Mbela ehulilo lyuuyuni owe li tila, owa hala lya thika nenge ku na ko nasha nalyo?

Owa tala ko ngiini 21 Desemba 2012 esiku ndyoka tali popiwa mokalindeli kAamaya kutya otamu ka ningwa omalunduluko ga guma uuyuni awuhe? Shi ikolelela kwaashoka wa tegelela shi ningwe, otashi vulika wu ka kale wa pepelelwa, wa yemata nenge wu kale itoo ipulile ko nokuli kusho. Mbela ndika olimwe owala lyomomatengeneko ngoka ga puka?

Ongiini kombinga ‘yehulilo lyuuyuni’ ndyoka lya popiwa mOmbiimbeli? (Mateus 24:3) Yamwe oye na uumbanda kutya evi otali ka fikwa po. Yamwe oya halelela okumona shoka tashi ka ningwa po pehulilo lyuuyuni. Yalwe ihayi ipulile ko we nokuli kehulilo lyuuyuni, molwaashoka oya kala nale ye li tegelela ethimbo ele. Ndele mbela oyu uva ngaa oshili kombinga yehulilo lyuuyuni?

Otashi vulika shi ke ku kumithe ngele owu uvu shoka Ombiimbeli tayi ti lela kombinga yehulilo lyuuyuni. Ombiimbeli itayi popi owala kutya omolwashike tu na okukala twa tegelela ehulilo nondjuulukwe, ihe otayi yelitha wo kutya yamwe otaya ka kala ye wete ehulilo lya kala ko e taya loloka okutegelela. Tala nkene Ombiimbeli tayi yamukula gamwe gomomapulo ngoka haga pulwa olundji kombinga yehulilo lyuuyuni.

Mbela evi otali ka fikwa po?

OMBIIMBELI OTAYI TI: “Evi owe li tula komakankameno ga kola, itali tenguka” sigo aluhe.—EPISALOMI 104:5.

Evi itali ka hanagulwa po nando, kutya nduno onomulilo nenge opamukalo gulwe. Pehala lyaashono, Ombiimbeli otayi ti kutya opulanete ndjika oyo egumbo lyetu lyaaluhe. Episalomi 37:29 otali ti: “Aayuuki otaa ka thigulula evi e taa kala mo sigo aluhe.”—Episalomi 115:16; Jesaja 45:18.

Konima sho Kalunga a shiti evi okwa ti ‘olyo opala lela,’ natango osho e li tala ko ngaaka. (Genesis 1:31) Evi halyo a hala okuhanagula po, ihe oku uvaneka kutya ota ka ‘hanagula po mboka taya yonagula po evi,’ noku li gamena kaali yonwe po thilu.—Ehololo 11:18.

Ihe otashi vulika to dhiladhila kutya 2 Petrus 3:7 ota yelitha kutya evi otali ka fikwa po. Ombiimbeli otayi ti ngeyi movelise ndjoka: “Ihe omagulu nevi sho yi li ko sigo onena, oya gamenwa kohapu tuu ndjoka yaKalunga, yi ka hanagulwe po nomulilo.” Mbela shika itashi ulike kutya evi otali ka fikwa po? Omathimbo gamwe Ombiimbeli ohayi longitha uutumbulilo “omagulu,” ‘evi’ nosho wo ‘omulilo’ tayi popi pathaneko, nenge ano tu tye tayi popi oshinima shimwe shi ili. Pashiholelwa, sho Episalomi 97:1 tali ti: “Evi, nyanyukwa!,” olya longitha oshitya “evi” okuulika kaantu.

