Ombiimbeli ohayi lundulula onkalamwenyo yaantu

Omolwashike omukiintu ngoka a li a kanitha einekelo momalongelokalunga ha longitha ethimbo lye olindji ngashingeyi okukwathela yalwe yi ilonge kombinga yaKalunga? Oshike shi inyengitha omulumentu ngoka a li e hole omaudhano gelongithonkondo a kale e hole ombili? Oshe ende ngiini opo omulumentu ngoka a li ha longitha iingangamithi, ha nu sha pitilila noku hole olugodhi a lundulule onkalo ye? Lesha shoka taya ti.

UUYELELE KOMBINGA YE

EDHINA: PENELOPE TOPLICESCU

OMIMVO: 40

OSHILONGO MOKA A VALELWA: AUSTRALIA

ONDJOKONONA: OKWA LI A KANITHA EINEKELO MOMALONGELOKALUNGA

OKWA HOKOLOLA ONAKUZIWA YE A TI: Onda valelwa moAustralia, ihe sho nda li ndi na omimvo mbali, uukwanegumbo wetu owa tembukile koNew Guinea. Konyala omimvo mbali otwa li twa kala muRabaul, nomimvo hetatu otwa li twa kala muBougainville. Pethimbo ndyoka muNew Guinea kamwa li o-TV, onkee ngame nomumwamememati katwa li hatu kala megumbo, ihe otwa longitha ethimbo olindji mokumbwinda nokupashiyona.

Sho ndi na omimvo omulongo lwaampono, onda tameke okukala ndi na ohokwe momalongelokalunga. Meme okwa li Omukatoolika nokwa lombwele ndje ndi kale handi yi kotundimbiimbeli pamwe nomwiikaleli gumwe gwaKatoolika. Onda ningi Omukatoolika nonda shashwa sho nda li ndi na omimvo omulongo.

Ihe konima yaashoka otwa shuna koAustralia. Sho ndi na omimvo omulongo nandatu lwaampono, onda li nda limbililwa kwaashoka nda longwa kombinga yelongelokalunga. Onda li ndi ilongo ondjokonona sho ndi li mosekundosikola. Tse natate otwa li hatu popi ethimbo ele kombinga yankene omalongelokalunga ga tameka, notwa li hatu dhiladhila kutya omahokololo gomOmbiimbeli kage shi goshili. Lwahugunina, onda thigi po ongeleka yaKatoolika.

Sho ndi na omimvo 16, aavali yandje oya topoka. Meme okwa li a gwililwa po unene, nokonima yethimbo onda ka kala pamwe natate nomukulukadhi gwe omupe. Omumwamememati naMeme oya li ya tembukile koshitopolwa shimwe. Pethimbo ndyoka onda li ndi uvite uuwike unene. Onda li nda ningi owala ekwatathano nameme konima yomimvo mbali. Onda tameke okunwa, okulongitha iingangamithi nokwiitula momainyanyudho. Onde etha osikola e tandi tameke iilonga, nonda li nda hepitha onkalamwenyo yandje momikalo dha nyata sho ndi na omimvo 20 nasha.

Sho nda gwanitha omimvo 25 onda tameke okudhiladhila ishewe kombinga yOmbiimbeli. Onda tameke iilonga iipe moka twa li hatu longo naLiene, omukadhona omunamikalo ngoka a li ha yamukula omuhona gwe nombili, nonando okwa li he mu ningi nayi. Onda pula Liene kutya omolwashike ihaa yamukula omuhona gwe nayi? Okwa ti kutya oha konakona Ombiimbeli nOonzapo dhaJehova noha kambadhala okutula omakotampango gayo miilonga monkalamwenyo ye. Liene okwa pula ndje a konakone Ombiimbeli nangame. Onda li ndi shi ote ya a longe ndje ashihe shoka e shi kombinga yOmbiimbeli uule wotundi yimwe. Ongulohi ndjoka, Liene okwa li a longitha oowili ndatu okuyamukula omapulo gandje kombinga yOmbiimbeli. Onda li nda kumwa molwaashoka omayamukulo agehe ngoka a pe ndje oge li mOmbiimbeli.

Konima yoonkundathana dhetu naLiene onda shuna kegumbo nonda li nda geela Kalunga molwaashoka ina kwathela ndje nale ndi ilonge oshili kombinga ye. Onda li nda tseya kutya Oonzapo odha yogoka pamikalo nonda li te dhiladhila kutya ethimbo olya pwa po kungame okulundulula omikalo dhandje. Onda li wo tandi dhiladhila kutya itandi vulu nando okuuvitha egumbo negumbo ngaashi Oonzapo. Onda tsikile okukonakona Ombiimbeli nOonzapo, ihe elalakano lyandje olya li okumona epuko momalongo gadho opo ndi kale ndi na etompelo ewanawa okuhulitha po eendathano nadho. Esiku limwe onda li ndi wete kutya kapu na siku ndi mone epuko ndyoka.

