Uupyakadhi muuyuni auhe otawu ka kandulwa po

OKUMONA iihuna otaku monika apuhe, noyendji ohaya kwathele nohenda mboka taya mono iihuna. Pashiholelwa, aaniilonga yopaunamiti ohaya longo omalufo ethimbo ele miipangelo okukwathela mboka taye ehama nenge ye ehamekwa. Aadhimi yomililo, aapolisi, aatotimpango naaniilonga yokuhupitha, ohaya kambadhala okuhulitha po okumona iihuna nenge oku ku keelela. Oonkambadhala dha tya ngawo ohadhi kwathele noonkondo aantu paumwene mboka ye li mompumbwe, ihe kapu na omuntu gwontumba nenge ehangano lyontumba tali vulu okuhulitha po okumona iihuna muuyuni auhe. Mepingathano naashoka, Kalunga oye ta vulu oku shi ninga noku li poku shi ninga.

Membo lyOmbiimbeli lyahugunina otamu adhika eshilipaleko tali ti: “[Kalunga] ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” (Ehololo 21:4) Dhiladhila owala kutya aantu yangapi taya ka gumwa keuvaneko ndyoka. Otali ngongo elalakano lyaKalunga lyokuhulitha po okumona iihuna akuhe. Ote ke shi ninga mokuhulitha po iita, ondjala, uuwehame, okwaahenuuyuuki naantu ayehe aakolokoshi kombanda yevi. Kapu na omuntu ta vulu oku shi ninga.

Shoka Uukwaniilwa waKalunga tawu ka ninga

Kalunga ota ka gwanitha po omauvaneko ge okupitila momuntu omutiyali omunankondonkondo meshito alihe, omuyumudhwa Jesus Kristus. Ethimbo otali ya uuna Jesus ta ka pangela ombanda yevi alihe e li Omukwaniilwa kaapu na ngoka te mu pataneke. Aantu itaya ka pangelwa we kaakwaniilwa yopantu, kaapresidende nenge kaanapolotika. Pehala lyaashono, otaya ka pangelwa kOmukwaniilwa gumwe nokepangelo limwe, sha hala okutya, Uukwaniilwa waKalunga.

Uukwaniilwa mboka otawu ka hulitha po omapangelo agehe gopantu. Ombiimbeli oya hunganeka okuza nale ya ti: “Kalunga nguka komegulu ota ka dhika uukwaniilwa itaawu ka teka po sigo aluhe nepangelo lyawo itali ka gandjwa koshigwana shilwe. Ihe owo otawu ka nyanyagula notawu ka teyagula omaukwaniilwa agehe noku ga hulitha po, ihe wo wene otawu ka kala sigo aluhe.” (Daniel 2:44, KB) Aantu ayehe yokombanda yevi otaya ka hangana kohi yepangelo limwe li li pauyuuki, sha hala okutya, Uukwaniilwa waKalunga.

Sho Jesus a li kombanda yevi e li omuntu, okwa li a popi kombinga yUukwaniilwa mboka lwiikando oyindji. Okwa li a popi kombinga yUukwaniilwa mboka moshiholelwa shegalikano, sho a li ta longo aalongwa ya kale haya galikana taya ti: “[Uukwaniilwa woye nawu ye, KB], ehalo lyoye nali gwanithwe kombanda yevi wo ngaashi megulu.” (Mateus 6:10) Ndhindhilika kutya Jesus okwa kwatakanitha kumwe Uukwaniilwa nokugwanithwa kwehalo lyaKalunga kombanda yevi, ndyoka kutya Kalunga okwa hala okuhulitha po okumona iihuna kombanda yevi alihe.

Epangelo lyaKalunga li li pauyuuki otali ke eta omalaleko nuuyamba ngoka epangelo lyopantu itaali vulu okweeta. Dhimbulukwa kutya Jehova okwa li a gandja Omwana e li eyambo opo aantu ya vule okumona omwenyo gwaaluhe. Kohi yepangelo lyopahole lyUukwaniilwa waKalunga, aantu otaya ka galulilwa megwaneneno kashona nakashona. Oshizemo otashi ka kala shini? Jehova “Omupangeliawike ota ka hanagula po eso sigo aluhe. Ota ka theta po omahodhi momeho gaayehe.”—Jesaja 25:8.

