Masiku okumona iihuna otaku hulu po
Dhiladhila ando wu li muuyuni moka kaamu na omuntu ta mono iihuna, kaamu na omiyonena, iita, uuwehame niiponga yopaunshitwe. Dhiladhila ando to penduka itoo ipula kombinga yontondo, yomathiminiko nenge yuuhupilo. Mbela iinima mbika otayi monika ya fa itaayi vulu okuningwa? Odhoshili kutya kapu na omuntu nenge epangelo lyopantu tali vulu okweeta oonkalo dha tya ngaaka. Ihe Kalunga oku uvaneka okuhulitha po okumona iihuna kwaantu akuhe mwa kwatelwa naahoka kwa popiwa moshitopolwa sha tetekele. Tala komauvaneko gOmbiimbeli taga landula:
OTAKU KE YA EPANGELO EWANAWA
“Pomasiku gaaleli mboka Kalunga komegulu ota ka dhika po oshilongo shoka shaa na hulilo. Itashi ka sindika nando, ihe otashi ka yonagula po iilongo mbyoka ayihe, nosho shene tashi ka kala sigo aluhe.”—Daniel 2:44.
Oshilongo nenge Uukwaniilwa waKalunga owo epangelo lyomegulu. Jesus Kristus, Omupangeli ngoka a hogololwa ota ka pingena po aaleli ayehe yopantu nota ka shilipaleka kutya ehalo lyaKalunga itali longwa owala megulu, ihe nokombanda yevi wo. (Mateus 6:9, 10) Epangelo ndika itali ka pingenwa po nando okepangelo lyopantu, molwaashoka olyo ‘oshilongo shaaluhe shOmuwa gwetu noshOmukulili, Jesus Kristus.’ Otapu ka kala ombili sigo aluhe.—2 Petrus 1:11.
ITAPU KA KALA WE OMALONGELOKALUNGA GIIFUNDJA
‘Satana ota vulu okwiishitukitha, a kale a fa omuyengeli guuyelele. Onkee ano, itashi kumitha, ngele aayakuli yaSatana otaa ishitukitha, ya kale ongaayakuli aawanawa. Ihe hugunina otaa ka pewa shoka ye shi ilongela.’—2 Aakorinto 11:14, 15.
Omalongelokalunga giifundja otaga ka anekwa pomutenya kutya oge li iilonga yOmuhindadhi notaga ka hulithwa po. Okatongo netilohi lyombinzi ndyoka hali etithwa komalongelokalunga itayi ka kala po we. Shika otashi ka kwathela ayehe mboka ye hole “Kalunga kashili nomunamwenyo” ye mu longele ‘meitaalo limwe’ nosho wo ‘mombepo nomoshili.’ Itapu ka kala tuu ombili nuukumwe!—1 Aatessalonika 1:9; Aaefeso 4:5; Johannes 4:23.
OKWAAGWANENENA ITAKU KA KALA PO WE
“Kalunga mwene ota ka kala pamwe nayo nota ka ninga Kalunga kawo. Oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.”—Ehololo 21:3, 4.
Jehova Kalunga okwe shi ningi tashi wapa okupitila mOmwana, Jesus, ngoka a gandja omwenyo gwe omolwetu. (Johannes 3:16) Kohi yewiliko lyaJesus, aantu otaya ka kala ya gwanenena. Itaya ka mona we iihuna, oshoka “Kalunga mwene ota ka kala pamwe nayo” nota ka theta po “omahodhi agehe momeho gawo.” Okwaagwanenena nokumona iihuna kwaantu masiku otaku hulu po; “aayuuki otaa ka thigulula evi e taa kala mo sigo aluhe.”—Episalomi 37:29.
OOMPWIDHULI ITADHI KA KALA PO WE
“Oye [Jesus Kristus] okwa kwata oshikoko, eyoka ndyoka ekulu hali [ithanwa] omuhindadhi nenge Satana, nokwe mu manga, a kale a mangwa ngaaka uule woomvula eyuvi limwe. Omuyengeli oku umbile Satana molumbogo lwomuule nokwe lu pata noshipatitho, opo kaa vule we okupukitha aantu.”—Ehololo 20:2, 3.
