Septemba

Kalunga okwa pa Jesus oonkondo dhokukandula po omaupyakadhi agehe gaantu. Sho Jesus a li a longo iikumithalonga, okwa li a ulike kutya ota vulu okukandula po omaupyakadhi getu agehe ngoka itaatu vulu nando okukandula po kutse yene. Pashiholelwa, oku na oonkondo dhokuhulitha po omaupyakadhi ngoka ga etithwa kuulunde mboka twa thigulula nakehe shimwe shoka hashi etithwa kuulunde, mwa kwatelwa uuwehame neso. (Mat. 9:1-6; Rom. 5:12, 18, 19) Iikumithalonga ye oye shi ulike kutya ota vulu okwaaludha omukithi “kehe” nota vulu nokuli okuyumudha oonakusa. (Mat. 4:23; Joh. 11:43, 44) Shimwe ishewe, oku na oonkondo dhokumweneka iikungulu iidhigu nokusinda oombepo dhoompwidhuli. (Mark. 4:37-39; Luk. 8:2) Shoka itashi tu tsu tuu omukumo okutseya kutya Jehova okwa gandja oonkondo ndhoka kOmwana! Otatu vulu okukala tu na einekelo thiluthilu kutya omauvaneko giinima iiwanawa mbyoka Uukwaniilwa waKalunga tawu ka eta, otaga ka gwanithwa. Iikumithalonga mbyoka Jesus a longo, sho a li omuntu kombanda yevi, ote ke yi longa natango kombanda yevi alihe, molwaashoka oku li Omukwaniilwa gwUukwaniilwa waKalunga. w23.04 3 ¶5-7

Ngele owu li megongalo enene nowu uvite kutya olundji iho tumbulwa uuna wa ganeke, otashi vulika wu kale wa hala okweetha po okugandja omatyokosha. Ihe ino etha po okukambadhala okugandja omatyokosha. Oto vulu okukala ho ilongekidha omatyokosha gontumba wu ke ga gandje pokugongala kehe. Opo nduno, ngele owa ka kala inoo tumbulwa wu gandje etyokosha petameko lyokugongala, oto vulu natango okukala wu na oompito wu gandje etyokosha momukokomoko gwokugongala. Uuna to ilongekidhile Oshungolangelo yokukonakonwa, dhiladhila kombinga yankene okatendo kehe ka kwatathana nenenedhiladhilo lyoshitopolwa. Ngele osho wa ningi, otashi vulika wu ka kale wu na omatyokosha omawanawa, ngoka to ka vula okugandja moshitopolwa shoka tashi ka konakonwa. Shimwe ishewe, oto vulu okwiilongekidha wu ka gandje etyokosha muutendo mboka tawu popi iinima yomuule, mbyoka iidhigu okuyelitha. Omolwashike mbela? Omolwaashoka puutendo mboka, aantu owala aashona tashi vulika ya ganeke ya gandje omatyokosha. Ihe ongiini ngele pomakugongala ogendji ino pewa natango ompito wu gandje etyokosha? Manga okugongala inaaku tameka, oto vulu okulombwela omumwatate ngoka ta kwatele komeho, kutya owa hala oku ka yamukula epulo lini. w23.04 21-22 ¶9-10

Josef okwa tula miilonga nehalo ewanawa elombwelo lyaJehova, naashoka oshe mu ningi omusamane e li nawa. Poompito dhi li ndatu lwaampono, okwa li a pewa omalombwelo kuJehova ge na ko nasha nuukwanegumbo we. Oshikando kehe okwa li a vulika meendelelo, nuuna nokuli sha li tashi pula a ninge omalunduluko omanene. (Mat. 1:20; 2:13-15, 19-21) Sho a landula elombwelo lyaKalunga, Josef okwa gamene Maria, okwe mu ambidhidha nokwe mu sile oshimpwiyu. Dhiladhila owala kombinga yankene shoka Josef a ningi sha ningitha Maria a kale e mu hole nokwe mu simaneka shi vulithe nale! Aasamane, otamu vulu okuholela Josef mokukala hamu kongo omayele ga kankamena kOmbiimbeli, gankene mu na okusila oshimpwiyu omaukwanegumbo geni. Uuna wa tula miilonga omayele ngoka, nokuli nando otage ku pula wu ninge omalunduluko, oto ulike kutya owu hole omukulukadhi gwoye noho koleke ondjokana yeni. Omumwameme gumwe moVanuatu ngoka a kala a hokanwa uule womimvo dhi vulithe 20 okwa ti: “Uuna omusamane gwandje ta kongo ewiliko kuJehova noku li landula, ohandi mu simaneke shi vulithe nale. Ohandi kala ndi uvite nda gamenwa nohandi kala ndi inekela omatokolo ge.” w23.05 21 ¶5

