Omhango yohole ya shangelwa momitima
“Omhango yange ohandi i tula mo meenhulo davo, ndele handi i shangele momitima davo.” — JEREMIA 31:33.
1, 2. (a) Oshike hatu ka kundafaneni moshitukulwa eshi? (b) Jehova okwe li ulika ngahelipi komhunda yaSinai?
MOITUKULWA ivali ya tetekela, okwa li twe lihonga kutya eshi Moses kwa li ta londoloka komhunda yaSinai, oshipala shaye osha li tashi vilima ouyelele omolwokulimonikila oshinge shaJehova. Okwa li yo twa kundafana kombinga yoshiuviko osho Moses a li he liuvike nasho koshipala. Paife natu ka kundafaneni oshinima osho sha pambafana noinima oyo ya popiwa metetekelo, osho tashi ti sha kOvakriste kunena.
2 Ofimbo Moses a li komhunda yaSinai, okwa li a pewa omalombwelo kuJehova. Eshi Ovaisrael va li va ongala pomhunda yaSinai, ova li va mona euliko likumwifa li na sha naKalunga. “Opa li [omipwalakato] nomaluvadi, noshilemo shilaula sha li komhunda, nondaka yenghuma linene ya udika, opo ovanhu aveshe ava va li monhanda, ova kakama. . . . Nomhunda aishe yaSinai oya tuvikilwa komwifi, shaashi Omwene okwa londoloka momundilo. Nomwifi wa ya pombada ngaashi omwifi woluungu, nomhunda aishe oya kakama unene.” — Exodus 19:16-18.
3. Jehova okwa li a yandja Oipango Omulongo kOvaisrael okupitila mushike, noshiwana osha ka uda ko shike?
3 Jehova okwa popya novanhu okupitila momweengeli, e va pa eemhango odo da ka shiivika di li Oipango Omulongo. (Exodus 20:1-17) Onghee hano, kape na omalimbililo kutya eemhango odo oda li da dja kOmunaenghono adishe. Jehova okwa shanga eemhango odo koipelende yomamanya — oipelende oyo Moses a ka tatula po, eshi a mona Ovaisrael tava ilikana onhana yoshingoli. Jehova okwa ka shanga natango oipango oyo koipelende yomamanya. Oshikando osho eshi Moses a li ta londoloka e kwete oipelende, oshipala shaye osha li tashi vilima ouyelele. Pefimbo olo, aveshe okwa li tava ka uda ko kutya eemhango odo oda li di na eityo la fimanenena. — Exodus 32:15-19; 34:1, 4, 29, 30.
4. Omolwashike Oipango Omulongo ya li ya fimanenena?
4 Oipelende ivali oyo ya li ya shangwa Oipango Omulongo oya li ya tulwa moshikefa shehangano mOuyapukielela wetwali nokonima yaasho oya ka tulwa mOuyapukielela wotembeli. Eemhango odo da li da shangwa koipelende oda li di na omafinamhango a fimanenena e na sha nehangano lOmhango yaMoses noda li da dika po ekanghameno li na sha newiliko lopauteokratika okuwilika oshiwana shaIsrael. Eemhango odo okwa li tadi yandje oumbangi kutya Jehova okwa li ta ungaunga noshiwana she likalekelwa, sha hala okutya oshiwana sha hoololwa.
5. Omeenghedi dilipi eemhango odo Kalunga a li a yandja kOvaisrael da ulika ohole yaye?
5 Eemhango odo oda li da holola shihapu kombinga yaJehova, unene tuu ohole yaye yokuhola oshiwana shaye. Eemhango odo kada li tuu oshali i na ondilo kwaavo va li hava dulika kudo! Omuhongwanhu umwe okwa shanga a ti: “Kape na nande eemhango dopaenghedi da totwa po kovanhu, kutya nee onale ile okonima yaasho . . . tadi dulu okuyelekwa neendjovo odo daKalunga omulongo ile okudula po pudo.” Shi na sha nOmhango yaMoses aishe, Jehova okwa ti: “Ngenge tamu pwilikine ondaka yange ndee tamu diinine ehangano lange, nye mokati koiwana aishe, mu nokukala oshiwana shange mwene osheshi edu alishe olange. Ndele nye otamu ka kalela nge ouhamba wovapristeri noshiwana shiyapuki.” — Exodus 19:5, 6.
