Mbela iimaliwa otayi etele ngaa omuntu elago lyashili?
SONIA omvalele yaSpania. Sho a li okanona, okwa li ha yi nayina kokugongala kOonzapo dhaJehova. Ihe sho a koko, okwa yi koLondona muIngilanda nokwa tameke iilonga mehangano limwe lyokupungula iimaliwa.
Sonia okwa li e hole iilonga ye. Okwa li ha mono iimaliwa oyindji nokwa li wo hu ungaunga niimaliwa oyindji yookastoma. Oya li iilonga yinyanyudha na Sonia okwa li te shi enditha nawa. Okwa li ha longo aluhe oowili 18 mesiku nomasiku gamwe okwa li ha kotha owala oowili mbali nenge ndatu. Onkalamwenyo ye oya li ya kwatwa ko omboko kiilonga ye. Ihe ohaluka onkalamwenyo ye oya lunduluka. Okwa kwatwa kuuvu wombanda, tashi vulika we etithwa kiilonga ye mbyoka kayi na oluthuwo. Pethimbo mpoka okwa li e na owala omimvo 30.
Sonia okwa li a sa ombinga, noondohotola odha li dha limbililwa ngele onaka popye we ngaa. Yina okwa yi mbala koIngilanda e ke mu kwathele. Sho Sonia a tameke ishewe okweenda, yina okwe mu lombwele kutya “otandi yi kokugongala nowu na okuya pamwe nangame molwaashoka itandi vulu oku ku thiga megumbo ongoye awike.” Okwa zimine ya ye pamwe. Oshizemo osha li shike?
Sonia okwa ti: “Kehe shimwe shoka ndu uvu po osha li shi li mondjila. Onda li nda pandula shili. Onda li nda nyanyukwa sho gumwe gwomaantu oyendji mboka ya li ya popitha ndje oshikando shotango sho nda gongala pOshinyanga shUukwaniilwa a ti kutya ota ka konakona Ombiimbeli nangame. Ookuume kandje yonale oye etha okutalela ndje po, ihe ookuume kandje aape oya li ye na ko nasha nangame noye hole ndje.”
Kashona nakashona, Sonia okwa tameke okupopya nokwa ningi wo ehumokomeho lyopambepo meendelelo. Okwa li a ninginithwa meni lyomumvo gumwe. Ookuume ke oyendji megongalo oya li miilonga yethimbo lyu udha, nokwa li e shi wete kutya yo oya mbilipalelwa. Sonia okwa ti: ‘Onda hala okukala nde ya fa, mokugandja kuJehova Kalunga ashihe shoka te vulu.’ Ngashingeyi oku li miilonga yethimbo lyu udha.
Sonia okwi ilongo shike monkalamwenyo ye? Okwa ti: “Nonando onda li handi mono iimaliwa oyindji, iimpwiyu nokukala ndi wete inaandi gamenwa miilonga oye etele ndje omaipulo noya yono po ombili yandje. Onda mono kutya oshinima sha simanenena monkalamwenyo osho okukala nekwatathano ewanawa naJehova, Tate yomegulu. Ngashingeyi ondi uvite shili ombili.”
Omuyapostoli Paulus okwa nyola a ti: “Mohole yeliko omo tamu zi uukolokoshi auhe. Aantu oyendji sho ya lalakanene eliko, oya puka mo mondjila yeitaalo noya yono po oomwenyo dhawo niimpwiiyu oyindji.” (1 Timoteus 6:10) Sonia okwe shi mona monkalamwenyo ye kutya oohapu ndhika odhoshili.