Aajuda mboka ya li ya galuka ko kuBabilonia, oya li taya ka ninga “oshigwana sha yapulilwa Omuwa” nenge tu tye oshigwana oshiyapuki kuKalunga kawo. (Deut. 7:6) Ihe shoka kasha li sha hala okutya kaya li ya pumbwa okuninga omalunduluko, opo ya nyanyudhe Jehova. Aajuda oyendji mboka ya li ya valelwa muBabilonia otashi vulika ya li ya igilila omukalo gwokudhiladhila nogwokuninga iinima gwAababilonia. Konima yomimvo odhindji, sho Aajuda yotango ya galukile kuIsraeli, Omunashikandjo Nehemia okwa li a kumwa, sho a mono aanona mboka ya valelwa muIsraeli kaaye shi okupopya nokuli elaka lyOshijuda. (Deut. 6:6, 7; Neh. 13:23, 24) Ongiini mbela aanona mboka taya ka ilonga okukala ye hole Jehova noku mu longela, ngele kaya li haya uvu ko Oshihebeli, elaka moka omo mwa li mwa nyolwa Oohapu dhaKalunga? (Esra 10:3, 44) Onkee ano, Aajuda mboka oya li ye na okuninga omalunduluko omanene, nosha li owala tashi ka kala oshipu kuyo oku ga ninga, ngele oye ga ningi sho ye li muIsraeli, moka elongelokalunga lya yogoka lya li tali ende nokutotululwa. — Neh. 8:8, 9. w23.05 15 ¶6-7

Kutya nduno otwa halelela okwaadha elalakano lyetu nenge tu na elandulathano, otashi vulika natango pu kale iiyimbi. Pashiholelwa, “iiningwanima yombaadhilila” otayi vulu okulya po ethimbo lyetu ndyoka twa pumbwa, opo tu adhe elalakano lyetu. (Omuuv. 9:11, NW) Otashi vulika pu holoke uudhigu mboka tawu tu thigi tu uvite twa teka omukumo nokaatu na lela oonkondo. (Omayel. 24:10) Okwaagwanenena kwetu otaku vulu oku tu ningitha tu katuke momukalo ngoka itaagu tu kwathele tu adhe elalakano lyetu. (Rom. 7:23) Nenge otashi vulika tu kale owala tu uvite twa vulwa. (Mat. 26:43) Oshike tashi vulu oku tu kwathela tu sinde iiyimbi mbyoka? Dhimbulukwa kutya ngele opu na oshiimbi shontumba, itashi ti kutya owa ndopa. Ombiimbeli otayi ti kutya otashi vulika tu adhike komaupyakadhi lwiikando. Ihe otayi shi popi wo sha yela kutya otatu vulu okwaadha elalakano lyetu, unene tuu kekwatho lyaJehova. Ngele otwa tsikile okukambadhala tu adhe elalakano lyetu nonando oshidhigu, ohatu ulukile Jehova kutya otwa hala oku mu nyanyudha. Jehova iha kala tuu a nyanyukwa, uuna e wete to tsikile okukambadhala okwaadha elalakano lyoye! w23.05 30 ¶14-15

Uukokolindjila ohawu kwathele omulumentu omugundjuka a ilonge nkene e na okuungaunga nomupondo naantu yomaukwatya ga yoolokathana. Ohawu mu kwathele wo a ilonge nkene e na okulongitha nawa iimaliwa mbyoka ha mono. (Fil. 4:11-13) Omukalo omwaanawa okutameka iilonga yethimbo lya udha, owo okukutha uukwathelikokolindjila mboka hawu kwathele gumwe a tameke uukokolindjila wondjigilile. Uukokolindjila otashi vulika wu ku egululile ompito yilwe yokuya miilonga yethimbo lya udha, mwa kwatelwa okulonga miilonga yokutunga nenge yaBetel. Aalumentu Aakriste oye na okugwanitha po iitegelelwa, opo ya kale ya gwana okukwathela aamwatate naamwameme megongalo ye li aakuluntugongalo. Ombiimbeli otayi ti kutya aalumentu mboka ya gwanitha po iitegelelwa oya “hala oshilonga oshiwanawalela.” (1 Tim. 3:1) Tango, omumwatate oku na okugwanitha po iitegelelwa yokuninga omuyakuligongalo. Aayakuligongalo ohaya kwathele aakuluntugongalo, mokusila oshimpwiyu aamwatate naamwameme megongalo. Aakuluntugongalo naayakuligongalo ohaya yakula neifupipiko aamwatate naamwameme, nohaya kutha ombinga nuulaadhi miilonga yokuuvitha. w23.12 28 ¶14-16

Omukwaniilwa Josia okwa li e na omimvo 16 sho a tameke okukonga Jehova. Okwa li a hala okwiilonga kombinga yaJehova nokulonga ehalo lye. Ihe onkalamwenyo ye kaya li ompu. Pethimbo ndyono, aantu oyendji oya li taya longele iikalunga, na Josia okwa li e na okukatuka nuulaadhi, opo a hulithe po oshinima shoka. Manga inaa gwanitha omimvo 20, okwa tameke okuhulitha po elongelokalunga lyiifundja mokati koshigwana. (2 Ondjal. 34:1, 2) Nonando owu li omugundjuka, oto vulu okuholela Josia mokwiilonga oshindji kombinga yaJehova nosho wo yomaukwatya ge omawanawa. Shono otashi ke ku inyengitha wu mu iyapulile. Okwiiyapulila Jehova otaku ka guma ngiini onkalamwenyo yoye? Luke, ngoka a ninginithwa sho a li e na omimvo 14, okwa ti: “Okuza nena, otandi kala nda pititha komeho okulongela Jehova monkalamwenyo yandje, notandi ka ninga ngaashi tandi vulu ndi mu nyanyudhe. (Mark. 12:30) Ngele owa ningi ngawo, Jehova ote ke ku laleka nuuyamba. w23.09 11 ¶12-13

