Uukwatya wa simanenena mboka omulongi omwaanawa e na okukala e na
1. Uukwatya wuni wa simanenena mboka omulongi omwaanawa e na okukala e na?
1 Uukwatya wa simanenena wuni omulongi gwOmbiimbeli omwaanawa e na okukala e na? Mbela oku na okukala e na elongo lyopombanda? Mbela oku na okukala e na ontseyo yomuule? Nenge mbela oku na okukala e na omagano? Omulongi omwaanawa oku na okukala e na uukwatya wa faathana naamboka omuntu e na okukala e na opo a gwanithe po Ompango nuukwatya mboka ohawu ndhindhilikitha mo aalanduli yaJesus nowu li uukwatya waJehova wa tongomana nuuhokithi womuukwatya we mboka wa simanenena. (Joh. 13:35; Gal. 5:14; 1 Joh. 4:8) Uukwatya mboka owo ohole nomulongi omwaanawa owo e na okukala e na.
2. Omolwashike sha simanenena tu kale tu hole aantu?
2 Kala wu hole aantu: Jesus ngoka e li Omulongi Omunene okwa li e hole aantu naashoka osha li sha ningitha aantu ya pulakene kuye. (Luk. 5:12, 13; Joh. 13:1; 15:13) Ngele otu na ko nasha naantu, otatu ke yu uvithila pompito kehe. Okuhepekwa omolweitaalo nokwaana ko nasha kwaantu muukalele itaku ke tu teya omukumo. Otatu ku ulika kutya otu na ko nasha nomuntu ngoka tatu uvithile ngele otwa kala hatu lundulula omikalo moka hatu kundathana naye opo tu mu kwathele shi ikolelela konkalo moka e li. Kakele kethimbo ndyoka tatu ka longitha mokuninga ekonakonombiimbeli otu na wo okulongitha ethimbo lyetu mokwiilongekidhila ekonakonombiimbeli ndyoka.
3. Ohole yokuhola oshili yOohapu dhaKalunga otayi ke tu kwathela ngiini muukalele?
3 Kala wu hole oshili yOohapu dhaKalunga: Jesus okwa li e hole oshili yOohapu dhaKalunga nokwa li e yi tala ko yi li eliko lyondilo. (Mat. 13:52) Ngele otu hole oshili yOohapu dhaKalunga, otatu ka popya nuulaadhi naashika otashi ka ningitha aapulakeni ya kale ya nyanyukilwa shoka tatu popi. Ohole ndjoka otayi ke tu kwathela tu kale hatu gandja eitulomo kuuyelele wa simana mboka hatu uvithile aantu pehala lyokugandja eitulomo kuunkundi wetu, naashika otashi ke tu ningitha kaatu kale tu na unene uumbanda muukalele.
4. Ongiini tatu vulu okukokeka ohole?
4 Kokeka uukwatya wohole: Ongiini tatu vulu okukokeka ohole yokuhola aantu? Otatu ke yi kokeka ngele ohatu dhiladhila kohole ndjoka Jehova nOmwana ye tu ulukila nokonkalo yinikitha oluhodhi yopambepo ndjoka aantu moshitopolwa shetu ye li muyo. (Mark. 6:34; 1 Joh. 4:10, 11) Ohole yetu yokuhola Oohapu dhaKalunga otayi ka koka ngele ohatu konakona aluhe nokutedhatedha kudho. Ohole oyi li yimwe yomiiyimati yombepo yaKalunga. (Gal. 5:22) Onkee ano, otatu vulu okupula Jehova e tu pe ombepo ye ondjapuki opo tu vule okukala tu na uukwatya mboka wohole. (Luk. 11:13; 1 Joh. 5:14) Kutya nduno otwa mona elongo lyi thike peni, kutya nduno otu na owino yoshili yOohapu dhaKalunga yi thike peni, kutya nduno otu na omagano nenge ka tu na, otatu vulu okukala aalongi yOmbiimbeli aanekeka ngele otu na ohole.