Omhango ya shangelwa momitima
6. Omhango ilipi ya li i na ondilo inene i dulife eemhango odo da li da shangwa koipelende yomamanya?
6 Doshili, eemhango odo dopakalunga oda li di na ongushu inene. Ndele mbela ou shi shii kutya Ovakriste ovavaekwa ove na oshinima osho shi na ondilo inene shi dulife eemhango odo da li da shangwa koipelende yomamanya? Jehova okwa li a xunganeka edikepo lehangano lipe olo li he li ngaashi ehangano lOmhango olo la li la ningwa noshiwana shaIsrael. Okwa ti: “Omhango yange ohandi i tula mo meenhulo davo, ndele handi i shangele momitima davo.” (Jeremia 31:31-34) Jesus, Omupokati wehangano lipe, ka li a yandja omusholondodo weemhango da shangwa kovashikuli vaye. Okwa li a findila omhango yaJehova momadiladilo nomomitima dovahongwa vaye okupitila mwaasho a popya naasho a ninga.
7. “Omhango yaKristus” oya li tete ya yandjwa koolyelye, noolyelye ve ke i tambula ko konima yefimbo?
7 Omhango oyo ohai ifanwa “omhango yaKristus.” Tete, oya li ya yandjwa koshiwana shopamhepo, “Israel yaKalunga,” ndele hakoshiwana shaIsrael shopambelela, osho sha li oludalo laJakob. (Ovagalati 6:2, 16; Ovaroma 2:28, 29) Israel yaKalunga oya fikama po mOvakriste ovavaekwa nomhepo. Konima yefimbo, ope ke uya “ongudu inene” ya dja moiwana aishe yaavo va hala okulongela Jehova, oyo ye ke limbwanga mumwe navo. (Ehololo 7:9, 10; Sakaria 8:23) Ve li “oshiunda shimwe” koshi ‘yomufita umwe,’ eengudu adishe odo mbali oda tambula ko “omhango yaKristus,” sha hala okutya, ova efa i wilike keshe osho tava ningi. — Johannes 10:16.
8. Eyooloko lilipi li li pokati kOmhango yaMoses nomhango yaKristus?
8 Mepingafano nOvaisrael vopambelela ovo va li koshi yOmhango yaMoses omolwokudalelwa moshiwana osho, Ovakriste ohava dulika komhango yaKristus nehalo liwa, ndele oinima ngaashi omihoko nosho yo onhele opo omunhu a dalelwa kai na eshi tai ti. Ohave lihongo kombinga yaJehova neendjila daye nova hala okulonga ehalo laye. Molwaashi ova shangelwa eemhango daKalunga “momitima davo,” Ovakriste ovavaekwa ihava dulika ashike kuye molwaashi ta dulu okuhandukila ovo ihava dulika kuye, noihava dulika ashike molwaashi shi li oshinakuwanifwa. Okudulika kwavo okwa kanghamena kekanghameno la fimanenena nola kola, naavo veedi dimwe ohava dulika yo molwaashi ova shangelwa omhango yaKalunga momitima davo.
Eemhango de likolelela kohole
9. Jesus okwa ulika ngahelipi kutya ohole oyo ekanghameno leemhango daJehova?
9 Ekanghameno leemhango adishe nomaufomhango aJehova otali dulu okungongwa noshitya shimwe: ohole. Osho osha kala alushe ombinga ya fimanenena yelongelokalunga lashili notashi ka kala alushe ngaho. Eshi a li a pulwa kutya oshipango shinenenene shomOmhango oshilipi, Jesus okwa nyamukula a ti: “Hola Omwene Kalunga koye nomutima woye aushe nomwenyo woye aushe neendunge doye adishe.” Noshitivali osha li: “Hola omukweni ngaashi ove u lihole mwene.” Opo nee okwa ti: “Moipango ei ivali omhango aishe novaprofeti ova kwatelelwa mo.” (Mateus 22:35-40) Kungaha, Jesus okwa ulika kutya, haMhango ashike nOipango Omulongo ya li ye likolelela kohole, ndele Omishangwa adishe dOshiheberi oda li de likolelela kuyo.