Sho omuyapostoli Paulus a nyolele Aatessalonika ontumwafo ndjika yotango, egongalo ndyoka olya adhika owala opo lya totwa po, inaali gwanithwa nomumvo gumwe. Aalumentu mboka ya li taya kwatele komeho megongalo ndyoka otashi vulika kaaya li ye na owino, notashi vulika ya li ya ningi omapuko. Ihe nando ongawo, oya li ya gwana okusimanekwa. Sho uudhigu uunene tawu hedha popepi, otashi vulika aakuluntugongalo yomegongalo lyetu oyo unene taye ke tu pa omalombwelo shi vulithe nale. Otashi vulika itaatu ka vula okukwatathana noombelewa dhetu oonene nosho wo noshitayimbelewa, onkee osha simana okwiilonga okukala tu hole notwa simaneka aakuluntugongalo, manga taku tiwa nena. Kutya nduno oshike tashi ka ningwa po, natu kale tu na eidhiliko, inatu kala owala tatu gandja eitulomo kokwaagwanenena kwaakuluntugongalo, ihe natu kale twa tompwa kutya Jehova ota wilike aalumentu mboka aadhiginini okupitila muKristus. Ngaashi owala egala lyosheela hali gamene omutse gwomukwiita, etegameno lyetu lyehupitho nalyo ohali gamene omadhiladhilo getu. Otu shi shi kutya uuyuni itawu vulu oku tu pa sha shi na ongushu. (Fil. 3:8) Etegameno ohali tu kwathele wo tu kale twa ngungumana noitaa tu tengauka. w23.06 11-12 ¶11-12

Mboka yu uvite ‘omukiintu omugoya’ ti igidha, oye na okuninga etokolo kutya otaya taamba ko ehiyo ndyoka nenge itaye li taamba ko? Opu na omatompelo omawanawa kutya omolwashike tu na okuyanda omilalo dha nyata. ‘Omukiintu egoya’ okwa hokololwa ta ku ti: “Omeya ga yakwa omatoye.” (Omayel. 9:17) “Omeya ga yakwa” oshike? Ombiimbeli otayi yelekanitha omilalo pokati komusamane nomukulukadhi nomeya gomothithiya. (Omayel. 5:15-18) Omusamane nomukulukadhi mboka ya hokana paveta oya pitikwa okunyanyukilwa pamwe omilalo mondjokana yawo. Ihe “omeya ga yakwa” oge li shimwe shi ili. Omeya ga yakwa otashi vulika taga ulike komilalo dhi indikwa. Aantu mboka haya yi momilalo dha nyata, olundji ohaya kambadhala oku shi ninga meholamo, ngaashi naanaa omufuthi ha kambadhala okuyaka. “Omeya ga yakwa” otashi vulika ga monike ga fa omatoye, unene tuu ngele mboka taye shi ningi otaya dhiladhila kutya kapu na gumwe ta ka mona shoka ya ninga. Shoka itashi yemateke tuu! Jehova oku wete kehe shimwe. Ngele otwa kala inaatu hokiwa we kuJehova, ohashi kala oshiwinayi noonkondo, oshinima shoka tashi vulu oku tu ningilwa nokashi shi oshiwanawa nando. — 1 Kor. 6:9, 10. w23.06 22 ¶7-9

Ongiini ngele oho galikana omagalikano wu wete itaaga zi komutima, nenge wu wete itoo shi enditha we nawa muukalele ngaashi nale? Ino thika pehulithodhiladhilo kutya ombepo yaJehova kayi po we pungoye. Omaiyuvo gomuntu inaa gwanenena ohaga vulu okulunduluka. Ngele oto ende to kanitha uulaadhi, tedhatedha koshiholelwa shomuyapostoli Paulus. Nonando okwa li a kambadhala okuholela Jesus, okwa li e shi kutya omathimbo gamwe otashi vulika a kale kee na oonkondo dhokulonga shoka a hala. Paulus okwa li a tokola toko a gwanithe po uukalele we, kashi na nduno mbudhi kutya oku uvite ngiini pethimbo ndyoka. Sha faathana, molwaashono ino gwanenena, ino etha omaiyuvo goye ge ku pangele sho to ningi omatokolo. Kala wa tokola toko wu ningi shoka sha uka, kutya nduno owu uvite ngiini. Mokweendela ko kwethimbo, oonkatu dhoye otadhi ke ku kwathela wu ninge shoka shi li mondjila. — 1 Kor. 9:16. w24.03 11-12 ¶12-13

