Kwafela vamwe va dulike kwaasho Ombibeli tai hongo
“Odo domedu liwa ovovo tava kwatele eendjovo ve di uda momitima diwa di he noihelele, ndee otava imi oiimati moudiinini.” — LUKAS 8:15.
1, 2. (a) Embo Ombibeli otai hongo lela shike? ola nuninwa shike? (b) Jehova okwa nangeka noupuna ngahelipi eenghendabala dovapiya vaye dokuninga ovanhu ovahongwa omido opo da di ko?
ONDOMBWEDI yaJehova imwe oyo i li omukokolindjila wondjikilile oya popya shi na sha nembo Ombibeli otai hongo lela shike? a ya ti: “Embo eli oliwa neenghono. Ovakonakonimbibeli vange ove li hole, ndele naame mwene ondi li hole. Ole shi ninga shipu okuhovela omakonakonombibeli novanhu.” Omuudifi umwe wOuhamba omunamido okwa popya yo shi na sha nembo olo a ti: “Nonande onda kala handi hafele okukwafela ovanhu vahapu va shiive Jehova oule womido 50 odo nda kala nde lipyakidila moukalele, inandi mona nale embo lihokwifa la fa eli. Oli na omafaneko a twa nosho yo omafano mahokwifa.” Mbela naave osho u udite ngaho shi na sha nembo Ombibeli otai hongo? Oshikwafifo shokukonakona Ombibeli osho osha nuninwa oku tu kwafela tu wanife po elombwelo laJesus, olo tali ti: “Indeni hano ka ningeni ovanhu aveshe ovalongwa vange, . . . noku va longa okudiinina aishe ei nde i mu lombwela.” — Mateus 28:19, 20.
2 Nopehe na omalimbililo, ohashi hafifa omutima waJehova ngeenge ta tale Eendombwedi daye omamiliyona 6,6 tadi dulika nehalo liwa kelombwelo laJesus li na sha nokuninga ovanhu ovahongwa. (Omayeletumbulo 27:11) Oshi liwetikile kutya Jehova ota nangeke noupuna eenghendabala davo. Pashihopaenenwa, momudo woilonga 2005, onghundana iwa oya kala tai udifwa moilongo 235, noupokati womakonakonombibeli e dulife po 6 061 500 okwa ningwa momudo oo. Oshidjemo, ovanhu vahapu ova ‘uda ondjovo yaKalunga nove i tambula ko, hangaashi ondjovo yovanhu, ndelenee ongaashi i li shili ondjovo yaKalunga.’ (1 Ovatessaloniki 2:13) Momukokomoko womido mbali da pita, ovahongwa vape ve dule petata lemiliyona ova lundulula onghedi yavo yokukalamwenyo opo va kale metwokumwe nomifikamhango daJehova nove mu liyapulila.
3. Omapulo elipi hatu ka konakona moshitukulwa eshi e na sha nokulongifa embo Ombibeli otai hongo?
3 Owa li mbela wa hafela okukonakona Ombibeli naumwe efimbo opo la di ko? Mounyuni aushe omu na natango oohandimwe ovo ve na ‘omitima diwa,’ ovo ngeenge va udu eendjovo daKalunga, tave ke di ‘kwatela momitima davo ndele tava imi oiimati moudiinini.’ (Lukas 8:11-15) Natu tale nghee hatu dulu okulongifa embo Ombibeli otai hongo moilonga yokuninga ovanhu ovahongwa. Ohatu ka konakoneni omapulo atatu aa taa landula apa: (1) Ongahelipi to dulu okuhovela ekonakonombibeli? (2) Eenghedi dokuhonga dilipi hadi pondola? (3) Ongahelipi to dulu okukwafela omukonakonimbibeli woye a ninge omuhongi wEendjovo daKalunga, Ombibeli?
Nghee to dulu okuhovela ekonakonombibeli
4. Omolwashike ovanhu vamwe tashi dulika va ongaonge okukonakona Ombibeli, nongahelipi to dulu oku va kwafela va finde eamo la tya ngaho?
