Ekonakonombiimbeli lyoye nali kale tali pendutha ohokwe notali tungu
Ongiini to vulu okuninga ekonakonombiimbeli lyoye li kale tali pendutha ohokwe notali tungu? Natu taleni paufupi iinima itatu ya simana mbyoka tayi vulu oku tu kwathela tu mone uuwanawa owundji mekonakonombiimbeli lyetu lyopaumwene.
1 OKUGALIKANA: Tango galikana manga inoo tameka okukonakona. (Eps. 42:8) Omolwashike mbela? Omolwaashoka okukonakona Oohapu dhaKalunga oku li oshitopolwa shelongelokalunga lyetu. Onkee ano, otu na okugalikana kuJehova opo u ukithe iikala yetu yopamadhiladhilo noku tu pe ombepo ye ondjapuki. (Luk. 11:13) Omumwameme Barbara ngoka a kala miilonga yuutumwa ethimbo ele okwa ti: “Ohandi galikana aluhe omanga inaandi tameka ekonakonombiimbeli. Konima yaashono ohandi mono kutya Jehova oku li pamwe nangame nokwa hokwa shoka tandi ningi.” Uuna tatu galikana omanga inaatu tameka okukonakona ohashi patulula omitima dhetu nomadhiladhilo getu tu uve ko nawa shoka tatu lesha.
2 OKUTEDHATEDHA: Molwaashoka ethimbo olya pumba kunena, yamwe ohaya lesha Oohapu dhaKalunga shampa ashike ye dhi lesha. Kungawo, ihaya mono uuwanawa mboka ya li ye na okumona mo. Omumwatate Carlos ngoka a longela Jehova uule woomvula dhi vulithe 50, okwa mona kutya osha simana okutedhatedha opo ekonakono lye li kale tali mu tungu. Okwa ti: “Ohandi lesha poshikando omapandja gaali gOmbiimbeli esiku kehe. Konima yaashoka ohandi longitha ethimbo olindji tandi tedhatedha kwaashoka nda lesha.” (Eps. 77:12) Ngele ohatu longitha ethimbo lyetu tu tedhatedhe, ontseyo yetu otayi ka indjipala, notatu ka uva ko nawa ehalo lyaKalunga.—Kol. 1:9-11.
3 OKUTULA MIILONGA: Oshi li nawa okutala kutya uuwanawa wuni to ka mona ngele owa tula miilonga shoka wi ilonga. Ekotampango ndyoka ohali longo wo uuna tatu konakona Ombiimbeli. Omumwatate omugundjuka Gabriel ngoka ha konakona Ombiimbeli pandjigilile okwa ti: “Ekonakono ohali kwathele ndje ndi sinde omaupyakadhi gakehe siku, nondi kwathele yalwe.” Okwa gwedha ko a ti: “Ohandi tula miilonga kehe shoka tandi ilongo.” (Deut. 11:18; Jos. 1:8) Otatu ka mona shili ontseyo yokutseya Kalunga ngele ohatu tula miilonga shoka tatu ilongo.—Omayel. 2:1-5.
OKWEENDULULA: Otu na shili uuthembahenda uunene wokukonakona muule ontseyo ndjoka hayi zi kuJehova, Onzo yuunongo auhe. (Rom. 11:33) Onkee ano, oshikando tashi ya manga inoo tameka nekonakono lyoye, galikana Jehova u ukithe iikala yoye yopamadhiladhilo noku ku pe ombepo ye ondjapuki. Kala ho mwena po kashona wu tedhatedhe shoka wa lesha. Kala wo ho tula miilonga iinima mbyoka to ilongo. Uuna to ningi iinima mbyoka, ekonakonombiimbeli lyoye otali ka kala tali pendutha ohokwe notali tungu.