Ehunganeko lya simanenena
“Elaka ndika etoye [lyUukwaniilwa, KB] otali ka uvithilwa aantu ayehe, li ningile iigwana ayihe onzapo; notaku ya ihe ehulilo.”—MATEUS 24:14.
AALONGWANTU yOmbiimbeli otaye shi zimine kutya ovelise ndjika oya simana noonkondo, molwaashoka otayi hokolola iilonga mbyoka tayi ka longwa kombanda yevi alihe. Oya simana wo molwaashoka otayi popi shoka Aakriste ye na okulonga, iilonga yeuvitho mbyoka tayi ka tetekela notayi hempulula oshiningwanima oshinenenene shoka tashi ka guma aantu noonkondo shoka Jesus i ithana “ehulilo.”
Ovelise ndjika yopahunganeko oyi li tayi gwanithwa kunena. Oye ku kwatela mo molwaashoka onkundana ombwanawa ndjoka tayi popiwa mo otayi ku hiya notayi ku londodha. Oye ku pa ehogololo wu taambe ko Uukwaniilwa waKalunga nenge wu wu pataneke. Ehogololo ndyoka to ningi otali ka guma onkalamwenyo yoye ayihe.
Natu ka konakoneni oshikalimo shontopolwa moka mwa za ovelise ndjoka. Omasiku gontumba, manga Jesus inaa alelwa komuti gwomahepeko, aalongwa ye oya li ye ya kuye noye mu pula kombinga yonakuyiwa. Oya li ya halelela okutseya kutya Uukwaniilwa waKalunga mboka Jesus a li ha popi aluhe kombinga yawo, otawu ka dhikwa po uunake. Oya li wo ya hala okutseya kombinga ‘yehulilo lyuuyuni.’—Mateus 24:3.
Jesus okwe ya yamukula ta ti kutya otaku ke ya iita iinenenene, oondjala, omalega nomakakamo gevi omatilithi. Okwa ti wo kutya uulunde otawu ka lunda pombanda, aalongi yomalongelokalunga aafundja otaya ka pukitha oyendji nAakriste yashili otaya ka tondwa nokuhepekwa. Ayihe mbika oya li onkundana ombwinayi.—Mateus 24:4-13; Lukas 21:11.
Ihe opwa li wo pu na onkundana ombwanawa. Jesus okwa li ishewe a popi oohapu ndhoka dha tothwa mo metetekelo, ndhoka dha li dhihokitha nodha nwetha mo aantu uule womathelemimvo. Nonando aantu oyi itaala kutya oohapu dhaJesus odha simana, ohaya tindi eityo lyadho. Onkundana ndjika ombwanawa oshike aanaa? Uukwaniilwa owo shike? Uunake ehunganeko ndika tali ka gwanithwa, nolye te ke li gwanitha? ‘Ehulilo’ oshike? Natu taleni kwaashika.
[Ethano pepandja 2]
Facsimile of the Washington Manuscript of Four Gospels. Matthew 24:14 is highlighted
[Edhina lyomuthaneki]
From the book Facsimile of the Washington Manuscript of the Four Gospels in the Freer Collection 1912