4 Ngeenge owa lombwelwa u nuke okamulonga, otashi dulika u anye oku shi ninga. Ndele ngeenge omwa tulwa omamanya okulyatelela, otashi dulika u dimine okutauluka okamulonga oko. Sha faafana, omunhu oo e lipyakidila otashi dulika a ongaonge okutambula ko ekonakonombibeli. Otashi dulika a diladile kutya ekonakonombibeli otali ke mu pula efimbo lihapu nota ka pumbwa okuninga eenghendabala da mana mo. Ongahelipi to dulu oku mu kwafela a tambule ko ekonakonombibeli? Oto dulu okukala to mu talele po lwoikando to ningi eenghundafana di li pauxupi notadi hongo, to longifa embo Ombibeli otai hongo fiyo mwa hovela okukonakona Eendjovo daKalunga pandjikilile. Ngeenge oho lilongekida nawa, elishuneko keshe to ningi otali ka kala emanya lokulyatelela lopafaneko olo tali ka kwafela omuneumbo a ehene popepi naJehova.
5. Omolwashike wa pumbwa okulesha embo Ombibeli otai hongo?
5 Fimbo ino hovela okukwafela umwe a mone ouwa membo Ombibeli otai hongo, owa pumbwa oku li shiiva nawa. Mbela ove owe li lesha nale la pwa ko? Ovalihomboli vamwe ova li va hovela okulesha embo olo eshi va li tava fuwa po komunghulofuta fimbo va li mefudo. Fimbo va li pomunghulofuta oo, omukainhu umwe womoshitukulwa oo a li ta landifa oinima kovatalelipo okwa li e uya puvo ndele ta lesha nokukonenena oshipalanyole shembo Ombibeli otai hongo lela shike? Omukainhu oo okwa li a lombwela ovalihomboli ovo kutya eevili donhumba da pita okwa li ta ilikana kuKalunga e mu pe enyamukulo lepulo la fa olo. Ovalihomboli ova li va hafa oku mu pa embo Ombibeli otai hongo. Mbela oho ‘longifa efimbo’ mokulesha oshishangomwa osho, tashi dulika oshikando oshitivali nokuli, ofimbo wa teelela okuyakulwa ponhele yonhumba ile u li pokafudo koilonga ile kofikola? (Ovaefeso 5:15, 16) Ngeenge osho, oto ka shiiva nawa oshikwafifo shokukonakona Ombibeli osho notashi dulika yo shi ku kwafele u lombwele vamwe osho wa lesha.
6, 7. Ongahelipi to dulu okuhovela omakonakonombibeli to longifa embo Ombibeli otai hongo?
6 Ngeenge to yandje embo Ombibeli otai hongo moukalele womoipafi, longifa nawa omafano, omishangwa nosho yo omapulo oo e li pepandja eti-4 fiyo eti-6. Pashihopaenenwa, otashi dulika u hovele eenghundafana mokupula omunhu kutya: “Ngeenge hatu tale komaupyakadi oo a kundukida ovanhu kunena, mbela oto diladila kutya ope na odjo yonhumba i shii okulineekelwa oyo tai dulu oku tu kwafela tu ungaunge nomaupyakadi oo?” Konima eshi wa pwilikina nawa kenyamukulo laye, lesha 2 Timoteus 3:16, 17, ndele to yelifa kutya Ombibeli oi na ouyelele u na sha nanghee omaupyakadi ovanhu taa dulu okukandulwa po. Ulikila omuneumbo pepandja eti-4 neti-5, ndele to mu pula kutya: “Eshi to tale omafano oo e li pomapandja aa, onghalo ilipi mbela ye ku kenyeneka neenghono?” Ngeenge omuneumbo okwa ulike efano limwe, mu leshela omushangwa mOmbibeli yoye oo wa shaama nefano olo a ulika ofimbo e kwete embo. Natango, lesha epandja eti-6, ndele to pula omuneumbo kutya: “Eshi wa pwilikina komapulo ahamano oo e li pepandja apa, mbela owa hala enyamukulo kepulo lilipi?” Ngeenge omunhu okwa hoolola po epulo limwe, mu ulikila etukulwa omo ta ka hanga enyamukulo lepulo olo. Mu fiila embo ndele to ningi oshilaye u aluke vali mu uye mu kundafane kombinga yepulo laye.
7 Eetepo olo li li mokatendo ka tetekela li na sha nokuninga eenghundafana to longifa embo Ombibeli otai hongo otali dulu okuningwa oule wominute nhano lwaapo. Onghee hano, moule ashike wominute dinini, oto dulu okushiiva osho omuneumbo te lipula nasho, okulesha omishangwa mbali noku di yelifa nokuninga oshilaye u ninge elishuneko. Eenghundafana deni nomuneumbo di li pauxupi otadi dulu okukala etwomukumo nehekeleko linene kuye. Oshidjemo, otashi dulika omunhu oo e lipyakidila a kale a hala mu longife efimbo lihapu eshi to mu kwafele a hovele okweenda ‘mondjila oyo tai twala komwenyo.’ (Mateus 7:14) Eshi ohokwe yomuneumbo tai ende tai kulu, omwa pumbwa okuweda ko kefimbo olo hamu longifa mokukonakona. Opo nee otamu dulu okutula po efimbo lokondadalunde lokukonakona.
