Kokeka ohole ndjoka ihaayi hulu po
‘Ohole ohayi idhidhimikile ayihe. Ohole ihayi hulu po nando.’—1 KOR. 13:7, 8, OB-1954.
1. (a) Aantu olundji ohayu ulike ohole yini kunena? (b) Aantu oyendji oye hole unene shike kunena?
OPU na iinyolomwa oyindji mbyoka tayi popi kombinga yohole. Uukwatya mbuka owa kala nokusimanekwa nokwiimbwa momaimbilo. Omuntu kehe okwa pumbwa okukala e holike. Moongeshefa oto adha mo onyankanyanka yomambo noofilima ndhoka tadhi popi ohole yokambwenga. Ihe ohole yashili yokuhola Kalunga naantu ooyakwetu oya pumba lela. Shoka Ombiimbeli ya hunganeka shi na ko nasha nomasiku gahugunina otashi gwanithwa kunena. Aantu ‘oyi ihole, ye hole eliko noye hole olundundu pehala lyokuhola Kalunga.’—2 Tim. 3:1-5.
2. Ombiimbeli otayi londodha ngiini kombinga yohole ya goyoka?
2 Aantu oye na uukwatya mboka wokuulika ohole, ihe Oohapu dhaKalunga otadhi tu londodha tu henuke ohole ya goyoka. Ombiimbeli otayi shi popi kutya oshike hashi ningwa po ngele ohole ya tya ngaaka oya mene omidhi momutima gwomuntu. (1 Tim. 6:9, 10) Mbela oto dhimbulukwa shoka omuyapostoli Paulus a nyola kombinga yaDemas? Nonando okwa li omweendi pamwe naPaulus, Demas okwa li a hokwa iinima yuuyuni. (2 Tim. 4:10) Omuyapostoli Johannes okwa li a londodha Aakriste ya yande oshiponga shika. (Lesha 1 Johannes 2:15, 16.) Ito vulu okukala wu hole Kalunga niinima ye ngele owu hole iinima yopokathimbo noondjila dhuuyuni.
3. Otwa taalela eshongo lini, nomapulo geni tu na okwiipula?
3 Nonando otu li muuyuni mbuka, tse katu shi oshitopolwa shuuyuni. Onkee ano, otu na okuhenuka okutala ko ohole momukalo ngoka gwa penga, ngaashi uuyuni. Osha simanenena opo twaaha ye momwigo gwohole ya goyoka nenge ya pilikwa. Mbela oolye tu na okuulukila ohole yashili? Oshike tashi ke tu kwathela tu kokeke ohole ndjoka hayi idhidhimikile ayihe noihayi hulu po nando? Uuwanawa washike tatu ka mona ngashingeyi nomonakuyiwa ngele tatu kokeke ohole? Opo tu shi ninge nawa, otwa pumbwa etaloko lyaKalunga moshinima shika.
Kokeka ohole yokuhola Jehova
4. Ohole yokuhola Kalunga ohayi koko ngiini?
4 Okukokeka osha kwatela mo okwiilongekidha nokukwathela okukoka kwoshinima shontumba. Dhiladhila komunepya ngoka ha longo nuudhiginini mpoka e na okukuna oombuto dhe. Oha kala a tegelela oombuto dhi mene. (Heb. 6:7) Sha faathana, ohole yetu yokuhola Kalunga nayo oyi na okukoka. Oshike tashi ke yi kokeka? Otu na okulongekidha omitima dhetu ndhoka dhi li evi moka oombuto dhUukwaniilwa dha kunwa. Otatu vulu oku shi ninga mokukonakona neitulomo Oohapu dhaKalunga opo ontseyo yetu yoku mu hola yi koke. (Kol. 1:10) Okukala pokugongala pandjigilile nokukutha ombinga muko otashi ki indjipaleka ontseyo yetu. Mbela ohatu ningi oonkambadhala dha mana mo opo tu tseye iinima yomuule?—Omayel. 2:1-7.
5. (a) Ongiini tatu vulu okwiilonga omaukwatya gaJehova ga tongomana? (b) Oshike to vulu okutya kombinga yuuyuuki waKalunga, uunongo we noonkondo dhe?
