Iilonga yaakalelipo aaendi

OMUKALELIPO omweendi gumwe e na owino yokupopya montaneho nokulonga aantu Ombiimbeli okwa tile: “Itandi vulu nando okulonga egumbo negumbo.” Aakonakonimbiimbeli oyendji aape osho haya kala yu uvite ngaaka uuna taya dhiladhila okuninga aauvithi.

Aaleshi oyendji yoshifo Zion’s Watch Tower mboka ya li ya thigi po oongeleka dhawo oya li ye hole okukala naamboka haye ya longo oshili yOmbiimbeli. Aaleshi mboka oya li ya ladhipikwa ya konge yalwe mboka ye na eitaalo nosho wo mboka haya konakona Ombiimbeli pandjigilile. Mo 1894 lwaampono, ehangano olya li lya tumu aakalelipo aaendi ya ka talele po oongundu ndhoka dha hala okutalelwa po. Opo gumwe a ninge omukalelipo omweendi okwa li e na okukala a pyokoka, ha longo nuudhiginini, omwiifupipiki, e na ontseyo yOmbiimbeli, e shi okupopya nokulonga nawa noku na eitaalo tali longo thiluthilu mekuliloyambo lyaJesus. Etalelopo lye okwa li he li ningi owala muule wesiku limwe nenge gaali moka ha kala i ipyakidhila noonkondo. Pethimbo ndyoka, Aakonakoni yOmbiimbeli oyendji oya li haya mono ompito yokuya muukalele oshikando shotango ya ka hiye aantu koshipopiwa shomontaneho shomukalelipo omweendi. Omumwatate Hugo Riemer, ngoka a ka ninga oshilyo shOlutuwiliki, esiku limwe okwa li a yamukula omapulo gopaMbiimbeli sigo omokati kuusiku konima sho a gandja oshipopiwa she shoka sha li sha ningilwa mosikola yontumba. Nonando okwa li a vulwa, okwa li a nyanyukwa nokwa ti kutya okugongala “okweenda nawa.”

Oshungolangelo oya ti kutya “elalakano enene” lyaakalelipo aaendi olya li okutunga “ooitaali ooyakwawo” mboka ya li haya ningile okugongala momagumbo pethimbo ndyoka. Aakonakoni yOmbiimbeli pomudhingoloko oya li haye ya okupulakena iipopiwa nosho wo okupula omapulo gopaMbiimbeli, go taga yamukulwa. Konima yaashoka, oya li haya nyanyukilwa pamwe. Pashiholelwa, sho Maude Abbott a li okakadhona, esiku limwe okwa li e ya okupulakena oshipopiwa ethimbo lyongula, nokonima ayehe oya kuutumba poshitaafula oshile ya lile pamwe. Maude okwa ti: “Opwa li iikulya oyindji, ngaashi onyama yoshingulu, oondjuhwa dha kangwa, oomboloto dhomaludhi, uupayi nosho wo iikuki. Kehe gumwe okwa li ta li ngaashi a hala, nokonima otwa ka pulakena koshipopiwa shilwe lwopombali yomutenya. Ihe ethimbo ndyoka kehe gumwe okwa li ta nyongila.” Omumwatate Benjamin Barton, ngoka a longa ethimbo ele e li omukalelipo omweendi, okwa li a shendjula a ti: ‘Ando onda li handi li iikulya ayihe ya zinga mbyoka he pewa, andola onda thanga nale uuzilo.’ Ihe konima yethimbo aamwatate koBrooklyn oya li ya nyolele aamwameme mboka ye na ehalo lyokuyakula, opo kaaya kale taya telekele aakalelipo aaendi iikulya ya tulwa “omagadhi ogendji” noku ya pa “ethimbo lya gwana lyokuthuwa po.”

Aakalelipo aaendi oya li ya pyokoka mokulonga aantu. Oya li haya longitha omathano, iiholelwa nosho wo kehe shimwe shoka ye na, opo iipopiwa yawo yi kale tayi tungu. Omumwatate R. H. Barber okwa li aluhe ha gandja iipopiwa ye “momukalo guhokitha.” Omumwatate W. J. Thorn okwa li ha popi “ngaashi ootatekulululwa yonale.” Esiku limwe sho omumwatate Shield Toutji a li a londa moshihauto shimwe, okwi igidha omuhingi a ti: “Mbilika!” Okwa nuka mo e ta tona oongala melundu, nokwa tameka okulombwela mboka a li pamwe nayo moshihauto kombinga yeshito lyaJehova.

