Omapulo gane kombinga yehulilo taga yamukulwa

JESUS KRISTUS okwa li a hunganeke kutya monakuyiwa ‘ehulilo otali ya.’ Mokuhokolola ethimbo ndyoka okwa ti: “Omasiku ngoka otaku ka kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we.”—Mateus 24:14, 21.

Oohapu dhaJesus kombinga yehulilo nosho wo omanyolo galwe gOmbiimbeli kombinga yoshinima shika oge eta po omapulo gamwe ga simana. Omolwashike itoo ileshele mOmbiimbeli wu mone nkene tayi gandja omayamukulo komapulo ngoka?

1 Oshike tashi ka hula po?

Ombiimbeli itayi longo kutya evi lyo lyene otali ka hanagulwa po. Omupisalomi okwa nyola a ti: “Evi [Kalunga okwe] li tula komakankameno ga kola itali tenguka [sigo aluhe, KB].” (Episalomi 104:5) Ombiimbeli itayi longo wo kutya onkalamwenyo ayihe kombanda yevi otayi ka hanagulwa po miita yuuyuni auhe. (Jesaja 45:18) Jesus ye mwene okwa li u ulike kutya aantu yamwe otaya ka hupa po pehulilo. (Mateus 24:21, 22) Oshike nduno Ombiimbeli ya ti osho tashi ka hula po?

Omapangelo gopantu inaga pondola sha notaga ka hulithwa po. Kalunga okwa li a nwetha mo omupolofeti Daniel a nyole ta ti: “Kalunga . . . komegulu ota ka dhika [po] uukwaniilwa itaawu ka teka po sigo aluhe nepangelo lyawo itali ka gandjwa koshigwana shilwe. Ihe owo otawu ka nyanyagula notawu ka teyagula omaukwaniilwa agehe noku ga hulitha po, ihe wo wene otawu ka kala sigo aluhe.”—Daniel 2:44, KB.

Iita nosho wo enyateko lyevi otayi ka hula po. Episalomi 46:9 otali hokolola shoka Kalunga ta ka ninga tali ti: “Ota hulitha po omalugodhi kombanda yevi alihe; ota teya omatati, ta ndonyona omagonga, niikandekitho ote yi fike po.” Ombiimbeli otayi longo wo kutya Kalunga ota ka ‘hanagula po mboka taya yonagula po evi.’—Ehololo 11:18.

Omuyonena nokwaahe na uuyuuki otayi ka hula po. Oohapu dhaKalunga otadhi uvaneke tadhi ti: “Aayuuki otaa kala moshilongo, [naakaanashipwe] oyo taa thigala mo, ihe aakaanakalunga otaa ka kombwa mo moshilongo naakaanuudhiginini otaa ka nakulwa mo.”—Omayeletumbulo 2:21, 22.

2 Mbela ehulilo otali ya uunake?

Jehova Kalunga okwa tula po “ethimbo” a hulithe po uukolokoshi auhe nokutula po epangelo lye lyUukwaniilwa. (Markus 13:33) Ihe Ombiimbeli otayi ulike sha yela kutya itatu vulu okuyalula kondandalunde esiku moka ehulilo tali ya. Jesus okwa ti: “Esiku notundi ndjoka kaku na ngoka e yi shi, nando aayengeli yomegulu nenge Omwana, oTate oye awike.” (Mateus 24:36) Ihe Jesus naalongwa ye oya li ya hunganeke kombinga yankene oonkalo tadhi ka kala kombanda yevi manga owala Kalunga inaa eta ehulilo. Ehulilo otali ka kala popepi sho iiningwanima ayihe tayi landula tayi ka ningwa pethimbo limwe nomuuyuni auhe.

Omalunduluko omanene gopapolotika, gopamudhingoloko nosho wo pankalathano otaga holoka inaashi monika nale mondjokonona yaantu. Sho Jesus a yamukula epulo ndyoka aalongwa ye ya li ye mu pula, okwe ya lombwele a ti: “Iigwana otayi ka thikama okukondjithathana, niilongo otayi ka matukilathana. Otaku ke ya oondjala nomakakamo gevi koombinga noombinga. Ayihe mbika otayi ningi ongetameko lyoshitheta, okanona ngele taka valwa.” (Markus 13:8) Omuyapostoli Paulus okwa nyola a ti: “Komasiku [gahugunina, KB] otaku ke ya omathimbo omadhigu. Aantu otaa ka kala nokwiihola, ye hole eliko, aainomi noye hole uuntsa. Otaa ka kala aasheki, ihaa vulika kaakuluntu yawo, ihaa pandula noya pota. Oyo otaa ka kala yaa na olukeno nohenda, haa lundilathana, aapwidhi naadhudhu; otaa kala ye tonde uuwanawa. Oyo otaa kala aakotokeli, ihaa yawala, haa tuwalala noye hole olundundu peha lyokuhola Kalunga.”—2 Timoteus 3:1-5.

Oshikonga shokuuvithila aantu yomomalaka ogendji muuyuni auhe otashi ningwa ngashingeyi. Jesus okwa ti: “Elaka ndika etoye [lyUukwaniilwa, KB] otali ka uvithilwa aantu ayehe, li ningile iigwana ayihe onzapo; notaku ya ihe ehulilo.”—Mateus 24:14.