10. Otu shi shii ngahelipi kutya ohole oyo ekanghameno lomhango yaKristus?
10 Mbela ohole yokuhola Kalunga nosho yo ovanhu vakwao oyo i li yo ekanghameno lomhango oyo ya shangwa momitima dOvakriste? Osho naanaa! Omhango yaKristus oya kwatela mo ohole yokuhola Kalunga tashi di komutima noya kwatela mo oshipango shipe — osho kutya Ovakriste ove na okukala ve holafane nohole yokuliyamba mwene. Ove na okukala ve holafane ngaashi Jesus a li e hole ovahongwa, nokwa yandja omwenyo waye nehalo liwa omolwookaume kaye. Okwa li a honga ovahongwa vaye va kale ve hole Kalunga nosho yo va kale ve holafane, ngaashi ashike a li e va hole. Ohole ya tongomana oyo ve holafane nayo oyo oukwatya wa fimana oo tau va didilikifa kutya ove li Ovakriste vashili. (Johannes 13:34, 35; 15:12, 13) Jesus okwe va lombwela yo nokuli va kale ve hole ovatondi vavo. — Mateus 5:44.
11. Ongahelipi Jesus a ulika ohole yokuhola Kalunga nosho yo ovanhu?
11 Jesus okwa tula po oshihopaenenwa sha wanenena shi na sha nokuulika ohole. Eshi a li meulu e li oshishitwa shopamhepo oshinaenghono, okwa li a tambula ko nehalo liwa omhito yokuxumifa komesho oinima yaXe kombada yedu. Kakele kokuyandja omwenyo waye wopanhu opo vamwe va dule okukala nomwenyo fiyo alushe, okwa ulikila ovanhu nghee ve na okukala. Okwa li omulininipiki, omunanghenda nokwa li e na ko nasha navamwe nokwa kwafela ovo va li va lolokifwa novahepekwa. Okwa li yo a honga ovanhu ‘eendjovo domwenyo waalushe,’ sha hala okutya, okwa li ha longo noudiinini moku va kwafela va shiive Jehova. — Johannes 6:68.
12. Omolwashike taku dulu okutiwa kutya ohole yokuhola Kalunga nosho yo ovanhu vakwetu oya pambafana filufilu?
12 Doshili, ohole yokuhola Kalunga novanhu vakwetu oya pambafana filufilu. Omuyapostoli Johannes okwa ti: “Ohole oyo ya dja muKalunga . . . Ngenge pe na ou ta ti: Ame ondi hole Kalunga, ndee ta tondo omumwaxe, ye omunaipupulu. Osheshi ou e he hole omumwaxe, nande e mu wete, oye ita dulu okuhola Kalunga e he mu wete.” (1 Johannes 4:7, 20) Jehova oye odjo yohole noye oshihopaenenwa sha denga mbada mokuulika ohole. Keshe osho ta ningi otashi wilikwa kohole. Ohatu dulu okuulikila vamwe ohole, molwaashi otwa shitwa oshifeka shaye. (Genesis 1:27) Mokuulikila ovanhu vakwetu ohole, ohatu ulike yo ohole yetu yokuhola Kalunga.
Okukala nohole otashi ti okudulika
13. Opo tu kale tu hole Kalunga otu na okuninga po shike tete?
13 Ongahelipi hatu dulu okuhola Kalunga oo tu he mu wete? Onghatu ya fimanenena oyo tu na okukatuka tete oyo oku mu shiiva. Itatu dulu okukala shili tu hole ile tu lineekele omunhu tu he mu shii. Onghee hano, Eendjovo daKalunga otadi tu ladipike tu mu shiive mokulesha Ombibeli, mokwiilikana nosho yo mokweendafana naavo ve mu shii nale nove mu hole. (Epsalme 1:1, 2; Ovafilippi 4:6; Ovaheberi 10:25) Omavangeli ane oku li shili ekwafo linene, molwaashi otaa holola omaukwatya aJehova oo a ulikwa monghalamwenyo nomoukalele waJesus Kristus. Ehalo letu lokudulika kuKalunga nokuhopaenena omaukwatya aye ohali kulu neenghono eshi hatu ende hatu mu shiiva nawa nokupandula ohole oyo e tu ulikila. Doshili, ohole yokuhola Kalunga oya kwatela mo eduliko.