5 Jehova okwa holola uukwatya we okupitila mOohapu dhe. Mokukonakona Omanyolo nokuninga ehumokomeho oku mu tseya, otatu ka kokeka olupandu lwetu okupandula omaukwatya ge ngaashi uuyuuki, oonkondo, uunongo nuunene tuu ohole ndjoka onene yi vule ayihe. Jehova ohu ulike uuyuuki miinima ye ayihe nomoompango dhe dha gwanenena. (Deut. 32:4; Eps. 19:7) Otatu vulu okudhiladhila kombinga yeshito alihe lyaJehova ndyoka tali holola uunongo we uukumithi. (Eps. 104:24) Eshito nalyo otali gandja euliko kutya Jehova oye Onzo yoonkondo oonenenene ndhoka dha kolelela.—Jes. 40:26.
6. Ongiini Kalunga e tu ulukila ohole ye, noshe ku guma ngiini?
6 Ongiini shi na ko nasha nohole ndjoka yi li uukwatya waKalunga wa tongomana? Okwe wu ulukila aantu ayehe kombanda yevi. Oku ulike ohole ye sho a gandja ekuliloyambo opo aantu ya vule okuhupithwa. (Lesha Aaroma 5:8.) Aantu ayehe kombanda yevi otaya vulu okumona uuwanawa mekulilo ndika, ihe oomboka owala tayi inyenge kohole yaKalunga nokukala neitaalo tali longo mOmwana. (Joh. 3:16, 36) Otu na okukala tu hole Kalunga, molwaashoka okwa gandja Jesus e tu kulile muulunde.
7, 8. (a) Opo tu ulike kutya otu hole Kalunga, otu na okuninga shike? (b) Aapiya yaKalunga ohaya dhiginine iipango ye nonando oye li moonkalo dha tya ngiini?
7 Ongiini natse tatu vulu okuulukila Kalunga ohole omolwuuwanawa auhe mboka e tu ningila? Oohapu dha nwethwa mo otadhi yamukula tadhi ti: “Ohole yokuhola Kalunga oyo okuvulika kiipango ye. Iipango ye kayi shi iidhigu kutse.” (1 Joh. 5:3) Ngele otu hole Jehova Kalunga shili, otashi ke tu inyengitha tu dhiginine iipango ye. Shika oshi li etompelo limwe molwaashoka hatu gandja uunzapo kombinga yedhina lye nUukwaniilwa we shoka tashi etele yalwe uuwanawa. Ngele otatu shi ningi nomutima aguhe, oshi li euliko kutya ohatu simaneke iipango yaKalunga neinyengotompelo lyu uka.—Mat. 12:34.
8 Aamwatate kongonga yevi otaya tsikile okudhiginina iipango yaKalunga, nonando aantu yamwe kaye na ko nasha nayo noinaya hala etumwalaka lyUukwaniilwa. Ohaya ningi lela oonkambadhala opo ya gwanithe po uukalele wawo. (2 Tim. 4:5) Sha faathana, natse otu na okulombwela yalwe kombinga yontseyo yaKalunga nokuvulika wo kiipango ye ayihe.
Omolwashike tu hole Omuwa gwetu Jesus Kristus?
9. Kristus okwi idhidhimikile shike, noshike she mu inyengitha e shi ninge?
9 Kakele owala kokukala tu hole Kalunga, otu na omatompelo ogendji okukala tu hole Omwana. Nonando inatu mona Jesus, ohole yetu yoku mu hola otayi koko sho tatu ilongo oshindji kombinga ye. (1 Pet. 1:8) Jesus okwa li i idhidhimikile shike? Sho a li ta gwanitha po ehalo lyaHe, Jesus okwa li e tondike nopwaahe na omatompelo gasha, okwa li a hepekwa nokulundilwa, okwa li u ulwa nayi. Okwa monithwa wo iihuna momikalo dhilwe. (Lesha Johannes 15:25.) Jesus okwa li i idhidhimikile omamakelo ngoka molwaashoka okwa li e hole He gwomegulu. Molwaashoka Jesus oku tu hole, eso lye olya ningi iikulila yoyendji.—Mat. 20:28.
10, 11. Otatu ka ninga shike omolwohole yaKristus?
