Oshigongi shopashikandjo ohashi kwathele uupambepo wetu
1. Okupitila mushike Jehova he tu kwathele tu gwanithe po oshilonga shokutaandelitha onkundana ombwanawa?
1 Jehova ohe tu pe nehalo ewanawa uuyelele, edheulo netsomukumo ndyoka twa pumbwa opo tu gwanithe po oshilonga shoka e tu pa shokutaandelitha onkundana ombwanawa. (Mat. 24:14; 2 Tim. 4:17) Ohe shi ningi okupitila moshigongi shopashikandjo shokomumvo. Oshigongi shoshikandjo shomumvo gwiilonga 2010 otashi ka kala noshipalanyolo “Gamena uupambepo woye,” sha kankamena kAaroma 8:5 nosho wo Judas 17-19. Otashi ka tameka mo 31 Auguste 2009.
2. (a) Omomikalo dhini tatu ka mona uuwanawa poshigongi shopashikandjo? (b) Iigongi yopashikandjo mbyoka ya pita oye ku kwathela ngiini muukalele woye?
2 Uuwanawa washike hatu mono mo?: Oshigongi otashi ke tu kwathela tu kotokele iinima mbyoka hayi mana po ethimbo lyetu noku tu imba tu gandje eitulomo kwaashoka sha simana shili. Otatu ki ilonga nkene tu na okuyanda ombepo yuukakombwiilitha, notatu ka tala shoka sha kwatela mo okukala tu na uupambepo wu li nawa. Iipopiwa ya pambathana mOsoondaha otayi ka kwathela oohandimwe nomaukwanegumbo okukoleka uupambepo wawo uuna ya taalelwa komathininiko nokiinima mbyoka tayi makele eitaalo lyawo. Oshigongi otashi ke tu kwathela tu gamene omitima dhetu, tu kale nuupambepo wa kola nokukaleka momadhiladhilo omayambeko omawanawa noonkondo ngoka taga ka monika kwaamboka taa gamene uupambepo wawo.
3. Oshigongi sheni shopashikandjo tashi landula otashi ka ningwa uunake, nowu na okutokola toko wu ninge shike?
3 Mbalambala ngele wu uvu kutya uunake nopeni oshigongi sheni shopashikandjo tashi landula tashi ka ningilwa, ninga omalongekidho goku ka kala po nokugandja eitulomo kiipopiwa yomasiku agehe gaali. Kala nuushili kutya Jehova oha yambeke iikaha yomunandjungu. — Omayel. 21:5.
4. Otu na uushili kutya otatu ka mona shike poshigongi shopashikandjo shoka twa taalela?
4 Oshoshili kutya Jehova oye Omugandji gomagano ngoka omawanawa. Opolohalama ndjoka ya longekidhwa kongundu yomupiya omudhiginini nomunandunge otayi ka kala lela ndjoka twa pumbwa opo tu tsikile okukala aakalele Aakriste. Otwa pandula komasiloshimpwiyu gaJehova agehe gopahole oku tu kwathela “tu dhiginineni okuhempulula nomukumo etegameno lyetu.” — Heb. 10:23-25; Jak. 1:17.