Natse otatu vulu okuulukila aamwatate naamwameme ohole mokupanga uukuume nayo nokukala ethimbo pamwe nayo. (2 Kor. 6:11-13) Oyendji yomutse otu li momagongalo moka mu na aamwatate naamwameme ya za momaputuko ga yoolokathana noye na omaukwatya ga yoolokathana. Otatu vulu okukoleka ohole yetu yoku ya hola mokugandja eitulomo komaukwatya gawo ngoka omawanawa. Ngele otwa ilongo okutala ko yalwe ngaashi Jehova he ya tala ko, otatu ulike kutya otu ya hole. Pethimbo lyuudhigu uunene otatu ka pumbwa okukala tu hole aamwatate naamwameme. Uuna uudhigu uunene wa tameke, openi tatu ka adha egameno? Natu taleni shoka Jehova a li a lombwele oshigwana she shi ninge, sho Babilonia shonale sha li sha ponokelwa. Okwa ti: “Ne aantu yandje, indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po.” (Jes. 26:20) Otashi vulika tatu ka kala twa pumbwa okulandula omalombwelo ngoka pethimbo lyuudhigu uunene. w23.07 6-7 ¶14-16

Ihumbata momukalo moka yalwe taya vulu okumona kutya ngoye owu na ondjele. Ipula ngeyi: ‘Mbela aantu ohaya tala ndje ko ngaa kutya ondi na ondjele, ohandi tifuka nohandi idhidhimike? Nenge ohaya tala ndje ko ihaandi levuka, ndi na onyanya nenge ndi na omanganga? Mbela ohandi pulakene kuyalwe nokulandula omaetopo gawo mpoka sha pumbiwa?’ Ngele otwa kala tu na ondjele otatu holele Jehova naJesus. Otwa pumbwa okukala tu na ondjele, uuna oonkalo dhetu dha lunduluka. Omalunduluko ngoka otashi vulika ge tu etele omaupyakadhi ngoka inaatu dhiladhila kutya onage ke tu adhe. Otashi vulika tu akukilwe kuupyakadhi wuukolele wa kwata miiti. Nenge omalunduluko gombaadhilila ge na ko nasha nuuhupilo nenge ge na ko nasha nepangelo, otaga vulu okupiyaganeka onkalamwenyo yetu. (Omuuv. 9:11) Otashi vulika nokuli shi kale oshidhigu kutse ngele ehangano olye tu pula tu ka longele Jehova momukalo gumwe gwi ili nenge kehala li ili. Otatu vulu okupondola okutaamba ko oonkalo oompe ngele otwa ningi iinima mbika ine: (1) taamba ko onkalo yi li ngaashi yi li, (2) dhiladhila konakuyiwa, (3) dhiladhila kombinga yiinima mbyoka iiwanawa nosho wo (4) ningila yalwe iinima iiwanawa. w23.07 21-22 ¶7-8

Omuhunganeki Daniel okwa li omugundjuka sho Aababilonia ya li ye mu kwata po, e taye mu fala muupongekwa kokule naJerusalem. Ihe nando ongawo, okwa li a kumitha mboka ya li ye ya oku mu kwata po. Oya mono kutya oku na ondjelo ombwanawa, ye okwa “shitika,” nokwa za megumbo lya simana. (1 Sam. 16:7) Omolwomatompelo ngono, oya li ye mu dheula a kale ha longo mombala. (Dan. 1:3, 4, 6) Jehova okwa li e hole Daniel, omolwuukwatya uuwanawa mboka a li e na. Eeno, sho Jehova a ti kutya Daniel okwa fa Noa naJob, otashi vulika Daniel a li e na owala omimvo 20 lwaampono. Onkee Jehova okwa li a tala ko Daniel e li omuyuuki ngaashi Noa naJob, mboka ye mu longela nuudhiginini omimvo odhindji. (Gen. 5:32; 6:9, 10; Job 42:16, 17; Hes. 14:14) Jehova okwa kala e hole Daniel onkalamwenyo ye ayihe. — Dan. 10:11, 19. w23.08 2 ¶1-2

Uuna wa hala okulanda egumbo oto ka kala wa hala okukonakona iinima ayihe yomegumbo ndyoka wa hala okulanda. Otatu vulu okuninga sha faathana uuna tatu lesha notatu konakona Ombiimbeli. Ngele owe yi lesha owala to endelele, otashi vulika wi ilonge owala oshili yopetameko, ano “iilongwa yopetameko yomOohapu dhaKalunga.” (Heb. 5:12) Onkee ano ngaashi owala wa pumbwa okuya “meni” lyegumbo ndyoka wa hala okulanda, opo wu tseye ashihe shoka shi li mo, yi konakona muule wu tseye uuyelele awuhe wayo. Omukalo gwa dhenga mbanda gwokukonakona, okumona nkene iitopolwa ya yoolokathana yetumwalaka lyayo ya kwatathana. Kambadhala okuuva ko nawa iinima mbyoka wa itaala nosho wo omatompelo ngoka ge ku ningitha wu yi itaale kutya oyoshili. Opo tu uve ko nawa uuyelele awuhe womOohapu dhaKalunga, otu na okukonakona ooshili dhOmbiimbeli dhomuule. Omuyapostoli Paulus okwa li a ladhipike aamwahe Aakriste ya konakone nuulaadhi Oohapu dhaKalunga, opo ya vule “okuuva ko uumbwalangandja, uunene, uule wopombanda nuule womohi” woshili. Opo nduno otaya ka kala ye na “omidhi nekankameno” meitaalo lyawo. (Ef. 3:14-19) Natse otwa pumbwa okuninga sha faathana. w23.10 18 ¶1-3

