Ombiimbeli ohayi lundulula onkalamwenyo yaantu
OSHIKE sha li shi inyengitha Omurastafari a tete ko omafufu ge gorasta nokweetha po okukala e na okatongotongo niilumbu? Niishewe oshike sha li sha ningitha omulumentu omugundjuka ngoka a li haka tala iimaliwa yaamboka ya landitha iingangamithi kwaamboka ye yi landa a lundulule onkalamwenyo ye? Tala kwaashoka aantu mbaka taya ti.
“Onda li nokuli nde etha po okukala ndi na okatongotongo niilumbu.”—HAFENI NGHAMA
OOMVULA: 34
OSHILONGO MOKA A VALELWA: ZAMBIA
ONDJOKONONA: OMURASTAFARI
ONAKUZIWA YANDJE: Onda valelwa mokamba yoontauki moZambia. Meme okwa li a tauka mo moNamibia pethimbo lyiita nokwa li a yi mongundu ndjoka hayi ithanwa South West Africa People’s Organization (SWAPO). Ongundu ndjika oya li tayi kondjitha epangelo lyaSouth Africa ndyoka lya li tali pangele Namibia pethimbo mpoka.
Petameko onda li nda kala mookamba dhi ili nodhi ili uule woomvula 15 dhonkalamwenyo yandje. Aagundjuka mookamba dho-SWAPO oya li ya longwa kutya oye na okwaambidhidha o-SWAPO ndjoka tayi kondjele emanguluko. Otwa li twa longwa opolotika nosho wo okukala tu tonde iilumbu.
Sho nda li ndi na oomvula 11, ndi li Omukriste onda li nda hala okukolekwa mongeleka ndjoka ya li mokamba, ndjoka ya li embwinda lyoongeleka ngaashi Katoolika, Luteri, Angilikana nosho wo dhilwe. Omusita ngoka nda li nda popi naye shi na ko nasha naashoka okwa li a sitha ndje uunye kaandi katuke onkatu ndjika. Okuza mpoka onda tameke okukala ndi wete kutya ka ku na Kalunga. Nonando ongawo, sho ndi na oomvula 15 onda tameke okukala ndi hole oongalo dhoreggae nohokwe yandje yokuningulula okwaahe na uuyuki hoka kwa ningilwa aaludhe Aafulika oya li yi inyengitha ndje ndi ye mongundu yEitaalo lyOorasta. Onda kokeke Oorasta, onda tameke okuhila epangwe, nonde etha po okulya onyama nosho wo okupopila emanguluko lyaaluudhe. Ihe inandi lundulula omikalo dhandje dha nyata nenge ndi ethe po okutala ookino ndhoka dhi na elongitho lyoonkondo. Onda tsikile okulongitha elaka lya nyata.
NKENE OMBIIMBELI YA LUNDULULA ONKALAMWENYO YANDJE: Mo 1995 sho nda li ndi na oomvula 20 lwaampono, onda tameke okudhiladhila muule shi na ko nasha naashoka ndi na okulongitha onkalamwenyo yandje. Onda li handi konakona iileshomwa ayihe yOorasta mbyoka tandi vulu okumona. Yimwe yomuyo oya li ya longitha uuyelele wa za mOmbiimbeli ihe shoka ya yelitha kasha li shi na eityo kungame. Onkee ano, onda tokola ndi leshe Ombiimbeli kungame mwene.
Konima, kuume kandje Omurastafari okwa li a pe ndje okambo kokukonakona Ombiimbeli ka nyanyangidhwa kOonzapo dhaJehova. Onda konakona kungame mwene oshileshomwa shoka pamwe nOmbiimbeli. Konima onda li nda tsakanene nOonzapo dhaJehova nonda tsikile nadho ekonakono lyandje lyOmbiimbeli.
Onda li nda ningi oonkambadhala dha mana mo opo ndi ethe po okuhila omakaya nokunwa sha piitilila. (2 Aakorinto 7:1) Onda opaleke eholokepo lyandje, ondi ikulula orasta, onde etha po okutala omafano giipala e tandi hulitha po wo okulongitha elaka lya nyata. (Aaefeso 5:3, 4) Hugunina onda li nokuli nde etha po okukala ndi na okatongotongo niilumbu. (Iilonga 10:34, 35) Opo ndi ninge omalunduluko ngaka onda li ndi na okweetha okupulakena koongalo ndhoka tadhi humitha komeho uukwamuhoko nokuhulitha po eendathano nokuume kandje yonale, mboka ya li haya kambadhala okuningitha ndje ndi shune mokukalamwenyo kwandje kwonale.
