Omolwashike tatu mono iihuna ngeyi?

OMAPANGELO OMAKWANYANYA OHAGE ETITHA IIZEMO IIWINAYI

Ombiimbeli otayi ti: “Aakaanakalunga nge taa pangele, oshigwana otashi keme.”—Omayeletumbulo 29:2.

Mondjokonona omu na aapangeli oyendji ookayamukulwa mboka ya li haya pangele nonyanya noya li ye etele aapangelwa yawo okumona iihuna okundji. Ihe haayehe ye li ngawo. Yamwe oye nine aantu ooyakwawo omalalakano omawanawa. Ihe nonando ongawo, uuna taya pangele, olundji oonkambadhala dhawo ohadhi yiwa moshipala koontamanana nokokukondjela koshipundi. Nenge tashi vulika ya longithe nayi oonkondo yi iyambapaleke, shoka hashi uvitha nayi aantu. Ngoka a li nale ominista yiikwapondje yaAmerika, Henry Kissinger, okwa ti: “Ondjokonona oyu udha omahokololo goonkambadhala ndhoka dha ponya nomalalakano ngoka inaaga tsakanithwa.”

Ombiimbeli otayi ti wo: “Kaku na omuntu hu utha okukalamwenyo kwe.” (Jeremia 10:23) Aantu inaaya gwanenena kaye na uunongo mboka wa pumbiwa nomayele gokuwilika onkalamwenyo yawo. Ngele aantu itaya vulu okuwilika oonkalamwenyo dhawo, otaya vulu ngaa okuwilika oonkalamwenyo dhayakwawo? Owu wete nduno kutya omolwashike aapangeli yopantu itaaya vulu okuhulitha po okumona iihuna? Nokuli olundji omapangelo omakwanyanya ogo hage etitha okumona iihuna.

ENWETHOMO LYOMALONGELOKALUNGA GIIFUNDJA

Jesus okwa ti: “Ngele omu holathane, nena aantu ayehe otaa ka dhimbulula kutya one aalongwa yandje.”—Johannes 13:35.

Aawiliki yomalongelokalunga meitaalo kehe nomoongeleka ohaya uvitha kombinga yohole noyuukumwe. Ihe nonando ongaaka, oya nyengwa okulonga aalanduli yawo ohole yashili ndjoka tayi vulu oku ya kwathela ya hulithe po okatongo. Pehala lyoku ya kwathela ya kokeke ohole, omalongelokalunga olundji ohaga hwahwameke etopoko, okatongo noontamanana mokati kiigwana nomihoko. Omuteolohi Hans Küng okwa nyola pehulilo lyembo lye Christianity and the World Religions a ti: “Oontamanana dhopapolotika ndhoka dha yaga unene kegonga oondhoka dha nwethwa mo nohadhi hwahwamekwa komalongelokalunga.”

Niishewe, aasita nenge aawiliki yomalongelokalunga ogendji ihaya kala ye na ko nasha uuna omuntu ta hondele nenge e li muushenge. Shoka ohashi etitha omikithi, omaikutho gomala, omategelelo inaaga halika nokuteka kwoondjokana nomagumbo, shoka hashi ehameke nohashi uvitha nayi.

OKWAAGWANENENA KWOPANTU NUUHALU

“Omuntu oha makelwa kuuhalu we mwene, mboka tau mu hekaheka e tau mu yulu. Uuhalu ngele wa ningi uusimba, otau vala uulunde.”—Jakob 1:14, 15.

Molwaashoka atuheni inatu gwanenena, otu na egamo lyokuninga omapuko notu na okukondja ‘twaa longe shoka sho opalela uuhalu womomalutu getu.’ (Aaefeso 2:3) Ohashi kala oshidhigu okukondjitha okahalu, unene tuu ngele opu na ompito yoku ka gwanitha po. Ngele otwe etha ke tu tone oonkondo, otashi ke tu endela nayi.