14. Omolwashike taku dulu okutiwa kutya eemhango daJehova kadi fi didjuu?
14 Ngeenge tu hole oohandimwe, ohatu kala tu shii osho ve hole naasho ve tonde nohatu lihumbata metwokumwe naasho ve hole. Ihatu kala twa hala okuhandukifa ovo tu hole. Omuyapostoli Johannes okwa shanga a ti: “Ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” (1 Johannes 5:3) Oipango yaye kai fi idjuu nokai fi ihapu. Ohole ohai wilike eenghatu detu. Inatu pumbwa okulihonga momutwe omusholondodo weemhango dihapu opo di kale tadi wilike eenghatu detu keshe, ndele ohatu wilikwa kohole yokuhola Kalunga. Ngeenge otu hole Kalunga, ohatu hafele okulonga ehalo laye. Kungaha, ohatu kala twa hokiwa kuKalunga nohatu mono alushe ouwa mewiliko laye. — Jesaja 48:17.
15. Oshike tashi ke tu linyengifa tu hopaenene Jehova? Shi yelifa.
15 Ohole yokuhola Kalunga ohai tu linyengifa tu hopaenene omaukwatya aye. Ngeenge tu hole omunhu, ohatu kala twa hokwa omaukwatya aye nohatu kendabala okukala twe mu fa. Konakona ekwatafano olo li li pokati kaJehova naJesus. Ova kala pamwe meulu, tashi dulika omido omamiliyona omayovi. Ova kala ve ninafane ohole yomoule noyoshili. Molwaashi Jesus okwa li a fa filufilu Xe womeulu, okwa li ta dulu okulombwela ovahongwa vaye kutya: “Ou [a] mona nge, oye a mona Tate.” (Johannes 14:9) Eshi hatu mono eshiivo lihapu li na sha naJehova nOmona waye nokukulika olupandu li na sha navo, ohatu linyengifwa tu va hopaenene. Ohole yetu yokuhola Jehova nosho yo ekwafo lomhepo yaye iyapuki otai ke tu dulifa tu ‘lidule omunhu mukulu pamwe noilonga yaye, notu djale omunhu mupe.’ — Ovakolossi 3:9, 10; Ovagalati 5:22.
Ohole tai tulwa moilonga
16. Ongahelipi ohole yokuhola Kalunga nosho yo ovanhu vakwetu tai ulikwa koilonga yetu yokuudifa noyokuhonga?
16 Tu li Ovakriste, ohatu efa ohole yokuhola Kalunga nosho yo ovanhu vakwetu i tu linyengife tu kufe ombinga moilonga yokuudifa Ouhamba noyokuninga ovanhu ovahongwa. Ngeenge hatu ningi ngaho, ohatu hafifa Jehova Kalunga, “ou a hala ovanhu aveshe va xupifwe nova fike meshiivo loshili.” (1 Timoteus 2:3, 4) Onghee hano, ohatu dulu okumona ehafo mokukwafela vamwe va kale va shangelwa omhango yaKristus momitima davo. Nohatu kala twa hafa oku va mona tava lundulula ounhu wavo ndele tava hopaenene omaukwatya aJehova. (2 Ovakorinto 3:18) Doshili, okukwafela vamwe va shiive Kalunga oyo oshali i na ondilo inene oyo hatu dulu oku va pa. Ovo va ninga ookaume kaJehova otava dulu okuhafela oukaume naye fiyo alushe.
17. Omolwashike shi li pandunge okukulika ohole yokuhola Kalunga nosho yo okuhola ovanhu vakwetu ponhele yokukala tu hole oinima yopamaliko?
17 Otu li mounyuni omo ovanhu va lenga neenghono oinima yopamaliko nove i hole. Ndelenee oinima yopamaliko itai kala po fiyo alushe. Otai dulu okuvakwa po ile i nyonauke. (Mateus 6:19) Ombibeli otai tu londwele tai ti: “Ounyuni otau xulu po pamwe nokahalu [kao]; ndelenee ou ta longo ehalo laKalunga, oye ta kala alushe.” (1 Johannes 2:16, 17) Heeno, Jehova ota ka kala po fiyo alushe nosho yo ovo ve mu hole nohave mu longele. Mbela kashi li pandunge okukulika ohole yokuhola Kalunga nosho yo ovanhu vakwetu, ponhele yokulalakanena oinima yomounyuni oyo i li po ashike pakafimbo?