Konima yokuninga omalunduluko ngoka, onda kongo Oshinyanga shUukwaniilwa shOonzapo dhaJehova e tandi ya pula opo ndi ninge gwomelongelokalunga lyawo. Opwa li pu na ngoka ha konakona nangame Ombiimbeli. Sho nda tokola okuninginithwa ndi ninge gumwe gwomOonzapo dhaJehova, aakwanezimo yandje kaya li ye shi nyanyukilwa. Meme okwa lombwele ndje ndi hogolole elongelokalunga “lyopaKriste” lilwe ihe ha Oonzapo dhaJehova. Kuku gumwe omukwawo gwameme, ngoka a li e na ondondo yopombanda mepangelo, okwa kala aluhe ha pe ndje uusama omolwetokolo lyandje lyokweendathana nOonzapo.
Nonando ongaaka, sho ndi ilongo kombinga yankene Jesus a li u ungaunga naantu nokutula miilonga omayele ge osha kwathele ndje ndi idhidhimikile omapataneko nokushekwa. Sho nda yelekanitha shoka Oonzapo hadhi longo naashoka Ombiimbeli tayi ti, onda li ndi na uushili kutya onda mona elongelokalunga lyashili. Pashiholelwa, ohaya landula oshipango shOmbiimbeli shokuuvithila yalwe. (Mateus 28:19, 20; Iilonga 15:14) Yo ishewe ihaya kutha ombinga mopolotika.—Episalomi 146:3, 4; Johannes 15:17, 18.
NKENE SHA KWATHELE NDJE: Mokwiilonga okukala pamithikampango dhOmbiimbeli osha kwathela ndje momikalo tadhi ti sha. Pashiholelwa, okweetha okuhila epangwe okwa kwathela ndje kaandi kale tandi hepeke oodola omathele kehe omwedhi. Ihandi kala we tandi ningi omahaluhalu, nosho wo uukolele wandje wopamadhiladhilo nowopalutu owa hwepopala.
Ngashingeyi onkalamwenyo yandje oyi na eityo nelalakano ndyoka nda kala nda yuulukwa okuza kuugundjuka wandje. Shoka sha simanenena osho kutya, ngashingeyi ondi uvite kutya onda hedha popepi naKalunga.—Jakob 4:8.
“Ondi ilonga okupangela ongeyo yandje.”—MARTINO PEDRETTI
OOMVULA: 43
OSHILONGO MOKA A VALELWA: AUSTRALIA
ONDJOKONONA: OMULANDITHI GWIINGANGAMITHI
ONAKUZIWA YANDJE: Uukwanegumbo waandjetu owa kala nokutembuka olundji pethimbo sho tandi koko. Onda li nda kala moondolopa oonshona, moshilando oshinene nonda li nda kala ethimbo efupi kiitopolwa yokomikandi hoka haku kala oomvalele dhaAustralia. Otandi dhimbulukwa iinima iiwanawa mbyoka twa ninga pamwe naamwameme nookuku ngaashi okukwata oohi, okuya kuukongo nokuhonga iinima yontumba.
Tate okwa li omudhengingonyo nokwa li a tameke okulonga ndje okukondja manga nda li omushona lela. Onkalamwenyo yandje ayihe onda kala handi longitha oonkondo. Sho nda li ndi na oomvula omulongo nasha, onda li nda kala olundji poondunda dhomanwino. Ngame nookuume kandje otwa kala aluhe hatu kongo omalugodhi opo tu kondje naantu. Otwa li hatu longitha oomwele niiti yokudhana okatanga kobase tu ponokele ongundu yaantu 20 nenge ye vulithe po.
Onda li nda mono iimaliwa mokulanditha iingangamithi nokulanditha iinima mbyoka ya yakwa kaaniilonga yopomatulilosikepa. Onda li wo handi ka tala iimaliwa yaamboka ya landitha iingangamithi kwaamboka ye yi landa nonda li handi ya tilitha mokulongitha ondjembo yomushasho nombistoli. Elalakano lyandje olya li okukala handi dhipagele aantu iimaliwa. Elalakano lyandje oya li okudhipaga nenge okudhipagwa.