NKENE OMBIIMBELI YA LUNDULULA ONKALAMWENYO YANDJE: Mpoka ngaa pu thike okwiilonga kwandje oshindji kombinga yOmbiimbeli, opo ngaa pu thike eiyuvo lyandje tali pe ndje uusama. Opo eiyuvo lyandje li kale lya yela, onde etha okulongitha iingangamithi. Ihe onda tembukile koshilongo shimwe nonda ningi ishewe omupika gwomainyanyudho niikolitha. Aluhe sho ngaa nda fa tandi ningi ehumokomeho ndi kale metsokumwe nomakotampango gOmbiimbeli, ohandi shuna owala monima. Ohandi galikana kuJehova nda sa ohoni, ihe natango ohandi kala ndu uvite nayi.

Sho ndi ilongo kombinga yomukwaniilwa David naBatseba nankene Jehova a li u ungaunga nayo nohenda, osha li sha kwathele ndje unene. David okwa li a zimine epuko lye sho a pewa epukululo noka li i ipopile, nokwa taamba neifupipiko omayele ngoka a pewa. (2 Samuel 12:1-13) Uuna nda yona onda li handi dhimbulukwa ehokololo ndyoka nokasha li we oshidhigu unene kungame okupula edhiminopo kuJehova. Onda tokola wo okukala handi galikana omanga inaandi ya mepuko pehala lyokugalikana owala uuna ndi li mepuko, naashoka osha kwathela ndje lela.

NKENE SHA KWATHELE NDJE: Onda li handi geye nziya. Ihe Aaefeso 4:29-31 oya kwathele ndje ndi mone kutya onda pumbwa okuhenuka “uululu auhe, ondjahi nonkone.” Sho tandi ilongo okupangela ondjahi yandje, ondi ilongo wo okupangela elaka lyandje. Natango ishewe, omayele gaJesus kutya “oohapu dheni nadhi tye ‘eeno, eeno’” oga kwathela ndje ndi kale handi ningi omatokolo. — Mateus 5:37.

Petameko meme okwa li e li ompinge nangame sho handi endathana nOonzapo, ihe konima yethimbo okwa li u uvite uuntsa omolwandje. Okwa li a lombwele ndje a ti: “Ondi shi kutya uukwatya mboka wu na ngashingeyi omolwaashoka wi ilonga kombinga yaJehova, ihe hamolweputudho ndyoka wa mona.” Onda li nda nyanyukwa okuuva meme ta lombwele ndje ngaaka.

Ngashingeyi ondu uvite kutya onkalamwenyo yandje oyi na elalakano notayi ti sha. Omimvo omugoyi dha pita ngame nomusamane gwandje otwa longo aantu Ombiimbeli tu li miilonga yethimbo lyu udha. Ngashingeyi ohandi uvitha egumbo negumbo nondi uvite kutya iilonga mbyoka oyi na ondjambi ya dhenga mbanda.

UUYELELE KOMBINGA YE

EDHINA: DENIS BUSIGIN

OMIMVO: 30

OSHILONGO MOKA A VALELWA: RUSIA

ONDJOKONONA: OKWA LI E HOLE OKALATE

OKWA HOKOLOLA ONAKUZIWA YE A TI: Onda valelwa muPerm’ nonda kokele muFurmanov, oshilando shoka shi na aakalimo ye li 40 000 lwaampono shi li moshitopolwa shaIvanovo muRusia. Furmanov oshilando shi na uunshitwe wu fuula nomu na omiti omiwanawa ndhoka omafo gadho haga ningi omashunga nomatiligane poshikufuthinge. Mo 1980 sigo 1990 nasha iilonga yomuyonena oya li yi indjipala moshilando moka. Uukwanegumbo wetu owa li hawu mono iiyemo iishona lela. Otwa kala naavali yandje nomumwamememati megumbo ndyoka li na owala ondunda yimwe yokulala.

