Okavidio kedhina Jehovah’s Witnesses—Faith in Action, Part 2: Let the Light Shine

Konima sho omumwatate Rutherford nooyakwawo ya egululwa mo mondholongo mo-1919, iilonga oyindji oya li ya tegelela Aakonakoni yOmbiimbeli. Ngaashi shu ulikwa mokavidio kedhina Jehovah’s Witnesses — Faith in Action, Part 2: Let the Light Shine, Aakonakoni yOmbiimbeli oya li taya ka kala ye na aapataneki oyendji, ontseyo yawo yOmbiimbeli oya li tayi ka tsikila okwiindjipala, neitaalo lyawo olya li tali ka dhindwa. (Omayel. 4:18; Mal. 3:1-3; Joh. 15:20) Ngele wa tala okavidio, yamukula omapulo ngaka taga landula.

(1) Aakonakoni yOmbiimbeli oya li ya longitha omukalo guni opo ya taandeleke onkundana ombwanawa? (2) Oshike sha li sha tseyithwa poshigongi shi ikalekelwa shomo-1931 noshomo-1935? (3) Uuyelele wuni wa simana wa li wa piti mOshungolangelo yOshiingilisa ye 1 Novomba 1939? (4) Hokolola shoka sha li sha ningwa po-Madison Square Garden sho omumwatate Rutherford a li ta gandja oshipopiwa shoshipalanyolo “Epangelo nombili.” (5) Omolwashike oshipopiwa shomumwatate Knorr shoka shi na oshipalanyolo, “Mbela ombili otayi vulu ngaa okukalelela?” sha li oshindhindhilikwedhi? (6) Momumvo 1942 Oonzapo dhaJehova odha li dha ningi omalongekidho geni opo dhi tamunune mo iilonga yadho yokuuvitha? (7) Popya kutya iipotha yini ya li ya kondjelwa mompangu yaAmerika, yaCanada, nosho wo muyaGreka. (8) Osikola yaGilead oya kwathela ngiini mokuhumitha komeho iilonga yokuuvitha? (9) Iilonga ya simana yini ya tamekele mo-1946, nomolwashike ya li ya tamekwa? (10) Oonkatu dhini Oonzapo dhaJehova dha li dha katuka opo dhi shilipaleke kutya eihumbato lyadho oli li metsokumwe nomithikampango dhOmbiimbeli? (11) Yelitha omalunduluko gamwe ngoka ga li ga ningwa momimvo dho-1970 nasha opo ehangano li kale tali endele pamwe naashoka Ombiimbeli tayi ti. (12) Ongiini okavidio haka ke ku kwathela wu kale wu na olupandu lwomuule kutya Jehova ota wilike thiluthilu ehangano lye nosho wo kutya ndika ehangano lye mwene shili? (13) Ongiini okavidio ke ku kwathela wu kale wa tokola toko okuuvitha nuulaadhi nonando opu na iiyimbi? (14) Ongiini tatu vulu okulongitha okavidio haka tu kwathele aakwanezimo, aakonakonimbiimbeli nosho wo yalwe?

Esiku kehe tali piti po ohali gwedha ko kondjokonona yOonzapo dhaJehova. Mbela ondjokonona ndjoka otayi ka ulika shike kombinga yoonkambadhala dhetu ndhoka hatu ningi muukalele? Ngaashi naanaa aamwatate ya li ya ningi monakuziwa, natse natu longe nuulaadhi opo ‘uuyelele wu tsikile okuminikila.’— 2 Kor. 4:6.