Kala nokuhuma komeho wu li omuuvithi gwUukwaniilwa
1. Iiholelwa yini yomethelemumvo lyotango tayi ulike kutya otu na okuhuma komeho tu li aauvithi yUukwaniilwa?
1 Aakriste oye na okuhuma komeho ye li aauvithi yUukwaniilwa. Nomolwaashono Jesus a li a pe aalongwa ye edheulo tali tsikile miilonga yokuuvitha. (Luk. 9:1-5; 10:1-11) Sho osho wo molwaashoka Akula naPriskila ya yi naApollos kaandjawo e taye mu “longo noku mu yelithila nawalela ondjila yaKalunga.” (Iil. 18:24-26) Omolwetompelo olyo tuu ndyoka, Paulus okwa li a ladhipike omuuvithi Timoteus a tsikile okutula miilonga shoka ti ilongo, opo okuhuma kwe komeho “ku monike kwaayehe.” (1 Tim. 4:13-15) Kashi na nduno mbudhi kutya otwa longela Omuwa ethimbo li thike peni tu li aauvithi yonkundana ombwanawa, otwa pumbwa okutsikila okuhwepopaleka uunkulungu wetu wokuuvitha.
2. Ongiini tatu vulu okwiilonga kuyalwe?
2 Ilonga kuyalwe: Omukalo gumwe ngoka tatu vulu okuhwepopaleka uunkulungu wetu, omokwiilonga kuyalwe. (Omayel. 27:17) Onkee ano, kala ho gandja eitulomo uuna aauvithi ooyakweni taya ningi omafalomo gawo. Kala ho pula omaetopo gokondandalunde kaauvithi mboka ya pyokoka, e to pulakene nawa shoka taya ti. (Omayel. 1:5) Mbela oho kala kuu shi nkene wu na okuninga eishunoko, okutameka ekonakonombiimbeli nenge okukutha ombinga moombinga dhilwe dhuukalele? Katuka onkatu tango, e to pula omutonateli gwongundu yeni nenge omuuvithi ngoka a pyokoka. Dhimbulukwa wo kutya, ombepo yaJehova otayi vulu oku ku kwathela, onkee ano, kala ho pula pandjigilile megalikano wu yi pewe.— Luk. 11:13.
3. Otu na okwiinyenga ngiini ngele otwa pewa eetopo, tashi vulika momukalo ngoka inaa tu panda?
3 Ngele owa pewa eetopo lyaampoka wa pumbwa okuhwepopala, ino geya nokuli nando owe li pewa momukalo inoo gu panda. (Omuuv. 7:9) Ngaashi Apollos, kala ho taamba ko ekwatho neifupipiko nonolupandu. Moku shi ninga oto ku ulika uunongo.— Omayel. 12:15.
4. Jesus okwe tu pa etompelo lyomungunda lini lyokuhuma komeho tu li aauvithi?
4 Ehumokomeho ohali simanekitha Kalunga: Mokulongitha omathaneko, Jesus okwa li a ladhipike aalanduli ye ya ninge ehumokomeho ye li aauvithi yUukwaniilwa. Okwiiyelekanitha nomuviinu naalanduli ye aagwayekwa okwe ya yelekanitha niitayi. Okwa ti kutya Tate ota opaleke kehe oshitayi shoka tashi imi, ‘shi ime iiyimati oyindji.’ (Joh. 15:2) Ngaashi owala mwene gweyana ha kala a halelela iitayi yomandjembele yi ime omandjembele ogendji, Jehova okwa hala tu tsikile okwiimika “iiyimati yomilungu” dhetu. (Heb 13:15, OB-1954) Oshizemo oshiwanawa otashi ka kala shini ngele ohatu ningi ehumokomeho tu li aauvithi yUukwaniilwa? Jesus okwe tu pa eyamukulo a ti: “Osho ngeyi Tate ota simanekithwa, ne ngele tamu imi iiyimati oyindji.”— Joh. 15:8.