Iita yaArmagedon otayi ya uunake?

‘Onda mono ko ongundu onene yaantu ya nyengana okuyalulwa. Oyo oya zi maantu yomomihoko adhihe, momaludhi agehe, miigwana ayihe nomomalaka agehe noya pita muudhigu uunene.’—EHOLOLO 7:9, 14, YELEKANITHA NW.

MASIKU iita yaArmagedon otayi pwakele. Omolwashike tatu tile ngawo?

Omolwaashoka opu na nale oshigwana shi li muuyuni auhe shoka tashi longele Jehova noshi li metsokumwe nomithikampango dhOmbiimbeli dhopamikalo ndhoka dha dhenga mbanda. Pakwatho lyaKalunga, aantu omamiliyona yomiigwana ayihe, yomomihoko adhihe, noyomomalaka agehe otaya hangana kunena opo ya ninge oshitopolwa shuumwayinathana wopahole tawu longele kumwe. Uumwayinathana mboka ohawu adhika mokati kOonzapo dhaJehova.—Johannes 13:35.

Masiku Satana ota ka gongela omatangakwiita ge e ta ponokele aantu mbaka aanambili, notaya monika ya fa kaaye na egameno. (Hesekiel 38:8-12; Ehololo 16:13, 14, 16) Oshike tashi vulu oku ku kwathela wu kale nuushili kutya shoka otashi ka ningwa? Ombiimbeli oya popya iiningwanima yokondandalunde mbyoka tayi tu kwathele tu tseye kutya uunake iita yaArmagedon tayi ya. Oyindji yomiiningwanima mbika otayi ningwa nale.

Iiningwanima mbyoka wu wete tayi ningwa ngashingeyi

Aalongwa yaJesus oya li ye mu pula kutya aantu otaya ka mona ngiini kutya ‘ehulilo lyuuyuni’ oli li popepi? (Mateus 24:3) Jesus okwa li e ya lombwele kombinga yethimbo ndyoka a ti kutya ‘iigwana otayi ka thikama okukondjithathana, niilongo otayi ka matukilathana notaku ke ya oondjala nomakakamo gevi koombinga noombinga.’ Okwa popi ishewe a ti: “Ayihe mbika otayi ningi ongetameko lyoshitheta.” (Mateus 24:7, 8) Omuyapostoli Paulus okwa popi wo kombinga yethimbo ndika a ti kutya oli li “omasiku gahugunina,” ngoka ge li “omathimbo omadhigu okukaliwa mugo.” (2 Timoteus 3:1, NW) Mbela sho to tala omahunganeko ngoka otaga popi kombinga yiiningwanima mbyoka tayi ningwa kunena?

Mbela omolwashike ethimbo ndyoka tali ka kala edhigu noonkondo? Omuyapostoli Johannes okwa gandja etompelo kutya omolwashike. Okwa li a hunganeke kutya Satana noompwidhuli dhe otaya ka pewa “okathimbo okafupi kowala” kokulonga iilonga yawo kombanda yevi. Mokathimbo hoka, Satana ota popiwa kutya ota ka kala “u udha ondjahi.” (Ehololo 12:7-12) Mbela owu wete nkene aantu ye na ombepo yokugeya nohaya longo uukolokoshi muuyuni auhe kunena?

Jesus okwa ti wo kutya pethimbo ndika lyuudhigu wa kwata miiti, otapu ka longwa iilonga inaayi longwa nando onale. Okwa ti: ‘Onkundana ndjika ombwanawa yuukwaniilwa waKalunga otayi ku uvithilwa uuyuni auhe yi ningile iigwana ayihe uunzapo; notaku ya ihe ehulilo.’ (Mateus 24:14, NW) Kunena, Oonzapo dhaJehova otadhi uvitha onkundana ombwanawa yUukwaniilwa waKalunga miilongo ya konda 235 nomomalaka ge vulithe 500. Iifo iyali yi ikolelela kOmbiimbeli, Oshungolangelo no-Awake mbyoka hayi nyanyangidhwa kudho, ohayi andjaganekwa muuyuni auhe yi vulithe iifo yilwe. Oonzapo odha toloka wo Ombiimbeli momalaka 100 lwaampo. Iilonga yadho ohayi longwa kaaiyambi nohayi ambidhidhwa pashimaliwa nehalo ewanawa. Mbela iilonga mbika ya dhenga mbanda oyi li egwanitho lyehunganeko lyaJesus?

