Okuhola omukweni otashi ti shike?
“Hola omukweni ngaashi ove u lihole mwene.” — MATEUS 22:39.
1. Ongahelipi hatu dulu okuulika kutya otu hole Kalunga?
JEHOVA okwa hala ovapiya vaye ve mu longele ngahelipi? Jesus okwa ngonga enyamukulo kepulo olo, a longifa ashike eendjovo di li pauxupi ndele otadi ti sha neenghono. Okwa ti kutya oshipango shinene osho okuhola Jehova nomutima wetu aushe, nomwenyo wetu aushe, neendunge detu adishe nosho yo neenghono detu adishe. (Mateus 22:37; Markus 12:30) Ngaashi twe lihonga moshitukulwa sha tetekela, otwa mona kutya ohole yokuhola Kalunga oya kwatela mo okudulika kuye nokudiinina oipango yaye, notu mu hole molwaashi oye a kala e tu hole tete. Molwaashi otu mu hole, kashi fi omutengi kufye okulonga ehalo laye, ndele oshi li oshinima shihafifa. — Epsalme 40:9; 1 Johannes 5:2, 3.
2, 3. Omolwashike tu na okuyandja elitulemo koshipango osho tashi tu lombwele tu kale tu hole vakwetu ngaashi tu lihole fye vene, naasho otashi pendula omapulo elipi?
2 Jesus okwa popya kutya oshipango oshitivali shinene, osho sha pambafana noshipango shotete shinene, osho: “Hola omukweni ngaashi ove u lihole mwene.” (Mateus 22:39) Paife ohatu ka yukifa elitulemo letu koshipango osho shitivali, nope na etomheno liwa loku shi konakona. Otu li momafimbo omo ovanhu vahapu ve lihole vo vene nokave na ko nasha novanhu vakwao. Eshi omuyapostoli Paulus a li a nwefwa mo a shange shi na sha ‘nomafiku axuuninwa,’ okwa popya kutya ovanhu otava ka kala ve lihole vo vene, ve hole oimaliwa nosho yo ouhalu mwii. Okwa li yo a xunganeka kutya ovanhu vahapu otava ka kala ‘vehe nohole yopaushitwe.’ Etoloko limwe lOmbibeli ola ti kutya otava ka kala “vehe na ohole yopaushitwe yokuhola omaukwaneumbo avo.” (2 Timoteus 3:1-4, yelekanifa NW.) Jesus Kristus okwa li a xunganeka a ti: “Vahapu . . . tava kengelelafana ndee tava tondafana. . . . Ohole yavahapu otai talala.” — Mateus 24:10, 12.
3 Ndele didilika kutya Jesus ina tya kutya ohole yakeshe umwe otai ka talala. Momafimbo onale, opa li ovo ve hole Jehova nova li have mu longele monghedi oyo ta hokwa. Nokunena, ope na ovo tava ningi sha faafana, omolwohole yavo yokuhola Jehova. Ovo ve hole shili Jehova ohava kendabala okutala ko ovanhu vakwao ngaashi ye he va tale ko. Ndele oovakwetu ovo tu na okukala tu hole ovo oolyelye? Omeenghedi dilipi tu na oku va ulikila ohole ya tya ngaho? Omishangwa otadi dulu oku tu kwafela tu mone omanyamukulo komapulo oo a fimana.
Omukwetu Olyelye?
4. MuLeviticus etukulwa eti-19, Ovajuda ova li va lombwelwa va kale ve hole oolyelye?
4 Eshi Jesus a lombwela Omufarisai wonhumba kutya oshipango oshitivali shinene osho okuhola mukweni ngaashi u lihole mwene, okwa li a tofa oshipango osho mOmhango oyo ya li ya pewa Ovaisrael. Oshipango osho otashi hangwa muLeviticus 19:18. Metukulwa olo eti-19, Ovajuda ova li va lombwelwa kutya ove na okutala ko ovanhu vomoiwana imwe i lili ve li yo oovakwao. Ovelishe 34 oya ti: “Omunailongo ou ta kala punye, na talwe kunye, oye ngaashi omudalelwa womoshilongo, ou e li mokati keni. Ndele mu noku mu hola ngaashi mu lihole nye vene, osheshi nanye yo mwa li ovanailongo medu laEgipti.” Onghee hano, Ovajuda ova li ve na okukala ve hole nokuli novanhu ovo vehe fi vomoshiwana shavo, unene tuu ovo va li ve lidilululifwa ndele tava ningi veitavelo lOshijuda.
