“Ethimbo lyokutsakanithwa” oli li popepi

NGAASHI omupolofeti Habakuk, aalongwa yaJesus nayo oya li ya hala okumona iihuna ku hule po. Sho ya li yu uvu shoka Uukwaniilwa waKalunga tawu ka ninga okwoopaleka onkalo kombanda yevi, oya pula Jesus ya ti: “Uunake iinima mbika tayi ka ningwa, noshike tashi ka kala endhindhiliko lyokukala po kwoye [moonkondo dhUukwaniilwa] nolyethimbo lyehulilo lyonkalelo yiinima?” (Mateus 24:3, NW) Jesus okwe ye yamukula kutya oJehova Kalunga owala e shi esiku notundi uuna Uukwaniilwa tawu ka tameka lela okupangela ombanda yevi. (Mateus 24:36; Markus 13:32) Kakele kaashono, Jesus nayalwe oya li ya hunganeke shoka tashi ka ningwa opo shu ulike kutya ethimbo oli li popepi.—Tala oshimpungu kolulyo.

Mbela ito zimine kutya iinima mbika oyi li apuhe kunena? Jesus okwa li wo a hunganeke kutya iilonga yokuuvitha otayi ka longwa kombanda yevi alihe. Jesus okwa ti: ‘Onkundana ndjika ombwanawa yuukwaniilwa otayi ku uvithilwa aantu ayehe, yi ningile iigwana ayihe uunzapo; notaku ya ihe ehulilo.’—Mateus 24:14, yelekanitha NW.

Shika osho naanaa tashi ningwa kunena. Oonzapo dhaJehova otadhi longo iilonga mbyoka. Miilongo 236 lwaampono, Oonzapo dhi vulithe pomamiliyona gaheyali otadhi lombwele aantu shoka Uukwaniilwa tawu ya okuninga notadhi ya kwathele ya vulike kiitegelelwa yuuyuuki yaKalunga ngoka e na ehalo okuhulitha po okumona iihuna nuuwehame. Tsikila okwiilonga kombinga yUukwaniilwa waKalunga opo wu ka kale wu na etegameno lyoku ka kala nomwenyo sigo aluhe muuyuni kaamu na okumona iihuna.

[Oshimpungu pepandja 8]

Omanyolo ngoka taga popi omasiku gahugunina

MATEUS 24:6, 7; EHOLOLO 6:4

• Iita inaayi kala ko nando onale

MATEUS 24:7; MARKUS 13:8

• Omakakamo gevi omanene

• Ondjala

LUKAS 21:11; EHOLOLO 6:8

• Omalega

MATEUS 24:12

• Okwaanompango taku indjipala

• Ohole tayi huhwa

EHOLOLO 11:18

• Evi tali yonagulwa

2 TIMOTEUS 3:2

• Ohole onene yokuhola iimaliwa

• Okwaavulika kaakuluntu

• Okwiihola sha pitilila

2 TIMOTEUS 3:3, yelekanitha OB-1954

• Okwaanohole yopaunshitwe

• Aayoni yeuvaneno

• Aakaaneidhiliko

• Aatondi yuuwanawa

2 TIMOTEUS 3:4, yelekanitha OB-1954

• Okuhola iihulo komeho gaKalunga

2 TIMOTEUS 3:5

• Oyendji oya fa haa simaneke Kalunga, ihe otaa idhimbike oonkondo dhe

MATEUS 24:5, 11; MARKUS 13:6

• Aapolofeti aafundja oyendji

MATEUS 24:9; LUKAS 21:12

• Aakriste yashili taya hepekwa

MATEUS 24:39

• Aantu itaaya pulakene komalondodho gOmbiimbeli

[Ethano pepandja 8]

Oonzapo dhaJehova ohadhi longo yalwe kombinga yUukwaniilwa waKalunga muuyuni auhe