Kandi na esiku nda topokele nondjembo yandje

ONAKUZIWA YANDJE:

Ngame omvalele yokoshitopolwa shokomikandi dhaRoma noko wo nda putukila, moshitopolwa moka mu na aantu kaaye na iiyemo yi li nawa. Onkalamwenyo oya li ya kukuta. Meme kanda li ndi mu shi, nokanda li ndi na ekwatathano ewanawa natate. Mokuputuka kwandje onda li ndi ilongo omikalo dhomomapandaanda.

Sho nda ka gwanitha oomvula omulongo, onda adhika nale nda tameka okuyaka. Sho ndi na oomvula 12, onda li nda tembuka mo megumbo oshikando shotango. Iikando oyindji, tate okwa li i ile ndje kopolisi nokufala ndje kegumbo. Onda li handi nyenyeta naantu olwindji, onda li omuhahu nonda li nda geyela uuyuni awuhe. Sho ndi na oomvula 14, onda li nda tembukililile mo megumbo. Onda li nda tameke okulongitha iingangamithi nokukala handi lala momapandaanda. Molwaashoka kanda li ndi na mpoka handi lala, onda li handi teya oohauto ngame tandi kala moka sigo oosho eluwa tali tende. Onda li nduno handi kongo mpoka pu na omeya opo ndi iyoge.

Onda li nda ningi kapyoko mokuyaka, kehe shimwe okuza ngaa kokuyakula oondjato, okuteya omahala gokukala nosho wo omagumbo gomafudho uusiku. Ondi iningile edhina ewinayi nonda li nda pulwa ndi ninge oshilyo shongenga yimwe ya nika oshiponga, ndjoka ya li ya pe ndje ompito anuwa tu hume komeho sigo omokuteya oombaanga. Molwaashoka onda li omuhahu, nziya onda kala nda simanekwa mongenga moka. Kandi na esiku nda topokele nondjembo yandje, oya li nokuli hayi lala kohi yoshikuusinga shandje. Elongithonkondo, iingangamithi, okuyaka, elaka lya nyata nosho wo oluhondelo oya li ya ningi oshitopolwa shonkalamwenyo yandje. Aluhe opolisi oya li hayi kala yi li ndje mokashoko. Onda li nda kwatwa po iikando oyindji, nonda li handi ningi nda yi mo nda zi mo mondholongo oomvula odhindji.

NKENE OMBIIMBELI YA LUNDULULA ONKALAMWENYO YANDJE:

Oshikando shimwe sho nda li nda piithwa mo mondholongo, onda li nda tokola ndi ka talele po meme gumwe omumwayina gwameme. Mokwaaha shi sha, memegona ngoka naanona ye yaali oya adhika ya ninga Oonzapo dhaJehova. Oya li ya hiya ndje ndi ye pamwe nayo kokugongala kwOonzapo. Omolwokatalekonawa, onda tokola ndi ye pamwe nayo. Sho twa thiki pOshinyanga shUukwaniilwa, onda kondjitha ndi kuutumbe popepi nomweelo opo ndi kale tandi tala kehe gumwe ngoka te ya mo naangoka ta zi mo. Eeno shili, onda li ndi li komalwilo.

Okugongala hoka okwa li kwa lundulula onkalamwenyo yandje. Otandi dhimbulukwa tandi dhiladhila kutya shila pamwe ondi li kopulanete yilwe. Onda li nda popithwa nohole nonuukuume kaantu tayi imemeha. Sigo ongashingeyi otandi dhimbulukwa nawanawa nkene Oonzapo dha li dha tala ndje ko nohenda. Onda li lela ndi li kokule nuuyuni mboka ndi igilila!

Onda li nda tameke okukonakona Ombiimbeli nOonzapo. Shi thike pwaashoka nda li tandi ilongo, opo ngaa she ende tashi yela kutya ondi na okulundulula thiluthilu omukalo gwokukalamwenyo gwandje. Onda li nda tula miilonga oohapu ndhoka dhi li mOmayeletumbulo 13:20, tadhi ti: “Enda pamwe naanawino, u likole owino, ihe ngoka ta kala paagoya, ota likola uuwinayi.” Onda li nda mono kutya onda pumbwa okukala kokule nongenga ndjoka. Kasha li oshipu oku shi ninga, ihe kekwatho lyaJehova, onda li nda pondola.

Onda li wo nda lundulula eholokopo lyandje. Mokuninga oonkambadhala dha kwata miiti, onde etha po okuhila omakaya nokulongitha iingangamithi. Onda li nda kulula ko omafufu gandje omale, e tandi etha po okuzala uutenda wokomakutsi, nonde etha po okulongitha elaka lya nyata. Osha li oshikando shotango monkalamwenyo yandje nda li nda tameke okupangela oonkatu dhandje.

Kapu na nando esiku nda nyanyukililwe okulesha nokukonakona, onkee osha li lela eshongo kungame okugandja eitulomo mekonakonombiimbeli. Ihe sho nda ningi oonkambadhala, kashona nakashona onda tameke okukala ndi hole Jehova, nuuntu wandje womeni owa tameke okulunduluka, ano, eiyuvo lyandje olya tameke okunyenyetela ndje. Olundji onda li handi kala ndi itala ko nayi, nda limbililwa ngele Jehova oku na ngaa esiku a dhimine ndje po omolwiinima ayihe iiwinayi mbyoka nda ninga. Pomathimbo ngoka onda li handi mono ehekeleko olindji mokulesha kombinga yankene Jehova a li a dhimine po omukwaniilwa David konima sho a yono sha kwata miiti. — 2 Samuel 11:1–12:13.

Eshongo lilwe oondyoka lyokulombwela yalwe kombinga yeitaalo lyandje muukalele wegumbo negumbo. (Mateus 28:19, 20) Onda li ndi na uumbanda nayi kutya otandi ka tsakanena nomuntu ngoka ndu uvitha nayi nenge nda ningila uuwinayi monakuziwa. Ihe mokweendela ko kwethimbo onda li nda sindi uumbanda wandje. Onda li nda mono enyanyu lyashili mokukwathela yalwe yi ilonge kombinga yaTate yetu gwomegulu omunahole, ngoka ha dhimine po thiluthilu.

UUWANAWA MBOKA NDA MONA:

Okwiilonga kombinga yaJehova okwa gamena onkalamwenyo yandje! Oyendji yomookuume kandje oya sa nenge ye li mondholongo, ihe ondi na onkalamwenyo tayi ti sha lela nondi na onakuyiwa ndjoka nda tegamena. Ondi ilonga okukala omwiifupipiki nomuvuliki nosho wo okupangela ongeyo yandje ombwinayi. Oshizemo, ohandi kala ndi na ekwatathano ewanawa naamboka handi endathana nayo. Ondi na omukulukadhi gwandje omwaanawa, Carmen, notatu nyanyukilwa ondjokana yetu. Ohatu nyanyukilwa pamwe okukwathela yalwe yi ilonge kombinga yOmbiimbeli.

Oh, ngashingeyi ohandi longo iilonga yi li pauyuuki, omathimbo gamwe oya kwatela mo natango oombaanga, ihe pehala lyoku dhi teya, ohandi dhi opaleke!