Osikola yokudheula Aauvithi yomo 2015 otayi tu kwathele tu hwepopaleke omukalo gwetu gwokulonga aantu

¹ Omupisalomi David okwa nyola a ti: “Omuwa, omugameni nomuhupithi gwandje, taamba oohapu nomadhiladhilo gandje!” (Eps. 19:14) Otwa hala shoka tatu popi shi kale tashi nyanyudha Jehova, molwaashoka otwa lenga uuthembahenda wetu wokupopya oshili megongalo nomuukalele. Osikola yOkudheula Aauvithi oyo yimwe yomomikalo ndhoka Jehova he tu dheulile uukalele. Edheulo ndika ohali gandjwa oshiwike kehe momagongalo ge vulithe po 111 000 muuyuni awuhe. Olya kwathela aamwatate naamwameme muuyuni awuhe ya za momaputuko gi ili nogi ili ya kale ya dheuka nawa ye li aakalele yonkunduna ombwanawa. Ngashingeyi ohaya vulu okulonga aantu momukalo ngoka tagu tompo, nuukeka, nonuulaadhi. — Iil. 19:8; Kol. 4:6.

² Elandulathano lyosikola yomo 2015 olya kwatela mo iipalanyolo mbyoka yi li mokambo “Tseya shoka shi li mOohapu dhaKalunga” nosho wo okuza mokambo “Onkundana ombwanawa ya za kuKalunga.” Shimwe ishewe, ethimbo lyElesho lyOmbiimbeli nosho wo lyoshipopiwa sho-1 olya lunduluka. Omalunduluko ngoka pamwe nomalombwelo nkene iitopolwa mosikola yi na okuningwa otaga kundathanwa muutendo tawu landula.

³ Elesho lyOmbiimbeli: Omumwatate ngoka ta ningi oshitopolwa shika oku na okulongitha ominute mbali, opo a tse omuthindo oshitsa shimwe tashi hokitha okuza mElesho lyOmbiimbeli lyoshiwike shoka. Ngele okwi ilongekidha nawa otashi ke mu kwathela a gandje oshitsa shoka sha simana kegongalo meni lyethimbo ndyoka lya gandjwa. Konima yaashono, egongalo otali ka longitha ominute hamano ngaashi shito li gandje omatyokosha galyo muule woosekonde 30, nenge oonshona kombinga yaashoka yi ilonga mElesho lyOmbiimbeli. Opo gumwe a gandje etyokosha tali ti sha muule woosekonde 30, oku na okwiilongekidha nawa nokukala e na eipangelo. Uuna tatu shi ningi oshi li edheulo ewanawa kutse. Ohashi pe wo yalwe ompito ya gandje omatyokosha gawo gaashoka yi ilonga mo nosho wo gomapekapeko ngoka ya ninga.

⁴ Oshipopiwa sho-1: Ethimbo lyoshipopiwa shokulesha olya shunithwa pevi. Otashi ka ningwa meni lyominute ndatu notashi ka kala sha kankamena owala koovelise oonshona dhowala. Mboka haya pewa oshipopiwa shoka oye na okwiiyenditha po iikando yontumba mokulesha pombanda nokugandja eitulomo nkene ye na okulesha iitya nawa noya yela, opo ya ka leshe momukalo gu uvitike. Aapiya ayehe yaJehova oya pumbwa okukambadhala ya kale haya lesha nawa, molwaashoka okulesha ohaku dhana onkandangala ya simana melongelokalunga lyetu. Inatu nyanyukwa tuu sho aanona yetu oyendji haya lesha nawa. Natu pupule aavali kombunda sho haya ningi oonkambadhala ya mana mo ya kwathele oyana ya kale haya lesha nawa.

⁵ Oshipopiwa oshi-2: Otashi ka kala shi na ominute ntano notashi ka gandjwa kaamwameme. Naya longithe oshipalanyolo shoka ya pewa. Ngele oshipopiwa osha za mokambo Tseya shoka shi li mOohapu dhaKalunga, nashi gandjwe momukalo moka omuntu a fa e li momapya ngaashi hashi ningwa moshitopolwa moka egongalo lyeni hali longo. Ngele oshipopiwa osha za mokambo Onkundana ombwanawa ya za kuKalunga, omunasikola na longithe omanyolo ngoka taga opalele nokuulika shoka tatu ilongo moovelise ndhoka. Omunasikola ota vulu wo okulongitha omanyolo galwe ngoka ga pamba oshipopiwa she. Omutonateli gwosikola oye ha hogolola gumwe ngoka ta ka kwathela omugandji gwoshipopiwa.