MOmbiimbeli omu na iiholelwa yaantu oyendji mboka ya li aaidhidhimiki. Otashi ka kala oshiwanawa ngele owa kongo ethimbo wu konakone nowu ninge omapekapeko kombinga yawo. Pashiholelwa, nonando David okwa li a gwayekwa sho a li omushona lela, a ka ninge omukwaniilwa gwaIsrael gwomonakuyiwa, okwa li e na okutegelela ethimbo nuule manga inaa ninga omukwaniilwa. Simeon naHanna oya li ya longele Jehova nuudhiginini omanga ya tegelela Mesiasa omuuvanekwa. (Luk. 2:25, 36-38) Sho to konakona omahokololo ngoka, kambadhala wu konge omayamukulo komapulo taga landula: ‘Oshike sha li sha kwathele omuntu nguka a kale omwiidhidhimiki? Uuwanawa wuni a mona sho a kala omwiidhidhimiki? Ongiini tandi vulu oku mu holela?’ Oto vulu wo okumona uuwanawa mokwiilonga kombinga yaamboka ya li kaaye shi aaidhidhimiki. (1 Sam. 13:8-14) Oto vulu okwiipula to ti: ‘Oshike sha li she ya ningitha ya kale kaaye na eidhidhimiko? Oya li ya mono iilanduliko yini?’ w23.08 25 ¶15

Omuyapostoli Petrus okwa li omulaadhi, ina etha nando osha shi mu ethithe po okulandula Jesus. Pashiholelwa, oshikando shimwe Jesus okwa li a popi sha shoka aalongwa ya li kaaye uvite ko. (Joh. 6:68) Aalongwa oyendji oya etha po okulandula Jesus. Ihe Petrus ina etha po oku mu landula. Okwa li e shi kutya Jesus oye owala e na “oohapu ndhoka tadhi gandja omwenyo gwaaluhe.” Jesus okwa li e shi kutya Petrus naayapostoli yalwe otaye ke mu thiga po. Ihe Jesus okwa li a lombwele Petrus kutya oku na uushili kutya Petrus ota ka galuka e ta kala ishewe omudhiginini. (Luk. 22:31, 32) Jesus okwa li e uvite ko kutya ‘ombepo oya hala, ihe onyama onkundi.’ (Mark. 14:38) Ano sho Petrus e mu idhimbike, Jesus ina sholola okukala e hole omuyapostoli gwe. Konima sho Jesus a yumuka okwa ihololele Petrus, tashi vulika sho a li oye awike. (Mark. 16:7; Luk. 24:34; 1 Kor. 15:5) Shoka osha li sha kumike Petrus, ngoka a li a yematela nayi shoka a ninga. w23.09 22 ¶9-10

Kalunga oha dhimi po, nenge oha siikile omayono gaamboka ye na eitaalo muye. (Eps. 32:1, 2) Ohe ya dhimine po thiluthilu noiha dhimbulukwa we omapuko gawo gonale. Oha kala e ya tala ko kaaye na ondjo yasha, noye li aayuuki, omolweitaalo lyawo. Kalunga okwa ithana Abraham, David nosho wo yamwe mboka ye mu longela nuudhiginini aayuuki, nonando kaya li ya gwanenena. Omolweitaalo lyawo, Kalunga okwe ya tala ko aayuuki, unene tuu ngele te ya yelekanitha naamboka kaaye na eitaalo muye. (Ef. 2:12) Ngaashi omuyapostoli Paulus e shi yelitha nawa montumwafo ye, otu na okukala tu na eitaalo, opo tu kale tu na ekwatathano lyopaumwene naKalunga. Abraham naDavid oya li ye na ekwatathano ndyoka naye, ngaashi owala natse tatu vulu okukala tu li na kunena. w23.12 3 ¶6-7

Kunena Aakriste ayehe oye na uuthemba wokugandja omayambo kuJehova mokulongitha ethimbo lyawo, oonkondo dhawo nosho wo iiniwe yawo, opo ya pitithe komeho Uukwaniilwa waKalunga. Otatu vulu okuulika kutya otwa lenga uuthembahenda wetu wokulongela Jehova moku mu pa omayambo getu ga dhenga mbanda. Omuyapostoli Paulus okwa li a popi iinima yi ili noyi ili yi na ko nasha nokulongela Kalunga kwetu, mbyoka kaatu na nando okweetha po oku yi ninga. (Heb. 10:22-25) Iinima mbyoka oya kwatela mo okugalikana Jehova, okuuvithila yalwe, okuya kokugongala nosho wo okuladhipikathana ‘uunene sho tu wete esiku lyaJehova tali hedha popepi.’ Okuuka pehulilo lyehokololo lyomEhololo, omuyengeli gwaJehova okwa li a tsu omuthindo lwiikando iyali oohapu tadhi landula, a ti: “Galikana Kalunga!” (Eh. 19:10; 22:9) Inatu dhimbwa nando oshili ndjika ya simanenena yi na ko nasha notempeli yaJehova yopambepo nosho wo okukala twa lenga uuthembahenda mboka tu na wokulongela Kalunga ketu omunene! w23.10 29 ¶17-18

