Ontopolwa ontimulongo
Uukwaniilwa mboka “itaau ka teka po sigo aluhe”
1. Uushili uni wa tsuwa omuthindo kiiningwanima yuuyuni okupitila mondjokonona ayihe yaantu?
IININGWANIMA yuuyuni esiku kehe otayi tsu omuthindo oshili kutya aantu inaya mona enyanyu sho ye ekelehi uunamapangelo waJehova e taya kambadhala okwiipangela yo yene. Kapu na omulandu gwepangelo lyopantu gwe etela aantu omauwanawa nopwaahe na ontondo. Nonando aantu oya huma komeho montseyo yawo yopaunongononi inaashi monika nando onale, inaya vula oku shi pondola okukutha po omikithi nenge ya hulithe po eso, nokuli nando omuntu gumwe oye inaaye shi ningila. Epangelo lyopantu inali kutha po iita, ekuni, omuyonena, eyonuko nenge oluhepo. Omapangelo omathininiki otaga pangele natango aantu miilongo oyindji. (Omuuvithi 8:9) Uuteknologi, olwiho nokwaanakonasha otayi nyateke evi, omeya nombepo. Okulongitha nayi eliko kwaakwanepangelo ohaku shi ningi oshidhigu kuyamwe opo ya mone iipumbiwa yonkalamwenyo. Oomvula omayuvi dhokupangela kwaantu odhu ulike uushili mboka kutya: “Oondjila dhomuntu ihadhi kala momapangelo ge mwene nenge moonkondo dhomulumentu te ende, ku uthe ando oonkatu dhe, e dhi fale kethikilo.”—Jeremia 10:23.
2. Oshike osho awike shi li ekandulopo lyomaupyakadhi gaantu?
2 Oshike mbela osho ekandulopo? Osho Uukwaniilwa waKalunga, mboka Jesus a longo aalanduli ye okugalikana taya ti: “Oshilongo shoye nashi ye [“Uukwaniilwa woye nau ye,” KB]; ehalo lyoye nali gwanithwe nokombanda yevi wo ngashika megulu.” (Mateus 6:9, 10) Uukwaniilwa waKalunga womegulu owa hokololwa mu 2 Petrus 3:13 u li “omagulu omape,” ngoka taga ka pangela ‘evi epe,’ sha hala okutya, uulipamwe waantu uuyuuki. Uukwaniilwa we womegulu owa simana noonkondo omolwashoka Jesus e u ninga enenedhiladhilo lyokuuvitha kwe. (Mateus 4:17) Oku ulike ehala ndyoka u na okukala u na monkalamwenyo yetu, moku tu ladhipika ta ti: “Otango ano kongeni [uukwaniilwa waKalunga, KB] nuuyuuki we.”—Mateus 6:33.
3. Omolwashike shi li oshinima she endelela noonkondo adhihe ngashingeyi opo aantu yi ilonge kombinga yUukwaniilwa waKalunga?
3 Oshi li oshinima she endelela noonkondo adhihe opo aantu yi ilonge ngashingeyi kombinga yUukwaniilwa waKalunga, molwashoka masiku Uukwaniilwa mboka otau ka katuka oonkatu u lundulule omapangelo gokombanda yevi ndika sigo aluhe. Daniel 2:44 (KB) ota hunganeke ta ti: “Pomasiku gaakwaniilwa mbeyaka [omapangelo ngoka taga pangele ngashingeyi] Kalunga nguka komegulu ota ka dhika uukwaniilwa [megulu] itaau ka teka po sigo aluhe, nepangelo lyawo itali ka gandjwa koshigwana shilwe [aantu itaya ka pangela we ombanda yevi nando]. Ihe owo tau ka nyanyagula notau ka teyagula po omaukwaniilwa agehe [gongashingeyi] noku ga hulitha po ihe owo wene tau ka kala sigo aluhe.” Kungeyi, Uukwaniilwa otau ka hulitha po ano omasiku gahugunina ngoka mokuhanagula po onkalelo ndjika ayihe yiinima yuukolokoshi. Nopo nduno okupangelwa kwevi kUukwaniilwa womegulu otaku ka kala kwoshili. Katu na tuu okukala twa pandula sho epepelelo ndyoka tau ke eta li li popepi noonkondo ngashingeyi!
