Kala u hole Kalunga oo e ku hole
“Hola Omwene Kalunga koye nomutima woye aushe nomwenyo woye aushe neendunge doye adishe.” — MATEUS 22:37.
1, 2. Oshike tashi dulika sha li sha ningifa Ovafarisai va pule kutya oshipango shinene oshilipi?
OSHIPANGO shilipi shomOmhango yaMoses, oyo ya li i na oipango i dule po 600, sha li sha fimana unene shi dule ikwao? Mbela oshipango shi na sha nomayambo, molwaashi omayambo okwa li haa ningwa opo omunhu a diminwe po omatimba aye kuKalunga noku mu pandule? Ile osha li oshipango shi na sha nepitotanda olo la li la fimana molwaashi ola li edidiliko lehangano olo Jehova a li a ninga naAbraham? (Genesis 17:9-13) Nopehe na omalimbililo, oshinima osho osha li hashi tuwa eemhata neenghono kOvafarisai vopefimbo laJesus.
2 Mepingafano naasho, ovanhu ovo va li va kanyatela keenghulunghedi ova li hava diladila kutya molwaashi oshipango keshe osho Kalunga a yandja osha fimana, inashi yuka okutya ope na oshipango shimwe osho sha fimana shi dule ikwao, nonande ope na imwe oyo tai monika ya fa inai fimana unene. Ovafarisai ova li va pula Jesus epulo olo va li hava tu eemhata, tashi dulika va li tava diladila kutya ota ka tya sha osho tashi ka ningifa ovanhu vaha kale ve mu lineekela vali. Umwe womOvafarisai okwa li e uya kuJesus ndele te mu pula ta ti: “Oshipango shinene shomomhango oshilipi po?” — Mateus 22:34-36.
3. Jesus okwa ti oshipango shinene oshilipi?
3 Enyamukulo olo Jesus a li a yandja kepulo olo a li a pulwa kOmufarisai ola fimana neenghono kufye kunena. Mokunyamukula epulo olo, okwa tumbula oshinima osho tashi twikile okudana onghandangala ya fimanenena melongelokalunga lashili. Okwa tofa muDeuteronomion 6:5 a ti: “Hola Omwene Kalunga koye nomutima woye aushe nomwenyo woye aushe neendunge doye adishe. Oshipango shinene noshotete osho tuu eshi.” Nonande Omufarisai oo okwa li ashike a pula Jesus oshipango shimwe, Jesus okwa li e mu lombwela vali shimwe sha wedwa po, a tofa muLeviticus 19:18, a ti: “Noshitivali shi fike pusho, osheshi, Hola omukweni ngaashi ove u lihole mwene.” Opo nee Jesus okwa li a yelifa kutya oipango oyo ivali oyo efina lelongelokalunga la koshoka. Ndele opo a henuke okupulwa a popye oipango ikwao ya fimana palandulafano layo, okwa xulifa a ti: “Moipango ei ivali omhango aishe novaprofeti ova [kwatelwa] mo.” (Mateus 22:37-40) Moshitukulwa eshi ohatu ka kundafana oshipango shinene shomoipango oyo ivali. Omolwashike tu na okukala tu hole Kalunga? Ongahelipi hatu dulu okuulika kutya otu hole Kalunga? Nongahelipi hatu dulu okukulika ohole yokuhola Kalunga? Osha fimanenena okumona omanyamukulo komapulo oo, molwaashi otu na okukala tu hole Jehova nomutima wetu aushe, nomwenyo wetu aushe nosho yo neendunge detu adishe, opo tu mu hafife.
Ohole oya fimana
4, 5. (a) Omolwashike Omufarisai oo a li a pula Jesus epulo a li ina kumwifwa kenyamukulo olo Jesus a li e mu pa? (b) Oshike sha fimana kuKalunga shi dulife omayambo?
4 Omufarisai oo a li a pula Jesus epulo ka li a halukifwa kenyamukulo olo Jesus a li e mu pa. Omufarisai oo okwa li e shii kutya ohole yokuhola Kalunga oi li oshitukulwa sha fimana shelongelokalunga lashili, nonande ovanhu vahapu kava li hava ulike ohole ya tya ngaho. Ovaheberi ova li hava ilikana moinagoga yavo eilikano lOshiheberi lokudimina eitavelo, olo la li la kwatela mo eendjovo odo tadi hangwa muDeuteronomion 6:4-9, omo Jesus a li a tofa. Mehokololo la faafana olo tali hangwa muMarkus, Omufarisai oo okwa li a tya kuJesus: “Heeno, omuhongi, owa popya doshili, nokutya, Oye umwe aeke, nokaku na mukwao, Oye tuu aeke. Noku mu hola komutima aushe nokeendunge adishe nokeenghono adishe, nokuhola mukweni ngaashi u lihole mwene, [oko] oku dule oiyandjwa aishe yexwikilo nomayambo makwao.” — Markus 12:32, 33.
