Mbela owa li nale omukokolindjila gwondjigilile?
1. Uuthembahenda wuni oyendji haya nyanyukilwa, ihe oya pumbwa ishewe okuninga oshike?
1 Muule woomvula odhindji, aantu oyendji oya kala nokunyanyukilwa uuthembahenda ‘wokulonga nokuuvitha elaka etoye’ ye li aakalele yethimbo lyu udha. (Iil. 5:42) Ihe yamwe oya li ye na okweetha po uukokolindjila omolwomatompelo gi ili nogi ili. Ngele owa li nale omukokolindjila gwondjigilile, mbela owa tala ngaa oonkalo dhoye dhongashingeyi ngele oto vulu natango okuninga omukokolindjila?
2. Omolwashike mboka ya li aakokolindjila nale ye na okutala oonkalo dhawo dhongashingeyi?
2 Oonkalo ohadhi lunduluka: Otashi vulika onkalo ndjoka ya li ye ku imba kuu kokole we ondjila kaayi po we. Pashiholelwa, ngele owa li we etha po uukokolindjila molwaashoka itoo vulu we okutsakanitha oowili 90 omwedhi kehe, mbela ito vulu oku wu tameka ishewe molwaashoka oowili ngashingeyi odha ninga 70? Mbela iilonga yoye yokwiikongela omboloto nenge iinakugwanithwa yoye yuukwanegumbo oya shonopala okuza sho we etha po uukokolindjila? Omumwameme gumwe ngoka a li e etha po uukokolindjila omolwuukolele, okwa li a vulu oku wu tameka ishewe mepipi lyoomvula 89. Molwaashoka opwa li pwa piti omvula inaa ya moshipangelo, okwa li u uvite kutya oku na uukolele nota vulu oku wu tameka ishewe.
3. Ongiini iilyo yuukwanegumbo tayi vulu okulongela kumwe yi kwathele gumwe gwomuyo ngoka ta kokola ondjila?
3 Otashi vulika ino kokola nale ondjila, ihe gumwe muukwanegumbo weni okwe etha po oku shi ninga opo a sile oshimpwiyu oshilyo shimwe shuukwanegumbo, ngaashi omuvali ngoka a kulupa. (1 Tim. 5:4, 8) Ngele osho, mbela ngoye nenge yalwe muukwanegumbo itamu vulu okuninga oshindji mu mu kwathele? Omolwashike itaamu shi kundathana amuhe? (Omayel. 15:22) Ngele iilyo yuukwanegumbo otayi longele kumwe opo gumwe a vule okukokola ondjila, ayehe muukwanegumbo otaya vulu okukala yu uvite kutya oye na oshinakugwanithwa shoku mu kwathela.
4. Oshike to vulu okuninga ngashingeyi ngele ito vulu we okuninga omukokolindjila?
4 Ino teka omukumo ngele onkalo moka wu li ngashingeyi itayi ku pitike wu tameke ishewe uukokolindjila. Okukala nehalo lyiilonga mbyoka ohashi nyanyudha Jehova. (2 Kor. 8:12) Longitha ngashingeyi muukalele woye uunkulungu woye mboka wa li wa mono sho wa li omukokolindjila. Ngele owu na ehalo oku shi ninga, galikana nokukonga oompito wu tale ngele oto vulu okuninga po sha wu shune mo. (1 Joh. 5:14) Otashi vulika konima yethimbo Jehova e ke ku pe “ompito okulonga oshilonga shika oshinene” opo wu vule okunyanyukilwa ishewe uukokolindjila wondjigilile. — 1 Kor. 16:9.