Ombiimbeli oya yelitha kutya iiningwanima yini tayi fala kiita mbyoka tayi ka kala pokati kaJehova Kalunga naamboka ye li ompinge naye. Tala komahunganeko gatatu ngoka taga ka gwanithwa.

Iiningwanima mbyoka to ka mona tayi ningwa masiku

Ehunganeko 1. Ombiimbeli oya popi kutya iigwana otayi ka ninga etseyitho endhindhilikwedhi li na ko nasha ‘nombili negameno.’ Otashi vulika yi ka kale tayi dhiladhila kutya oyi li pokukandula po omaupyakadhi omanene. Ihe iiningwanima mbyoka tayi ka holoka konima ngele ya popi ngaaka, itayi ka kala yombili.—1 Aatessalonika 5:1-3, NW.

Ehunganeko 2. Konima yaashono, omapangelo otaga ka tokola ga ka ponokele omahangano gopalongelokalunga gomuuyuni auhe. MOmbiimbeli, omapangelo ngaka oga popiwa ge li oshilikama; nomalongelokalunga giifundja gomuuyuni oga popiwa ge li omukiintu ngoka a londa koshilikama. (Ehololo 17:3, 15-18) Oshilikama shoka shopathaneko otashi ka ninga shoka Kalunga a hala, sho tashi ka hanagula po omalongelokalunga ngoka taga ti kutya oge lile po Kalunga, ihe oshilikama osho tuu shika itashi ke shi nongela kutya otashi longo ehalo lyaKalunga.

Omuyapostoli Johannes okwa popi kombinga yoshiningwanima momukalo gwopathaneko a ti: “Ooniga omulongo we dhi mono, nosho wo oshilikama, otayi ka tonda ohonda ndjoka. Oyo otaa ke yi hula ashihe shoka yi shi na notaye ke yi thiga yi li olutu lowala. Oyo otaa ka lya po onyama yayo notaa ke yi lungunitha po nomulilo. Oshoka Kalunga okwa pendutha moomwenyo dhawo ehalo lye.”—Ehololo 17:16, 17.

Ehunganeko 3. Konima ngele omalongelokalunga giifundja ga hanagulwa po, Satana ota ka unganeka iigwana yi ka ponokele mboka haya longele Jehova Kalunga.—Ehololo 7:14; Mateus 24:21.

Shika otashi ke ku guma ngiini?

Ngele ino mona ompito yokukonakona Ombiimbeli muule, otashi vulika wu ke shi mone oshidhigu okwiitaala kutya iiningwanima mbyoka ya hokololwa metetekelo otayi ka ningwa shili. Ihe opu na omatompelo omawanawa okwiitaala kutya kehe okanima ka popiwa otaka ka gwanithwa naayihe mbika otayi ka ningwa monakuyiwa yi li popepi. Omahunganeko gamwe ngoka ga popiwa mOmbiimbeli ga gwanithwa nale otage tu shilipaleke moshinima shika.a

Omolwashike itoo kutha ethimbo wu konakone kutya omolwashike Oonzapo dhaJehova dhi itaala kutya “iita mesiku enene lyaKalunga Omunankondoadhihe” oyi li popepi nowu tseye etompelo kutya omolwashike kuu na okukala we yi tila? Dhi pula dhi kundathane nangoye kombinga yaashoka Ombiimbeli tayi ku lombwele wu ninge opo wu ka kale gumwe gwomwaamboka Jehova ta ka gamena. (Ehololo 16:14) Shoka to ki ilonga otashi vulika shi ka lundulule etaloko lyoye li na ko nasha nonakuyiwa.

[Enyolo lyopevi]

[Oohapu dha simana pepandja 8]

Mbela iilonga yOonzapo dhaJehova oyi li yimwe yomomahunganeko gOmbiimbeli ngoka taga gwanithwa kunena?