Yandja elitulemo ‘kounghulungu woye wokuhonga’
‘Udifa ondjovo, hanyena, vela eembedi, kumaida monheni nomounghulungu wokuhonga.’ — 2 TIM. 4:2, yelekanifa NW.
1. Jesus okwa pa ovahongwa vaye oshilonga shilipi, nokwa tula po oshihopaenenwa shilipi?
NONANDE Jesus okwa li a longa oikumwifilonga yokuvelula pefimbo loukalele waye kombada yedu, ka li a shiivika unene e li omuveluli ile omulongi woikumwifilonga, ndele okwa li a shiivika e li omuhongi. (Mark. 12:19; 13:1) Jesus okwa li a pitifa komesho okuudifa onghundana iwa yOuhamba waKalunga, novashikuli vaye osho hava ningi ngaho kunena. Jesus okwa pa Ovakriste oshilonga shokuninga ovanhu ovahongwa noku va honga okudiinina oinima aishe oyo e va lombwela. — Mat. 28:19, 20.
2. Otwa pumbwa okuninga shike opo tu wanife po oshilonga shetu shokuudifa?
2 Opo tu wanife po oshilonga shetu shokuninga ovanhu ovahongwa, otu na alushe okukendabala okuxwepopaleka ounghulungu wetu wokuhonga. Omuyapostoli Paulus okwa li a divilika kutya osha fimana okukala nounghulungu wokuhonga eshi a li a shangela Timoteus, omuudifi pamwe naye. Paulus okwa ti: “Lipashukila ove mwene nenongeko loye; dama mulo! Osheshi ngenge to shi ningi, oto lixupifa ove mwene naava tave ku pwilikine.” (1 Tim. 4:16) Enongeko ile ehongo olo Paulus a li ta popi kali fi ashike okupa vamwe eshiivo. Ovaudifi Ovakriste ovo hava pondola ohava findile oshili yOmbibeli momitima dovanhu nohave va ladipike va ninge omalunduluko monghalamwenyo yavo. Kungaho, otava ulike kutya ove na ounghulungu wokuhonga. Ndele ongahelipi hatu dulu okukulika ‘ounghulungu wokuhonga’ ngeenge hatu udifile vamwe onghundana iwa yOuhamba waKalunga? — 2 Tim. 4:2, NW.
Kulika ‘ounghulungu wokuhonga’
3, 4. (a) Ongahelipi hatu dulu okukulika ‘ounghulungu wokuhonga’? (b) Ofikola yOukalele woPauteokratika ohai tu kwafele ngahelipi tu kale ovahongi hava pondola?
3 Emboitya limwe ola fatulula oshitya “ounghulungu” u li “owino oo hau di mokulihonga, mokutula moilonga ile mokutala.” Otwa pumbwa okuyandja elitulemo koinima aishe oyo itatu opo tu kale ovaudifi vonghundana iwa hava pondola. Ohatu dulu ashike okumona eudeko li li mondjila loikundafanwa yetu mokukonakona pamwe neilikano. (Lesha Epsalme 119:27, 34.) Okukala hatu tale eshi ovakalele ovo hava pondola nghee tava hongo, otashi tu kwafele tu lihonge keenghedi davo dokuhonga noku va hopaenena. Okuninga eenghendabala efimbo keshe tu tule moilonga osho hatu lihongo, otashi ka xwepopaleka ounghulungu wetu. — Luk. 6:40; 1 Tim. 4:13-15.
