Omalunduluko ngoka ga ningwa moshifo shokukonakonwa
Oshifo shika osha lundulululwa shi kale tashi hokitha okutala, opo shi ku kwathele mokukonakona oshili yi na ondilo ndjoka tayi adhika mOohapu dhaKalunga.—Eps. 1:2; 119:97.
Opwa pita omimvo ne sho twa tameke okunyanyangidha iifo iyali yOshungolangelo, shimwe osha nuninwa uukalele, omanga shimwe sha nuninwa Oonzapo dhaJehova nosho wo aakonakonimbiimbeli mboka taya humu komeho.
Omumwatate gumwe ngoka a longela Jehova ethimbo nuule okwa nyola ti: “Onda li nda kumwa nonda hokwa noonkondo oshifo shokukonakonwa shOshungolangelo shoka sha li sha piti tangotango. Oshili yomuule nomautumbulilo ngoka ga longithwa mo oya fa owala ongame ya nyolelwa. Onda pandula unene kelongekidho ndika epe.” Omumwatate gumwe okwa nyola a ti: “Ohandi kala nda halelela okulesha oshifo shokukonakonwa uule woowili dhontumba pamwe nOmbiimbeli yandje.” Otwi inekela nangoye osho ho kala wu uvite ngaaka.
Nonando opwa li oothina, oshifo shika osha tameke okunyanyangidhwa okuza mo 1879 sigo okunena, omolwekwatho lyombepo yaJehova nomolwomalaleko nuuyamba ge. (Sak. 4:6) Osha kala nokunyanyangidhwa uule womimvo 133 nosha kala hashi lundululwa mpaka naampeyaka unene tuu kefo lyokombanda. Okutameka mo 2012, otashi ka kala nomathano omawanawa gaantu taya uvitha kefo lyokombanda, ngoka tage tu dhimbulukitha kutya otwa pewa oshilonga shokugandja uunzapo nawanawa kombinga yUukwaniilwa waKalunga. (Iil. 28:23, NW) Pepandja 2, ethano ndyoka otali ka popiwa paufupi kutya oshike tashi ningwa po nosho wo kutya omoshilongo shini. Uule womumvo nguka, otatu ka kala aluhe nokudhimbulukithwa kutya oshilonga shetu okuuvithila “aantu ayehe”onkundana ombwanawa.—Mat. 24:14.
Omalunduluko galwe ga ningwa mo ongaashi: Omapulo geendululo giitopolwa yokukonakonwa otaga kala petameko. Shika otashi ke ku kwathela wu tale kutya iitsa ya simana yini wu na okutala sho to lesha nokukonakona oshitopolwa kehe. Osha yela kutya omukwatelikomeho gwOshungolangelo oku na natango okukala ha pula omapulo geendululo pehulilo. Ehala ndyoka hali kala komunkulo gwepandja kehe, olya nenepekwa kashona. Oonomola dhomapandja nosho wo dhuutendo odha nyolwa dha tsa nawa.
Moshifo otamu kala oshitopolwa oshipe “Iinima mbyoka ya ningwa mondjokonona yOonzapo dhaJehova,” shoka tashi kala hashi kundathana omalunduluko ngoka ga ningwa po kOonzapo. Otamu ka kala wo oshitopolwa “Oyi igandja nehalo ewanawa,” shoka tashi ka kala hashi holoka mo omalupita. Oshitopolwa shoka otashi ka hokolola nkene aauvithi ya mona enyanyu, ombili nosho wo ondjambi mokukwathela miitopolwa moka mu na ompumbwe onene yaauvithi yUukwaniilwa.
Otwi inekela kutya oto ka nyanyukilwa okukonakona Ombiimbeli to longitha oshifo shika.
Okuza kaanyanyangidhi
[Ethano pepandja 3]
1879
[Ethano pepandja 3]
1895
[Ethano pepandja 3]
1931
[Ethano pepandja 3]
1950
[Ethano pepandja 3]
1974
[Ethano pepandja 3]
2008