4. Oshike sha ningwa megulu mo 1914 shi na ko nasha nUukwaniilwa, nomolwashike sha simana kutse?
4 Kristus Jesus okwa langekwa po e li Omukwaniilwa mo 1914 nokwa pewa oonkondopangelo a ‘pangele mokati kaaniita naye.’ (Epsalmi 110:1, 2) Natango momvula ndjoka “omasiku gahugunina” gonkalelo ndjika yiinima yuukolokoshi yongashingeyi omo ga tameke. (2 Timoteus 3:1-5, 13) Ethimbo olyo tuu ndyoka, iiningwanima mbyoka Daniel a mono memoniko lyopahunganeko oya ningwa shili megulu. ‘Omusamane gwomimvo,’ Jehova Kalunga, okwa pe Omunagwomuntu, Jesus Kristus, “epangelo, esimano noonkondo dhuukwaniilwa, opo aantu yomiigwana ayihe yomomaludhi agehe noyomomalaka agehe ye mu longele.” Daniel okwa nyola kombinga yemoniko, ta ti: “Epangelo lye otali ka kala sigo aluhe, nuukwaniilwa we kau na mpo tau hulu po sigo aluhe.” (Daniel 7:13, 14, OB-1986) Mokupitila mUukwaniilwa mbuka womegulu u li miikaha yaKristus Jesus, Kalunga ota ka vulitha mboka ye hole uuyuuki ya nyanyukilwe iinima oyindji noonkondo iiwanawa mbyoka a li e na momadhiladhilo sho a tula aakuluntu yetu yopantu yotango mOparadisa.
5. Omomauyelele geni ge na ko nasha nUukwaniilwa tu na okukala tu na ohokwe onene, nomolwashike?
5 Owa hala mbela okukala u li omulelwa omudhiginini gwUukwaniilwa? Ngele osho, oto ka kala u na ohokwe onene momutungilo gwepangelo ndika lyomegulu nosho wo kutya otali longo ngiini. Oto ka kala wa hala okutseya shoka tali ningi ngashingeyi, shoka tali ka pondola monakuyiwa naashoka tali pula kungoye. Sho to konakona nuukeka Uukwaniilwa, olupandu lwoye lwoku wu pandula otali ka koka. Ngele oto inyenge nawa kepangelo lyawo, oto ka kala wi ilongekidha okulombwela yalwe kombinga yiinima iikumithi mbyoka Uukwaniilwa waKalunga tau ka ningila aantu aavuliki.—Epsalmi 48:13, 14.
Aapangeli yUukwaniilwa waKalunga
6. (a) Omanyolo otagu ulike ngiini kutya uunamapangelo walye wu ulikwa okupitila mUukwaniilwa wopaMessias? (b) Shoka tatu ilongo kombinga yUukwaniilwa oshi na oku tu guma ngiini?
6 Oshinima shotango osho okukonakona hoka taku holola kutya Uukwaniilwa wopaMessias mboka ou li euliko lyuunamapangelo waJehova. Jehova oye a gandja “epangelo, esimano noonkondo dhuukwaniilwa” kOmwana. Konima sho Omwana gwaKalunga a pewa oonkondopangelo a tameke okupangela e li Omukwaniilwa, osha li sho opala sho omawi gomegulu gi igidha taga ti: “Uukwaniilwa wuuyuni wa ningi wOmuwa gwetu [Jehova Kalunga] nowaKristus gwe, [Jehova] e ta pangele aluhe sigo aluhe.” (Ehololo 11:15) Ashihe shoka tatu mono shi na ko nasha nUukwaniilwa mboka naashoka tau tsakanitha otashi vulu oku tu hedhitha popepi naJehova. Shoka tatu ilongo oshi na okupendutha mutse ehalo okuvulika kuunamapangelo we sigo aluhe.