Oovelise ndhoka dha kundukidha 2 Petrus 3:7 otadhi ulike kutya omagulu, evi nomulilo mbyoka ya popiwa moka nayo oyopathaneko. Ovelise 5, 6 otayi faathanitha shoka shi li movelise 7 naashoka sha li sha ningwa pEyelu lyopethimbo lyaNoowa. Pethimbo ndyoka, uuyuni wonale owa li wa hanagulwa po, ihe opulanete yetu kaya li ya hanagulwa po. Ano “uuyuni” nenge evi ndyoka tali popiwa kOmbiimbeli kutya olya li lya hanagulwa po keyelu, aantu aawinayi mboka ya li ko pethimbo ndiyaka. (Genesis 6:11) ‘Negulu’ ndyoka lya li lya hanagulwa po keyelu, aantu mboka ya li taya lele aantu mbeyaka aakolokoshi. Sha faathana, 2 Petrus 3:7 ota hunganeke kutya aakolokoshi nomapangelo gawo gu udha uulingilingi otayi ka hanagulwa po thiluthilu ya fa ya fikwa po nomulilo.

Oshike tashi ka ningwa pehulilo lyuuyuni?

OMBIIMBELI OTAYI TI: “Uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga e shi hala, ota kala e na omwenyo aluhe.”—1 JOHANNES 2:17.

“Uuyuni” mboka tawu hulu po kawu shi evi, ihe aantu ayehe yomuuyuni mboka ihaayi iyutha kehalo lyaKalunga. Ngaashi naanaa omutandi tashi vulika a kuthe mo oshitumba shi na okaankela momuvu, opo a hupithe omuvu, Kalunga naye ota ka ‘tidha ko’ aakolokoshi kombanda yevi, opo aayuuki ya vule okunyanyukilwa ko. (Episalomi 37:9) Molwaashono osho shi li ngawo, nena ‘ehulilo lyuuyuni’ oshinima oshiwanawa.

Ngele aantu nosho wo evi otayi ka hupa pehulilo lyuuyuni, mbela kashi li pandjele okudhiladhila kutya uuyuni uupe owo tawu ka landula ko? Ombiimbeli otayi yamukula kutya osho shi li ngawo, molwaashoka otayi popi kombinga ‘yuuyuni tawu ya.’—Lukas 18:30.

Jesus okwa li ta popi shi na ko nasha nethimbo ndyoka sho a popi kombinga ‘yuuyuni uupe.’ Pethimbo mpoka, ota ka galulila aantu monkalo ndjoka Kalunga a li a hala ya kale petameko. (Mateus 19:28) Otatu ka nyanyukilwa iinima tayi landula:

• Eviparadisa moka tatu ka kala twa gamenwa notwa hepuluka.—Jesaja 35:1; Mika 4:4.

• Iilonga tayi ti sha notayi nyanyudha.—Jesaja 65:21-23.

• Onkalamwenyo kaayi na omikithi.—Jesaja 33:24.

• Onkalamwenyo kaayi na uukulupe.—Job 33:25.

• Eyumuko lyaasi.—Johannes 5:28, 29.

Ngele otwa kala hatu longo “shoka Kalunga e shi hala,” ano shoka te tu pula tu ninge, inatu pumbwa okutila ehulilo lyuuyuni. Pehala lyaashono, otatu vulu okukala twe li tegelela nondjuulukwe.

Mbela ehulilo lyuuyuni oli li shili popepi?

OMBIIMBELI OTAYI TI: “Ngele tamu mono ayihe mbika tayi ningwa, kaleni mu shi shi kutya Oshilongo shaKalunga oshi li popepi.”—LUKAS 21:31.

Membo The Last Days Are Here Again (Otu li ishewe momasiku gahugunina), Omuprofesoli Richard Kyle okwa nyola kutya “omalunduluko ngoka hage ya ombaadhilila nevundakano moshigwana ohayi ningitha aantu ya hunganeke kombinga yehulilo lyuuyuni.” Shika ohashi kala ngawo, unene tuu ngele aantu oya nyengwa okufatulula kutya omolwashike omalunduluko ngoka taga ningwa nenge kutya omolwashike evundakano ndyoka li li po.

Ihe nonando ongawo, aahunganeki yomOmbiimbeli mboka ya nyola kombinga yehulilo kaya li ya nyola, opo ando ya yelithe kutya omolwashike ku na oonkalo oombwinayi ndhoka dha li dhe ya kundukidha. Pehala lyaashono, oya li ya nwethwa mo kuKalunga ya nyole kombinga yoonkalo ndhoka tadhi ka ulika kutya ehulilo lyuuyuni oli li popepi. Natu taleni kugamwe gomomahunganeko ngoka tu tale ngele otaga gwanithwa kunena.