Satana noompwidhuli dhe ngele ya mangwa itaya ka pukitha we aantu, molwaashoka otaye ku umbilwa “molumbogo lwomuule” moka taya ka kala itaaya vulu we okulonga sha. Itaya ka vula we okunwetha mo aantu ya longe uuwinayi. Aantu itaya ka kala tuu ya pepelelwa uuna ye li muuyuni kaamu na omanwethomo gaSatana noompwidhuli dhe!
ITAPU KA KALA WE ‘OMASIKU GAHUGUNINA’
‘Omasiku gahugunina’ otaga ka hula po ‘puudhigu uunene’ mboka wa popiwa kuJesus. Okwa ti: “Oshoka omasiku ngoka otaku kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we.”—Mateus 24:21.
Pethimbo lyuudhigu uunene otapu ka kala omaupyakadhi inaaga monika nando onale. Konima yaashoka otaku ka landula “iita mesiku enene lyaKalunga Omunankondoadhihe” mbyoka hayi ithanwa “Armagedon.”—Ehololo 16:14, 16.
Aantu ayehe mboka ye hole shoka shu uka oya tegelela nondjuulukwe ehulilo lyiinima iiwinayi. Natu tale komalaleko nuuyamba gamwepo ngoka ya tegelela oku ka mona kohi yUukwaniilwa waKalunga.
KALUNGA OTA KA NINGA OSHINDJI SHI VULITHE MPOKA
“Engathithi lyaantu” otali ka kala muuyuni uupe wombili: Oohapu dhaKalunga otadhi ti kutya “engathithi lyaantu” nenge ongundu onene otayi ka ‘pita momahepeko ngoka omanene’ notayi ka kala muuyuni uupe wuuyuuki. (Ehololo 7:9, 10, 14; 2 Petrus 3:13) Ehupitho lyawo otali ka za kuJesus Kristus, “Onzigona yaKalunga, tayi kutha po oondjo dhuuyuni.”—Johannes 1:29.
Elongo lyopakalunga otali ke ye etela uuwanawa owundji: Muuyuni uupe “evi otali ka udha okutseya OMUWA.” (Jesaja 11:9) Aantu melongo ndika lyopakalunga otaya ka longwa nkene ye na okukala nombili naantu ayehe nonkene ye na okukala momudhingoloko. Kalunga oku uvaneke a ti: “Ongame OMUWA Kalunga koye, ngoka tii ku longele shoka she ku opalela noku ku ulukila ondjila u na okweenda nayo.”—Jesaja 48:17.
Oonakusa aaholike otaya ka yumudhwa: Sho Jesus a li kombanda yevi, okwa li a yumudha kuume ke Lasarus kuusi. (Johannes 11:1, 5, 38-44) Kungawo, okwa li u ulike shoka ta ka ningila aantu oyendji kohi yUukwaniilwa waKalunga.—Johannes 5:28, 29.
Ombili nuuyuuki otayi ka kala po sigo aluhe: Kohi yelelo lyaKristus okwaanompango itaku ka kala po we. Otu shi shi ngiini? Otu shi shi molwaashoka Jesus oha vulu okutala momutima naasho ta ka pangula aayuuki naalunde osho ta ka ninga. Mboka itaaye ke etha po omikalo dhawo omiwinayi itaya ka kala mo muuyuni uupe waKalunga.—Episalomi 37:9, 10; Jesaja 11:3, 4; 65:20; Mateus 9:4.
Otwa kundathana owala gamwepo gomomahunganeko gOmbiimbeli ngoka taga popi kombinga yethimbo ewanawa ndyoka twa tegelela. Sho Uukwaniilwa waKalunga tawu ka pangela ombanda yevi, otapu ka kala “uulinawa nombili” sigo aluhe. (Episalomi 37:11, 29) Iinima ayihe mbyoka hayi etele aantu uuwehame nokumona iihuna itayi ka kala po we. Otu na uushili moshinima shika, molwaashoka Kalunga oku uvaneka a ti: “Tala, ngashingeyi iinima ayihe otandi yi ningi iipe! . . . oohapu ndhika, . . . odhoshili nodhi shi okwiinekelwa.”—Ehololo 21:5.