7. Omolwashike shi li shihokitha noonkondo kutse sho Jesus Kristus e li Omupehapangeli gwaJehova?
7 Dhiladhila wo oshili kutya Jehova okwa tula Jesus Kristus koshipangelapundi e li Omupehapangeli gwe. E li Omulongi onkulungu ngoka Kalunga a longitha okushita evi naantu, Jesus oku shi nawa oompumbwe dhetu e vule kehe gumwe gwomutse. Kakele kaashono, okuza ketameko lyondjokonona yaantu, oku ulike kutya okwa ‘nyanyukilwa aana yaantu.’ (Omayeletumbulo 8:30, 31, yelekanitha NW; Aakolossa 1:15-17.) Ohole ye yokuhola aantu onene noonkondo noye mu inyengitha e ye mwene kombanda yevi nokugandja omwenyo gwe gu li iikulila molwetu. (Johannes 3:16) Kungawo okwe shi tu ningile tashi wapa tu mangululwe muulunde neso nosho wo tu mone omwenyo gwaaluhe.—Mateus 20:28.
8. (a) Mekondjithathano nomapangelo gopantu, omolwashike epangelo lyaKalunga tali ka kalelela? (b) Ekwatathano lini “omupiya omudhiginini nomunandunge” e na nepangelo lyomegulu?
8 Uukwaniilwa waKalunga owo epangelo ihaali lunduluka notali kalelele. Uukwatya walyo tau kalelele owa shilipalekwa koshili kutya Jehova iha si. (Habakuk 1:12, OB-1986) Mekondjithathano naakwaniilwa yopantu, Jesus Kristus, ngoka Kalunga i inekelele uukwaniilwa, naye iha si. (Aaroma 6:9; 1 Timoteus 6:15, 16) Kristus ota ka kala kiipangelapundi yomegulu pamwe naapiya yaKalunga yalwe aadhiginini ye li 144 000, ya za ‘momazimo agehe nomomalaka agehe nomiilongo ayihe nomiigwana ayihe.’ Oya pewa wo omwenyo ihaagu si. (Ehololo 5:9, 10; 14:1-4; 1 Aakorinto 15:42-44, 53) Oyendji yomuyo oye li nale megulu niihupe yawo oyi li natango kombanda yevi, ya thikama po ‘momupiya omudhiginini nomunandunge,’ gwonena ngoka ta humitha komeho nuudhiginini iinima yUukwaniilwa huka kombanda yevi.—Mateus 24:45-47, KB.
9, 10. (a) Omanwethomo taga topagula nomayonaguli geni Uukwaniilwa tau ka kutha po? (b) Ngele inatu hala tu kale aatondi yUukwaniilwa waKalunga, iinima yini tu na okuyanda?
9 Masiku Jehova, pethimbo lye lyo opala, ota ka tuma aakwiita ye yomegulu yokuninga ehanagulo yo opaleke evi. Otaya ka hanagula po sigo aluhe aantu mboka ya hogolola okwaazimina uunamapangelo we nosho wo mboka ya dhina omasiloshimpwiyu ge gopahole ngoka ha gandja okupitila muJesus Kristus. (2 Aatessalonika 1:6-9) Ndika otali ka kala esiku lyaJehova, ndyoka lya kala lya tegelelwa uule wethimbo sho ta ka yukipalithwa e li Omunamapangelo gweshito alihe. “Tala, esiku lyOmuwa tali ya nokuli li na iihuna yowala, li na omageyelo nomulilo gwondjahi, . . . naalunde ayehe li ya kombe po sheke.” (Jesaja 13:9) “Esiku ndyoka esiku lyondjahi, esiku lyuuwehame nolyuudhigu, esiku lyehanagulo nolyeluwo, esiku lyomilema nolyuuluudhe, esiku lyiikogo nolyomizimbi.”—Sefanja 1:15.