Yamwe otashi vulika ya pule taya ti: ‘Omolwashike Kalunga inaa katuka onkatu nale? Okwa tegelela shike?’ Jehova okwa li ta vulu okukatuka onkatu nale a hulithe po nenge a kelele okumona iihuna akuhe. Pehala lyaashono, Jehova okwe etha okumona iihuna ku tsikile, hamolwokwiihola mwene, ihe omolwuuwanawa waaluhe woyana yokombanda yevi. Aavali aanahole otaye ke etha okanona kawo ka pite muudhigu ngele oye shi shi kutya shika otashi ke ke etela uuwanawa tawu kalelele. Sha faathana, Jehova oku na omatompelo omawanawa molwaashoka e etha aantu ya mone iihuna uule wokathimbo, nomatompelo ngaka oga yelithwa mOmbiimbeli. Oga kwatela mo iinima ngaashi emanguluko lyokuninga omatokolo, uulunde niinima yi na ko nasha nuuthemba waJehova wokupangela. Ombiimbeli otayi yelitha wo kutya oshishitwa shopambepo oshiwinayi oshe ethiwa okupangela uuyuni uule wethimbo lya ngambekwa.a

Nonando katu na ehala lya gwana lyokunyola po omatompelo agehe ngoka tage shi yelitha, opu na iinima iyali mbyoka tayi vulu oku tu pa etegameno noku tu tsa omukumo. Shotango osho: Jehova ote ke tu laleka nuuyamba owundji shi vulithe okumona iihuna hoka tashi vulika tu pite muko. Kakele kaashono, Kalunga okwe tu shilipaleka ta ti: “Iiningwanima yonale otayi ka dhimbiwa thiluthilu.” (Jesaja 65:17) Kalunga ota ka hulitha po thiluthilu nosigo aluhe oluhodhi nokumona iihuna hoka kwe etithwa kokweetha uukolokoshi wu kale po ethimbo eshona.

Oshinima oshitiyali osho: Kalunga okwa tula po ethimbo lye lyo opala okuhulitha po okumona iihuna. Dhimbulukwa kutya omupolofeti Habakuk okwa li a pula kutya sigo uunake Jehova te ke etha uukolokoshi noontamanana yi kale po. Jehova okwa yamukula a ti: “Ethimbo lyokutsakanithwa kwemoniko inali thikana manga. . . . [Itali kalelele ko, OB-1954].” (Habakuk 2:3) Ngaashi tatu ke shi mona moshitopolwa tashi landula, “ethimbo lyokutsakanithwa” oli li popepi.

[Enyolo lyopevi]

[Oshimpungu pepandja 7]

Omanyolo ngoka taga popi onakuyiwa ombwanawa

ITAPU KA KALE WE IITA:

“Ileni, mu tale iilonga yOMUWA. Konekeni iikumithalonga mbyoka e yi longo kombanda yevi. Ota hulitha po omalugodhi kombanda yevi alihe.”—Episalomi 46:8, 9.

AAHOLIKE YETU OTAYA KA YUMUKA:

‘Otaku ka kala eyumuko lyaawanawa naawinayi.’—Iilonga 24:15.

IIKULYA OTAYI KA KALA YA GWANA AANTU AYEHE:

“Moshilongo namu kale eloolo lyiilya; kiikulundundu naku kale omapya.”—Episalomi 72:16.

UUWEHAME ITAWU KA KALA PO WE:

“Kapu na nando ogumwe muSioni ta ka tya: ‘Otandi ehama.’”—Jesaja 33:24.

AAKOLOKOSHI ITAYA KA KALA PO WE:

“Aakaanakalunga otaa ka kombwa mo moshilongo naakaanuudhiginini otaa ka nakulwa mo.”—Omayeletumbulo 2:22.

OTAPU KA KALA UUYUUKI:

“Talii ko, omukwaniilwa ota ka lela nuuyuuki, nomalenga otaga ka pangula nawalela.”—Jesaja 32:1.

[Omathano pepandja 7]

Uukwaniilwa waKalunga otawu ka hulitha po okumona iihuna kehe hoka hatu mono