4 Jehova oye Omuhongi wetu Munenenene. Oha pe ovapiya vaye vokombada yedu ewiliko li na sha nanghee tava dulu okuwanifa po oshilonga shavo shokuudifa okupitila moshitukulwa shehangano laye shokombada yedu. (Jes. 30:20, 21, NW) Opo osho shi ningwe, eongalo keshe ohali kala li na elandulafano lokwoongala kwOfikola yOukalele woPauteokratika oshivike keshe, oyo ya nuninwa okukwafela aveshe ovo hava kufa ombinga muyo va kale ovaudifi vOuhamba waKalunga hava pondola. Ofikola oyo oye likolelela kOmbibeli. Eendjovo daJehova da nwefwa mo otadi tu hongo osho tu na okuhonga vamwe. Kakele kaasho, otadi tu hongo eenghedi dokuhonga odo hadi pondola notadi wapalele. Ofikola yOukalele woPauteokratika ohai tu dimbulukifa alushe kutya ohatu dulu okukala ovahongi ovanekeka ngeenge otwa kala hatu hongo ovanhu omahongo e likolelela kEendjovo daKalunga. Ohai tu hongo yo nghee hatu dulu okulongifa omapulo taa pondola, okuhonga monghedi i li paunafangwa nosho yo okukala tu na ko nasha shili novanhu vakwetu. Natu ka konakoneni oitwa oyo kooshimwe. Ohatu ka kundafana yo nghee hatu dulu okuhanga omitima dovakonakoni.
Ehongo loye nali kale le likolelela kEendjovo daKalunga
5. Ehongo letu oli na okukala le likolelela kushike, nomolwashike?
5 Jesus, omuhongi munenenene oo e dule ovanhu aveshe, okwa li ha hongo omahongo e likolelela kOmishangwa. (Mat. 21:13; Joh. 6:45; 8:17) Ka li ha popi omadiladilo aye mwene, ndele okwa li ha hongo osho Xe oo a li e mu tuma kombada yedu e mu lombwela. (Joh. 7:16-18) Nafye otu na okuhopaenena Jesus moshinima osho. Osho hatu popi moukalele wetu weumbo neumbo ile pomakonakonombibeli oshi na okukala she likolelela kEendjovo daKalunga. (2 Tim. 3:16, 17) Nonande otu kale hatu tomhafana pandunge shi fike peni, itatu dulu okupondola tu dule Omishangwa da nwefwa mo, molwaashi omishangwa dOmbibeli odi na eenghono. Ngeenge ohatu kendabala okukwafela omukonakoni a ude ko oshinima shonhumba, osha fimana oku mu ulikila osho Omishangwa tadi ti shi na sha nasho. — Lesha Ovaheberi 4:12.
6. Omukriste oku na okuninga po shike opo a mone kutya omukonakonimbibeli oku udite ko nawa ouyelele oo tava konakona?
6 Okulongifa Ombibeli moukalele inashi hala okutya Omukriste ina pumbwa okulilongekidila ekonakonombibeli. Mepingafano naasho, Omukriste oku na okulilongekida nawa komesho yefimbo opo a tokole kutya omishangwa dilipi domwaado inadi tofwa mo tava ka lesha mOmbibeli pamwe nomukonakoni pefimbo lekonakono. Luhapu oshiwa okulesha omishangwa odo tadi yambidida osho twa itavela. Osha pumbiwa yo okukwafela omukonakoni a ude ko nawa eityo lomishangwa odo tamu lesha. — 1 Kor. 14:8, 9.
Kala ho pula omapulo taa pondola
7. Omolwashike okulongifa omapulo mokuhonga vamwe haku pondola?
7 Okulongifa nawa omapulo ohaku kwafele omukonakoni a diladile nohaku kwafele omuudifi a hange omutima womukonakoni. Onghee hano, ponhele yokuyelifila omukonakoni woye omishangwa, mu pula oye a yelife. Omafimbo amwe, owa pumbwa oku mu pula epulo la wedwa po ile omapulo mahapu nokuli opo u mu kwafele a fike pexulifodiladilo li li mondjila. Ngeenge to longifa omapulo opo u honge omukonakoni, oto mu kwafele a ude ko kutya omolwashike pa fikwa pexulifodiladilo lonhumba noku kale yo a itavela pauhandimwe kutya osho shi li ngaho. — Mat. 17:24-26; Luk. 10:36, 37.
