Uukwaniilwa waKalunga oshike?
“Elaka ndika etoye [lyUukwaniilwa, KB] . . . ”—MATEUS 24:14.
JESUS mEuvitho lye lyokOndundu ndyoka lya tseyika nawa apuhe, okwa li a gandja oshiholelwa shegalikano shoka sha li sha kwatela mo eindilo ndika sho a galikana kuKalunga a ti: “Uukwaniilwa woye nawu ye.” Aantu oyendjiyendji oye shi egalikano ndyoka momutse nohaye li endulula olundji. Oensiklopedia oya ti kutya “egalikano ndika olyo hali galikanwa unene kAakriste ayehe uuna taya galikana.” Ihe oyendji mboka haye li hokolola kaye shi kutya Uukwaniilwa waKalunga oshike nenge otawu ke ya ningila shike ngele we ya.—Mateus 6:9, 10.
Shika itashi tu kumitha. Aawiliki yUukwakriste ohaya gandja omafatululo taga kondjithathana, taga ngwangwaneke noga kitakana uuna taya yelitha kutya Uukwaniilwa waKalunga oshike. Omunyoli gumwe okwa nyola kutya Uukwaniilwa waKalunga owo “oshinima shopashikumithalonga, . . . shoka shi na ekwatathano lyomeni lyomuntu naKalunga omunamwenyo . . . , ndyoka tali ningitha omulumentu nenge omukiintu a hupithwe.” Gulwe okwa fatulula kutya evaangeli lyUukwaniilwa oli li “elongo kombinga yongeleka.” Okambo kedhina Catechism of the Catholic Church oka ti: “Uukwaniilwa waKalunga [owo] uuyuuki, ombili nosho wo enyanyu lyomOmbepo Ondjapuki.”
Oto ka mona efatululo lya yela nawa pepandja eti-2 lyoshifo shika. Otali ti: “Uukwaniilwa waKalunga mboka wu li epangelo lyashili lyomegulu, masiku otawu ka hulitha po uukolokoshi notawu ka ninga evi oparadisa.” Natu taleni nkene Ombiimbeli tayi ambidhidha euvoko ndyoka.
Aapangeli yomonakuyiwa yokombanda yevi alihe
Uukwaniilwa owo epangelo hali lelwa komukwaniilwa. Omukwaniilwa gwUukwaniilwa waKalunga, oye omuyumudhwa Jesus Kristus. Okulangekwa po kwe megulu okwa popiwa memoniko ndyoka lya li lya pewa omupolofeti Daniel ngoka a nyola a ti: “Memoniko uusiku onda mono gumwe a fa omuntu [Jesus]. Okwe ya a kundukwa kiikogo nokwa yi kungoka ta kala e na omwenyo aluhe sigo aluhe [Jehova Kalunga], nokwe mu tseyithilwa. Okwa li a pewa epangelo, esimano noonkondo dhuukwaniilwa, opo aantu yomiigwana ayihe, yomomalaka agehe ye mu longele. Epangelo lye otali ka kala sigo aluhe nuukwaniilwa we kau na mpoka tau hulu po sigo aluhe.”—Daniel 7:13, 14.
Embo lyOmbiimbeli lyaDaniel otali ulike wo kutya Uukwaniilwa mboka otawu ka dhikwa po kuKalunga wa kola, otawu ka hulitha po omapangelo agehe gopantu noitawu ka umbwa ko nando okepangelo lilwe. Ontopolwa ontiyali otayi popi ondjodhi ya nwethwa mo ndjoka ya yagumwa komukwaniilwa gwaBabiloni moka a mono oshiyelekela oshinene shoka tashi thaneke omapangelo omanankondo guuyuni ga landulathana. Omupolofeti Daniel okwa fatulula ondjodhi ndjoka. Okwa nyola a ti: “Konakuyiwa . . . [Kalunga nguka komegulu ota ka dhika uukwaniilwa itaawu ka teka po sigo aluhe nepangelo lyawo itali ka gandjwa koshigwana shilwe. Ihe owo otawu ka nyanyagula notawu ka teyagula omaukwaniilwa agehe noku ga hulitha po, ihe wo wene otawu ka kala sigo aluhe, KB].”—Daniel 2:28, 44.
Omukwaniilwa gwUukwaniilwa waKalunga ita ka pangela oye awike. Pethimbo lyuukalele we kombanda yevi, Jesus okwa li a shilipaleke aayapostoli ye aadhiginini kutya nayo pamwe nayalwe otaya ka yumukila omwenyo gwomegulu notaya ka kuutumba kiipangelapundi. (Lukas 22:28-30) Ka li ta popi iipangelapundi yo yeneyene, molwaashoka okwa li tu ulike kUukwaniilwa mboka tawu ka kala megulu. Ombiimbeli otayi popi aapangeli pamwe naye mbaka kutya oya za “momaludhi agehe, momalaka agehe, miigwana ayihe nomomihoko adhihe.” Otaya ka ninga “ombala ye naayambi okulongela Kalunga ketu, oyo notaa ka pangela kombanda yevi.”—Ehololo 5:9, 10.
Omolwashike onkundana yUukwaniilwa ombwanawa?
Ndhindhilika kutya Jesus Kristus okwa pewa a pangele “omaludhi agehe, iigwana ayihe nomalaka agehe” nonokutya mboka ya hangana naye otaya ka “pangela kombanda yevi” pamwe naye. Oolye nduno taya ka pangelwa kUukwaniilwa mbuka? Oomboka yi inyenga nawa konkundana ombwanawa ndjoka tayi uvithwa kunena. Maapangelwa otamu kala wo mwa kwatelwa mboka taya ka yumukila omwenyo kombanda yevi noye na etegameno lyokukala nomwenyo sigo aluhe.
Ombiimbeli oya yelitha nawa omayambeko ngoka aantu taya ka nyanyukilwa kohi yUukwaniilwa mboka. Mpaka otapu landula gamwe gomugo:
‘Ota hulitha po omalugodhi kombanda yevi alihe; ota teya po omatati. Ta ndonyona omagonga, niikandekitho ote yi fike po.’—Episalomi 46:9.
‘Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Itaa ka tunga omagumbo, nayalwe taa ka kala mo, nenge ya tsike sha nayalwe taa ka lya iiyimati.’—Jesaja 65:21, 22.
‘[Kalunga] ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.’—Ehololo 21:3, 4.
‘Omeho gaaposi otaga ka tsikuluka, nomakutsi goombolo otaga ka uva ko. Oshitiningili otashi ka nuka ngomenye, nelaka lyoshikokoma otali imbi kenyanyu.’—Jesaja 35:5, 6.
‘Inamu kuminwa oshinima shika; oshoka ethimbo otali ya, uuna oonakusa ayehe mboka ye li moombila, taa ka uva ewi lye [Jesus]. Oyo notaa ka za mo moombila dhawo: mboka ya longo uuwanawa, otaa ka yumudhwa e taa kala ye na omwenyo.’—Johannes 5:28, 29.
‘Aaifupipiki otaa ka thigulula evi notaa ka mona uuliwana nombili.’—Episalomi 37:11.
Shoka kashi shi tuu onkundana ombwanawa! Kakele kaashono, okugwanithwa kwomahunganeko gOmbiimbeli otaku ulike kutya ethimbo oli li popepi opo Uukwaniilwa wu dhike po elelo li li pauyuuki kombanda yevi alihe.