IITOPOLWA YI IKOLELELA KOSHIPALANYOLO SHOKOMBANDA
Aantu oyendji ohaya si iipundjamenye
Noelle, oka li okakadhona ke na ohenda noka li ke hole okuthaneka. Ongulohi yimwe manga taka dhana molugumbo lwaandjawo oka gwile mokandama kokuyoga e taka sile mo. Opo owala ka li pokugwanitha oomvula ne.
Charlotte, Daniel, Olivia naJosephine . . . Ngaka ogamwe gomomadhina gaanona 20 yoomvula oohamano nooheyali yomaantu 26 mboka ya li ya dhipagwa nondjembo, mo 14 Desemba 2012, posikola moConnecticut, moAmerika. Pehupulitho, omupresidende Obama okwa tumbula omadhina gaanona e ta lombwele aalilisa ta ti: “Iiningwanima ya tya ngeyi oyi na okuhulithwa po.”
Bano, ngoka a li e na oomvula 18, okwa li a tembuka mo moIrak noyaandjawo mo 1996 ya ka kale koNorway. Shinikitha oluhodhi, mo 22 Juli 2011, Bano okwa li gumwe gwomaantu 77 mboka ya li ya yahwa nokusa komudhipagi ngoka a li a popi a ti: “Onda hala okugandja ombili . . . sho inaandi vula okudhipaga aantu oyendji.”
Ohatu uvu omahokololo ga nikitha oluhodhi ga faathana taga popiwa apuhe muuyuni. Dhiladhila koluhodhi nokuuwehame mboka hawu etithwa kiiponga, komiyonena, kiita, kuukulo, kiiponga yopaunshitwe nokiiningwanima yilwe. Iinima mbika oya faalela oomwenyo odhindji noya thiga oyendji taya mono iihuna.
Yamwe ohaya pe Kalunga ombedhi, taya dhiladhila kutya Omushiti ke na ko nasha naantu. Yalwe oye ya pehulithodhiladhilo kutya Kalunga oku tu wete sho tatu mono iihuna, ihe ina hala okuninga po sha. Omanga yalwe haya ti kutya iiponga oyu uthwa nale, itatu vulu oku yi keelela. Konyala kehe omuntu oku na omadhiladhilo ge moshinima shika. Openi tatu vulu okumona omayamukulo ge shi okwiinekelwa notaga mbilipaleke? Miileshwa tayi landula, otatu ka konga mOmbiimbeli tu mone omayamukulo kutya oshike hashi etitha okumona iihuna nonkene taku vulu okuhulithwa po.