10 Shoka Jesus a ningi otashi tu inyengitha opo natse tu ninge sha. Ngele tatu dhiladhila shoka e tu ningila, ohole yetu yoku mu hola ohayi koko. Tu li aalanduli ye, otu na okukokeka ohole ya fa ye noku yi ulika opo tu dhiginine elombwelo lye lyokugandja uunzapo kombinga yUukwaniilwa nokuninga aantu aalongwa ye.—Mat. 28:19, 20.
11 Omolwohole ndjoka Kristus u ulukile aantu ayehe, tse otu na okwiiyila mo tse yene opo tu mane oshilonga shetu omanga ehulilo inaali ya. (Lesha 2 Aakorinto 5:14, 15.) Ohole ndjoka Kristus u ulike oya kankamena kelalakano lyaKalunga li na ko nasha naantu. Kehe gumwe gwomutse ota vulu okukala e na ombinga melalakano ndyoka ngele ota landula oshiholelwa shoka Kristus e tu thigila. Shika osha kwatela mo tu kokeke lela ohole yaKalunga naanaa ngaashi tatu vulu. (Mat. 22:37) Otatu ku ulika kutya otu hole Jesus mokudhiginina elongo lye niipango ye notwa tokola toko okwaambidhidha uunamapangelo waKalunga, ngaashi Jesus a li e shi ningi.—Joh. 14:23, 24; 15:10.
Lalakanena ondjila ombwanawelela yohole
12. Paulus okwa li a hala okutya shike sho a popi “ondjila ombwanawelela”?
12 Omuyapostoli Paulus okwa li ha holele Kristus. Molwaashoka okwa li ha landula oshinkoti shaKristus thiluthilu, Paulus okwa li a lombwele aamwahe a manguluka kutya naye mu holele. (1 Kor. 11:1) Nonando okwa li a ladhipike Aakriste muKorinto ya kale nokukonga omagano gopambepo ngoka ga li ko methelemumvo lyotango, ngaashi okwaaludha nokupopya omalaka, Paulus okwa li e ya ladhipike ya lalakanene oshinima shilwe oshiwanawa. Okwa yelitha a ti: ‘Otandi mú ulukile natango ondjila ombwanawelela.’ (1 Kor. 12:31, OB-1954) Oovelise ndhoka dha landula ko otadhi ulike kutya ohole oyo ondjila ombwanawelela. Omeityo lini yi li ondjila ombwanawelela? Paulus okwa tsikile ko nokuulika shoka a li a hala okutya. (Lesha 1 Aakorinto 13:1-3.) Nonando oku kale e na uunkulungu wa dhenga mbanda nokulonga iilonga ya simana, ihe ke na ohole, kasha li tashi mu kwatha sha nando. Ombepo yaKalunga oya li ye mu kwathele a yelithe nawa oshinima shika sha simana. Oshinima shika okwe shi popi nuulaadhi opo natse tu shi uve ko kunena.
13. (a) Enyolo lyokomumvo lyomo 2010 olini? (b) Omeityo lini ohole ihayi hulu po nando?
13 Paulus ote tu yelithile natango kutya ohole oshike nokayi shi shike. (Lesha 1 Aakorinto 13:4-8.) Ngashingeyi, natu tale kutya ohole oya kwatela mo shike. Gandja unene eitulomo ketumbulo lyahugunina movelise 7 netumbulo lyotango movelise 8, ndyoka tali ti: ‘Ohole ohayi idhidhimikile ayihe. Ohole ihayi hulu po nando,’ shoka tashi ka kala oshipalanyolo shokomumvo shomo 2010. Ndhindhilika kutya movelise 8 Paulus okwa popi kutya omagano gombepo ngoka ga kwatela mo okuhunganeka nokupopya omalaka hoka kwa li haku longithwa momagongalo gopaKriste gwopetameko, otaga ka hula po. Ihe ohole itayi hulu po nando. Jehova oye ohole nota kala sigo aluhe. Onkee ano, ohole itayi hulu po nando. Otayi kala po sigo aluhe molwaashoka oyi li uukwatya waKalunga ketu ngoka omukwaaluhe.—1 Joh. 4:8.
