OMAPULO GOPAMBIIMBELI TAGA YAMUKULWA
Mbela Ombiimbeli oyi li ngaa shili Oohapu dhaKalunga?
Owu na okukala wa tegelela Oohapu dhaKalunga dhi kale dhi ikalekelwa, yo Ombiimbeli osho tuu yi li shili. Oombiimbeli omabiliyona odha nyanyangidhwa momalaka omathele. Uunongo mboka wu li mOmbiimbeli owu na oonkondo dhokulundulula aantu ya kale ye li nawa. — Lesha 1 Aatessalonika 2:13; 2 Timoteus 3:16.
Otu shi shi kutya Ombiimbeli oya za kuKalunga molwaashoka oya hunganeka mondjila onakuyiwa. Kapu na omuntu ta vulu okuninga ngaaka kuye mwene. Pashiholelwa, dhiladhila kembo lyaJesaja. Ondhingambo yalyo ndjoka ya nyolwa pwa pita oomvula dhi vulithe pethele manga Jesus inaa valwa oya li ya adhika mekololo popepi nEfuta Lya Sa. Otayi ti kutya oshilando Babilonia osha li itaashi ka kala we aantu. Shoka sha li sha ningwa tango oomvula odhindji konima yuukalele waJesus kombanda yevi. — Lesha Jesaja 13:19, 20; 2 Petrus 1:20, 21.
Ombiimbeli oya li ya nyolwa ngiini?
Ombiimbeli oya li ya nyolwa muule woomvula dhi vulithe 1 600 dha ka pita. Ombiimbeli oya nyolwa kaanyoli ye li 40 lwaampono, naashoka ya li ya nyola osha li shi na enenedhiladhilo limwe noitaali kondjithathana. Ongiini shoka sha li sha wapa? Kalunga okwa li e ya wilike ya nyole. — Lesha 2 Samuel 23:2.
Kalunga okwa li a popi naanyoli yOmbiimbeli okupitila maayengeli, momamoniko nenge moondjodhi. Aluhe, Kalunga okwa li a tula omadhiladhilo ge momadhiladhilo gomunyoli noku mu pitika a hogolole iitya mbyoka tayi holola etumwalaka lyaKalunga. — Lesha Ehololo 1:1; 21:3-5.