Atuheni otwa hala okutsikila okukala “tu holathaneni.” Ihe osha simana tu dhimbulukwe kutya Jesus okwa li a gandja elondodho kutya “ohole yoyendji otayi ka talala.” (Mat. 24:12) Jesus kali a hala okutya aalongwa ye oyendji otaya ka etha po okuulukilathana ohole. Nonando ongawo, otwa pumbwa okukala twa kotoka, opo iikala yaantu muuyuni kaayi tu nwethe mo tu kale hatu ungaunga nayi nayalwe. Omanga tu na oshinima shoka momadhiladhilo, natu taleni epulo ndika lya simana tali ti: Mbela opu na omukalo ngoka tatu vulu okutala ngele ohole yetu yokuhola aamwatate oya kola? Omukalo gumwe gwokutala ngele ohole yetu oya kola, okukonakona nkene hatu ungaunga noonkalo dhontumba monkalamwenyo. (2 Kor. 8:8) Onkalo yimwe oyo ndjoka ya popiwa komuyapostoli Petrus a ti: “Komeho gaayihe holathaneni nomwenyo aguhe, oshoka ohole ohayi siikile omayono ogendji.” (1 Pet. 4:8) Onkee ano omaunkundi gayalwe nosho wo okwaagwanenena kwawo otayi vulu oku tu kwathela tu mone ngele ohole yetu oya kola. w23.11 10-11 ¶12-13

Itatu vulu okutya ohatu vulika kelombwelo lyaJesus li na ko nasha nohole, ngele ohatu ulukile owala ohole yamwe megongalo, ihe haantu ayehe. Odhoshili kutya otashi vulika tu kale tu hole yamwe shi vulithe puyamwe, ngaashi Jesus a ninga. (Joh. 13:23; 20:2) Ihe omuyapostoli Petrus ote tu dhimbulukitha kutya natu lalakanene okukala tu hole ooitaali ooyakwetu, molwaashoka oyomuukwanegumbo wetu.(1 Pet. 2:17) Petrus okwe tu ladhipika tu kale tu ‘holathane lelalela nomwenyo aguhe.’ (1 Pet. 1:22) Uutumbulilo mboka otawu ti kutya okukala wu hole gumwe, nokuli nando oshidhigu oku mu ulukila ohole. Pashiholelwa, ongiini ngele omumwatate okwe tu uvitha nayi momukalo gwontumba? Petameko otashi vulika tu kale twa hala okutameka okuungaunga naye momukalo moka ha ungaunga natse pehala lyoku mu ulukila ohole. Ihe Petrus okwa li a ilongo kuJesus kutya iikala ya tya ngawo inayi hokiwa kuKalunga. (Joh. 18:10, 11) Petrus okwa nyola a ti: “Ngoka te mu ningile uuwinayi nenge te mu thingi, inamu mu thinga. Ihe mu shunithileni elaleko nuuyamba.” (1 Pet. 3:9) Etha ohole yoye yomuule yi ku inyengithe wu kale omunambili. w23.09 28-29 ¶9-11

Ohashi tu kumitha okumona nkene okanona haka koko e taka ningi omukuluntu. Ohaka koko paunshitwe nopwaa na okuninga po sha. Ihe opo omuntu a koke pambepo, oku na okuninga oonkambadhala dhontumba. (1 Kor. 13:11; Heb. 6:1) Opo tu adhe elalakano ndyoka, otu na okukala tu na ekwatathano lyopothingo naJehova. Otwa pumbwa wo ombepo ondjapuki, opo tu vule okukokeka omaukwatya gopakalunga, uunkulungu nokwiilongekidhila iinakugwanithwa yomonakuyiwa. (Omayel. 1:5) Jehova okwa shita aantu, yamwe aalumentu yamwe aakiintu. (Gen. 1:27) Odhoshili kutya aalumentu naakiintu oya yoolokathana palutu nosho wo momikalo dhilwe. Pashiholelwa, Jehova okwa pa aalumentu naakiintu iinakugwanithwa yokondandalunde, onkee ano oya pumbwa omaukwatya nosho wo uunkulungu mboka tawu ya kwathele ya gwanithe po iinakugwanithwa yawo mbyoka. — Gen. 2:18. w23.12 18 ¶1-2

Mbela Jesus okwa li ngaa a hala yalwe ya longithe edhina lyaHe? Osho naanaa. Aawiliki yomalongelokalunga yamwe yopethimbo lye oya li ya itaala kutya edhina lyaKalunga eyapuki unene nokutumbulwa, ihe Jesus ka li a etha nando etaloko ndyoka kaa li shi lyopamanyolo li mu imbe a simaneke edhina lyaHe. Pashiholelwa, dhiladhila kethimbo sho a li a aludha omulumentu ngoka a li e niwe koondemoni, moshitopolwa shAagerasa. Aantu oya li ya tila e taya pula Jesus a ze mo moshitopolwa shawo, nokwa zi mo. (Mark. 5:16, 17) Ihe nando ongawo, Jesus okwa li a hala edhina lyaJehova li tseyike moshitopolwa moka. Onkee okwa li a lombwele omulumentu ngoka a aludha, a lombwele aantu shoka Jehova a ningi, ihe haashoka Jesus a ningi. (Mark. 5:19) Jesus okwa hala natse kunena tu tseyithe edhina lyaHe muuyuni awuhe. (Mat. 24:14; 28:20) Uuna tatu shi ningi, otatu nyanyudha Omukwaniilwa gwetu, Jesus. w24.02 10 ¶10