Ohole ohayi idhidhimikile ayihe
14, 15. (a) Ongiini ohole tayi tu kwathele tu idhidhimikile omamakelo? (b) Omolwashike omumwatate gumwe omugundjuka a li a tindi okwiigandja?
14 Oshike hashi kwathele Aakriste yi idhidhimikile omamakelo, oonkalo oondhigu nomaudhigu ngoka hage ya adha? Ohole ndjoka ya kankamena komakotampango gaKalunga. Ohole ya tya ngaaka oya kwatela mo oshindji kaashi shi owala okugandja po iiniwe yetu. Ohayi tu ningitha wo tu kanyatele uudhiginini wetu nokukala twi ilongekidha okukanitha oomwenyo dhetu omolwaKristus. (Luk. 9:24, 25) Dhiladhila kombinga yiiholelwa yuudhiginini yOonzapo ndhoka dha li monithwa iihuna mookamba dhoonkwatwa nosho wo mookamba moka aantu haya longithwa nonyanya nomoondholongo pethimbo nokonima yIita iitiyali yUuyuni.
15 Omugundjuka gwedhina Wilhelm, Onzapo Omundowishi okwa yelitha nawa oshinima shika. Pehala lyokwiigandja, okwa kala omudhiginini sigo omeso lye sho a yahwa kaakwiita yaNazi. Okwa nyolele uukwanegumbo waandjawo ontumwafo manga inaa sa a ti: “Komeho gaayihe natu kale tu hole Kalunga, ngaashi omuwiliki gwetu Jesus Kristus e tu lombwela. Ngele otwe mu longele, ote ke tu pa ondjambi.” Konima yethimbo, oshilyo shuukwanegumbo wawo osha nyola mOshungolangelo tashi ti: “Nonando uukwanegumbo wetu owa li methimbo edhigu, otwa li twa ningi oonkambadhala opo tu pitithe komeho ohole yetu yokuhola Kalunga.” Aamwatate oyendji mboka ye li moondholongo kunena moArmenia, Eritrea, South Korea nomiilongo yilwe oye na iikala ya fa mbyoka. Aamwatate mboka oya kakatela ohole yawo yokuhola Jehova.
16. Aamwatate muMalawi oya li yi idhidhimikile shike?
16 Omamakelo gi ili nogi ili ohaga makele eitaalo nuudhiginini waamwatate poompito odhindji. Uule womimvo 26 Oonzapo dhaJehova muMalawi odha li dhi idhidhimike, nonando iilonga yadho oya li yi indikwa kepangelo nodha li dha patanekwa nokuhepekwa noonkondo. Shi alula oshi na ondjambi. Sho omahepeko ngoka ga tameke muMalawi, omwa li mu na Oonzapo 18 000 lwaampono. Ihe konima yomimvo 30, omwaalu ogwa londo sigo opo 38 393. Oshinima sha fa shoka osha ningwa wo miilongo yilwe.
17. Oshike sha taalela yamwe momaukwanegumbo ngoka ga topoka palongelokalunga, noshike hashi ya kwathele yi idhidhimike?
17 Oshi li oshinima oshidhigu uuna oshigwana shaKalunga. Ihe ohashi kala oshidhigu unene ngele Omukriste ta patanekwa kiilyo yuukwanegumbo. Iilyo yuukwanegumbo nenge aakwanezimo otashi vulika ye tu thiminike. Mbela Jesus ina hunganeka nale oshinima shoka? Okwe shi hunganeka, naamwatate oyendji oye shi ningilwa. (Mat. 10:35, 36) Aagundjuka yamwe oya kala nokwiidhidhimikila omapataneko okuza kaavali yawo mboka kaaye shi ooitaali. Yamwe oya tidhwa nokuli momagumbo kaavali yawo, ihe Oonzapo odha li dhe ya taamba ko nombili. Yalwe oya li ya tondwa. Oshike she ya kwathele yi idhidhimike? Kasha li owala ohole yawo yokuhola aamwahe, ihe osha li unene tuu molwaashoka ya li ye hole Jehova nOmwana.—1 Pet. 1:22; 1 Joh. 4:21.