Ondi ilongo okalate sho ndi na omimvo heyali. Onda li ndi hole uudhano mboka tagu pu mo. Ethimbo alihe ndyoka ki na sho te ningi onda li handi ki idheula, nookuume kandje ayehe oya li aaholi yomaudhano. Sho ndi na omimvo 15 onda li nda sindana epaya etiligane, nomumvo gwa landula ko onda li nda sindana epaya eyimbi. Onda li nda kutha ombinga muudhano wokalate mboka wa li muRusia nomuEuropa naAsia womanyakwa dhingi. Onda li ndi wete ndi na onakuyiwa ombwanawa, ihe sho ndi na omimvo 17, onkalamwenyo yandje oya lunduluka thiluthilu.

Otwa li twa kwatwa pamwe nookuume kandje sho twa longo iilonga yomuyonena. Onda li nda pewa egeelo okukala mokakuma uule womimvo mbali. Onkalamwenyo moka oya li ondhigu. Ihe sho ndi li mondjedhililo onda li nda mono Ombiimbeli oshikando shotango. Onda lesha embo lyaGenesis, Omapisalomi nEtestamendi Epe. Ondi ilongo egalikano lyOmuwa momutse nonda li handi li hokolola ongulohi kehe omanga inaandi ka lala. Onda li handi dhiladhila kutya oku shi ninga otashi ka kwathela ndje.

Mo 2000 onda mangululwa mondjedhililo, ihe kanda li ndi shi kutya nandi ninge shike monkalamwenyo yandje. Onda tameke okulongitha iingangamithi. Meme okwa si, nosha li oshidhigu kungame oku mu hupula molwaashoka onda li ndi mu hole unene. Konima yethimbo onde etha po okulongitha iingangamithi nokukala handi ki idheula ishewe okalate. Onda tembukile kuIvanovo nonda mono iilonga mositola yiikulya. Omukulukadhi ngoka a li menindjela mositola moka okwa li Onzapo yaJehova. Okwa yelithile ndje ooshili dhopetameko dhOmbiimbeli, e ta ningi elongekidho opo omumwatate gumwe a kale aluhe ha konakona nangame.

NKENE OMBIIMBELI YA LUNDULULA ONKALAMWENYO YANDJE: Sho ndi ilonga kutya elalakano lyaKalunga okuninga evi oparadisa, oshi inyengitha ndje unene nonda kala nda hala ndi ka kale monakuyiwa ya tya ngaaka. Konima onde shi dhimbulula kutya Jehova Kalunga oku na omakotampango ngoka a hala aantu ya kale metsokumwe nago. Monkalamwenyo yandje kanda li ndi na nomuntu. Ihe ondi ilongo kutya Jehova okwa hala ndi kale ndi na ko nasha nayalwe nokukala nomaukwatya ngoka kaanda li ndi na pethimbo mpoka, ngaashi olukeno nokuhola ombili.

Sho nda tameke okudhiladhila kiinima mbyoka Jehova a ningila ndje, ngaashi okugandja Omwana ekuliloyambo omolwoondjo dhandje, olupandu okupandula ohole yaJehova olwa ningitha ndje ndi lundulule onkalamwenyo yandje. Pashiholelwa ondi ilongo mEpisalomi 11:5 kutya Jehova oku tonde uukakombwiilitha. Onkee onda hulitha po okutala oopolohalama dhoko-TV ndhoka tadhi ulike elongithonkondo nuukakombwiilitha. Onda kondjo wo noonkondo opo ndi ethe po uudhano welongithonkondo. Ekotampango ndyoka li li mAakorinto yotango 15:33, olya kwathele ndje okumona kutya mboka tandi endathana nayo otaya vulu okunwetha ndje mo, naashoka oshu ulikwa sho nda li dhe edhililwa mondjedhililo omolwookuume aawinayi. Onkee ano, onda tokola okuhulitha po eendathano nookuume mboka ye hole tagu pu mo omaudhano gelongithonkondo.

NKENE SHA KWATHELE NDJE: Okukala handi endathana nOonzapo dhaJehova nokukonakona Ombiimbeli osha kwathela ndje ndi kale omunashili. Pashiholelwa, ondi ilonga mAahebeli 13:5 kutya onda pumbwa okukala nda gwanenwa kwaashoka ndi na nokukondjitha ohole yiimaliwa. Okutula miilonga omayele ngaka osha kwathele ndje ndi kale ihaandi yaka noihaandi fundju.

Onda kala aluhe nda lenga ookuume kandje. Ihe monakuziwa onda mona nkene olwiho nuutile hayi yono po uukuume. Oonzapo dhaJehova inadhi gwanenena, ihe onda mono kutya ohadhi simaneke omakotampango gaKalunga nohadhi kambadhala oku ga tula miilonga meihumbato lyadho nayalwe. Ngashingeyi ondi na ookuume kashili mokati kadho.