Otwa lalekwa shili nuuyamba sho tu li oshitopolwa shehangano lyaJehova momasiku ngaka gahugunina omadhigu. Sho oonkalo dhuuyuni mbuka tadhi ende tadhi nayipala, Jehova okwe tu pa uukwanegumbo wopambepo wa hangana waamwatate naamwameme. (Eps. 133:1) Ohe tu kwathele tu kale tu na ekwatathano lya kola. (Ef. 5:33–6:1) Ohe tu pe oondunge nuunongo mboka twa pumbwa, opo tu kale tu na ombili yashili yokomutima. Ihe nando ongawo, otwa pumbwa okulonga twa mana mo, tu tsikile okulongela Jehova nuudhiginini. Omolwashike mbela? Omolwaashoka omathimbo gamwe otashi vulika tu uvithwe nayi kokwaagwanenena kwayalwe. Otashi vulika wo tu kale tu uvite twa teka omukumo, uuna twa ningi omapuko, unene tuu ngele omapuko ga tya ngawo ohatu ga endulula. Otwa pumbwa okukala aadhiginini miilonga yaJehova, (1) uuna omwiitaali omukwetu e tu uvitha nayi, (2) uuna kuume ketu kopandjokana e tu yemateka nosho wo (3) uuna tu uvite twa teka omukumo, molwaashoka twa ninga omapuko. w24.03 14 ¶1-2

Omathimbo nomathimbo, ohatu uvu iimoniwa yaamwatate naamwameme, mboka ya tokola okulonga oshindji miilonga yaJehova. Otashi vulika ya hita Osikola yAauvithi yUukwaniilwa, nenge ya tembukila hoka ku na ompumbwe onene. Ngele oto vulu okwiitulila po elalakano ndyoka, shi ninga. Oshigwana shaJehova osha halelela okutamununa mo uukalele washo. (Iil. 16:9) Ongiini ngele ngashingeyi ito vulu oku shi ninga? Ino dhiladhila kutya owu vulike kwaamboka taya vulu oku shi ninga. Shoka sha simana, okutsikila okwiidhidhimika. (Mat. 10:22) Ino dhina ongushu yokulongela Jehova sha ikolele kwokuvula kwoye nokoonkalo dhoye. Ngoka ogwo omukalo gwa simana to vulu okutsikila okulandula Jesus konima yokuninginithwa. — Eps. 26:1. w24.03 10 ¶11

Tate yetu gwomegulu oku uvaneka oku tu dhimina po. (Eps. 86:5) Ngele otwa iyele shili ombedhi omolwomayono getu, otatu vulu okwiinekela kutya shoka Jehova a popya oshoshili, note ke tu dhimina po. Dhimbulukwa kutya Jehova oku na ondjele. Ihe tu pula nando shoka itaatu vulu okuninga. Oha pandula kehe shoka tatu mu ningile, shampa owala tatu ningi ngaashi tatu vulu. Shimwe ishewe, natu dhiladhileni kiiholelwa yomOmbiimbeli yaamboka ya li ya longele Jehova nomutima aguhe. Dhiladhila komuyapostoli Paulus. Okwa li a longo nuudhiginini uule womimvo, a ende ookilometa omayuvi nokwa toto omagongalo ogendji. Ihe sho oonkalo dha li itaadhi mu pitike a kuthe ombinga miilonga yokuuvitha, mbela Jehova okwa kala kee mu hole we? Hasho nando. Okwa li a tsikile okuninga ngaashi ta vulu, na Jehova nokwe mu yambeke. (Iil. 28:30, 31) Sha faathana, shoka tatu vulu okupa Jehova otashi vulu okulunduluka. Ihe shoka sha simana kuye osho kutya omolwashike tatu mu longele. w24.03 27 ¶7, 9

Jesus okwa tulila po aalongwa ye oshiholelwa ye shi landule, sho a li a galikana kuJehova. Momukokomoko guukalele we, Jesus okwa li a galikana lwiikando. Okwa li e na okwiitulila po ethimbo a galikane, molwaashoka olundji okwa li ha kala i ipyakidhila nokwa umanenwa kaantu. (Mark. 6:31, 45, 46) Okwa li a penduka ongulonene e ki ikalele, opo a galikane. Pompito yimwe, okwa li a galikana uusiku awuhe, manga inaa ninga etokolo lya simana. (Luk. 6:12, 13) Jesus okwa li wo a galikana lwiikando ongulohi ndjoka ya tetekele eso lye, manga inaa mana oshitopolwa she shoka oshidhigudhigu shoshinakugwanithwa she shokombanda yevi. (Mat. 26:39, 42, 44) Oshiholelwa shaJesus otashi tu longo kutya kashi na nduno mbudhi kutya otwi ipyakidhila shi thike peni, otwa pumbwa okwiitulila po ethimbo lyokugalikana. Ngaashi Jesus, otashi vulika tu kale twa pumbwa okwiitulila po ethimbo lyokugalikana ongulonene nenge kongulohi. Ngele otwe shi ningi, otatu ka ulukila Jehova kutya otwa pandula omagano ngaka gi ikalekelwa gegalikano. w23.05 3 ¶4-5