10 Omalongelokalunga agehe giifundja nomapangelo agehe gopantu nomatangakwiita gago, ngoka ga longithwa komupangeli omwiinayi gwuuyuni mbuka ihaa monika, otaga ka hanagulwa po sigo aluhe. Ayehe mboka haye endathana nuuyuni mbuka mokulalakanena onkalamwenyo yokwiihola mwene, yokwaahenuuyuki noya nyata otaya ka hanagulwa po. Satana noompwidhuli dhe otaya ka kuthwa po kaaya kale po we ye na ekwatathano naakali yokombanda yevi notaye ku umbilwa molumbogo ya kale mo uule woomvula eyuvi. Opo nduno Uukwaniilwa waKalunga otau ka pangela thiluthilu ombanda yevi ayihe. Itashi ka kala tuu epepelelo kwaayehe mboka ye hole uuyuuki!—Ehololo 18:21, 24; 19:11-16, 19-21; 20:1, 2.
Nkene omalalakano gUukwaniilwa taga adhika
11. (a) Uukwaniilwa wopaMessias otau ka gwanitha ngiini elalakano lyaJehova li na ko nasha nevi? (b) Okupangela kUukwaniilwa otaku ka tya shike kaantu mboka ye li kombanda yevi ethimbo ndyono?
11 Uukwaniilwa wopaMessias otau ka gwanitha po thiluthilu elalakano lyaKalunga lyopetameko li na ko nasha nevi. (Genesis 1:28; 2:8, 9, 15) Sigo onena aantu oya nyengwa okuyambidhidha elalakano ndyoka. Ihe “uuyuni mbwiyaka tau ya” otau ka pangelwa kOmunagwomuntu, Jesus Kristus. Ayehe mboka taya hupu megwanitho lyokupangula kwaJehova onkalelo ndjika onkulu otaya ka longa ya hangana kohi yOmukwaniilwa Kristus, ya nyanyukwa okulonga ashihe shoka te ya lombwele, opo evi alihe li ninge oparadisa. (Aaheberi 2:5-9) Aantu ayehe otaya ka nyanyukilwa iilonga yiikaha yawo notaya ka mona thiluthilu uuwanawa wa gwana miilongomwa yevi.—Epsalmi 72:1, 7, 8, 16-19; Jesaja 65:21, 22.
12. Aalelwa yUukwaniilwa otaye ke etelwa ngiini egwaneneno pamadhiladhilo nosho wo palutu?
12 Sho Adam naEva ya shitwa, oya li ya gwanenena, nosha li elalakano lyaKalunga opo yu udhithe evi noluvalo lwawo, ndoka aluhe lwa gwanenena pamadhiladhilo nopalutu. Elalakano ndyoka otali ka gwanithwa pamukalo omwaanawa lela kohi yepangelo lyUukwaniilwa. Shoka otashi ti kutya iilanduliko ayihe yuulunde oyi na okukuthwa po, nomolwashoka Kristus ita longo owala e li Omukwaniilwa ihe oku li wo Omusaaseri Omukuluntu. Ota ka kwathela neidhidhimiko aalelwa ye aavuliki ya mone uuwanawa mongushu yeyambo lyomwenyo gwe gwopantu yokudhiminwa po oondjo.
13. Omauwanawa gopalutu geni taga ka monika kohi yepangelo lyUukwaniilwa?
13 Kohi yelelo lyUukwaniilwa, aakali yokevi otaya ka mona omauwanawa gopalutu omakumithi. “Nena omeho gaaposi otaga tonata, nomakutsi goombolo otaga thituluka. Esiku ndyoka oshitiningili ta nuka ngomenye, nelaka lyoshikokoma tali imbi pombanda.” (Jesaja 35:5, 6) Omalutu ngoka gi ipikwa kuukulupe nenge komukithi otaga ka kala ga nyashuka ge vule ngoka gaanona, nomaunkundi goshinamenena otaga ka pingenwa po kuukolele uuwanawa noonkondo. “Olutu lwe otalu fulithwa koonkondo dhuugundjuka, oye ta shunine komasiku guugundjuka we.” (Job 33:25) Ethimbo otali ke ya sho itaapu ka kala nando ogumwe ta ti: “Ongame nda ala.” Omolwashike? Molwashoka aantu mboka haya tila Kalunga otaya ka mangululwa komutenge gwuulunde nokiilanduliko yawo ya kwata miiti. (Jesaja 33:24; Lukas 13:11-13) Eeno, Kalunga “[ota ka] theta po omahodhi momeho gawo, neso kali kala we nenge oluhodhi nenge elilagano, nenge uuwehame kau kala mo we, oshoka shiyaka shotango osha hulu po.”—Ehololo 21:4.