Omunyoli P. D. Mehta okwa nyola a ti: “Olundji okumona iihuna ohatu ku iyetele omolwokahalu, okukonga enyanyu twaa na eipangelo, olwiho nokulalakanena oondondo dhopombanda.” Omahalo ga pitilila niinima mbyoka hayi piki aantu, ngaashi iikolitha, iingangamithi, okundombola, omilalo nosho tuu, ohayi vulu okuyona po oonkalamwenyo dhaantu mboka ya simanekwa moshigwana noye etela aanegumbo yawo, ookuume nayalwe okumona iihuna. Mokutala kokwaagwanenena kwaantu, otatu tsu kumwe nOmbiimbeli sho tayi ti: “Otu shi shi kutya sigo ongashingeyi kehe shimwe shomeshito otashi fudhagana kuuwehame wa fa mboka wopevalo lyokanona.”—Aaroma 8:22.

EPANGELO LYOOMBEPO DHOOMPWIDHULI

Ombiimbeli otayi ti kutya Satana oye “kalunga kuuyuni mbuka” (OB-1954) noha yambidhidhwa kiishitwa yilwe iiwinayi iinankondo hayi ithanwa oondemoni nenge oompwidhuli.—2 Aakorinto 4:4; Ehololo 12:9.

Ngaashi Satana, oondemoni nadho ohadhi kutha ombinga mokupangela nomokupukitha aantu. Omuyapostoli Paulus okwa zimine oshinima shika sho a ti: “Tse itatu kondjitha aantu, ihe otatu kondjitha oonkondo dhomombepo, aanankondo yuuyuni mbuka womilema nosho wo oonkondo dhuuwinayi mewangandjo.”—Aaefeso 6:12.

Nonando oondemoni ohadhi nyanyukilwa okuningila aantu uuwinayi, ndyoka halyo elalakano lyadho lyotango. Elalakano lyadho okugamuna ko aantu kuJehova, Kalunga Omupangeliawike. (Episalomi 83:18) Iinima ngaashi okwaanekela noonyothi nokwaanekela kulwe, uulodhi nuumpulile oyimwe yomiinima mbyoka oompwidhuli hadhi longitha okupukitha nokupangela aantu. Nomolwaashoka Jehova te tu londodha kiiponga mbyoka nokwa hala okugamena ayehe mboka taya kondjitha Satana noondemoni dhe.—Jakob 4:7.

OTU LI ‘MOMASIKU GAHUGUNINA’

Oomvula 2 000 lwaampono dha piti, Ombiimbeli oya li ya hunganeke ya ti: ‘Dhimbulukwa aluhe kutya momasiku gahugunina otaku ke ya omathimbo omadhigu.’ (Yelekanitha OB-1954.)

Oya popi shoka tashi ka ningitha omathimbo ngaka omadhigu, ya ti: “Aantu otaa ka kala nokwiihola, ye hole eliko, aainomi noye hole uuntsa. . . . Oyo otaa ka kala yaa na olukeno nohenda, haa lundilathana, aapwidhi, naadhudhu; otaa ka kala ye tonde uuwanawa. Oyo otaa kala aakotokeli, ihaa yawala, haa tuwalala noye hole olundundu peha lyokuhola Kalunga.” Osha yela kutya etompelo lya simana kutya omolwashike tatu mono iihuna olyo kutya otu li ‘momasiku gahugunina.’—2 Timoteus 3:1-4.

Mbela iinima mbika twa zi nokukundathana inayi tu kwathela tu tseye kutya omolwashike aantu ya nyengwa okuhulitha po okumona iihuna, nonando otaya kambadhala? Mbela ekwatho otali tu zile peni? Otu na okutala kOmushiti ngoka u uvaneka ‘okuhanagula po iilonga yomuhindadhi’ naalanduli ye. (1 Johannes 3:8) Oshileshwa tashi landula otashi ka yelitha shoka Kalunga ta ka ninga, opo a hulithe po iinima ayihe mbyoka hayi etitha okumona iihuna.