Eenghedi dokuhonga odo hadi pondola
8, 9. (a) Ongahelipi to dulu okukwafela omukonakoni woye a kondjife omashongo nomayeleko oo tashi dulika a shakeneke? (b) Openi hatu dulu okuhanga oitungifo ihai pi oyo hai tungu eitavelo la kola?
8 Luhapu ngeenge omunhu a hovele okudulika komahongo Ombibeli, oshi na oupu a hangwe komayeleko oo taa dulu oku mu imba a ninge exumokomesho. Omuyapostoli Paulus okwa ti: “Aveshe ovo va hala okukala metilokalunga muKristus Jesus, otava ka hepekwa.” (2 Timoteus 3:12) Paulus okwa faafanifa omayeleko oo nomundilo oo hau lungwinifa po oitungifo inai kola ndele ihau lungwinifa po oshingoli, oshisiliveli nosho yo omamanya ondilo. (1 Ovakorinto 3:10-13; 1 Petrus 1:6, 7) Opo omukonakonimbibeli woye a kulike omaukwatya oo taa dulu oku mu kwafela a finde omayeleko oo tashi dulika e mu hange, owa pumbwa oku mu kwafela mokutunga eitavelo laye noitungifo yopafaneko oyo ihai pi.
9 Omupsalme okwa faafanifa “Eendjovo dOmwene” ‘noshisiliveli tashi kungulukile poshi shiyela tashi vilima, sha yelifwa lu-7.’ (Epsalme 12:7) Osho otashi ulike kutya Ombibeli oi na oitungifo yondilo oyo tai dulu okulongifwa mokutunga eitavelo la kola. (Epsalme 19:8-12; Omayeletumbulo 2:1-6) Nomolwaasho, opa longekidwa embo Ombibeli otai hongo li ku kwafele u longife Omishangwa nomupondo opo u tunge eitavelo lomukonakoni woye.
10. Ongahelipi to dulu okukwafela omukonakoni woye a ude ko eityo lomishangwa dOmbibeli?
10 Ngeenge tamu konakona, kwafela omukonakoni woye a ude ko eityo lomishangwa dOmbibeli odo di li metukulwa olo tamu konakona noku di tule moilonga paumwene. Osho oto dulu oku shi ninga okupitila moku mu pula omapulo e na sha nomishangwa odo. Ndele kala wa lungama uha ningile omukonakoni woye omatokolo. Ponhele yaasho, landula oshihopaenenwa shaJesus. Pashihopaenenwa, omulumenhu umwe oo a li e shii nawa Omhango okwa li a pula Jesus omapulo, ndele Jesus okwa li e mu nyamukula a ti: “Momhango omwa shangwa ngahelipi? Oho lesha mo ngahelipi?” Omulumenhu oo okwa li a nyamukula omapulo aJesus okudja mOmishangwa, opo nee Jesus okwa li e mu kwafela a mone nghee ta dulu okutula moilonga omafinamhango oo pauhandimwe. Jesus okwa li yo a longifa efaneko opo a kwafele omulumenhu oo a mone nghee omahongo oo a li e na okunwefa mo onghalamwenyo yaye. (Lukas 10:25-37) Embo Ombibeli otai hongo oli na omafaneko mahapu e li paunafangwa oo hatu dulu okulongifa tu kwafele ovakonakonimbibeli va mone nghee ve na okutula moilonga omafinamhango Ombibeli pauhandimwe.
11. Omu na okukala hamu konakona shi fike peni pekonakono keshe?
11 Embo Ombibeli otai hongo ola shangwa monghedi i li paunafangwa noya yela opo li yelife Eendjovo daKalunga, ngaashi ashike Jesus a li ha yelifa oilihongomwa yomoule monghedi ipu okuudiwa ko. (Mateus 7:28, 29) Natu hopaenene Jesus ngeenge hatu hongo vamwe, mokukala hatu yandje ouyelele u li paushili, monghedi ya yela noi li paunafangwa. Ino endelela ashike okumana ko embo olo, ndele ponhele yaasho, eenghalo nokudula kwomukonakoni woye oyo nai ufe kutya otamu konakona outendo vangapi pekonakono keshe. Jesus okwa li e shii omangabeko ovahongwa vaye nokali he va ndubile ouyelele muhapu poshikando shimwe. — Johannes 16:12.