18. Ongiini ohole ndjoka hayi idhidhimikile ayihe hayi kwathele aaihokani Aakriste?
18 Opu na oompito odhindji monkalamwenyo moka tu na okuulika ohole ndjoka hayi idhidhimikile ayihe. Ohole ohayi kwathele aaihokani ya simaneke oohapu dhaJesus ndhoka tadhi ti: “Shono Kalunga e shi tula kumwe, inashi kuthwa kumwe komuntu.” (Mat. 19:6) Uuna aaihokani Aakriste yi iyadha ‘muudhigu wonkalamwenyo,’ oye na okwiidhimbulukitha kutya Jehova oye ta dhana onkandangala mondjokana yawo. (1 Kor. 7:28) Oohapu dhe otadhi ti kutya ‘ohole ohayi idhidhimikile ayihe,’ nongele omusamane nomukulukadhi oye yi na, otaya ka kala nekwatathano ewanawa, nondjokana yawo otayi ka kalelela.—Kol. 3:14.
19. Aamwatate oya li ya ningi po shike sho aamwahe ya li ya dhengwa kiiponga yopaunshitwe?
19 Ohole ohayi tu kwathele tu idhidhimikile ayihe uuna pwa holoka iiponga yopaunshitwe. Shika osha li shi iwetikile sho ekakamo lyevi lya li lya dhenge oshitopolwa shi li muumbugantu waPeru nosho wo sho oshikungulu shombepo sha li sha hanagula po oshitopolwa shimwe mIilongohangano. Miiponga moka aamwatate oyendji oya li ya kanithile mo omagumbo niiniwe yawo. Ohole yuumwayinathana oya li yi inyengitha aamwatate yi iyambe okuza kooha nooha opo ya kwathele mokutungulula omagumbo nIinyanga yUukwaniilwa. Oshinima shoka oshu ulike kutya aamwatate oye holathane noye na ko nasha nooyakwawo, kutya nduno oye li monkalo ya tya ngiini.—Joh. 13:34, 35; 1 Pet. 2:17.
Ohole ihayi hulu po
20, 21. (a) Omolwashike ohole yi li uukwatya wa dhenga mbanda unene? (b) Omolwashike wa tokola toko okulandula ondjila yohole?
20 Aapiya yaJehova kunena ohaya lalakanene okuulukilathana ohole ndjoka yi li ondjila ombwanawelela. Odhoshili kutya ohole oyo uukwatya wa dhenga mbanda moonkalo adhihe. Tala nkene omuyapostoli Paulus a tsu omuthindo uushili woshinima shoka. Tango okwa popi kutya omagano gopambepo otaga ka hula po nonokutya egongalo lyopaKriste otali ka koka nokuhuma komeho. Opo nduno okwa hulitha a ti: “Ihe ngashingeyi otaku kala mbika itatu: eitaalo, etegameno nohole, ihe oshinima oshinene kwaayihe mbika osho ohole.”—1 Kor. 13:13.
21 Lwahugunina, iinima mbyoka twi itaala muyo otayi ka gwanithwa neitaalo lyetu muyo otali ka hula po. Konima ngele iinima ayihe ya ningi iipe, itatu ka kala we twa pumbwa okumona omauvaneko ngoka twa li twa tegamena. Ihe ongiini kombinga yohole? Itayi ka hula po nando. Otayi ka kalelela. Ngele otatu kaleke etegameno lyomwenyo gwaaluhe momadhiladhilo, otatu ka mona shili ohole yaKalunga noku yi uva ko nawa. Otatu ka kala nomwenyo gwaaluhe ngele otatu longo ehalo lyaKalunga nokulalakanena ondjila ombwanawelela yohole ndjoka ihaayi hulu po nando.—1 Joh. 2:17.
Oto yamukula ngiini?
• Omolwashike tu na okuhenuka ohole ya goyoka?
• Ohole otayi vulu oku tu kwathela tu idhidhimikile shike?
• Omeityo lini ohole ihayi hulu po nando?
[Oohapu dha simana pepandja 27]
Enyolo lyomumvo 2010 otali ka kala: ‘Ohole ohayi idhidhimikile ayihe. Ohole ihayi hulu po nando.’—1 Kor. 13:7, 8, OB-1954.
[Ethano pepandja 26]
Ohole ihaayi hulu po oya li ya kwathele aamwatate muMalawi yi idhidhimikile omamakelo