NKENE OMBIIMBELI YA LUNDULULA ONKALAMWENYO YANDJE: Onda li ndu uva kombinga yOonzapo dhaJehova pethimbo sho nda li te putuka. Sho nda li mepipi lyoomvula 20 nasha, otandi dhimbulukwa sho nda li nda pula meme ngele oku shi mpoka tadhi vulu okwaadhika. Konima yomasiku gaali, Onzapo yedhina Dixon oya li ya konkola paandjetu. Konima yokupopya uule wokathimbo, okwa hiya ndje ndi ye kokugongala kwOonzapo dhaJehova. Onda kala handi yi kokugongala hoka uule woomvula dhi vulithe 20 ngashingeyi. Kehe epulo ndyoka nda li ndi na, Oonzapo odha li dha yamukula ndje okuza mOmbiimbeli.
Onda li nda nyanyukilwa okwiilonga kutya Jehova oku na ohokwe nakehe gumwe, nokuli naamboka kaaye shi aatilikalunga. (2 Petrus 3:9) Onda li nda mono kutya oku li Tate omunahole ngoka ta ka sila ndje oshimpwiyu, nokuli nuuna kaapu na gulwe ngoka te shi ningi. Onda li wo nda pepelelwa sho ndi ilongo kutya otaka dhima po oondjo dhandje ngele onda lundulula iikala yandje. Oovelise dhOmbiimbeli mAaefeso 4:22-24 odha nwetha ndje mo noonkondo. Oovelise ndhoka odha li dha ladhipike ndje ndi ‘ihule omuntu omukulu’ ‘nondi zale omuntu omupe ngoka a shitwa a fa Kalunga.’
Osha li sha pula ndje ethimbo opo ndi lundulule iikala yandje. Onda li handi kala inee guma iingangamithi oshiwike ashihe, ihe mehuliloshiwike, uuna ndi li nookuume kandje onda li handi yi longitha. Onda li nda mono kutya onda li ndi na okuya kokule naamboka nda li handi endathana nayo ngele onda hala okukala nonkalamwenyo ya yogoka, onkee ano, onda tokola ndi tembukile koshilando shilwe. Ookuume yamwe oya tokola okuthindikila ndje nonde shi itaale. Molweendo, oya tameke okuhila epangwe e taya kala ya hala okupa ndje. Onde ya lombwele kutya oonkalo ndhoka odho nda li te thigi po, notwa topoka poongamba e tandi yi ongame awike. Konima, onda li ndu uvu kutya mboka ya li ookuume kandje oya li ya teya ombaanga komulungu gwondjembo.
NKENE SHA KWATHELE NDJE: Sho nde etha po eendathano nookuume kandje mbeyaka, onde shi mona oshipu okuninga omalunduluko ngoka ga pumbiwa monkalamwenyo yandje. Mo 1989, onda li nda ningi Onzapo ya ninginithwa. Konima sho nda ninginithwa, omumwamemekadhona, meme natate nayo oya landula ndje mokulongela Jehova.
Ngashingeyi ondi li nda hokana uule woomvula 17 nondi na aanona yatatu. Ondi ilonga nkene ndi na okupangela ongeyo yandje, nokuli nuuna nda hindwa. Ondi ilonga okukala ndi hole aantu ‘yomiigwana ayihe, yomomihoko adhihe noyomalaka agehe.’ (Ehololo 7:9) Onda mona uushili woohapu dhaJesus moshinima shandje. Okwa ti: “Ngele tamu vulika koohapu dhandje, nena kapu na omalimbililo, one aalongwa yandje. One otamu ka tseya ihe oshili, noshili otayi ke mú mangulula.”—Johannes 8:31, 32.
[Oohapu dha simana pepandja 9]
Opo ndi ninge omalunduluko ngaka onda li ndi na okweetha okupulakena koongalo ndhoka tadhi humitha komeho uukwamuhoko
[Oohapu dha simana pepandja 10]
Ngame nookuume kandje otwa kala aluhe hatu kongo omalugodhi opo tu kondje naantu. Otwa li hatu longitha oomwele niiti yokudhana okatanga kobase tu ponokele ongundu yaantu 20 nenge ye vulithe po