5. Ovajuda ova li va tala ko ngahelipi oshipango osho tashi ti hola mukweni ngaashi u lihole mwene?
5 Ndele ovawiliki vOvajuda vopefimbo laJesus ova li ve na etaleko limwe li lili; pashihopaenenwa, vamwe ova li hava hongo ovanhu kutya outumbulilo “kaume” nosho yo “mukweni” otau ulike ashike kOvajuda. Pataleko lavo, ovo vehe fi Ovajuda ova li ve na okutondwa. Ovahongi ovo ova li tava diladila kutya ovatilikalunga ove na okutonda filufilu ovahenakalunga. Embo limwe lomauyelele ola ti: “Onghalo ya tya ngaho oya li tai xwaxwameke outondwe, nomolwaasho outondwe owa li wa hapupala.”
6. Oitwa ivali ilipi Jesus a popya eshi a li ta yelifa kombinga yohole yokuhola vamwe?
6 MEudifo laye lokOmhunda, Jesus okwa li a popya shi na sha nohole yokuhola vamwe, a yelifa nawa kutya oolyelye tu na okukala tu hole. Okwa ti: “Onye omwa uda kwa tiwa: Hola omukweni, tonda omutondi woye. Ndelenee Ame ohandi mu lombwele: Holeni ovatondi veni, ilikaneneni ovahepeki veni; opo mu ninge ovana vaXo yeni [womeulu], osheshi etango laye ote li pitifile ava vaii naava vawa, nodula ote i lokifile ovayuki naava ve he fi ovayuki.” (Mateus 5:43-45) Pomhito oyo, Jesus okwa li a popya oitwa ivali ya fimana. Shotete oshosho kutya, Jehova omunefilonghenda noha yandje nehalo liwa kovanhu aveshe, ovo vawa naavo vai. Oshitwa oshitivali oshosho kutya, otu na okuhopaenena oshihopaenenwa shaJehova.
7. Oshike hatu lihongo meyele laJesus li na sha nOmusamaria omunamutimanghenda?
7 Pomhito imwe, omunongo umwe wOmhango Omujuda okwa li a pula Jesus a ti: “Omukwetu olyelye?” Jesus okwa li e mu nyamukula ta longifa eyele li na sha nOmusamaria oo a li a kwafela omulumenhu Omujuda, oo a li a hangwa kovanyeki ndele tave mu denge noku mu nyeka oinima yaye. Nonande Ovajuda koonono ova li ve tonde Ovasamaria, Omusamaria womeyele laJesus okwa li a manga oipute yOmujuda nokwe mu twala ponhele ya amenwa, mongulu yovaenda, omo a li ta xungwa opo a veluka. Oshike hatu lihongo meyele olo? Oshilihongomwa oshosho kutya katu na ashike okukala tu hole ovanhu vomuhoko wetu, voshiwana shetu ile velongelokalunga letu. — Lukas 10:25, 29, 30, 33-37.