Ndhindhilika oshitya “tililwa” shoka shi li menyolo lyesiku lyonena. Embo limwe lyuuyelele wOmbiimbeli olya ti kutya ohole yaKalunga “oye ya kutse ya fa okamulonga taka tondoka omeya.” Oohapu ndhoka otadhi tsu omuthindo kutya Jehova oku hole aagwayekwa shi thike peni. Aagwayekwa oye shi kutya oye li “kohi yohole yaKalunga.” (Jud. 1) Omuyapostoli Paulus okwa li a nyola nkene aagwayekwa haya kala ye uvite sho a ti: “Taleni ohole mpoka yi thike, Tate sho e tu hole! Ohole ye oyi li po onene, sho tse hatu ithanwa aana yaKalunga.” (1 Joh. 3:1) Mbela Jehova oku hole owala aagwayekwa? Aawe, Jehova oku ulika kutya oku tu hole atuheni. Oshike tashi tu shilipaleke lela kutya Jehova oku tu hole? Ekuliloyambo. Ohole ndjoka a ulika itayi vulu okuyelekwa nasha. — Joh. 3:16; Rom. 5:8. w24.01 28 ¶9-10

Ovelise ndjika yi li pombanda otayi ulike omukalo gulwe moka David a li a sindi uumbanda we. Nonando omwenyo gwe ogwa li moshiponga, okwa li a tedhatedha kwaashoka Jehova te ke mu ningila. David okwa li e shi kutya Jehova ote ke mu hupitha pethimbo lyo opala. Kakele kaashono, Jehova okwa li a ti kutya David oye ta ka kala omukwaniilwa gwaIsraeli ta landula ko. (1 Sam. 16:1, 13) David okwa li e na uushili kutya kehe shoka Jehova a uvaneka, otashi ka gwanithwa. Jehova oku uvaneka oku ku ningila shike? Inatu tegelela e tu gamene komaupyakadhi agehe. Ihe dhimbulukwa kutya, uupyakadhi kehe tawu tu adha muuyuni mbuka, Jehova ote ke wu kutha po muuyuni uupe, kutya nduno owu kale wa fa peni. (Jes. 25:7-9) Omushiti gwetu oku na lela oonkondo dhokuyumudha oonakusa, oku tu aludha nokuhanagula po aapataneki yetu ayehe. — 1 Joh. 4:4. w24.01 6 ¶12-13

Dhiladhila kutya omolwashike wu na okwiiyapulila Jehova nokuninginithwa. Owa katuka oonkatu ndhoka, molwaashoka owa hala okugama kombinga yaJehova. Dhiladhila kwaashoka sha li she ku kwathele wu kale wa tompwa kutya owa mona oshili. Owa tseya Jehova nowa tameke oku mu simaneka nokukala wu mu hole e li Tate gwoye gwomegulu. Owa kokeke eitaalo e tali ku inyengitha wu iyele ombedhi. Omutima gwoye ogwe ku inyengitha wu ethe po iilonga ya puka e to kala metsokumwe nomithikampango dhaKalunga. Owa li wu uvite wa pepelelwa sho wa mono kutya Kalunga okwe ku dhimina po. (Eps. 32:2) Owa kala ho kala pomakugongala nowa tameke okulombwela yalwe iinima iiwanawa mbyoka wa ilonga. Wu li Omukriste a iyapulila Jehova, ngashingeyi oto ende mondjila ndjoka tayi fala komwenyo nowa tokola toko kuu ze mo mondjila ndjoka. (Mat. 7:13, 14) Kala aluhe omudhiginini, wa kolelela mokulongela Jehova nokuvulika kiipango ye. w23.07 17 ¶14; 19 ¶19

Ngele owa kala ho tedhatedha kegalikano lyoye lyokwiiyapulila Jehova, otashi ke ku kwathela wu sinde emakelo kehe. Pashiholelwa, mbela oto ka dhana nomaiyuvo gakuume kopandjokana gwagulwe? Hasho nando. Owa popya nale kutya ito ka ninga oshinima sha tya ngawo. Ngele ino pitika omaiyuvo omawinayi ga tya ngawo ga koke mungoye, nena itashi ka kala oshidhigu kungoye oku ga vudha mo. Oto ka ‘gamuka mo mondjila yaakaanakalunga.’ (Omayel. 4:14, 15) Ngele owa tedhatedha kunkene Jesus a li a tokola toko a nyanyudhe He, ito ka kakadhala okutinda kehe shoka wu shi kutya otashi yemateke Kalunga, ngoka wa iyapulila. (Mat. 4:10; Joh. 8:29) Uushili owo kutya omashongo nosho wo omamakelo ohage ku pe ompito wu ulike kutya owa tokola toko okutsikila okulandula Jesus. Ngele owe shi ningi, oto vulu okukala nuushili kutya Jehova ote ke ku kwathela. w24.03 9-10 ¶8-10