“Onda li ndi na omikalo omiwinayi”

ONAKUZIWA YANDJE:

Onda putukile momudhingoloko gwa hepa, moshilando shetuliloskepa, Turku. Tate okwa li enyakwa mokudhenga oongonyo. Ngame nokamwamememati natse otwa li aadhengingonyo. Sho nda li mosikola onda li handi kondjo olundji. Onda li nda ningi oshilyo shongundu ya nika oshiponga sho ndi na oomvula omulongo nasha, ndjoka ya li ya fala ndje momalugodhi ga kwata miiti. Onda ningi wo oshilyo shongundu yaahiki yoongalo hadhi hikwa mokulekule nonda li nda hala okuninga omuhikingalo a tseyika nawa.

Onda landa oongoma e tandi toto ongundu yokuhika oongalo. Nziya onda ningi omwiimbi dhingi mongundu yetu. Onda li ndi hole okwiihumbata nayi komeho gaantu sho tatu hiki oongalo. Shaashi otwa li twa pilaala notwa li hatu zala nayi, konima yethimbo otwa li twa tseyika nawa. Otwa tameke okukala hatu hiki komeho yomangathithi gaantu e tatu kwata uungalo wontumba nowahugunina owa li wu holike lela. Mo 1980 nasha, otwa yi koAmerika tu ka humithe komeho oongalo dhetu. Otwa dhanene moNew York nomoLos Angeles iikando yontumba notwa li twa tseyathana naatseyinawa yoongalo manga inaatu shuna koSoomi.

Nonando onda li handi kala ndu uvite nawa sho tatu hiki oongalo, onda li nda hala onkalamwenyo yandje yi kale tayi ti sha. Onda li nda lulilwa kiikala iiwinayi yaahikingalo nonda li nda loloka onkalamwenyo kaayi na elalakano. Onda li nda tila oku ka pya moheli, shaashi onda li ndi wete kaandi shi omuntu omwaanawa. Onda li handi kambadhala okukonga omayamukulo momambo gomalongelokalunga nonda li wo handi galikana Kalunga nda mana mo a kwathele ndje, nonando onda li ndi wete itaandi vulu oku mu opalela.

NKENE OMBIIMBELI YA LUNDULULA ONKALAMWENYO YANDJE:

Onda li handi longo mopoosa, opo ndi kale ndi na okamaliwa kokwiikwathela. Esiku limwe onda mono kutya omuniilonga omukwetu gumwe Onzapo yaJehova. Onda li nde mu pula okanaku. Omayamukulo ge gopandunge ga za mOmanyolo oga ningitha ndje ndi kale nda hala okutseya oshindji, e tandi zimine a longe ndje Ombiimbeli. Sho nda konakona Ombiimbeli iiwike yontumba, ongundu yetu yokuhika oongalo oya li ya pewa ompito yokushaina euvathanotsokumwe lyokukwata oongalo nolyoku ka pititha oalbuma moAmerika ngele oshe ende nawa. Onda li ndu uvite kutya ompito ndjika kayi shi kuhunuthwa.

Onda lombwele ngoka a li ta longo ndje Ombiimbeli kutya onda hala owala okuninga oalbuma yahugunina nokonima otandi ka tameka okutula miilonga nda mana mo omakotampango gOmbiimbeli monkalamwenyo yandje. Ina lombwela ndje nando etaloko lye mwene, pehala lyaashono, okwa pe ndje ndi leshe oohapu dhaJesus dhi li muMateus 6:24. Ovelise otayi ti: “Kaku na ngoka ta vulu okulongela aawa yaali.” Onda li nda kumwa sho ndu uvu ko eityo lyoohapu dhaJesus. Ihe konima yomasiku gontumba, ngoka ha longo ndje Ombiimbeli oye a ka kumwa ko sho nde mu lombwele kutya shaashi onda hala okulandula Jesus, onda za mo mongundu yokuhika oongalo.

Ombiimbeli oya li ya fa esipili, oshoka oya li tayi kwathele ndje ndi mone uunkundi wandje. (Jakob 1:22-25) Onde shi mono kutya ondi na omikalo omiwinayi, shaashi onda li ndi na uuntsa nonda li ndi ihalela unene esimano. Onda li handi tukana, handi kondjo, handi hili omakaya nohandi nu sha pitilila. Sho nda mono kutya onkalamwenyo yandje kaya li metsokumwe nomakotampango gOmbiimbeli onda li ndi igeela shili. Ihe onda li nda tokola okuninga omalunduluko ngoka ga pumbiwa. — Aaefeso 4:22-24.

Petameko onda li ndu uvite nayi unene omolwomapuko gandje gonale. Ihe ngoka a li ta longo ndje Ombiimbeli okwa li ekwatho enene kungame. Okwa li u ulukile ndje shoka Ombiimbeli tayi ti muJesaja 1:18: “Oondjo dheni nando nadhi kale dha tiligana mbyu, otadhi ka toka dha fa oompawe.” Ovelise ndjika nosho wo oovelise dhilwe odhi itaalitha ndje kutya Tate yetu gwomegulu omunahenda nokwa hala okwaaludha iilalo yaamboka yi iyela ombedhi omolwomayono gawo.

Sho nda tseya Jehova nokukala ndi mu hole onda li nda hala oku mu igandjela. (Episalomi 40:8) Onda ninginithwa mo 1992 poshigongi shOonzapo dhaJehova shopaigwana moSt. Petersburg, Rusia.

NKENE SHA KWATHELA NDJE:

Onda mona mo ookuume oyendji aawanawa maalongeli yaJehova. Omathimbo gamwe ohatu ya pamwe tu dhane omusika ombwanawa nokulongitha omagano ngaka ga za kuKalunga. (Jakob 1:17) Eyambeko lyi ikalekelwa nda mona omukulukadhi gwandje, Kristina, ngoka ndi hole. Otwa pita naye miipyu niitalala nohandi vulu okupopya naye omaiyuvo gandje gomuule.

Ando kanda ningile Onzapo yaJehova, ando otashi vulika kaandi li momwenyo nena. Nale onda li handi yaayaa momaupyakadhi. Ihe ngashingeyi onkalamwenyo yandje oyi na elalakano nondi wete ayihe yi li pomahala.