Uulaadhi waakalelipo aaendi owa li we etitha omashongo ogendji, unene tuu kwaamboka ye li poomvula dhopokati kuugundjuka nuukulupe. Osha li emakelo enenenene kuyamwe okuninga omalunduluko miilonga yawo. Oya li ye na okukwatela komeho miilonga yokuuvitha egumbo negumbo. Oshungolangelo yo 15 Maalitsa 1924 oya ti kutya “oshinakugwanithwa shimwe sha simanenena” shAakriste yashili “osho okugandja uunzapo kombinga yuukwaniilwa. Aakalelipo aaendi oya li haya tumwa nelalakano ndyoka.”

Aakalelipo aaendi yamwe kaya li ya hokwa elunduluko ndyoka noye etha po iilonga mbyoka. Yamwe oya li ya geya noya toto po nokuli omalongelokalunga gawo. Omumwatate Robie D. Adkins okwa hokolola kombinga yomukalelipo omweendi gumwe, ngoka a li omupopi omunekeka, kutya okwa li a keme a geya ta ti: “Ngame ondi shi owala okuuvitha uuna ndi li komutuni. Itandi vulu nando okulonga egumbo negumbo.” Omumwatate Adkins okwa ti: “Omukalelipo omweendi ngoka onde ke mu mona ishewe poshigongi shoshitopolwa mo 1924 sha li muColumbus, Ohio. Ihe ka li nando e na ombili koshipala. Okwa li a thikama i ilile momuzile gwokamuti kamwe, a polimana nonando oku li mokati kaamwatate omayuvi ya nyanyukwa. Okuza mpono inandi mu mona we. Konima yaashono, okwa thigi po ehangano lyaJehova.” Ihe “aamwatate oyendji oya li taye ende puye ya nyanyukwa ya humbata omambo gawo yu uka kiihauto yawo,” noya li ya halelela oku ka gandja uunzapo egumbo negumbo.—Iil. 20:20, 21.

Aakalelipo aaendi oyendji oya li ya tila oku ka uvitha egumbo negumbo, ya fa aamwatate mboka ya li taya dheula. Ihe konima yethimbo, aakalelipo aaendi nosho wo aamwatate mboka ya dheula oya li yu uvitha nuulaadhi. Omumwatate omupopi gwOshindowishi, Maxwell G. Friend, omukalelipo omweendi, okwa nyola kombinga yokuuvitha egumbo negumbo a ti: “Iilonga yokukala omukalelipo omweendi ohayi eta omayambeko ga gwedhwa po.” Omukalelipo omweendi John A. Bohnet okwa li a ti kutya aamwatate oyendji oya li ya hokwa iilonga yUukwaniilwa. Okwa ti kutya oyendji oya li ye yi longo “nuulaadhi nonehwamo.”

Momukokomoko gwoomvula adhihe ndhoka, aamwatate aatonateli aaendi aadhiginini oya li ya tsu omukumo aamwatate naamwameme. Omumwatate Norman Larson ngoka a longela Jehova ethimbo ele okwa ti: “Onde shi mona okuza kuunona wandje kutya okukala omutalelipo omweendi oshi na oshilonga nohashi eta omauwanawa ogendji. Iilonga mbyoka oya kwathela ndje lela.” Sigo okunena, aatonateli aaendi mboka ye na ombepo yeiyambo noye li aadhiginini otaya kwathele ooitaali ooyakwawo ya tye: “Otatu vulu okulonga egumbo negumbo.”

[Oohapu dha simana pepandja 32]

Otwa li twa nyanyukwa sho omukalelipo omweendi e ya oku tu talela po

[Ethano pepandja 31]

Benjamin Barton mo 1905 okwa li a ningi elandulathano a talele po omahala 170 lwaampono

[Ethano pepandja 32]

Omumwatate Walter J. Thorn okwa li omukalelipo omweendi omunahole ngoka e na omaukwatya omawanawa ga fa gaKristus

[Ethano pepandja 32]

Omumwatate J. A. Browne ngoka a li omukalelipo omweendi, okwa li a tumwa koJamaica mo 1902 lwaampono a ka tse omukumo nokuladhipika okangundu kaantu 14

[Ethano pepandja 32]

Iilonga yaakalelipo aayendi oya li okutunga eitaalo, nokukoleka uukumwe mokati kaamwatate nosho wo oku ya kwathela ya kale popepi nehangano lyaJehova