12. Oshiwedelwako oshi na okulongifwa ngahelipi?
12 Embo Ombibeli otai hongo oli na oshiwedelwako osho shi na oikundafanwa 14. Tokola kutya oto ka longifa ngahelipi oshiwedelwako osho, she likolelela keemhumbwe domukonakoni woye. Pashihopaenenwa, ngeenge omukonakoni woye ke udite ko nawa osho tamu konakona ile pamwe oku na omapulo e na sha noinima yokondadalunde oyo a li a itavela nale, oto dulu oku mu ulikila oshitukulwa tashi wapalele moshiwedelwako noku mu lombwela eshi konakone ye mwene. Ndele otashi dulika wa pumbwa okukonakona ouyelele oo pamwe nomukonakoni woye she likolelela kokudula kwaye. Oshiwedelwako oshi na oikundafanwa yopamishangwa ya fimana, ngaashi: “Oitya ‘omwenyo’ nosho yo ‘omhepo’ otai ti naanaa shike?” na “ ‘Babilon shinene’ oshike?” Otashi dulika wa pumbwa okukundafana oitwa oyo nomukonakoni woye ngeenge ou wete sha pumbiwa. Molwaashi moshiwedelwako kamu na omapulo oikundafanwa oyo, owa pumbwa okukala u shii nawa ouyelele oo u li mo opo u dule okupula omapulo taa ti sha.
13. Eilikano ohali dana onghandangala ilipi mokupameka eitavelo?
13 Epsalme 127:1, ola ti: “Omwene, ngenge haye [omudiki] weumbo, ovadiki valo otava kendabala oshimha.” Onghee hano, ngeenge to lilongekidile oku ka ninga ekonakonombibeli, ilikana kuJehova e ku kwafele. Ngeenge to ilikana pehovelo nosho yo pexulilo lekonakonombibeli, omailikano oye naa kale taa ulike kutya ou na ekwatafano lopofingo naJehova. Ladipika omukonakonimbibeli a kale ha ilikana kuJehova e mu pe ounongo wokuuda ko Eendjovo daYe noku mu pe eenghono a dule okutula moilonga omayele ado. (Jakob 1:5) Ngeenge omukonakoni okwa ningi ngaho, ota ka pamekwa a dule okulididimikila omayeleko nota ka twikila okukula pamhepo.
Kwafela omukonakonimbibeli a ninge omuhongi wEendjovo daKalunga
14. Ovakonakonimbibeli ova pumbwa okuninga exumokomesho lilipi?
14 Opo ovakonakonimbibeli vetu va diinine ‘aishe oyo’ Jesus a lombwela ovashikuli vaye, kave na ashike okukala ovakonakonimbibeli ndele ove na okuninga exumokomesho va ninge ovahongi vEendjovo daKalunga. (Mateus 28:19, 20; Oilonga 1:6-8) Mbela ou na okuninga shike opo u kwafele omukonakonimbibeli woye a ninge exumokomesho lopamhepo la tya ngaho?
15. Omolwashike u na okuladipika omukonakonimbibeli woye a kale hai kokwoongala kwopaKriste?
15 Mefiku olo ta mu hovele ekonakonombibeli, shiva omukonakoni woye a kale he uya kokwoongala kwopaKriste. Mu yelifila kutya pokwoongala opo hatu deulwa tu kale ovahongi vEendjovo daKalunga. Moule woivike yonhumba, kala ho longifa ominute dinini konima yekonakono keshe u yelifile omukonakoni woye kombinga yelandulafano lehongo lopamhepo olo hatu mono pokwoongala nosho yo poshoongalele keshe. Divilika kombinga yomauwa oo ho mono pokwoongala nosho yo poshoongalele keshe. (Ovaheberi 10:24, 25) Ngeenge omukonakoni okwa kala hai kokwoongala nopehe na okufaula, oshi na oupu a ninge omuhongi wEendjovo daKalunga.
16, 17. Omukonakonimbibeli ota dulu okulitulila po omalalakano elipi oo ta dulu okuhanga?