14. Egwaneneno lyopantu olya kwatela mo shike?
14 Ihe okumona egwaneneno okwa kwatela mo oshindji kaashi shi owala okukala u na olutu lu na uukolele nomadhiladhilo ge li nawa. Shoka osha kwatela mo okuulika lela omaukwatya gaJehova, molwashoka otwa shitwa tu li ‘oshifetha shaKalunga, twe mu fa.’ (Genesis 1:26) Opo shoka shi ningwe, otapu ka kala pwa pumbiwa elongo olindji. Muuyuni uupe, ‘otamu ka kala uuyuuki.’ Onkee ano, ngaashi Jesaja a hunganeke, “aakuuyuni otaa ka tseya uuyuuki.” (2 Petrus 3:13; Jesaja 26:9) Uukwatya mboka otau eta ombili—pokati kaantu yomihoko adhihe, pokati kaamboka ye na omakwatathano gopothingo, muukwanegumbo, nuunene tuu naKalunga. (Epsalmi 85:11-14; Jesaja 32:17) Mboka tayi ilongo uuyuuki otaya ka longwa kashona nakashona kutya Kalunga okwa hala ya ninge shike. Sho ohole yokuhola Jehova tayi koko momitima dhawo, otaya ka landula oondjila dhe moshinima kehe monkalamwenyo yawo. Otaya ka vula okupopya ngaashi Jesus, taya ti: ‘Ohandi longo aluhe shoka sho opalela Tate.’ (Johannes 8:29) Onkalamwenyo itayi ka kala tuu ombwanawa ngele shoka sha ningilwa aantu ayehe!
Shoka sha pondolwa kUukwaniilwa oshi iwetikile nale
15. Longitha omapulo ngoka ge li mokatendo haka, to ukitha eitulomo kiinima mbyoka ya pondolwa kUukwaniilwa nokuulika shoka tu na okuninga ngashingeyi.
15 Iinima iikumithi mbyoka ya pondolwa kUukwaniilwa waKalunga naalelwa yawo oyi iwetikile nale. Omapulo nomanyolo taga landula otage ke ku dhimbulukitha yimwe yomiinima mbyoka nosho wo iinima mbyoka aalelwa ayehe yUukwaniilwa taya vulu noye na okuninga ngashingeyi.
Uukwaniilwa owa katukile tango onkatu oolye, noshilanduliko osha li shike? (Ehololo 12:7-10, 12)
Okugongelwa kwiilyo yoshihupe shongundu yini kwa kala taku pewa eitulomo okuza sho Kristus a yi koshipangelapundi? (Ehololo 14:1-3)
Iilonga yini Jesus a hunganeke kutya oyo ta ka longa konima yokuholoka kuudhigu uunene, ngaashi sha nyolwa muMateus 25:31-33?
Iilonga yomalongekidho yini tayi longwa nena? Oolye taya kutha ombinga muyo? (Epsalmi 110:3; Mateus 24:14; Ehololo 14:6, 7)
Omolwashike aapataneki yopapolotika noyopalongelokalunga inaaya vula okukelela iilonga yeuvitho? (Sakaria 4:6; Iilonga 5:38, 39)
Omalunduluko geni ga ningwa monkalamwenyo yaamboka ya vulika kepangelo lyUukwaniilwa? (Jesaja 2:4; 1 Aakorinto 6:9-11)
Uukwaniilwa woomvula eyuvi
16. (a) Kristus ota ka pangela uule wethimbo li thike peni? (b) Iinima yini iikumithi tayi ka ningwa pethimbo ndyoka nokonima yalyo?