⁶ Oshipopiwa oshi-3: Otashi ka kala shi na ominute ntano notashi ka gandjwa komumwatate nenge komumwameme. Ngele osha pewa omumwameme, oku na oku shi gandja a fa ta gandja oshipopiwa oshi-2. Ngele omumwatate okwa pewa oshipopiwa shi ikolelela kokambo Tseya shoka shi li mOohapu dhaKalunga, oshipopiwa ne shi gandje e na aapulakeni momadhiladhilalo. Omunasikola nakundathane oshipalanyolo shoka a pewa. Ye na hogolole Omanyolo tago opalele ngoka ta ka longitha. Na popye wo shoka tatu ilongo mo moshipopiwa shoka.

⁷ Omukalo omupe gwokugandja oshipopiwa oshi-3, uuna sha pewa omumwatate: Ngele omumwatate okwa pewa oshipopiwa shi ikolelela kokambo Tseya shoka shi li mOohapu dhaKalunga, oshipopiwa ne shi gandje a fa ta konakona naanegumbo lye nenge ta longo omuntu muukalele. Olundji omutonateli gwosikola oye he mu pe ngoka te ke mu kwathela nosho wo kutya ote ke shi gandja momukalo guni. Ngoka te ke mu kwathela na kale oshilyo shuukwanegumbo waandjawo nenge omumwatate megongalo. Omunasikola ota vulu okulongitha oovelise dhilwe ndhoka tadhi tsu omuthindo omakotampango gOmbiimbeli ngoka ga pambathana noshipopiwa. Omathimbo nomathimbo oshipopiwa shika ohashi pewa omukuluntugongalo oye e shi gandje. Omukuluntugongalo ota vulu okuhogolola omunegumbo ye mwene nenge omukalo moka te ke shi ninga. Okumona nkene aakuluntugongalo tayu ulike uunkulungu wawo wokulonga noshilyo shuukwanegumbo wawo nenge nomumwatate gulwe otashi ka ladhipika lela egongalo.

⁸ Okugandja omayele: Omutonateli gwosikola ota ka longitha ominute mbali a pandule omunasikola kehe noku mu pa omayele tago opalele, taga zi membo Mona ouwa mOfikola yOukalele woPauteokratika. Uuna omutonateli gwosikola ti ithana komeho omunasikola a gandje oshipopiwa she, ke na okutseyitha kutya omunasikola ota ka longela koshitsa shini. Konima yoshipopiwa kehe omutonateli oku na okupandula omunasikola tashi zi komutima, na popye kutya omunasikola okwa li ta longele koshitsa shini. Na popye kondandalunde kutya omolwashike omunasikola a ninga nawa moshitsa shoka, nenge a yelithe kutya omolwashike shi li nawa a longele ko ishewe.

⁹ Omayele ngoka haga pewa aanasikola otaga adhika pepandja 79 sigo 81 membo Ofikola yOukalele. Ngele omunasikola a mana oshipopiwa she, omutonateli gwosikola ota ka gandja omayele tago opalele kombinga yoshitsa shoka omunasikola a longela kusho. Ote ke mu pula paumwene ngele okwi iyenditha po pomayele ga pamba oshitsa shoka. Omunasikola ota vulu okupandulwa nokupewa omayele ga gwedhwa po ngoka tage mu kwathele konima yokugongala nenge pompito yimwe yi ili. Omayele gopaumwene ngoka omunasikola kehe ta pewa ne ga tale ko ge li ekwatho kuye a hume komeho pambepo. — 1 Tim. 4:15.

¹⁰ Ngele omunasikola ota pitililitha ethimbo, omutonateli gwosikola nenge ngoka ta kwathele oku na okukala i ilongekidha oku mu ulukila kutya ethimbo olya pwa ko. Ota vulu okudhenga okangendjo nenge okatenda kasha, opo e shi ulike. Uuna omunasikola e shi mono na hulithe etumbulo lye e ta zi ko komutune. — Tala embo Ofikola yOukalele, ep. 282, okat. 4.

¹¹ Ayehe mboka ya gwanitha po iitegelelwa otaya ladhipikwa yi inyolithe mOsikola yOkudheula Aauvithi. (Tala embo Ofikola yOukalele, ep. 282, okat. 6.) Elongo ndyoka hali gandjwa mosikola ndjika olya kwathela aapiya yaJehova ya kale hayu uvitha nokulonga aantu onkundana ombwanawa yUukwaniilwa ye na uushili, esimaneko nota ye shi ningi nohole. Jehova okwa nyanyukwa shili sho ta tangwa nokusimanekwa kwaayehe mboka taya mono uuwanawa owundji melongo ndika lyopakalunga. — Eps. 148:12, 13; Jes. 50:4.