Eenghedi omo hatu dulu okuulika kutya otu hole ovanhu vakwetu
8. Etukulwa eti-19 laLeviticus ola yelifa ngahelipi shi na sha nanghee Ovaisrael va li ve na okuulika ohole?
8 Ngaashi ashike ohole yokuhola Kalunga i na okuulikwa pailonga, ohole yokuhola ovanhu vakwetu nayo oi na yo okuulikwa pailonga, ndele kai fi ashike eliudo longaho. Opo tu ude ko nawa oshinima osho, oshiwa okutala ketukulwa eti-19 laLeviticus alishe, olo la li la ladipika Ovaisrael va kale ve ohole ovanhu vakwao ngaashi ve lihole vo vene. Ovaisrael ova li va lombwelwa metukulwa olo kutya ove na okweefa ovakwanaluhepo nosho yo ovanailongo va pupudulule momapya avo pefimbo leteyo. Ova li yo va lombwelwa vaha vake, vaha popye oipupulu, vaha kengelelafane novaha tokole nonhondo moihokolola yavo. Nonande ova li tava dulu okuhanyena omunhu oo a nyona, ova li va londwelwa sha yukilila taku ti: “Omumwanyoko . . . ino mu tonda momutima woye.” Oipango oyo nosho yo ikwao ihapu oya kwatelwa moshipango eshi tashi ti: “Hola omukweni ngaashi u lihole mwene.” — Leviticus 19:9-11, 15, 17, 18.
9. Omolwashike Jehova a li a lombwela Ovaisrael ve litongole ko koiwana imwe i lili?
9 Nonande Ovaisrael ova li ve na okuulikila ovanhu vakwao ohole, ova li ve na okulitongola ko koiwana oyo ya li hai longele oikalunga. Jehova okwa li e va londwela shi na sha noilanduliko ya nyika oshiponga oyo ya li tai dulu okweetifwa keendafano lii. Pashihopaenenwa, Jehova okwa li e va lombwela shi na sha noiwana oyo va li ve na oku ka taata mo mEdu lEudaneko, a ti: “Inamu hombolafana [navo, OB-1986]. Inamu yandja ovana veni oukadona kovana vavo ovamati, ndee inamu kufa ovana vavo ovamati kovana veni oukadona, osheshi ye ote ke liteekifa omona woye omumati kuame, opo va longele ookalunga vamwe, nehandu lOmwene tali mu xwamene.” — Deuteronomion 7:3, 4.
10. Oshike osho tu na okulungamena?
10 Sha faafana, Ovakriste navo ove na okulungama vaha pange oukaume naavo tava dulu okunyona po eitavelo lavo. (1 Ovakorinto 15:33) Ohatu kumaidwa taku ti: “Inamu humbata ondjoko imwe pamwe naava ve he neitavelo,” sha hala okutya, ovo vehe fi oshitukulwa sheongalo lopaKriste. (2 Ovakorinto 6:14) Kakele kaasho, Ovakriste otava kumaidwa va hombole “ashike mOmwene.” (1 Ovakorinto 7:39, NW) Ndelenee katu na nande okudina ovo ihava longele Jehova. Kristus okwa fila ovalunde, navahapu ovo va li hava longo oilonga ii ove i efa po nova hanganifwa naKalunga. — Ovaroma 5:8; 1 Ovakorinto 6:9-11.
11. Onghedi ya denga mbada ilipi omo hatu dulu okuulikila ovanhu ovo ihava longele Jehova ohole, nomolwashike tu na oku shi ninga?
11 Onghedi ya denga mbada omo hatu dulu okuulikila ovo ihava longele Kalunga ohole, omoku mu hopaenena. Nonande Kalunga iha hokwa oukolokoshi, oha ulikile ovanhu aveshe ouwanghenda moku va pa omhito ve lialuluke keendjila davo dii opo va ka mone omwenyo waalushe. (Hesekiel 18:23) Jehova ‘okwa hala ovanhu aveshe ve lidilulule.’ (2 Petrus 3:9) Okwa hala “ovanhu aveshe va xupifwe nova fike meshiivo loshili.” (1 Timoteus 2:4) Omolwetomheno olo, Jesus okwa li a lombwela ovashikuli vaye va ka udife ‘nokuninga ovanhu ovahongwa.’ (Mateus 28:19, 20) Heeno, ngeenge hatu kufa ombinga moshilonga osho, ohatu ulike kutya otu hole Kalunga nosho yo ovanhu vakwetu, nokuli novatondi vetu.
