Ongahelipi hatu dulu okuyakula nokukwafela ovo tave ke uya kEdimbuluko?
1. Oundombwedi wa kola ulipi tau ka yandjwa mo 22 Marsa 2008?
1 Mo 22 Marsa 2008, ovanhu omamiliyona mounyuni aushe otava ka pewa oundombwedi wa kola. Ovo tava ka kala pEdimbukuko otava ka yelifilwa shi na sha nanghee Jehova a ulikila ovanhu ohole inene eshi a yandja Omona waye e li ekuliloyambo. (Joh. 3:16) Otave ke lihonga yo kombinga yOuhamba waKalunga nosho yo nghee Kalunga te ke u longifa opo a wanife po ehalo laye li na sha nedu. (Mat. 6:9, 10) Otava ka mona yo nghee oshiwana shaJehova shi holafane noshi li moukumwe notava ka mona nhumbi hashi yakulafana nombili. — Eps. 133:1.
2. Ongahelipi hatu dulu okukwafela ovakonakonimbibeli ovo tava ka kala pEdimbuluko?
2 Ovakonakonimbibeli: Vamwe ovo tava ka kala pEdimbuluko ovanhu ovo opo va hovele okukonakona Ombibeli nafye. Otu na okukwafela ovakonakonimbibeli vetu va tya ngaho va shiivafane novamwatate novamwameme. Natu va yelifileni kombinga yokwoongala kwetu kwokoshivike noku va ulikila pauxupi oinima yonhumba oyo i li mOlupale lOuhamba. Omuyandji woshipopiwa ota ka ladipika ovakonakonimbibeli va twikile okuninga exumokomesho lopamhepo. Konima yEdimbuluko, oto dulu okulongifa oitwa yonhumba oyo ya kundafanwa moshipopiwa, opo u ladipike ovakonakonimbibeli voye.
3. Ongahelipi hatu dulu okuladipika ovaudifi ovo inave lipyakidila, ovo tave ke uya kEdimbuluko?
3 Ovaudifi ovo inave lipyakidila vali: Ovaudifi vamwe ovo inave lipyakidila vali otave ke uya kEdimbuluko. Onghee hano, inatu ongaonga oku va popifa, hatu shi ningi nohamu. Natu henuke oku va pula oinima yopaumwene ile tu popye oinima oyo tai dulu oku va fifa ohoni. Diva, konima yEdimbuluko, ovakulunhuongalo ove na okuninga omalongekido opo va ka talele po ovaudifi ovo inave lipyakidila, ovo va li ve uya kEdimbuluko. Ove na oku va pandula eshi va ninga eenghendabala ve uye kEdimbuluko noku va shiva ve uye kokwoongala kweongalo taku landula.
4. Ongahelipi keshe umwe womufye ta dulu okukwafela ovaenda ovo tave ke uya kEdimbuluko?
4 Ovaenda: Vamwe ovo tava ka kala pEdimbuluko otashi dulika ovashiinda shetu, ovanailonga pamwe nafye, ovanafikola vakwetu ile ovapambele ovo twa shiva. Vamwe otashi dulika ovanhu ovo twa shiva ve uye kEdimbuluko pefimbo loshikonga she likalekelwa. Ngeenge otwa didilike mo oohandimwe ovo inatu mona nale, natu ningeni eenghendabala doku va popifa noku va hambelela. Otashi dulika inava ongala nande onale pamwe nEendombwedi daJehova. Ngeenge owa popi navo, otashi dulika tamu ka udafana kutya ongahelipi tamu dulu okumonafana vali. Konima yEdimbuluko, oto dulu oku ka talela po ovanhu va tya ngaho odikilila ile okupitila mongodi, opo u dule okukulika ohokwe yavo nokuhovela omakonakonombibeli.
5. Eenghedi dilipi hatu dulu okulongifa opo tu hovele omakonakonombibeli?
5 Oto dulu okulongifa oitwa oyo ya kundafanwa moshipopiwa shEdimbuluko, opo u hovele eenghundafana dopaMbibeli to longifa embo Ombibeli otai hongo, eshi to ningi elishuneko. Pashihopaenenwa, omuyandji woshipopiwa ota ka lesha Jesaja 65:21-23. Eshi to ka ninga elishuneko, otashi dulika u popye oitwa yonhumba oyo ya kundafanwa moshipopiwa shEdimbuluko, ndele to weda ko to ti: “Onda hala ndi ku ulikile omanangeko noupuna amwe vali oo hatu ka mona omolwekuliloyambo.” Opo nee otamu dulu okukundafana omafano nomishangwa odo di li pepandja eti-4 neti-5 membo Ombibeli otai hongo. Ile otashi dulika u tye: “Ovanhu vahapu ohave lipula kutya onaini exunganeko olo li li muJesaja tali ka wanifwa.” Opo nee otamu dulu okukundafana okatendo ko-1 fiyo okati-3 metukulwa eti-9. Shimwe vali, oto dulu ashike okutumbula oitwa yonhumba oyo ya kundafanwa moshipopiwa shEdimbuluko, ndele to hovele ekonakonombibeli nopehe na okwoongaonga, to longifa embo Ombibeli otai hongo.
6. Omhito ilipi hatu ka kala tu na eshi hatu ke uya kEdimbuluko lefyo laJesus?
6 Atusheni natu ningeni eenghendabala opo tu kwafeleni ovakonakonimbibeli, ovaudifi ovo inave lipyakidila vali nosho yo ovaenda ovo tave ke uya kEdimbuluko. (Luk. 22:19) Nopehe na omalimbililo, Jehova ota ka nangeka noupuna eenghendabala detu dokutamununa mo oilonga yetu yOuhamba.