5 Nonande Omhango oya li hai pula ovanhu va yandje omayambo, Kalunga okwa li ha hokwa omunhu oo te linyengifwa kohole tai di komutima. Kalunga okwa li ha hokwa omunhu oo te mu yambele oshiyandja te linyengifwa kohole noketilokalunga shi dulife oo a li e mu yambela eedi omayovi nelinyengotomheno la puka. (Mika 6:6-8) Diladila kehokololo lomufiyekadi ohepele oo Jesus a li a didilika eshi a li kotembeli muJerusalem. Ouhaulapa vavali ovo a li a tula moshikefa shoiyandjwa kava li nokuli tava dulu okulanda oshiyandja shimwe. Ndele nande ongaho, eyambidido olo a li a yandja, e shi ninga omolwokuhola Jehova tashi di komutima, ola li la hokiwa kuJehova neenghono shi dulife omayambidido mahapu oo a li a yandjwa koipuna omolwouhapu woupuna wayo. (Markus 12:41-44) Itashi tu tu tuu omukumo okushiiva kutya Jehova oha kala a hafa neenghono ngeenge hatu ulike kutya otu mu hole, kashi na nee mbudi kutya eenghalo detu oda tya ngahelipi!
6. Paulus okwa ulika ngahelipi kutya ohole oi li oukwatya wa fimana?
6 Mokudivilika kutya ohole oya fimana shi fike peni melongelokalunga lashili, omuyapostoli Paulus okwa shanga a ti: “Nande ndi tonge omalaka ovanhu novaengeli, ndelenee ame nghi nohole, onda ninga oshivela shitwima tashi lili, nongaashi ongedjo tai kwelengedja. Nonande ondi kale ndi noshali [yokuprofeta] nondi shiive oiholekwa aishe nondi kale ndi neshiivo alishe, ndele nande ondi kale ndi neitavelo alishe lokudikula eemhunda, ndelenee ame nghi nohole, ame nghi fi sha. Nonande ondi yandjaule oinima aishe ndi palule eehepele, ile nande ondi liyandje olutu lange li xwikwe po, ame nghi nohole, ngeno kashi na eshi tashi kwafa nge.” (1 Ovakorinto 13:1-3) Osha yela kutya opo Kalunga a kale a hokwa oilonga oyo hatu mu longele, otwa pumbwa okukala nohole. Ndele ongahelipi hatu dulu okuulika kutya otu hole Jehova?
Nghee hatu dulu okuulika kutya otu hole Jehova
7, 8. Ongahelipi hatu dulu okuulika kutya otu hole Jehova?
7 Ovanhu vahapu ova itavela kutya ohole oyo eliudo olo hatu kala tu udite ndele itatu dulu lela oku li pangela; ngaashi pashihopaenenwa omaliudo oo omulumenhu ile omukainhu ha kala e uditile omunhu woukashike kookanhu wa yooloka ko kuwaye. Ohole yashili kai fi ashike oshinima shopamaliudo, ndele ohai ulikwa okupitila moilonga. Ombibeli otai ti kutya ohole “ondjila iwa unene” noi li oshinima osho tu na ‘okulalakanena.’ (1 Ovakorinto 12:31; 14:1) Ovakriste otava ladipikwa vaha kale ashike ve hole ‘nondjovo ile nelaka ndelenee onoilonga nomoshili.’ — 1 Johannes 3:18.
8 Ohole yokuhola Kalunga ohai tu linyengifa tu longe osho tashi mu hafifa notu popile nokuyambidida ounamapangelo waye okupitila meendjovo nomoilonga. Ohai tu linyengifa tu henuke okukala tu hole ounyuni nosho yo eenghedi dao doukolokoshi. (1 Johannes 2:15, 16) Ovo ve hole Kalunga ove tonde owii. (Epsalme 97:10) Ohole yokuhola Kalunga oya kwatela mo yo okukala tu hole ovanhu vakwetu, nohatu ka kundafana kombinga yaasho moshitukulwa tashi landula. Kakele kaasho, ovo ve hole Kalunga ove na okudulika kuye. Ombibeli otai ti: “Ohole yokuhola Kalunga oyo tuu ei nokutya, tu diinine oipango yaye.” — 1 Johannes 5:3.