• Iita, oondjala, omakakamo gevi nomikithi omidhipagi dhomikwayu.—Mateus 24:7; Lukas 21:11.

• Omiyonena dha yaga kegonga.—Mateus 24:12.

• Aantu taya yonagula po evi.—Ehololo 11:18.

• Aantu mboka yi ihole yo yene, ye hole omaliko nosho wo olundundu nenge omainyanyudho, ihe kaye hole Kalunga.—2 Timoteus 3:2, 4.

• Evundakano momagumbo.—2 Timoteus 3:2, 3.

• Okwaanakonasha nuunzapo mboka wu li po kutya ehulilo lyuuyuni oli li popepi.—Mateus 24:37-39.

• Euvitho lyonkundana ombwanawa yUukwaniilwa waKalunga muuyuni awuhe.—Mateus 24:14.

Ngaashi Jesus a li e shi popi, uuna tu wete “ayihe mbika” natu tseye kutya ehulilo oli li popepi. (Mateus 24:33) Oonzapo dhaJehova odhi itaala uumbangi mboka wu li po nohadhi uvithile aantu shoka dhi itaala miilongo 236.

Mbela otashi ti kutya shaashi aantu oya li ye na etegameno lya puka kombinga yehulilo, ehulilo itali ya we?

OMBIIMBELI OTAYI TI: “Manga aantu ye li mokutya: [‘Ope na ombili negameno,’ NW] nena ohaluka ehanagulo otali ya adha. Itaa ka vula okuya ontuku, oshoka otashi ka kala ngaashi omusimba taa adhika koshitheta.”—1 AATESSALONIKA 5:3.

Ombiimbeli otayi faathanitha ehanagulo lyuuyuni noshitheta, molwaashoka uuna omusimba ta mono okanona oha kala e na uuwehame mboka hawu ya ombaadhilila. Ethimbo ndyoka tali fala sigo omehulilo otali faathanithwa nomusimba, molwaashoka oha kala e wete omandhindhiliko kutya masiku ota mono okanona. Ndohotola gwe otashi vulika a tengeneke kutya ota mono uunake, ihe nando esiku ndyoka a pewa olya pitilile, ota ka kala natango e na uushili kutya okanona otaka ka valwa. Sha faathana, nonando aantu oye na etegameno lya puka kombinga yehulilo lyuuyuni, shoka itashi lundulula uumbangi mboka tawu ulike kutya otu li ‘momasiku gahugunina’ (NW).—2 Timoteus 3:1.

Otashi vulika wu pule kutya ‘ngele omandhindhiliko ngoka taga ulike kutya ehulilo oli li popepi oga yela, omolwashike aantu oyendji kaaye shi wete?’ Ombiimbeli otayi holola kutya sho ehulilo tali hedha popepi, oyendji otaya ka kala ya dhina uumbangi mboka. Pehala lyokwiitaala kutya opwa ningwa omalunduluko omanene momasiku gahugunina, otaya ka sheka taa ti: “Ootate oya sa nale, ihe iinima ayihe oyi li, ngaashi ya kala shito okuza keshito lyuuyuni.” (2 Petrus 3:3, 4) Oku shi popya niitya yilwe, endhindhiliko lyomasiku gahugunina olya yela, ihe oyendji otaye li ipwililike.—Mateus 24:38, 39.

Oshitopolwa shika osha gandja owala uumbangi wumwe po wopamanyolo mboka tawu ulike kutya ehulilo oli li popepi.a Mbela ino hala okwiilonga oshindji? Ngele owa hala, omolwashike itoo pula Oonzapo dhaJehova dhi kale hadhi konakona nangoye Ombiimbeli oshali? Otamu vulu okukala hamu konakonene paandjeni, pehala lilwe ndyoka lye ku opalela nenge okupitila nokuli mongodhi. Owa pumbwa owala okugandja ethimbo lyoye, uuwanawa mboka to ka mona mo kawu shi ku yelekwa.