3 Oshike tashi ka landula ehulilo?

Ombiimbeli itayi longo kutya aantu ayehe aawanawa otaya ka kuthwa ko kombanda yevi ya ka kale megulu sigo aluhe. Pehala lyaashono, Jesus okwa li a longo aantu kutya elalakano lyaKalunga lyopetameko otali ka gwanithwa. Okwa ti: “Aanelago oomboka aaifupipiki, oshoka oyo taa ka thigulula evi.” (Mateus 5:5; 6:9, 10) Kwaamboka taya si manga ehulilo inaali ya, Ombiimbeli oyu uvaneka eyumuko ndyoka tali ka ningwa monakuyiwa. (Job 14:14, 15; Johannes 5:28, 29) Oshike tashi ka landula ehulilo?

Jesus ota ka pangela okuza megulu e li Omukwaniilwa gwUukwaniilwa waKalunga. Omupolofeti Daniel okwa nyola a ti: “Memoniko ndika uusiku onda mono gumwe a fa omuntu. Okwe ya a kundukwa kiikogo nokwa yi kungoka ta kala e na omwenyo aluhe sigo aluhe, nokwe mu tseyithilwa. Okwa li a pewa epangelo, esimano noonkondo dhuukwaniilwa, opo aantu yomiigwana ayihe, yomomaludhi agehe noyomomalaka agehe ye mu longele. Epangelo lye otali ka kala sigo aluhe, nuukwaniilwa we kau na mpoka tau hulu po sigo aluhe.”—Daniel 7:13, 14; Lukas 1:31, 32; Johannes 3:13-16.

Aapangelwa yUukwaniilwa waKalunga otaya ka nyanyukilwa uukolele wa gwanenena, egameno tali kalelele nosho wo omwenyo gwaaluhe. Omupolofeti Jesaja okwa nyola a ti: “Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Itaa ka tunga omagumbo, nayalwe taa ka kala mo, nenge ya tsike sha, nayalwe taa ka lya iiyimati.” (Jesaja 65:21-23) Omuyapostoli Johannes okwa li a nyola kombinga yethimbo ndyoka a ti: “Ngashingeyi egumbo lyaKalunga oli li paantu! Oye ota ka kala pamwe nayo, notaa ka ninga aantu ye. Kalunga mwene ota ka kala pamwe nayo nota ka ninga Kalunga kawo. Oye ota ka theta po omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.”—Ehololo 21:3, 4.

4 Oshike wu na okuninga opo wu ka hupe pehulilo?

Omuyapostoli Petrus okwa li a zimine kutya aantu yamwe mboka ye na omwenyo pethimbo lyehulilo otaya ka sheka edhiladhilo kutya Kalunga ota ka ya mo olunyala monkalamwenyo yaantu nokuhulitha po uukolokoshi kombanda yevi. (2 Petrus 3:3, 4) Nonando ongawo, Petrus ota ladhipike aantu mboka ye li ko ngashingeyi ya katuke oonkatu tadhi landula.

Ilonga kwaashoka sha ningwa mondjokonona. Petrus okwa li a nyola a ti: “Kalunga ine etha inaa geela uuyuni mbwiyaka wonale waakeenakonasha naye, ndele okwe u tumine eyelu. Noowa, omuuvithi guuyuuki, oye awike a hupithwa kuKalunga pamwe nooyakwawo yaheyali.” (2 Petrus 2:5) Petrus okwa popi kombinga yaamboka haya sheke Kalunga a ti: “Oyo otaa ipwililike owina, ongo inaa tseya oshinima shika kutya nalenale Kalunga okwa li a popi, omagulu nevi e tayi shitwa. Evi olyu umbwa momeya nolyu umbwa nomeya, nokomeya geyelu wo uuyuni owa hanagulwa po. Ihe omagulu nevia sho yi li ko sigo onena, oya gamenwa kohapu tuu ndjoka yaKalunga, yi ka hanagulwe po nomulilo. Oyo oya pungulilwa esiku, uuna aakeenakonasha naKalunga taa ka pangulwa notaa ka yonagulwa po.”—2 Petrus 3:5-7.

Kala pamithikampango dhaKalunga dhuuyogoki wopamikalo. Petrus okwa nyola a ti kutya mboka ya hala okuhupa pehulilo oye na okukala ‘noondjenda oondjapuki netilokalunga.’ (2 Petrus 3:11, OB-1954) Ndhindhilika kutya Petrus okwa tsa omuthindo ‘oondjenda oondjapuki netilokalunga.’ Oshindji osha kwatelwa mo mwaashoka, kaashi shi owala okupopya kutya owu na eitaalo nenge okukambadhala okukala nomuthika omwaanawa naKalunga komunute gwahugunina.

Oondjenda nenge iilonga yini kondandalunde mbyoka Kalunga a hokwa? Omolwashike itoo yelekanitha shoka wu shi naashoka Ombiimbeli tayi longo kombinga yoshinima shika? Oonzapo dhaJehova otadhi ka kala dha nyanyukwa oku ku kwathela. Dhi pula dhi ku ulukile okuza mOmbiimbeli yoye ekankameno lyomayamukulo gadho. Okuninga ngaaka otaku vulu ku ku kwathele wu taalele onakuyiwa wu na omukumo neinekelo, nonando otwa kundukidhwa ngashingeyi kiiyetithi yuumbanda.

[Enyolo lyopevi]

[Oohapu dha simana pepandja 7]

Evi itali ka hula po, ihe mboka haya yonagula evi oyo taya ka hula po