Kala to gandja eitulomo kokuninga aantu aalongwa
1. Aantu oya pumbwa okuninga shike, opo ya ka hupithwe?
1 Olopota yiilonga yokomumvo yomo 2014 otayi ulike kutya oshigwana shaKalunga osha longa nuulaadhi, nosha tokola toko okuuvitha onkundana ombwanawa yUukwaniilwa waKalunga. (Mat. 24:14) Otu uvithila aantu oyendji etumwalaka lyOmbiimbeli inaashi monika nando onale. Omomikalo dhini mbela? Omokuuvitha egumbo negumbo, mokuninga iikonga yi ikalekelwa, mokugandja uufo uushona nowehiyo, mwa kwatelwa okugandja uunzapo womontaneho. Ihe opo aantu ya hupithwe, otu na oku ya kwathela ya konakone Ombiimbeli noya ninge aalongwa yaJesus. — 1 Tim. 2:4.
2. Omapulo geni tu na okwiipula ngoka tage ke tu kwathela tu kale hatu ningi oonkambadhala dhokutameka ekonakonombiimbeli nagumwe?
2 Kala aluhe wa hala okutameka naantu ekonakonombiimbeli: Uuna gumwe tu ulike ohokwe, mbela oho kambadhala ngaa oku mu pula kutya oto vulu oku mu mona ngiini? Oho shuna ko ngaa nziya, opo mu tameke ekonakonombiimbeli? Uunake wi ihula okuulukila omuntu nkene ekonakonombiimbeli hali ningwa petalelopo lyotango? Owu ulukila ngaa nale aaniilonga ooyakweni, aanasikola ooyakweni, aashiinda, aapambele nayalwe mboka wu shi uuvidio ngaashi Omolwashike wa pumbwa okukonakona Ombiimbeli? nosho wo Mbela Ombiimbeli ohayi konakonwa ngiini? Uuna wu li poshitaafula shiileshomwa, oho kambadhala ngaa wu lombwele mboka taya kutha uumbo kutya oto vulu okukonakona nayo Ombiimbeli oshali to longitha uumbo mboka?
3. Opo tu pondole mokulonga aantu oshili, otwa pumbwa okuninga shike?
3 Ekwatho okuza kuJehova naJesus: Jesus sho a gandja elombwelo ‘lyokuninga aantu aalongwa’ okwa li a tameke noohapu tadhi ti: “Indeni ano.” Oohapu ndhoka otadhi ulike kutya otwa pumbwa okuninga oonkambadhala nokukala tu na ohokwe yokukwathela omuntu a konakone Ombiimbeli. Ihe nonando ongaaka, ine tu etha owala, oku uvaneke kutya oku li pamwe natse. (Mat. 28:19, 20) Shimwe ishewe, Jehova okwe tu pa ombepo ye ondjapuki nosho wo iilongitho nedheulo ndyoka twa pumbwa, opo tu vule okulonga aantu oshili. (Sak. 4:6; 2 Kor. 4:7) Otatu vulu okugalikana Jehova e tu pe “ehalo noonkondo” tu longe iilonga mbyoka ya simana. — Fil. 2:13.
4. Omolwashike tu na okukala tatu gandja eitulomo kokuninga aantu aalongwa?
4 Okuuvitha onkundana ombwanawa ohaku tu uvitha nawa. Ihe ohatu kala twa nyanyukwa noonkondo ngele tatu longo omuntu oshili noku mu kwathela e ende pamwe natse ‘mondjila ndjoka tayi fala komwenyo.’ (Mat. 7:14; 1 Tes. 2:19, 20) Osha simana noonkondo okugandja eitulomo kokuninga aantu aalongwa. Shoka ohashi nyanyudha wo Jehova ngoka ‘inaa hala ku kale nando ogumwe ta geelwa, ihe okwa hala aantu ayehe ye ethe uulunde.’ — 2 Pet. 3:9.