9. Jesus okwa ulika ngahelipi kutya oku hole Kalunga?
9 Jesus okwa ulika osho okuhola Kalunga taku ti shili. Ohole oya li ye mu linyengifa a dje meulu noku uye kombada yedu. Oya li ye mu linyengifa a fimanekife Xe okupitila moilonga oyo a li a longa nosho yo mwaasho a li a honga. Oya li nokuli ye mu linyengifa a ‘dulike fiyo omefyo.’ (Ovafilippi 2:8) Okudulika kwa tya ngaho, oko ku li euliko lohole yaye, okwe shi ningifa tashi shiiva opo ovanhu ovadiinini va dule okuyukipalifwa kuKalunga. Paulus okwa shanga a ti: “Ngaashi kokuhadulika kwomunhu ou umwe [Adam] ava vahapu va ninga ovalunde, osho yo kokudulika kwaau umwe [Kristus Jesus] ava vahapu tava ningi ovayuki.” — Ovaroma 5:19.
10. Omolwashike ohole yokuhola Kalunga tai pula tu kale hatu dulika kuye?
10 Ngaashi Jesus, nafye ohatu ulike kutya otu hole Kalunga mokudulika kuYe. Omuhongwa waJesus omuholike, Johannes, okwa shanga a ti: ‘Ohole oyo ei, tu ende panghedi yoipango yaye.’ (2 Johannes 6) Ovo ve hole Kalunga shili ohava kala va hala okuwilikwa kuye. Molwaashi ove shii kutya itava dulu okuyukifa eenghatu davo nomupondo kuvo vene, ohave lineekele mounongo waKalunga nohava dulika kewiliko laye lopahole. (Jeremia 10:23) Ohava hopaenene ovanhu ovanaendunge vomuBerea shonale, ovo va li va tambula ko etumwalaka laKalunga “nohokwe,” nova li va halelela okulonga ehalo laye. (Oilonga 17:11) Ovaberea ova li va konakona Omishangwa noukeka opo va ude ko nawa ehalo laKalunga, naasho okwa li she va kwafela va ulike ohole yavo yokuhola Kalunga mokudulika kuye.
11. Okuhola Kalunga nomutima wetu aushe, neendunge detu adishe, nomwenyo wetu aushe nosho yo neenghono detu adishe otashi ti shike?
11 Ngaashi Jesus a popya, ohole yokuhola Kalunga oya kwatela mo okukala tu mu hole nomutima wetu aushe, neendunge detu adishe, nomwenyo wetu aushe nosho yo neenghono detu adishe. (Markus 12:30, OB-1986) Ohole ya tya ngaho ohai di komutima, sha hala okutya, oi na okukala ya kwatela mo omaliudo etu, omahalo etu nomadiladilo etu omoule, nohai tu linyengifa tu kale twa halelela okuhafifa Jehova. Otu hole yo Jehova nomadiladilo etu, sha hala okutya, ohatu mu longele tu na eshiivo li na sha nomaukwatya aye, omifikamhango daye nosho yo omalalakano aye. Ohatu tange Jehova noku mu longela nomwenyo wetu aushe, osho sha kwatela mo okulongifa omalutu etu nokukalamwenyo kwetu akushe. Ohatu longifa yo eenghono detu moku mu longela nomoku mu hambelela.
Omolwashike tu na okukala tu hole Jehova?
12. Omolwashike Kalunga a hala tu kale tu mu hole?
12 Etomheno limwe molwaashi tu na okukala tu hole Jehova, omolwaashi okwa hala tu hopaenene omaukwatya aye. Oye odjo yohole nokuli yo oshihopaenenwa sha denga mbada shohole. Omuyapostoli Johannes okwa nwefwa mo a shange a ti: “Kalunga Oye ohole.” (1 Johannes 4:8) Ovanhu otwa shitwa oshifeka shaKalunga, sha hala okutya, otwa shitwa tu na ohole. Ounamapangelo waJehova nao owe likolelela kohole. Kalunga oha hokwa ashike ovo have mu longele molwaashi ve hole onghedi yaye yokupangela iyuki. Doshili, opo oishitwa yaye aishe i kale mombili nomoukumwe oya pumbwa oukwatya wohole.
13. (a) Omolwashike Ovaisrael va li va lombwelwa taku ti: “Hola Omwene Kalunga koye”? (b) Omolwashike sha yuka eshi Kalunga a hala tu kale tu mu hole?