Nghee hatu dulu okuulika kutya otu hole Ovakriste vakwetu
12. Omuyapostoli Johannes okwa ti shike shi na sha nokuhola ovamwatate?
12 Omuyapostoli Paulus okwa shanga a ti: “Tu ningileni aveshe ouwa, ndelenee unene tuu ovo oovakwetu vomeitavelo.” (Ovagalati 6:10) Tu li Ovakriste, otu na okukala tu hole oovakwetu vomeitavelo, sha hala okutya, ovamwatate novamwameme vetu vopamhepo. Okuhola ovaitaveli vakwetu okwa fimana shi fike peni? Mokudivilika kutya osho osha fimana neenghono, omuyapostoli Johannes okwa shanga a ti: “Keshe ou ta tondo omumwaxe oye omudipai. . . . Ngenge pe na ou ta ti: Ame ondi hole Kalunga, ndee ta tondo omumwaxe, ye omunaipupulu. Osheshi ou e he hole omumwaxe, nande e mu wete, oye ita dulu okuhola Kalunga e he mu wete.” (1 Johannes 3:15; 4:20) Eendjovo odo oda kwa ta moiti neenghono, molwaashi Jesus Kristus okwa ifana Satana Ondiaboli “omudipai” ‘nomunaipupulu.’ (Johannes 8:44) Inatu hala nandenande tu talike ko ngaho!
13. Omeenghedi dilipi hatu dulu okuulika kutya otu hole ovaitaveli vakwetu?
13 Ovakriste vashili ova “longwa kuKalunga okuholafana.” (1 Ovatessaloniki 4:9) Katu na ashike okukala tu holafane ‘neendjovo ile nelaka, ndelenee omoilonga nomoshili.’ (1 Johannes 3:18) Ohole yetu “inai kala noihelele.” (Ovaroma 12:9) Ohole ohai tu linyengifa tu kale tu na olukeno nonghenda, nokukala hatu dimine po nokutala vamwe onheni. Ohai tu linyengifa yo tuha twile vamwe ondubo, tuha kale ovalitangi ile ovalinenepeki, notuha kale tu lihole fye vene. (1 Ovakorinto 13:4, 5; Ovaefeso 4:32) Ohole ohai tu linyengifa tu ‘yakulafane.’ (Ovagalati 5:13) Jesus okwa li a lombwela ovahongwa vaye va kale ve holafane ngaashi a li e va hole. (Johannes 13:34) Onghee hano, Omukriste oku na okukala nokuli e na ehalo okufila ovaitaveli vakwao ngeenge sha pumbiwa.
14. Ongahelipi hatu dulu okuulikilafana ohole moukwaneumbo?
14 Osha fimana neenghono koukwaneumbo wopaKriste okukala hau ulikilafana ohole, unene tuu omulumenhu nomukainhu. Ovalihomboli ove na okukala ve na ekwatafano lopofingo, nomolwaasho Paulus a ti: “Ovalumenhu [ove] nokuhola ovakainhu vavo ngaashi omalutu avo vene.” Okwa weda ko a ti: “Oye ou e hole omukainhu waye, oye oku lihole ye mwene.” (Ovaefeso 5:28) Paulus okwa ka endulula ekumaido olo mOvaefeso 5:33. Omulumenhu oo e hole omukainhu waye ita ka ninga ngaashi Ovaisrael vopefimbo laMalakia ovo va li ve na eteke. (Malakia 2:14) Oku na oku mu fila oshisho nokukala e mu hole ngaashi Kristus e hole eongalo. Ohole otai ke linyengifa yo omukainhu a kale ha fimaneke omulumenhu waye. — Ovaefeso 5:25, 29-33.
15. Ovanhu vamwe ovo va mona nghee ohole yetu yokuholafana hai ulikwa pailonga ova popya shike nova katuka eenghatu dilipi?
