Eshito otali holola oshinge shaKalunga (The Wonders of Creation Reveal God’s Glory)
Aantu oyendji ohaya nyanyukilwa okutala eshito. Ihe aashona yowala haya mono kutya sho taye shi ningi ohashi ya ulukile oshindji kombinga yomadhiladhilo nomaiyuvo gOmushiti gwetu omunenenene. (Rom. 1:20) Nalenale, David okwa li i ilongo kombinga yaJehova okupitila mOohapu Dhe dha nwethwa mo. Ihe okwa li wo e mu ‘mono’ okupitila meshito nokwa li a hedha popepi naye. (Eps. 8:3, 4) Okavidio kedhina The Wonders of Creation Reveal God’s Glory otake tu kwathele atuhe naanona yetu nosho wo aakonakonimbiimbeli yetu, tu tale nokukonenena iinima yimwe yomeshito lyaJehova notu mone uukwatya wOmushiti gwetu omunenenene, shoka tashi ke tu ningitha tu hedhe lela popepi naye. Konima ngele we ka tala, tala ngele oto vulu okuyamukula omapulo ngaka taga landula mpaka.
(1) Ongiini uunene wewangandjo nosho wo nkene lyu unganekwa hashi tu ningitha tu kale tu na olupandu lwaashono Jehova e tu ningila? (Jes. 40:26) (2) Oshike tatu vulu okwiilonga kombinga yaaNgoka a shita omeya ngele tatu ga konenene? (Eh. 14:7) (3) Uunongo waJehova otawu imonikila ngiini ngele tatu tala kuunene wevi nosho wo koshinano shoka shi li pokati kevi netango? (4) Omwedhi ogu na oshilonga shashike? (Eps. 89:37) (5) Jehova okwa shita ngiini aantu opo ya vule okunyanyukilwa onkalamwenyo? (6) O-DNA oshike? (Eps. 139:16) (7) Ongiini aantu ya yooloka ko keshito alihe lyaJehova lyokombanda yevi? (Gen. 1:26) (8) Oshike wa halelela oku ka ninga muuyuni uupe?
Iinima yilwe (Extra Features): (9) Omalwaala ohaga holoka po ngiini? (10) Ongiini omeya haga vulu okwaadha kondungu yomuti nonando opu na oonkondo ndhoka hadhi nanene iinima pevi? (11) Omeya oge na mo oshilonga shashike momalutu getu? (12) Gandja iiholelwa yankene pu na ekwatathano pokati kiinima mbyoka yi na omwenyo. (13) Iishitwa oyi ilongo peni okukala hayi longele kumwe niikwawo? (14) “O-golden angle” oshike nongiini yi iwetikile meshito?
“Taleni” nawa keshito lyaJehova: Jesus okwe tu ladhipika tu ‘tale koondhila dhokegulu’ “nokundhindhilika oongala dhokelundu.” (Mat. 6:26, 28) Okuninga ngaaka otaku vulu okukoleka eitaalo lyetu, oku tu ningitha tu kale tu na einekelo mOmushiti gwetu Jehova noku tu kwathela wo tu kale tu na olupandu omolwuunongo we, omolwoonkondo dhe dhokuhupitha aantu ye nomolwohole ye. Pehala lyokupiyaganekwa unene kiinima yomuuyuni mbuka, kutha ethimbo nokuninga oonkambadhala opo wu tale keshito lyaJehova nokukonakona shoka tali tu hololele kombinga yaKalunga ketu. — Eps. 19:1.