‘Aantu oya li ye wete nda fa omupe moshitopolwa sho tandi undula okofa yokuhumbata iileshomwa’

Sho omuuvithi gwethimbo lyu udha meme Charlotte White a thiki moLouisville, muKentucky, shomuAmerika, aantu oya li ye mu manena mo omeho, molwaashoka okwa li tu undula okofa tayi ende kuugulu.

Osha li mo 1908, sho omumwameme White a li ta talika nawa kaantu mondoolopa ndjoka sho e na okofa opo ya zi moshipakete yokuhumbata iileshomwa hayi ithanwa Dawn Mobile. Omumwameme okwa ti: “Aantu oya li taye yi popi noya li ye wete nda fa omupe moshitopolwa.”

Pethimbo ndyoka Oonzapo dhaJehova odha li hadhi ithanwa Aakonakoni yOmbiimbeli. Odha li hadhi konakona Ombiimbeli dha mana mo nodha li dhi wete kutya odha pumbwa okuuvitha oshili ndjoka dhi ilonga. Aantu oyendji oya li ya mono ontseyo yOmbiimbeli kekwatho lyomambo hagi ithanwa Millennial Dawn (konima oga ka lukwa Studies in the Scriptures). Aakriste mboka oya li haya yi kiitopolwa yokokule, kooha nooha, koondoolopa, komikunda nokiitopolwa yokuushayi opo ya ka gandje omambo ngoka kwaamboka ya hala oku ga lesha.

Mo 1908, omumwameme White nosho wo aauvithi yalwe yUukwaniilwa aalaadhi oya li haya gandja omambo gahamano kodola yaAmerika 1.65. Kaya li haya pe omunegumbo omambo pethimbo ndyoka, ihe oya li haye mu pula e ga mbestele yo taye ge eta konima yethimbo. Olundji oya li haye ge eta uuna aantu ya kwata, opo ye ya pe iimaliwa mbyoka ya longithwa moku ga nyanyangidha. Omulumentu gumwe ngoka a li ompinge nOonzapo okwa li ta nyenyeta kutya omambo ohaga gandjelwa unene omaambidhidho omashona.

Omumwameme Malinda Keefer, okwa ti kutya moshiwike okwa li ha vulu okufaalela aantu 200 sigo 300 omambo. Shoka osha li oshidhigu noonkondo kuye, molwaashoka aantu oyendji oya li ye ga hala. Omambo gahamano oga li ge na omapandja 740. Oga li omadhigu noonkondo, molwaashoka “omambo 50 oga li ge na ondjundo yookilograma 18” noku ga fala kaantu “osha li oshidhigu noonkondo” unene tuu kaamwameme.

Opo shi kale oshipu okufala omambo ngoka kaantu, omumwatate James Cole okwa li a kongo po ondunge yimwe. Okwa li a kongo uugulu uuyali wu li koshitenda sha kola e ta patele okofa ndjoka kuwo noomboha. Konima yaashoka omumwatate James ka li we ha humbata iipakete iidhigu yu udha omambo komapepe. Okwa ti: “Itandi teka we epepe.” Mo 1908, Aakonakoni yOmbiimbeli mboka ya li poshigongi shoshitopolwa muCincinnati, Ohio oya li ya nyanyukwa sho yu ulukilwa oshilongitho shoka oshipe. Edhina Dawn-Mobile olya li lya nyolwa kuupatitho mboka wu li lwopehulilo lyokolonela yokofa ndjoka ya li hayi humbata ondumba yomambo Millennial Dawn. Okofa ndjoka konima yethimbo oya ka kala owala hayi undulwa noshikaha shimwe. Oya li hayi vulu okulundululwa shi ikolele komuthika gwaangoka te yi undula noya li hayi vulu okweenda moondjila kehe. Uugulu wayo ohawu vulu okugonywa nuupu, nomuntu oto vulu oku yi humbata peke uuna kaayi na sha.

Aamwameme mboka ye li miilonga yethimbo lyu udha oya li haya pewa okofa ndjoka oshali. Ihe ngele omuntu te yi landa oya li yi na oodola dhaAmerika 2.50. Omumwameme Keefer ngoka e li methano okwa li e shi okuundula nawa okofa ndjoka yu udha omambo neke limwe nokwa li ha humbata gamwe ishewe mompunda yosikola. Molwaashoka aantu oyendji muPennsylvania, muAmerika mboka ya li haya longo moomina dhomakalamanya oya li ye na ohokwe, okwa li ha tutu omambo iikando itatu nenge ine mesiku ta taaguluka ontopa.

Lwopehulilo lyomumvo 1980, omulumentu gumwe ngoka ha hingi oonelomba okwa li a nduluka po oondjato nookofa dhuugulu ndhoka dha simanekwa unene puupale woondhila nosho wo miilando moka aantu haya kala yi ipyakidhila noonkondo. Ihe omimvo 100 dha ka pita, Aakonakoni yOmbiimbeli aalaadhi oya li haya kala ya manenwa mo omeho sho tayu undula okofa yokuhumbata omambo yedhina Dawn-Mobiles, sho taya yi muukalele naasho taya galuka.

[Oohapu dha simana pepandja 32]

Omumwameme Keefer okwa li ha tutu omambo iikando itatu nenge ine mesiku ta taaguluka ontopa

[Oohapu dha simana pepandja 32]

Osha li oshipu okufaalela aantu omambo