Nkene tu na okudheula aauvithi aape
1. Owa li wu uvite ngiini oshikando shotango sho wa kutha ombinga muukalele?
1 Mbela oto dhimbulukwa oshikando shoye shotango miilonga yegumbo negumbo? Otashi vulika wa li wa tila. Ngele owa li to longo pamwe naangoka he ku longo Ombiimbeli nenge nomuuvithi gulwe owa li wa nyanyukilwa ekwatho lye. Ngashingeyi owu na ontseyo noto vulu okudheula aauvithi yalwe aape.
2. Aauvithi aape oya pumbwa yi ilonge shike?
2 Aauvithi aape oya pumbwa yi ilonge nkene ye na okutameka oonkundathana nomunegumbo, okulongitha Ombiimbeli, okuninga omaishunoko nokutameka omakonakonombiimbeli. Oye na wo okwiilonga okuuvithila aantu pomahala ga yoolokathana, ngaashi momapandaanda nopomahala gomalandithilo. Iiholelwa yetu nomafalomo getu, otayi vulu oku ya kwathela ya hwepopaleke iilonga yawo yokuuvitha.
3. Ongiini tatu vulu okukwathela yalwe okupitila moshiholelwa shetu?
3 Ya tulila po oshiholelwa: Jesus okwa li u ulukile aalongwa ye nkene ye na okuuvitha. (Luk. 8:1; 1 Pet. 2:21) Uuna to ka longa nomuuvithi omupe, ino popya iinima yomuule, ihe pehala lyaashono, oto vulu okulongitha omafalomo omapu ngoka ge li miileshomwa yetu. Longa tango egumbo limwe nenge gaali opo omuuvithi u uve shoka to ti. Ngele mwa zi po oto vulu okupula omuuvithi kutya okwiilongo mo shike mefalomo lyoye. Shika otashi ke mu kwathela a mone esimano lyokulonga nayalwe muukalele notashi ka kala oshipu kuye okutaamba ko omayele ngoka to ke mu pa konima ngele a popi nomomunegumbo.
4. Ongiini tatu vulu okukwathela omuuvithi omupe konima ngele a popi nomunegumbo?
4 Ninga omaetopo: Jesus okwa li wo a pe aalongwa ye omalombwelo nkene ye na okuuvitha. (Mat. 10:5-14) Oto vulu okuninga sha faathana naauvithi aape. Ngele omuuvithi omupe oye e na olufo lwokupopya pulakena neitulomo. Ngele mwa zi po pegumbo, mu pandula mpoka a ninga nawa nomutima aguhe, nonando owu wete kutya okwa pumbwa okuhwepopala miinima yontumba. Omanga inoo ninga eetopo, tala ngele pegumbo lya landula ko okwa hwepopala. Otashi vulika owala a li a tila pegumbo lyotango. Kala wu shi kutya aauvithi ayehe kaye na uunkulungu wa faathana, nolundji aantu ohaya vulu okupopya oshinima shimwe momikalo dha yoolokathana, ihe adhihe odhi li mondjila. — 1 Kor. 12:4-7.
5. Oshike tatu vulu okutya uuna twa hala okugandja omaetopo?
5 Omathimbo gamwe omuuvithi omupe otashi vulika e ku pule omaetopo. Ihe ngele ine ku pula, oto vulu oku mu kwathela wo. Ongiini to vulu oku shi ninga nelungi? Aauvithi yamwe mboka ye na ontseyo otashi vulika ya tye “otandi vulu mbela oku ku pa eetopo?” nenge ya tye “owe shi enditha ngiini?” Natango oto vulu okutya “sho nda li omuuvithi omupe, onda li ndi wete shi li eshongo, . . . ihe omukalo nguka ogwa kwathela ndje. . . . ” Omathimbo gamwe oshi li nawa okutala omaetopo membo Reasoning. Opo kaashi mu dhigupalele, mu ulukila owala eetopo limwe.
6. Ongiini ‘oshitenda hashi wege oshikwawo,’ ngele tu li muukalele?
6 Oshitenda ohashi wege oshikwawo: Timoteus omuuvithi gwevaangeli a pyokoka okwa li a ladhipikwa kuPaulus a tsikile nokulonga aantu nokuninge ehumokomeho. (1 Tim. 4:13, 15) Nonando opwa piti ethimbo ele to longo muukalele, owu na natango okutsikila nokuhwepopaleka uunkulungu woye wokulonga aantu. Oto vulu okwiilonga oshindji kaauvithi mboka to longo pamwe nayo nokwaamboka ye na ontseyo onshona nokuli. Kwathela yalwe nombili, unene tuu mboka aape opo ya kale aauvithi yonkundana ombwanawa ya pyokoka. — Omayel. 27:17.