8. Ongahelipi hatu dulu okumona mo osho omukonakoni ta diladila?
8 Oishangomwa yetu ohai longifa onghedi yokukonakona oyo ya kwatela mo omapulo nomanyamukulo. Nopehe na omalimbililo, ovanhu vahapu ovo to ka konakona navo Ombibeli otava ka dula okunyamukula diva omapulo oo e li moshishangomwa, tava longifa ouyelele oo u li moutendo. Ndele nande ongaho, omuudifi oo e na eendunge dokuyoolola ita ka kala ashike a wanenwa komanyamukulo e li mondjila oo omukonakoni ta yandje. Pashihopaenenwa, omukonakoni otashi dulika a nyamukule mondjila shi na sha naasho Ombibeli tai ti kombinga yoluhaelo. (1 Kor. 6:18) Ndele okupula omukonakoni nelungi omapulo oo haa ningifa ovanhu va popye omataleko avo otashi dulu okuulika kutya ota diladila naanaa shike kombinga yaasho te lihongo. Onghee hano, omuudifi ota dulu okupula omukonakoni kutya: “Omolwashike Ombibeli ya tokola omilele kondje yohombo? Oto ti ngahelipi shi na sha noshipango osho sha yandjwa kuKalunga? Mbela omunhu ota dulu ngoo okumona ouwa washa ngeenge okwa dulika komifikamhango daKalunga dopaenghedi?” Omanyamukulo omukonakoni komapulo oo otaa dulu okuholola kutya ota diladila shike. — Lesha Mateus 16:13-17.
Longifa ouyelele u li paunafangwa
9. Oshike tu na okukaleka momadiladilo ngeenge hatu hongo vamwe ouyelele wopamishangwa?
9 Konyala oshili oyo i li mEendjovo daKalunga oya popiwa monghedi i li paunafangwa. Ndele otashi dulika ovanhu ovo hatu konakona navo Ombibeli va ngwangwanekwa komahongo omalongelokalunga oipupulu. Ndelenee tu li ovahongi vEendjovo daKalunga, natu yelife Ombibeli monghedi i shii okuudiwako. Omuudifi ha pondola oha yandje ouyelele monghedi i li paunafangwa, ya yela noi li paushili. Ngeenge otwa ningi ngaho, ohatu ka dula okuhonga monghedi i shii okuudiwako. Henuka okuyandja ouyelele inau pumbiwa. Inatu pumbwa okuyelifa oshitwa keshe shomushangwa oo hatu lesha, ndele natu yandje ashike elitulemo kouyelele oo wa fimana notau yelifa oshinima osho tashi kundafanwa. Omukonakoni ota ka uda ko oshili yomishangwa moule eshi ta ende ta ningi exumokomesho. — Heb. 5:13, 14.
10. Oshike hashi ufa kutya omuudifi oku na okukonakona outendo vangapi nomukonakonimbibeli?
10 Otu na okukonakona outendo vangapi pekonakono keshe? Osho otashi pula eendunge dokuyoolola. Okudula nosho yo eenghalo domukonakoni nodomuudifi ohadi kala da yooloka, ndele otu na alushe okudimbuluka kutya elalakano letu tu li ovahongi olo okukwafela omukonakoni a kale e na eitavelo la pama. Onghee hano, otu na oku mu pa efimbo la wana lokulesha, lokuuda ko nosho yo lokutambula ko oshili oyo i li mEendjovo daKalunga. Katu na okukonakona outendo vahapu ngeenge omukonakoni oha ende kanini okuuda ko. Ndele ngeenge omukonakoni okwa uda ko oshitwa shonhumba, inda kokatendo ka landula ko. — Kol. 2:6, 7.
11. Oshike hatu lihongo monghedi yokuhonga yomuyapostoli Paulus?
11 Omuyapostoli Paulus okwa li ha udifa monghedi i li paunafangwa ngeenge a li ta udifile ovanhu ovo vape. Nonande okwa li omuhongwanhu, ka li ha longifa omatumbulo madjuu okuudiwa ko. (Lesha 1 Ovakorinto 2:1, 2.) Oshili yopamishangwa i li paunafangwa ohai hokwifa nohai mbilipaleke ovanamitimadiwa. Omunhu ina pumbwa okukala omuhongwanhu opo a ude ko oshili. — Mat. 11:25; Oil. 4:13; 1 Kor. 1:26, 27.
