Uumaliwa uyali wu thike pokapeni kamwe

Omukalo gumwe gwa simana moka tatu ambidhidha iilonga yokuuvitha Uukwaniilwa muuyuni auhe, ogwo okugandja omayambidhidho gopashimaliwa. Ihe ongiini ngele otu na iiyemo iishona?

Oshikando shimwe Jesus okwa li a mona omuselekadhi ohepele ta tula uumaliwa uyali wu thike pokapeni kamwe moshiketha shiimaliwa shomotempeli. Nonando ‘okwa li a hepa, okwa tula mo ashihe shoka a li e shi na, iipalutha ye ayihe,’ molwaashoka okwa li e hole Jehova. (Mark. 12:41-44) Jesus okwa li a mono kutya uumaliwa mboka a tula mo owu na ongushu onene momeho gaKalunga. Sha faathana, Aakriste yomethelemumvo lyotango kaya li ya tala ko okuyambidhidha uukalele pashimaliwa ku li owala uuthembahenda wAakriste mboka aayamba. Omuyapostoli Paulus okwa li a popi oshiholelwa shAamakedonia mboka ‘nonando oya li ye na oluhepo olunene yi indile noya pula, ya pewe ompito yokukwatha.’​—2 Kor. 8:1-4.

Onkee ano, ngele otatu vulu okwaambidhidha owala ‘uumaliwa uyali wu thike pokapeni kamwe,’ natu dhimbulukwe kutya omayambidhidho ngoka omashona ngele oga tulwa kumwe otaga ka ninga ogendji. Ohashi nyanyudha Tate yetu gwomegulu ngoka e hole okugandja uuna tatu gandja tashi zi komutima, molwaashoka “Kalunga oku hole ngoka ta gandja nenyanyu.”​—2 Kor. 9:7.