15 Doshili, ohole ya tya ngaho oi li edidiliko olo tali didilikifa Ovakriste vashili. Jesus okwa ti: “Aveshe tave mu koneke kutya, nye ovalongwa vange, ngenge mu holafane.” (Johannes 13:35) Okuholafana kwetu ohaku kwafele ovanhu va ehene popepi naKalunga ketu, oo tu hole notu lile po. Pashihopaenenwa, diladila kehokololo limwe li na sha noukwaneumbo wonhumba wEendombwedi daJehova wokuMosambike. Oukwaneumbo oo owa hokolola tau ti: “Inatu shi mona nande onale. Efiku limwe omutenya, okwa li kwa dja oshikungulu shomhepo shidjuu, opo nee okwa dja odula yomupoolela neemhawe. Omhepo oyo i na eenghono oya li ya hanauna po eumbo letu olo la li la dikwa neembungu noya li ya pepa ko oipeleki yeumbo. Eshi ovamwatate vomomaongalo opopepi va li ve uya oku tu kwafela tu tungulule eumbo letu, ovashiinda shetu ova li ve shi kuminwa neenghono ndele tava ti: ‘Elongelokalunga leni oliwa shili. Fye inatu mona nande ekwafo lasha okudja kongeleka yetu ngaashi nye.’ Otwe va ulikila mOmbibeli Johannes 13:34, 35. Kunena ovashiinda shetu vahapu ohava konakona Ombibeli.”
Otu na okukala tu hole ovanhu pauhandimwe
16. Eyooloko lilipi li li pokati kokuhola ovanhu ve li ongudu nosho yo ve li oohandimwe?
16 Oshipu okukala tu hole ovanhu vakwetu ve li ongudu, ndele haalushe shipu okukala tu va hole pauhandimwe. Pashihopaenenwa, ovanhu vamwe ohava ulike ashike ohole yavo yokuhola ovanhu vakwao mokuyambidida pashimaliwa omahangano oo haa yandje omakwafo. Doshili, oshipu okupopya kutya otu hole ovanhu vakwetu, ndele kashipu okukala tu hole omulongi pamwe nafye oo ehe na ko nasha naanaa nafye, ile omushiinda shetu oo e tu tonde ile kaume oo he tu nyemateke lwoikando.
17, 18. Jesus okwa li a ulika ngahelipi kutya oku hole ovanhu pauhandimwe, noshike sha li she mu linyengifa a ninge ngaho?
17 Jesus, oo a li a hopaenena filufilu omaukwatya aKalunga, okwe tu tulila po oshihopaenenwa shiwa shi na sha nanghee hatu dulu okuhola ovanhu pauhandimwe. Nonande okwa li e uya kombada yedu opo a kufe po omatimba ounyuni, okwa li yo a ulikila ovanhu ohole pauhandimwe. Pashihopaenenwa, okwa li a ulikila ohole omukainhu wonhumba oo a li e na ouvela wefimbo lile, omulumenhu umwe oo a li e na oshilundu nosho yo okaana kamwe oko ka li ke na ondemoni. (Mateus 9:20-22; Markus 1:40-42; 7:26, 29, 30; Johannes 1:29) Sha faafana, nafye ohatu ulike kutya otu hole ovanhu vakwetu monghedi oyo hatu ungaunga navo pauhandimwe efiku nefiku.
18 Ndele inatu dimbwa kutya ohole yetu yokuhola ovanhu vakwetu oya pambafana nohole yetu yokuhola Kalunga. Nonande Jesus okwa li a kwafela eehepele, nokuvelula ovanaudu nosho yo okupalula ovafindjala, oinima aishe oyo, mwa kwatelwa okuhonga eengudu dovanhu, okwa li e i ninga nelalakano lokuhanganifa ovanhu naJehova. (2 Ovakorinto 5:19) Jesus okwa li a ninga keshe shimwe omolwokufimanekifa Kalunga. Ka li nande a dimbwa kutya oku li omukalelipo waye nokwa li ha hopaenene omaukwatya aye omolwohole yaye yoku mu hola. (1 Ovakorinto 10:31) Ngeenge otwa hopaenene Jesus, nafye ohatu ka kala tu na ohole yashili yokuhola ovanhu vakwetu, ndele pefimbo opo tuu opo, ohatu ka kala twe litukula ko kounyuni wovakolokoshi.