Ohandi kala tandi ipula kutya andola kandi ilongele omakotampango gOmbiimbeli, ando onkalamwenyo yandje oyi li ngiini? Otashi vulika ando ndi li ishewe mondjedhililo nenge handi ehameke aantu noku ya monitha iihuna. Ihe ngashingeyi ondi na nekulu noyanamati yetu yaali. Tu li uukwanegumbo ohatu nyanyukilwa okukwathela yalwe yi ilonge oshili kombinga yaKalunga.

UUYELE KOMBINGA YE

EDHINA: JOSE CARLOS PEREIRA DA SILVA

OMIMVO: 31

OSHILONGO MOKA A VALELWA: BRASILIA

ONDJOKONONA: OMUHOLI GWOMALUGODHI GOMOMAPANDAANDA

OKWA HOKOLOLA ONAKUZIWA YE A TI: Onda kokele molukanda lwuumbashu muSão Paulo muAmerika shokOlukadhi. Katwa li tu na omeya ga yela gokunwa nuundjugo mboka hawu pombwa. Oshitopolwa shoka osha li sha tseyikila nawa elongithonkondo niilonga yomuyonena.

Mokuputuka kwandje onda li ndi hole elongithonkondo nohandi geya mbala. Onda li handi kutha aluhe ombinga momalugodhi gomomapandaanda, naantu pomudhingoloko oya li haya tila ndje. Okuzala neholokopo lyandje nosho wo eihumbato lyandje oya li hayi ulike shili kutya onda nika oshiponga. Onda li handi nu unene nolundji onda kala kandi shi mpoka ndi li. Onda li handi longitha iingangamithi nda fa aamwamememati. Shoshili, omumwamememati gumwe okwa sa mokulongitha iingangamithi sha pitilila.

NKENE OMBIIMBELI YA LUNDULULA ONKALAMWENYO YANDJE: Sho nda tsakaneke Oonzapo dhaJehova, odha li dhu ulukile ndje mOmbiimbeli kutya Kalunga ota ka ninga evi alihe oparadisa. (Lukas 23:42, 43; Ehololo 21:3, 4) Onda li wo ndi ilongo kutya oonakusa kaye na shoka ye shi, onkee ano Kalunga iha geele aakolokoshi moku ya tula momulilo gwoheli. (Omuuvithi 9:5, 6) Shika osha li she etele ndje epepelelo enene. Shoka ndi ilongo kombinga yaKalunga osha hwahwameke ndje dhi lundulule onkalamwenyo yandje. Ihe kasha li oshipu okuninga omalunduluko, ngaashi okweetha po iingangamithi, okunwa sha pitilila, omalugodhi nelaka lya honga.

Shoka sha tsu ndje omukumo unene, oohapu dhomuyapostoli Paulus dhi li mAakorinto yotango 6:9-11. Enyolo ndyoka otali ulike kutya Aakriste yamwe yomethelemumvo lyotango oya li ye na iikala ya fa mbyoka nda li ndi na. Oovelise ndhoka otadhi ti: “Yamwe yomune osho mwa li mwa tya ngaaka. Ihe omwa yogwa oondjo, omwa yoololelwa Kalunga, omwa ningwa aayuuki koshipala shaKalunga omolwOmuwa Jesus Kristus okOmbepo Ondjapuki yaKalunga.” Oohapu ndhoka odha li dha kwathela ndje ndi kale netegameno kutya nangame otandi vulu okuninga omalunduluko ga pumbiwa monkalamwenyo yandje opo ndi kale nda hokiwa kuKalunga.

Sho nda tameke okweendathana nOonzapo dhaJehova, onda li nda tompwa shili kutya dho odhi li elongelokalunga lyashili. Odhi shi shi kutya onda li ndi hole elongithonkondo nohandi geye mbala, ihe nonando ongaaka, odha li dha popitha ndje nombili nosho wo nohole.

NKENE SHA KWATHELE NDJE: Andola onda li inaandi konakona Ombiimbeli nokulundulula onkalamwenyo yandje, otashi vulika ando nda sa nale. Onda nyanyukwa wo sho nda kwathela omumwamememati gumwe i ilonge kombinga yOmbiimbeli nokweetha po okulongitha iingangamithi. Onda ladhipika wo aakwanezimo yalwe ya tameke okukonakona Ombiimbeli. Onda pandula noonkondo sho ndi igandjela okulongela Kalunga ngoka e na ko nasha natse unene.

[Oohapu dha simana pepandja 23]

“Onda tokola okukala handi galikana omanga inaandi ya mepuko pehala lyokugalikana owala uuna ndi li mepuko, naashoka osha kwathela ndje lela”