Kwafela ovakonakoni va kale va lenga osho tave lihongo
12, 13. Oshike tashi dulu okulinyengifa omukonakonimbibeli a tule moilonga osho te lihongo? Shi yelifa.
12 Opo okuhonga kwetu ku pondole, oku na okukala taku kumu omutima womukonakoni. Omukonakoni oku na okuuda ko nghee ta dulu okutula moilonga ouyelele paumwene, nghee ta dulu okumona ouwa nosho yo nghee onghalamwenyo yaye tai dulu okulunduluka ngeenge okwa dulika kewiliko lopamishangwa. — Jes. 48:17, 18.
13 Pashihopaenenwa, otashi dulika hatu konakona Ovaheberi 10:24, 25 (OB-1986), ovo tava ladipike Ovakriste va kale hava ongala pamwe novaitaveli vakwao opo va twaafane omukumo pamhepo nova hafele eendafano lopahole. Ngeenge omukonakoni ihe uya natango kokwoongala, ohatu dulu oku mu yelifila pauxupi nghee okwoongala haku ningwa nosho yo osho hashi kundafanwa po. Ohatu dulu oku mu lombwela kutya okwoongala oku li oshitukulwa shokulongela Kalunga kwetu nonokutya ohaku tu etele ouwa pauhandimwe. Opo nee ohatu dulu oku mu shiva e uye kokwoongala. Omukonakoni oku na okudulika komafinamhango Ombibeli molwaashi a hala okuhafifa Jehova, ndele hamolwaashi a hala okuhafifa omuudifi oo ta konakona naye. — Gal. 6:4, 5.
14, 15. (a) Omukonakonimbibeli ota dulu okulihonga shike shi na sha naJehova? (b) Ongahelipi omukonakonimbibeli ta dulu okumona ouwa mokushiiva omaukwatya aKalunga?
14 Okukonakona Ombibeli nokutula moilonga omafinamhango ayo ohaku kwafele ovakonakonimbibeli va shiive Jehova nokukala ve mu hole e li omunhu. (Jes. 42:8) Jehova ke fi ashike Tate omunahole nosho yo Omushiti nOmwene weshito alishe, ndele oha hololele yo ovo tave mu longele nove mu hole eenghono daye nosho yo omaukwatya amwe e lili. (Lesha Exodus 34:6, 7.) Eshi Moses a li e li pokupitifa mo Ovaisrael moupika waEgipti, Jehova okwa li e mu lihololela a ti: “Ame ohandi ka kala osho handi ka kala.” (Ex. 3:13-15, NW) Osho okwa li tashi ulike kutya Jehova ota ka ninga keshe osho sha pumbiwa opo a wanife po omalalakano aye e na sha noshiwana shaye oshihoololwa. Kungaho, Ovaisrael ova li va shiiva onghandangala oyo Jehova ta dana e li Omuxupifi, Ofule, Omuyandji nOmuwanifi womaudaneko nokwa li yo e va kwafela meenghedi dimwe. — Ex. 15:2, 3; 16:2-5; Jos. 23:14.
15 Ovakonakoni vetu otashi dulika itava ka kwafelwa kuJehova pashikumwifilonga monghalamwenyo yavo ngaashi Moses. Ndele nande ongaho, ovakonakoni vetu otava dulu okukala ve na eitavelo la pama nosho yo olupandu linene li na sha naasho tave lihongo. Otava ka mona yo kutya ova pumbwa okulineekela Jehova e va pe ouladi, ounongo nosho yo ewiliko eshi tava tula moilonga osho tave lihongo. Mokuninga ngaho, otava ka shiiva yo kutya Jehova oku li Omuyandjimayele nOmwaameni omunaendunge noku shii okulineekelwa noha yandje nehalo liwa. — Eps. 55:23; 63:8; Omayel. 3:5, 6.