16 Konima ngele Satana noompwidhuli dhe yu umbilwa molumbogo, Jesus Kristus naathigululi pamwe naye 144 000 otaya ka pangela ye li aakwaniilwa naasaaseri uule woomvula eyuvi. (Ehololo 20:6) Pethimbo ndyoka, aantu otaye ke etwa megwaneneno opo uulunde neso mbyoka ye etwa kuAdam otayi ka kuthwa po sigo aluhe. Kehulilo lyElelo lyOomvula Eyuvi, Jesus ngoka ta longo nomupondo oshilonga she e li Omukwaniilwa nOmusaaseri gwopaMessias, ota ka “gandja uukwaniilwa” kuHe, “Kalunga, opo a kale oye awike omiinima ayihe.” (1 Aakorinto 15:24-28, yelekanitha KB.) Opo nduno Satana ota mangululwa uule wokathimbo okashona opo a makele aantu mboka ya kulilwa molwokuyambidhidha kwawo uunamapangelo waJehova weshito alihe. Konima ngele emakelo ndyoka lyahugunina lya pu, Jehova ota ka hanagula po Satana naanashipotha mboka ya gama kombinga ye. (Ehololo 20:7-10) Mboka ya yambidhidha uunamapangelo waJehova—sha hala okutya, uuthemba we wokupangela—otaye ku ulika thiluthilu uudhiginini wawo ihau tengauka. Opo nduno otaye ke ya mekwatathano ewanawa naJehova, taya ka taambwa ko kuye ye li oyana aamati naakadhona, ya hokiwa kuye omolwomwenyo gwaaluhe.—Aaroma 8:21.
17. (a) Oshike tashi ka ningilwa Uukwaniilwa pehulilo lyoomvula eyuvi? (b) Omondunge yini shi li shoshili kutya Uukwaniilwa ‘itau ka teka po sigo aluhe’?
17 Onkee ano, iilonga yaJesus noyo 144 000 otayi ka lunduluka shi na ko nasha nevi. Otaya ka longa shike monakuyiwa? Ombimbeli inayi shi popya. Ihe ngele otatu yambidhidha nuudhiginini uunamapangelo waJehova, otatu ka kala nomwenyo pehulilo lyElelo lyOomvula Eyuvi opo tu mone kutya elalakano lyaJehova li na ko nasha nayo nosho wo neshito lye alihe ekumithi olini. Nonando ongaaka, elelo lyaKristus lyoomvula eyuvi otali ka kala ‘lyaaluhe’ nUukwaniilwa we “kau na mpo tau hulu po sigo aluhe.” (Daniel 7:14, OB-1986) Omondunge yini? Oshinima shimwe osho kutya, oonkondopangelo itadhi ka gandjwa miikaha yayalwe mboka ye na omalalakano gi ili, molwashoka Jehova oye ta ka kala Omupangeli. Niishewe, Uukwaniilwa “itaau ka teka po sigo aluhe” molwashoka iinima mbyoka wa pondola otayi ka kala sigo aluhe. (Daniel 2:44, KB) NOmukwaniilwa Omusaaseri gwopaMessias nosho wo aapangeli pamwe naye aakwaniilwa naasaaseri otaya ka simanekwa sigo aluhe molwokulongela kwawo Jehova nuudhiginini.
Oonkundathana dhokweendulula
• Omolwashike Uukwaniilwa waKalunga owo awike ekandulopo lyomaupyakadhi gaantu? Uunake Omukwaniilwa gwUukwaniilwa waKalunga a tameke okupangela?
• Oshike osho unene tuu she ku inyengitha shi na ko nasha nUukwaniilwa waKalunga naashoka tau ka pondola?
• Iinima yini mbyoka Uukwaniilwa wa pondola tatu vulu okukala tu wete nale, nombinga yini tu na mwaashika?
[Ethano pepandja 92, 93]
Kohi yUukwaniilwa waKalunga, aantu ayehe otaye ki ilonga uuyuuki