13 Etomheno limwe vali molwaashi tu hole Jehova omolwaashi otu na olupandu laasho e tu ningila. Dimbuluka kutya Jesus okwa li a lombwela Ovajuda a ti: “Hola Omwene Kalunga koye.” Kava li tava pulwa va kale ve hole oshikalunga shihe na ko nasha navo ile shihe shiivike. Ova li tava pulwa va kale ve hole Jehova Kalunga kavo, oo a li he va ulikile ohole. Oye a li e va mangulula moupika waEgipti noku va twala mEdu lEudaneko. Okwa li e va amena, e va palula noku va fila oshisho, nokwa li e va pa outekuduliko wopahole. Nokunena, Jehova oku li Kalunga ketu, oo e tu yandjela Omona waye e tu kulile opo tu dule oku ka mona omwenyo waalushe. Onghee hano, oshi li pandunge eshi Jehova a hala tu kale tu mu hole. Otu hole Jehova molwaashi oye a “kala e tu hole tete.” — 1 Johannes 4:19.
14. Omonghedi ilipi ohole yaJehova ya fa oyo omudali omunahole e hole nayo ovana vaye?
14 Ohole yaJehova yokuhola ovanhu oya fa ohole oyo omudali omunahole e hole nayo ovana vaye. Ovadali ovanahole ohava longo noudiinini oule womido opo va file oshisho ovana vavo, hava ningi omaliyambo mahapu, nonande inava wanenena. Ovadali ohava hongo ovana vavo, ohave va ladipike, ohave va yambidida nohave va pe outekuduliko, molwaashi ova hala ovana vavo va kale va hafa nova kule ve li monghalo iwa. Mbela ovadali ohava kala va hala ovana vavo ve va ningile shike? Ohava kala va hala ovana vavo va kale ve va hole nova kaleke momadiladilo oinima oyo ve va honga omolwouwa wavo. Mbela inashi yuka eshi Tate yetu womeulu oo a wanenena a hala tu kale tu mu hole noku mu pandula omolwoinima aishe oyo e tu ningila?
Nghee hatu dulu okukulika ohole yokuhola Kalunga
15. Omunhu oku na okukatuka onghatu ilipi tete opo a kale e hole Kalunga?
15 Itatu dulu okumona Kalunga komudidi ile okuuda ondaka yaye. (Johannes 1:18) Ndele nande ongaho, ote tu shivi tu kale tu na ekwatafano lopofingo naye. (Jakob 4:8) Mbela osho otashi shiiva ngahelipi? Onghatu yotete oyo omunhu e na okukatuka opo a kale e hole omunhu oku na oku mu shiiva nawa. Oshidjuu okukala tu hole shili omunhu ngeenge katu mu shii lela. Jehova okwe tu pa Eendjovo daye, Ombibeli, opo tu lihonge shi na sha naye. Nomolwaasho he tu ladipike okupitila mehangano laye tu kale hatu lesha Ombibeli pandjikilile. Ombibeli otai tu hongo shi na sha naKalunga, omaukwatya aye nosho yo shi na sha nanghee a li a ungaunga novanhu pefimbo lonale. Mokudilonga kombinga yoinima oyo, olupandu letu nosho yo ohole yetu yoku mu hola otai kulu. — Ovaroma 15:4.
16. Ongahelipi okudilonga kombinga youkalele waJesus taku kulike ohole yetu yokuhola Kalunga?
16 Onghedi ya fimana omo hatu dulu okukulika ohole yetu yokuhola Jehova omokudilonga kombinga yokukalamwenyo kwaJesus nosho yo oukalele waye. Jesus okwa li e na omaukwatya a fa aXe filufilu, nomolwaasho a li a dula okutya: “Ou [a] mona nge, oye a mona Tate.” (Johannes 14:9) Jesus okwa li a nyumuna omonamati ewifa lomufiyekadi wonhumba. Mbela ino kumwa kolukeno olo Jesus a li a udila omufiyekadi oo? (Lukas 7:11-15) Mbela kashi hokwifa okushiiva kutya Omona waKalunga oo e li omunhu munenenene oo a li ko nale, okwa li a kosha nelininipiko eemhadi dovahongwa vaye? (Johannes 13:3-5) Mbela itashi ku kumu komutima okushiiva kutya nonande Jesus okwa li munene nomunongo e dule ovanhu aveshe, ovanhu aveshe okwa li hava popi naye noupu, mwa kwatelwa nokuli nounona? (Markus 10:13, 14) Mokudilonga nolupandu kombinga yoinima oyo i na sha nonghalamwenyo yaJesus, ohatu ka kala ngaashi Ovakriste ovo Petrus a shanga shi na sha navo a ti: “[Jesus] Oye ou mu mu hole, nande inamu mu mona.” (1 Petrus 1:8) Eshi ohole yetu yokuhola Jesus tai kulu, ohole yetu yokuhola Jehova nayo otai kulu.
