Okavidio kedhina Jehovah’s Witnesses — Organized to Share the Good News

Uule womimvo dha konda 100, Oonzapo dhaJehova odha kala tadhi uvitha onkundana ombwanawa momukalo gu unganekwa nawa. Onkundana ndjoka otayi uvithwa momalaka omathele nosho wo miilongo yi vulithe 230, shoka shi li oshikonga oshinenenene muuyuni inaashi monika nando onale. (Mat. 24:14) Omolwashike onkundana yi na okuuvithwa? Otayi uvithwa shi thike peni muuyuni? Okavidio kedhina Jehovah’s Witnesses — Organized to Share the Good News otaka yamukula omapulo ngoka notaka gandja uuyelele owundji nkene onkundana ombwanawa tayi uvithwa muuyuni. Konima yoku ka tala, gandja eitulomo komapulo taga landula.

Okavidio hoka oke ku kwathela ngiini wu uve ko nawa nowu kale nolupandu lu na ko nasha (1) noonkambadhala ndhoka ehangano lyaJehova hali ningi mokuuvitha onkundana ombwanawa? (2 Tim. 4:2) (2) nomaukwanegumbo gaBetel muuyuni? (3) nedheulo ndyoka hali pewa aatumwa nosho wo aatonateli? (2 Tim. 2:2) (4) nesimano lyokulesha enyolo lyesiku ongulonene yesiku kehe nokwiilongekidhila okugongala akuhe moshiwike kehe? (Iil. 17:11) (5) nuuwanawa mboka hatu mono mokugongalo kwopaKriste kehe? (Heb. 10:24, 25) (6) nomayambeko ngoka tatu ka mona sho evi tali ka ninga Oparadisa? (Jes. 11:9) (7) nuuthembahenda mboka tu na wokukutha ombinga miilonga yeteyo mbyoka tayi tsikile? — Joh. 4:35.

Okavidio haka oke li oshilongitho sha dhenga mbanda shoka tatu vulu okulongitha tu ulukile aantu mboka ye na ohokwe nkene iilonga yOonzapo dhaJehova muuyuni auhe tayi ende. (8) Uunake shi li nawa okuka ulukila aakonakonimbiimbeli yetu, aapambele yetu nosho wo aantu yalwe? (9) Ngele owe ka ulukila gumwe, okwa li i inyenge ngiini?

Sho tatu tala kwaashoka Jehova a pondola po, otashi tu inyengitha tu tse kumwe noohapu dhomupisalomi ndhoka tadhi ti: “Owe tu ningile iinima oyindji, OMUWA, Kalunga ketu; kaku na gumwe e ku fa!” (Eps. 40:5) Onkee ano, natu longitheni okavidio haka tu kwathele yalwe ya kokeke olupandu lwawo okupandula Jehova nosho wo ehangano lye.