Ongahelipi hatu dulu okuulika kutya otu hole ovanhu vakwetu ngaashi tu lihole fye vene?
19, 20. Okuhola ovanhu vakwetu ngaashi tu lihole fye vene osha hala okutya shike?
19 Jesus okwa ti: “Hola omukweni ngaashi ove u lihole mwene.” Oshi li paushitwe okulifila oshisho fye vene nokukala twe lifimaneka nefimaneko li li pandjele. Okukala tu lihole monghedi oyo okwa yuka. Ngeno hasho sha li ngaho, ngeno oshipango osho shaJesus itashi ka kala shi na lela eityo. Ohole yokulihola mwene ya yuka, oyo ya popiwa kuJesus, inai faafana naayo ya popiwa komuyapostoli Paulus mu 2 Timoteus 3:2, oyo omunhu ha kala ashike e na ko nasha nouwa waye mwene, ndele iha kala e na ko nasha navamwe. Omuhongwanhu umwe wOmbibeli okwa fatulula ohole oyo ya popiwa kuJesus a ti kutya “oi li ohole yokulihola i li pandjele, oyo omunhu iha kala e li tala ko a fa oshikalunga, ndele pefimbo opo tuu opo, iha kala e litala ko a fa omunhu wongaho.”
20 Okuhola ovanhu vakwetu ngaashi tu lihole fye vene otashi ti okukala hatu tale ko vamwe ngaashi twa hala ve tu tale ko nokuungaunga navo monghedi omo twa hala va ungaunge nafye. Jesus okwa ti: “Keshe eshi mwa hala ovanhu ve mu ningile, osho va ningileni yo.” (Mateus 7:12) Didilika kutya Jesus ina tya kutya kaleni tamu ngongota shi na sha nowii oo ovanhu ve mu ningila monakudiwa, nye mu va alulile owii wavo. Ahowe, otu na okudiladila kunghee twa hala ovanhu va ungaunge nafye, fye hatu ungaunga nee navo monghedi oyo twa hala va ungaunge nafye. Didilika yo kutya eshi Jesus a popya eendjovo odo, ka li ta popi ashike shi na sha nookaume ketu ile ovamwatate novamwameme vomeitavelo. Jesus okwa longifa oshitya “ovanhu,” tashi dulika opo a ulike kutya otu na okuningila ovanhu aveshe ouwa.
21. Ngeenge otu hole ovanhu vakwetu, ohatu ulike kutya otu hole yo lyelye?
21 Okukala tu hole ovanhu vakwetu otaku ke tu kwafela tuhe va ningile owii. Omuyapostoli Paulus okwa shanga a ti: “[Eemhango] edi: Ino nyona ohombo, ino dipaa, ino vaka, ino lundila, ino haluka, noshipango keshe shikwao, [oya] mangwa kumwe kondjovo ei: Hola omukweni ngaashi ove u lihole mwene. Ohole itai ningile mukwao owii nande washa.” (Ovaroma 13:9, 10) Ohole otai ke tu linyengifa tu kale hatu ningile vamwe ouwa. Mokukala tu hole ovanhu vakwetu, ohatu ulike kutya otu hole yo Jehova Kalunga, oo a shita ovanhu oshifeka shaye. — Genesis 1:26.
[Efano pepandja 24]
“Omukwetu olyelye?”
[Efano pepandja 27]
Jesus okwa li e hole ovanhu pauhandimwe
[Efano pepandja 26]
Oto nyamukula ngahelipi?
• Oolyelye tu na okukala tu hole, nomolwashike?
• Ongahelipi hatu dulu okuulikila ohole ovo ihava longele Jehova?
• Ombibeli oya ti shike shi na sha nohole oyo tu na okukala tu hole nayo ovamwatate?
• Okuhola ovanhu vakwetu ngaashi tu lihole fye vene osha hala okutya shike?