17, 18. Omokudilonga komafiloshisho opahole elipi taku ke tu kwafela tu kulike ohole yokuhola Kalunga?
17 Onghedi imwe vali omo hatu dulu okukula mohole yetu yokuhola Kalunga omokudilonga kombinga yomafiloshisho mahapu opahole oo e tu pa opo tu hafele okukalamwenyo, ngaashi ewapalo leshito, oikulya i lili noku lili i na omulyo, eendafano lopahole nookaume vawa nosho yo oinima ikwao ihapu iwa oyo hai tu hafifa noku tu mbilipaleka. (Oilonga 14:17) Apa ngoo pe fike okulihonga shihapu kombinga yaKalunga, opo ngoo tapa ka kala pe fike olupandu letu loku mu pandula omolwouwa waye uhe fi okuyelekwa nosho yo okuyandja kwaye nehalo liwa. Ngeenge to diladila kombinga yoinima aishe oyo Jehova e ku ningila pauhandimwe, mbela ito dimine kutya osha yeleka okukala tu mu hole pauhandimwe?
18 Imwe yomeeshali dihapu odo Kalunga e tu pa oyo oufembanghenda wokupopya naye meilikano efimbo keshe, notu shii kutya oha udu omailikano etu molwaashi oku li “Omuudi womailikano.” (Epsalme 65:3) Jehova okwa pa Omona waye oufembanghenda wokupangela nosho yo okutokola. Ndelenee ina pa nande oumwe oufembanghenda wokupwilikina omailikano etu, nokuli nOmona waye. Oye mwene ha pwilikine komailikano etu. Molwaashi ohe tu file oshisho pahole pauhandimwe, ohashi tu ehenifa popepi naye.
19. Omaudaneko aJehova elipi hae tu ehenifa popepi naye?
19 Ohatu ehene yo popepi naJehova ngeenge hatu diladila kwaasho a udanekela oku ka ningila ovanhu monakwiiwa. Okwa udaneka kutya ota ka xulifa po omikifi, oluhodi nefyo. (Ehololo 21:3, 4) Ngeenge ovanhu va fiki mewaneneno, kape na nande oumwe oo ta ka kala e na epolimano, a teka omukumo ile a wililwa po komaupyakadi. Ondjala, oluhepo noita itai ka kala po vali. (Epsalme 46:10; 72:16) Edu otali ka ninga oparadisa. (Lukas 23:43) Jehova ota ka etela ovanhu omanangeko noupuna molwaashi okuhole ovanhu, ndele hamolwaashi ngeno e na oku shi ninga.
20. Moses okwa popya shi na sha nomauwa elipi oo haa etifwa kokukala tu hole Jehova?
20 Doshili, otu na omatomheno a kola okukala tu hole Kalunga ketu nokukulika ohole ya tya ngaho. Mbela oto ka twikila okukulika ohole yoye yokuhola Kalunga mokweefa a wilike eenghatu doye? Keshe umwe womufye oku na okuninga etokolo laye mwene. Moses okwa li a mona ouwa mokukulika ohole yaye yokuhola Jehova. Moses okwa li a lombwela Ovaisrael vonale a ti: “Hoololeni . . . omwenyo, mu shiive okukala nomwenyo, nye noludalo leni, ngeenge mu hole Omwene Kalunga keni nokupwilikina ondaka yaye nokukanyatela muye. Osheshi osho oukalimwenyo woye noule womafiku oye.” — Deuteronomion 30:19, 20.
[Efano pepandja 18]
Jehova oha kala a hafa neenghono ngeenge hatu ulike kutya otu mu hole
[Efano pepandja 21]
‘Ou a mona nge, oye a mona Tate.’ — Johannes 14:9
[Efano pepandja 22]
Oto dimbuluka?
• Omolwashike sha fimanenena okukala tu hole Jehova?
• Ongahelipi hatu dulu okuulika kutya otu hole Kalunga?
• Omatomheno elipi tu na okukala tu hole Jehova?
• Ongahelipi hatu dulu okukulika ohole yetu yokuhola Kalunga?