Mbela osha simana ngaa okutseya eyamukulo?
“One otamu ka tseya ihe oshili, noshili otayi ke mú mangulula.”—JOHANNES 8:32.
OMBIIMBELI oyi na oshili ndjoka tayi vulu oku tu mangulula ko komaitaalo ga puka nenge nokuli taga ngwangwaneke kombinga yaJesus. Mbela oshi na ngaa mbudhi kutya otwi itaala shike kombinga ye? Eeno. Jehova naye oku wete shi nombudhi. Jesus naye osho e shi tala ko ngaaka. Natse osho wo tu na okukala twe shi tala ko ngaaka.
● Omolwashike Jehova e na ko nasha nasho? Omolwaashoka, “Kalunga oye ohole.” (1 Johannes 4:8) Jehova okwa hala tu kale twa nyanyukwa sigo aluhe. Jesus okwa ti: “Oshoka osho ngeyi Kalunga a kala e hole uuyuni [aantu], oye a gandja Omwana awike, opo shaangoka te mu itaale, kaa kane, ihe a kale e na omwenyo gwaaluhe.” (Johannes 3:16) Kalunga okwa li a tumu Omwana a se omolwoondjo dhetu opo tu kale tu na ompito yoku ka kala nomwenyo sigo aluhe moparadisa kombanda yevi, ngaashi naanaa a li a lalakanena petameko. (Genesis 1:28) Kalunga okwa halelela okugandja omagano gomwenyo gwaaluhe kwaayehe mboka ya hala okwiilonga oshili kombinga yOmwana nokukatuka metsokumwe nayo.—Aaroma 6:23.
● Omolwashike Jesus e na ko nasha nasho? Jesus naye oku hole aantu. Okwa li u ulike ohole ye onene sho a yamba po omwenyo gwe opo e tu sile. (Johannes 15:13) Okwa li e shi shi kutya omuye owala tamu vulu okuza ehupitho. (Johannes 14:6) Mbela oshi na oku tu kumitha sho Jesus a hala aantu oyendji ngaashi tashi vulika ya mone uuwanawa mekuliloyambo lye? Shika osho she mu ningitha a lombwele aalanduli ye yashili ya ka longe aantu muuyuni auhe kombinga yehalo nelalakano lyaKalunga.—Mateus 24:14; 28:19, 20.
● Omolwashike natse tu na okukala tu na ko nasha nasho? Dhiladhila owala kiinima mbyoka ya simana kungoye ngaashi uukolele woye nosho wo aantu yaandjeni. Mbela owa hala wu kale wu na uukolele nowa hala mu kale mu na onkalamwenyo ombwanawa naaholike yoye? Ngoye naaholike yoye omu na ompito yoku ka kala nuukolele nonkalamwenyo yaa na ehulilo muuyuni uupe moka itaamu ka kala we uuwehame nokumona iihuna, nompito ndjoka omwe yi pewa kuJehova okupitila muJesus. (Episalomi 37:11, 29; Ehololo 21:3, 4) Mbela ndyoka etegameno ewanawa kungoye? Ngele osho, opu na sha shoka wu na okuninga po.
Tala ishewe kenyolo ndyoka lya tothwa mo poshipalanyolo: “One otamu ka tseya ihe oshili, noshili otayi ke mú mangulula.” Oshili kombinga yaJesus nosho wo yonkandangala ndjoka a dhana mokugwanitha po elalakano lyaKalunga otayi vulu oku tu mangulula mo muwumwe womuupika kamana, ano muupika wuulunde neso. Ihe owu na tango ‘okutseya oshili’ opo wu manguluke mo muupika mboka. Omolwashike itoo ilongo oshindji kombinga yoshili ndjika opo wu mone nkene ngoye naaholike yoye tamu vulu okumona uuwanawa? Oonzapo dhaJehova otadhi ka kala dha nyanyukwa oku ku kwathela.