi yondjalo yefuta, nomolwombepo ya talala yokoondundu dhopopepi, omathimbo gamwe oombepo oondhigu ohadhi tukuluka e tadhi eta iikungulu iinene yombadhilila metale. Shika osho tashi ningwa po ngashingeyi. Mbalambala omakuthi otaga tameke taga dhenge owato, sigo tayi hala okuningina. Ihe Jesus okwa kotha natango!
Aalumentu aaendifuta ya pyokoka otaya ngwangwana noonkondo okuhinga owato. Osha yela kutya yo oya pita nale miikungulu. Ihe oshikando shika oya teka omukumo. Ye na uumbanda molwoomwenyo dhawo, otaya pendutha Jesus. ‘Omuhongi, ku na ko nasha nani? Tatu ningine mo!’ tayi igidha. ‘Tu hupitha, tatu si omeya!’
Jesus ota penduka nota ganda ombepo nefuta: “Mwena, ngu u lote!” Ombepo otayi kodha nefuta otali loto. Ota taalele kaalongwa ye e te ya pula ta ti: ‘Omolwashike mwa tila ngawo? Hamba kamu na eitaalo natango?’
Opo tuu mpoka aalongwa otaya kwatwa kuumbanda inaau monika nale. ‘Omulumentu nguka olye ano?’ yo taya pulathana, ‘sho ta lombwele ombepo nomeya e taga vulika kuye nokuli.’
Jesus itu ulike tuu kutya oku na oonkondo! Itashi tu uvitha tuu nawa okutseya kutya Omukwaniilwa gwetu oku na oonkondo okupangela iinima yopaunshitwe nonokutya sho te ku ukitha eitulomo lye alihe huka kombanda yevi lyetu pethimbo lyelelo lyUukwaniilwa we, aantu ayehe otaya ka kala ya gamenwa kiiponga iinene niihaluthi yopaunshitwe!
Konima yokathimbo sho oshikungulu sha loto, Jesus naalongwa ye otaya thiki ye li nawa komunkulofuta gwokuuzilontu. Otashi vulika oowato dhilwe dha henuka oshikungulu oshidhigu nodha thika dhi li nawa. Markus 4:35–5:1; Mateus 8:18, 23-27; Lukas 8:22-26.
▪ Dekapolis oshike, noshi li peni?
▪ Iinima yopaunshitwe oyini hayi etitha iikungulu iinene mEfuta lyaGalilea?
▪ Sho aalongwa taya mono kutya uunkulungu wawo wokuhinga mefuta itau vulu oku ya hupitha, otaya ningi ngiini?