Kala u na ohokwe novanhu
16. Omolwashike inatu pumbwa lela okukala tu na ounghulungu wopaushitwe opo tu pondole mokuudifa kwetu?
16 Ngeenge ou wete kutya ku na lela ounghulungu wokuhonga wopaushitwe, ino teka omukumo. Jehova naJesus ovo tava pashukile oilonga yokuudifa oyo tai longwa mounyuni aushe kunena. (Oil. 1:7, 8; Eh. 14:6) Otava dulu okunangeka noupuna eenghendabala detu opo osho hatu popi shi dule okuhanga omitima dovanamitimadiwa. (Joh. 6:44) Ngeenge omuudifi okuhole shili ovakonakoni vaye, otashi ke mu kwafela a pondole nonande ke na ounghulungu wopaushitwe. Omuyapostoli Paulus okwa li e shii kutya osha fimana okukala e hole ovanhu ovo a li ta hongo. — Lesha 1 Ovatessaloniki 2:7, 8.
17. Ongahelipi hatu dulu okuulika kutya otu na shili ohokwe nomukonakoni?
17 Ohatu dulu yo okuulika kutya otu na ohokwe shili nomukonakonimbibeli mokukala hatu longifa efimbo tu mu shiive nawa. Nopehe na omalimbililo, ohatu ka shiiva nawa eenghalo daye, ofimbo hatu kundafana kombinga yomafinamhango opamishangwa. Otashi dulika tu didilike kutya ota tula nale moilonga oinima imwe oyo e lihonga okudja mOmbibeli. Ndele otashi dulika a pumbwa okuninga natango omalunduluko moinima imwe. Ngeenge otwa kwafele pahole omukonakoni a mone nghee ouyelele oo te lihongo pefimbo lekonakonombibeli ta dulu oku u tula moilonga paumwene, ota ka dula okuninga omuhongwa washili waKristus.
18. Omolwashike sha fimana okwiilikana pamwe novakonakoni vetu noku va tumbula momailikano?
18 Osha fimanenena yo okwiilikana pamwe nomukonakoni wetu noku mu tumbula meilikano. Omukonakoni na kale e wete kutya otwa hala oku mu kwafela a shiive nawa Omushiti nokweehene popepi elela naYe noku mone ouwa mewiliko olo ta yandje. (Lesha Epsalme 25:4, 5.) Ngeenge hatu ilikana kuJehova a kwafele omukonakoni a dule okutula moilonga osho te lihongo, ota ka mona kutya osha fimana okukala ‘omuwanifi weendjovo.’ (Jak. 1:22) Eshi omukonakoni ta pwilikine komailikano etu taa di komutima, ote lihongo yo nghee e na okukala ha ilikana. Kashihafifa tuu okukwafela ovakonakonimbibeli va kale ve na ekwatafano naJehova!
19. Oshike tashi ka kundafanwa moshitukulwa tashi landula?
19 Otashi tu omukumo okushiiva kutya Eendombwedi di dule pomamiliyona ahamano netata mounyuni aushe otadi longifa ‘ounghulungu wokuhonga’ mokukwafela ovanamitimadiwa va diinine oinima aishe oyo Jesus a popya. Oilonga yokuudifa ya tya ngaho oya eta oidjemo ilipi? Ohatu ka mona enyamukulo lepulo olo moshitukulwa tashi landula.
Oto dimbuluka?
• Omolwashike Ovakriste va pumbwa okukulika ‘ounghulungu wokuhonga’?
• Eenghedi dilipi tadi dulu oku tu kwafela tu pondole filufilu mokuhonga vamwe?
• Oshike tashi dulu oku tu kwafela tu pondole moukalele nonande katu na ounghulungu wokuhonga wopaushitwe?
[Efano pepandja 13]
Owe lishangifa ngoo mOfikola yOukalele woPauteokratika?
[Efano pepandja 15]
Omolwashike sha fimana okupula omukonakoni wetu a leshe omishangwa mOmbibeli?
[Efano pepandja 16]
Kala ho ilikana pamwe nomukonakoni woye noku mu tumbula momailikano