16 Kwafela omukonakonimbibeli woye e litulile po omalalakano oo ta dulu okuhanga. Pashihopaenenwa, mu ladipika a lombwele ookaume kaye ile ovapambele vaye kombinga yaasho te lihongo. Mu ladipika yo e litulile po elalakano lokulesha Ombibeli aishe. Ngeenge owe mu kwafele e litulile po elandulafano lokulesha Ombibeli pandjikilile noku li diinina, otashi ke mu kwafela yo nongeenge a ninginifwa. Kakele kaasho, omolwashike ito kwafele omukonakoni woye a dimbuluke nande omushangwa umwe oo tau nyamukula epulo la fimana metukulwa keshe lembo Ombibeli otai hongo? Mokuninga ngaho, omukonakonimbibeli ota ka ninga “omulongi ita fi ohoni oshilonga shaye, e shii okutukula nawa ondjovo yoshili.” — 2 Timoteus 2:15.
17 Ponhele yokuhonga omukonakoni woye a kale ashike e shii omishangwa momutwe, mu ladipika a kale ha yelifa nghee omishangwa dOmbibeli tadi yambidida oshikundafanwa ngeenge ta nyamukula ovo tave mu pula omapulo kombinga yeitavelo laye. Lideuleni pauxupi nomukonakoni woye shi na sha nanghee e na okupopila eitavelo laye, ove ngeno kala nee wa fa omupambele ile omunailonga pamwe naye oo te mu pula a yelife kombinga yeitavelo laye. Ngeenge omukonakonimbibeli ta yandje omanyamukulo, mu yelifila nghee e na okukala te shi ningi “nengungumano netilo [“nombili nosho yo nefimaneko,” OB-1986, ovelishe 16].” — 1 Petrus 3:15.
18. Ngeenge omukonakonimbibeli okwa wana okuninga omuudifi ina ninginifwa, ekwafo lilipi vali a pumbwa okupewa?
18 Mokweendelako kwefimbo, omukonakoni otashi dulika a kale a wana okuya moukalele, onghee hano, mu kwafela a mone kutya oshi li oufembanghenda okukufa ombinga moukalele. (2 Ovakorinto 4:1, 7) Ngeenge ovakulunhuongalo ova mono kutya omukonakoni woye okwa wana okuninga omuudifi ina ninginifwa, mu kwafela e lilongekide osho ta ka popya moukalele ndele ta mu ka longa pamwe naye. Kala ho longo pamwe naye meembinga doukalele di lili noku lili, noku mu honga nghee e na okulilongekidila omalishuneko noku a ninga monghedi tai pondola. Oshihopaenenwa shoye shiwa otashi ka eta oidjemo iwa. — Lukas 6:40.
“Lixupifa ove mwene naava tave ku pwilikine”
19, 20. Otu na okulitulila po elalakano lashike, nomolwashike?
19 Osha yela kutya kashipu okukwafela omunhu a “fike meshiivo loshili.” (1 Timoteus 2:4) Ndele oshihafifa neenghono okukwafela umwe a kale ha dulika kwaasho Ombibeli tai hongo. (1 Ovatessaloniki 2:19, 20) Kashi fi tuu oufembanghenda okukala tu li “ovalongi pamwe naKalunga” moilonga yokuhonga ovanhu mounyuni aushe! — 1 Ovakorinto 3:9.
20 Mafiku Jehova ota ka hanauna po ovanhu aveshe ovo ‘inave mu shiiva noihava dulika kevangeli lOmwene wetu Jesus.’ Ota ka longifa Jesus Kristus novaengeli vaye ovanaenghono mokuhanauna po ovanhu ovo. (2 Ovatessaloniki 1:6-8) Eemwenyo dovanhu odi li monghuwo i nonghambe. Mbela osho itashi ku linyengifa u kale ho konakona Ombibeli naumwe membo Ombibeli otai hongo lela shike? Eshi to kufa ombinga moshilonga shokuhonga vamwe, oto “lixupifa ove mwene naava tave ku pwilikine.” (1 Timoteus 4:16) Osha endelela neenghono shi dulife nale okukwafela ovanhu va dulike kwaasho Ombibeli tai hongo.
[Eshangelo lopedu]
a La nyanyangidwa kEendombwedi daJehova.
Owe lihonga shike?
• Embo Ombibeli otai hongo ola nuninwa shike?
• Ongahelipi to dulu okuhovela omakonakonombibeli to longifa embo Ombibeli otai hongo?
• Eenghedi dokuhonga dilipi hadi pondola?
• Ongahelipi to dulu okukwafela omukonakoni woye a ninge omuhongi wEendjovo daKalunga?
[Efano pepandja 11]
Mbela oho longifa nawa embo Ombibeli otai hongo?