18. Ongahelipi omutumwa umwe a ulika ohole yokuliyamba mwene?
18 Ovo hava lalakanene ohole ohava fimanekifa Jehova. Konakona oshihopaenenwa shaSonia, omutumwa muSenegal. Okwa li ha konakona Ombibeli nomukainhu wedina Heidi, oo a li a pewa ombuto yo-HIV komushamane waye e he fi omwiitaveli. Konima eshi omushamane waye a fya, Heidi okwa li a ninginifwa, ndele diva konima yaasho, oukolele waye owa ka naipala nokwa ka ya meembete omolwo-AIDS. Sonia okwa hokolola a ti: “Ovapangi ova ninga keshe osho va li tava dulu, ndele ova li vanini momuvalu. Ovaliyambi nehalo liwa okudja meongalo ova li va pulwa va file oshisho Heidi eshi a li moshipangelo. Onguloshi ya ka landula ko, onda kala omutumba pemate, popepi nombete yaye nonde mu kwafela fiyo osheshi a fya. Ndokotola oo a li moilonga okwa ti: ‘Oupyakadi munene oo tu na oyoo kutya, nokuli novapambele luhapu ohava fiye po oilyo yomaukwaneumbo ngeenge ve shi shii kutya oi na o-AIDS. Omolwashike ove ou ino mu pamba, noina mu dja koshilongo shimwe, nou he fi womuhoko umwe wa dimina okutula omwenyo woye moshiponga omolwaye?’ Onde mu yelifila kutya pataleko lange, fye naHeidi okwa li tu na ekwatafano lopofingo, twa fa twa dalwa kuina imwe nokuxe imwe. Omolwekwatafano lange naHeidi, oo a li a fa omumwameme pambelela, onda li nda hafela oku mu fila oshisho.” Ndele nande hauxuuninwa Heidi okwa ka fya, Sonia ka li e wete a hepifa efimbo laye omolwoku mu fila oshisho pahole.
19. Molwaashi otu na omhango yaKalunga momitima detu, otu na okulongifa omhito keshe tu ninge shike?
19 Oihopaenenwa ihapu i na sha nohole yeliyambo mwene otai dulu okumonika mokati kovapiya vaJehova. Kape na omusholondodo weemhango wa shangwa oo tau didilikifa oshiwana shaKalunga kunena. Ponhele yaasho, otu wete ewanifo leendjovo odo da shangwa mOvaheberi 8:10, tadi ti: “Ehangano olo handi ke li ninga neumbo laIsrael omafiku oo ngenge a pita po, oleli, Omwene osho ta ti: Omhango yange ohandi ke i tula mo momadiladilo avo nohandi ke i shangela momitima davo, nosho ngaha ohandi ka kala Kalunga kavo, ovo notava ka ninga oshiwana shange.” Natu kale alushe twa lenga omhango yohole oyo Jehova a shangela momitima detu mokulongifa omhito keshe tu ulike ohole.
20. Omolwashike omhango yaKristus i li emona li na ondilo i he fi kuyelekwa?
20 Kashi hafifa tuu okulongela Kalunga pamwe noumwainafana womounyuni aushe oo hau ulike ohole ya tya ngaho! Ovo va shangelwa omhango yaKristus momitima davo ove na emona li na ondilo i he fi kuyelekwa mounyuni ou u he na ohole. Kave holike ashike kuJehova, ndele ohava hafele yo ekwatafano lopahole la kola loumwainafana. “Taleni, oshiwa nosha wapala shi fike peni, ovamwatate ngenge tava kala kumwe nombili.” Nonande Eendombwedi daJehova oda dja moiwana ihapu, hadi popi omalaka mahapu noda dja momaputuko a yooloka, ohadi hafele oukumwe wopalongelokalunga oo itau yelekwa nasha. Oukumwe wa tya ngaho ohau tu hokwifa kuJehova. Omupsalme okwa shanga a ti: “Oko tuu [mokati kovanhu va hangana mohole] Omwene a yandjela ko enangeko noupuna, olo omwenyo fiyo alushe.” — Epsalme 133:1-3.
Oto dulu okunyamukula?
• Oipango Omulongo oya li ya fimana shi fike peni?
• Omhango ya shangelwa momitima oshike?
• Ohole otai dana onghandangala ilipi ‘momhango yaKristus’?
• Omeenghedi dilipi hatu dulu okuulika kutya otu hole Kalunga nosho yo ovanhu vakwetu?
[Efano pepandja 19]
Ovaisrael ova li ve na eemhango da shangwa koipelende yomamanya
[Efano pepandja 20]
Ovakriste ova shangelwa omhango yaKalunga momitima davo