Oshikonga oshinenenene shoka inaashi ningwa nando onale muuyuni!
Uule womimvo dha konda pe-100, Oonzapo dhaJehova odha kala dhu unganekwa dhi uvithe onkundana ombwanawa. (1 Kor. 9:23) Ohatu lombwele yalwe etumwalaka ndika momalaka omathele naashika osha ninga oshikonga oshinenenene shokuuvitha shoka inaashi ningwa nale muuyuni. Ohashi ningwa miilongo yi vulithe po-230 lwaampo. (Mat. 24:14) Ihe mbela omolwashike iilonga mbika ya pumbwa okulongwa? Notayi longwa ngiini muuyuni awuhe?
Okavidio kedhina Oonzapo dhaJehova ohadhi uvitha onkundana ombwanawa muuyuni awuhe otaka yamukula omapulo ngoka mokugandja uuyelele owundji kombinga yiilonga yetu mbyoka hayi longwa muuyuni awuhe. Sho to ka tala, gandja eitulomo komapulo taga landula: (1) Iilonga yetu oyu unganekwa ngiini nohayi wilikwa koolye? (2) Ongiini Oshikondo shOkunyola, shIilonga yOkutoloka, shOkuthaneka nosho wo Oshikondo shIikwamawi nUuvidio hayi ambidhidha mokutaandelitha onkundana ombwanawa? (3) Elalakano lyokupilinta iileshomwa oyindji noku yi tuma olyashike? (Joh. 17:3) (4) Iileshomwa yi thike peni hayi pilintwa omumvo kehe? (5) Iileshomwa yetu yi ikolelela kOmbiimbeli oya gwanitha po shike? (Heb. 4:12) (6) Oshike sha ningwa po, opo mboka ihaaya mono ko nenge ihaaya uvu ko ya kwathelwe pambepo? (7) Iilonga yetu ohayi ambidhidhwa ngiini pashimaliwa? (8) Ongiini hatu mono uuwanawa mOshikondo shOmauyelele shOkukwatathana nIipangelo, mOshikondo shIilonga nosho wo mOshikondo shIigongi? (9) Wu li gumwe gwomOonzapo dhaJehova, ongiini okavidio ke ku kwathela wu kale wu na olupandu (a) lwoonkambadhala ndhoka ehangano lyaJehova tali ningi mokuuvitha onkundana ombwanawa? (b) lwomaukwanegumbo gaBetel ge vulithe pe-100 muuyuni awuhe? (c) lwelongo ndyoka hali pewa aatonateli naatumwa? (d) lwesimano lyokutameka esiku kehe nenyolo lyOmbiimbeli nosho wo okwiilongekidhila okugongala kehe kwegongalo oshiwike kehe? (e) lwuuwanawa wokukala pokugongala kwetu kehe kwopaKriste? (f) lwaashoka oParadisa tayi ke tu etela kombanda yevi? (Jes. 11:9) (g) lwokukutha ombinga paumwene miilonga yeteyo mbyoka tayi pula komeho? — Joh. 4:35.
Aapambele yoye, aashiwikile, omaishunoko goye, naakonakonimbiimbeli yoye, ohayi inyenge momukalo guni omwaanawa uuna we ya ulukile okavidio haka? Omolwashike itoo ka ulukile yalwe nokulombwela yalwe onkundana ombwanawa nziya? — Mat. 28:19, 20.